ثقافة الشعب المصري في إختيار سياراته

[Abo_Mazen]

من خلال متابعتي للمنتدى فتره ..ومن خلال معرفتي بناس كتيييير عندهم عربيات ..قدرت أكون فكره عامه عن ثقافة الشعب بتاعنا في إختيار العربية المناسبة ليه ..وده طبعا مش عيب ولا حرام ..لإن أي شعب ليه ثقافته الخاصه بيه في إختيار السيارة الخاصه بيه ..يعني مثلا وعلى سبيل المثال في السعوديه مثلا ..تلاقيهم يحبوا العربيات الكبيره والواسعه جدا ..مش مهم موديل سنة كام ولا إستهلاكها في البنزين إيه ..لكن أهم حاجه تكون مركب ماشيه على الأرض ..وعشان كده تلاقي عندهم الكابريس موديل 82 ماشيه عندهم عادي جدا لغاية النهارده ..هي صحيح تعتبر من غير فلوس ..بس برضه ثقافة الشعب هي اللي خلت العربيه دي ماشيه لغاية النهارده عندهم ..عندنا هنا بقى في مصر ..وده طبعا بحكم إني مصري وشفت في مصر أكتر من بره ..فأنا هتكلم عن مصر ..فيه شوية حاجات بتخلي المصري يختار عربيه معينة دونا عن عربيه تانيه ..والحاجات دي ثابته تقريبا ما بتتغيرش ..زي مثلا ..

سعر إعادة البيع ...
ودي بصراحه من الحاجات الغريبه قوي في طريقة إختيارنا للسيارة ..إنك تفكر في بيعها قبل أصلا ما تشتريها ..يعني أنا بدور على عربيه ..قبل أصلا ما أشتريها وقبل أصلا ما تكون من نصيبي ويا عالم هلاقيها أصلا ولا لأ بفكر هشتريها بكام وهبيعها بكام ..حتى تلاقي الكلمة ا لمشهوره ..ياعم لو حبيت تبيع هتبيع وإنت حاطط رجل على رجل ..وكأن المصري مننا ما هو إلا تاجر كده صغير ما نفسه ..بيشتري ويبيع بين عشية وضحاها

سهولة توافر قطع الغيار ..
ودي بصراحه أنا شايف إن مش عيب إن الواحد يخليها من المعايير اللي بيحدد بناء عليه العربية اللي هيركبها ..ما هو أكيد الواحد مش هيشتري عربيه عشان يكرهها ويكره نفسه عشان يلاقي ليها مسمار مثلا ..مع إن المعيار ده مش موجود في حتت كتير أو عند شعوب كتير ..بس ده يعتبر من المعايير المهمة جدا عندنا ..ويمكن ده اللي خلي عربيات إختفت من العالم كله إلا إنها لسه موجوده عندنا وليها قيمة ..زي مثلا ال 128 واللادا على سبيل المثال لا الحصر ..وأعتقد إن التوكيلات برضه سبب في إنتشار الثقافه دي بيننا

سهولة الصيانة ..
ودي بصراحه برضه أنا شايف إن مش عيب إن الواحد يخليها من المعايير اللي بيحدد بناء عليه العربية اللي هيركبها ..وللأسف ..أنا شايف إن المعيار ده مهم على الأقل في بلدنا عشان ضعف التوكيلات ..ووجود مشاكل في خدمات ما بعد البيع ..يعني مثلا في دولة زي السعودية ..معلش أنا بتكلم عن السعودية كتير في أمثلتي وده لإني كنت قاعد هناك فتره ..فمثلا في دولة زي السعوديه ما بتلاقيش المعيار ده موجود عندهم ..لإن هناك التوكيلات بتغطي وبتقدم خدمه مش هقول إنها ترقى للمستوى النموذجي ..لكن على الأقل هقول المستوى المطلوب ..عشان كده في بلدنا لازم المعيار ده يكون من ضمن حساباتنا

توفيرها للوقود ..
والسبب في المعيار ده بقى بالذات الحالة الإقتصادية للشعب المصري ..ودي بصراحه أنا مش هقدر أتكلم فيها ..لإن ده معيار بيفرض نفسه فرض ..وما ينفعش أصلا أقول يعني عندك في السعودية مثلا أو عندك في امريكا على سبيل المثال ..فده أنا مش هقدر أتكلم فيه

العربية على كبالن ..
والحته دي بقى بتاعة الناس القديمه بصراحه ..يقولك يا عم لأ ..دي عربية ضعيفه ..طب ليه ياعم؟ ..
-يقولك عربيه على كبالن ..
*طيب يا عم ما كل العربيات بتاعة النهارده على كبالن ..
-يقولك لأ ..ما في عربيات حديثه زي موديلات كتير في المرسيدس وزي موديلات كتير في البي إم مش على كبالن ..موضوع الكبالن ده أصلا نظام فاشل في أنظمة التعليق

مع إن نظام الكبالن ده أصلا هو النظام العام السائد المتبع في سيارات الركوب ..وده طبعا ليه أسباب إقتصاديه تخص المصنعين نفسهم ..

المكنة زهر مش المونيوم ...
ودي بقى ما تسمعهاش غير من الناس اللي فاهمه في العربيات بس على قديمه ..يعني الناس القديمه اللي فاهمه في العربيات ..يقولك المكنه دي زهر ..كويسه ..تتحمل معاك الحراره ..والمكنه دي المونيوم ..ضعيفه ..تجيب جوان علطول ولو فتحت معاك في الحرارة مش هتقفل بقها ..مع إن المحركات الألومنيوم أصبحت برضه إتجاه عام ..وده طبعا لخفة وزنها وسرعة ال exchange heating وده بيخليه ما يتسهلكش بنزين كتير ولتحملة الصدمات والصرعات الداخلية اللي بتحصل في المحرك ..وطبعا لقلة إنبعاثاته الضاره ..يعني في شوية حاجات كده خلت شركات تصنيع المحركات في العالم تتجه إتجاه عام للمحركات الألمونيوم ..بس برضه ..المحرك الزهر كويس ..والألومنيوم وحش


العربية دي تلاتة سلندر ..يعني بتزحف وهي ماشيه..
ودي برضه من الحاجات اللي ما زالت عالقه داخل أذهانا إحنا وبس ..خلاص ..الإتجاه العام برضه دلوقتي للمحركات التلاتة سلندر ..وخاصة بعد إستخدام تكنيك التربو على نطاق واسع ..ياراجل دي سوزوكي عامله عربية إسمها Suzuki alto Sr turbo charger العربية دي تلاتة سلندر 600 سي سي ...تخيل 600 سي سي ..وشركة سوزوكي اليابان بتقول إن العربيه دي مع التربو بتعطيك عزم عربية 900 سي سي تقريبا ...وكان في موديل من موديلات بي إم مش فاكره بصراحه ..كان نازل أربعه سلندر ..قامت الشركة ساحباه ومنزله مكانه محرك تاني تلاتة سلندر تربو ..يعني حكاية إن المحرك التلاتة سلندر ده فاشل ..خلالالالاص ..بقت بلغتنا كده ...كلمة قديمه قوي

العربية دي خفيفة قوي خلي بالك ..عشان كده بتقلب بسهولة ...
ودي برضه من الحاجات اللي بتخليني أقول إن إحنا عمرنا ما هنحكم على الحاجه بالعلم ..وهنفضل نحكم على الحاجه بالدراع وبالتقل بتاعها ..النهارده أصلا عشان تقدر تحقق معادلات معينة في الإيروديناميك لازم تكون العربية خفيفة ..تصدق بقى!!! ..العربيات التقيلة في الوزن بيكون التحكم فيها أصعب على السرعات العالية لإنك ما بتستفيدش بالهوا اللي بيسبب خلل في إتزان العربية ..يعني من الآخر كده اللي بيعمل خلل في إتزان العربية على السرعات العالية هو الهوا ..تخيل بقى لما تكون العربية خفيفة تقدر تستفيد من الهوا ده في الحفاظ على إتزان العربية ..



دي كده شوية حاجات جات على بالي وقلت أحصرها في موضوع واحد لجمع الأراء حول إذا كانت الحاجات دي صح ..ولا مبالغ فيها ؟؟؟

[hilal]

ما شاء الله موضوع ممتاز
وكان يستحق عمل استطلاع راي في القسم العام ليشارك فيه عدد اكبر
وان كنت اختلف مع سيادتك من حيث اعتراضك على سعر اعادة البيع كمعيار
تحياتي

[بحار]

شكرا لحضرتك موضوع مهم ومفيد .. انا رأيي ان الأحكام دون علم او درايه من ناس كتير هيا اللى بتكون رأى عام او قاعده خطأ عن كل حاجه مش السيارات فقط ..
وفى السيارات نتيجه انتشار المستعمل بسبب الوضع الاقتصادى ممكن واحد يقع فى عربيه تعبانه تعقده من الماركة دى وينشر تجربه سلبيه عنها
برغم انها ممكن يكون عمرها الافتراضى انتهى وعملت اللى عليها وزياده .. تحياتى لك .

[Abo_Mazen]

ما شاء الله موضوع ممتاز
وكان يستحق عمل استطلاع راي في القسم العام ليشارك فيه عدد اكبر
وان كنت اختلف مع سيادتك من حيث اعتراضك على سعر اعادة البيع كمعيار
تحياتي

ما حضرتك المشكلة إن كل معيار من المعايير دي بتيجي على حساب حاجه تانيه الواحد بيكون فعلا محتاجها في عربيته ..بس بيضطر يتنازل عشان المعيار ده يتحقق وما يختلش

على سبيل المثال ..
واحد نفسه يركب عربيه شيك وشكلها حلو ..بس أهو ..إشترى اللادا عشان يعرف يبيعها لما يفكر ببيع ..طيب يا عم ما بفلوس اللادا كان ممكن تجيب عربيه شكلها حلو ..أنا مش حاضرني حاجات شكلها حلو في نفس الفئه السعرية بتاعة اللادا ..بس هو نفسه وعاوز يركب عربيه شكلها حلو ..بس هو فكر في اللادا عشان لما يفكر يبيع يعرف يبيع ..يبقى إتنازل عن مطلب من متطلباته عشان خاطر معيار معين هو عايز يحققه ..على فكره الكلام ده شفته هنا في المنتدى ..في ناس عجباها عربيه معينة ..ومقتنع بيها جدا ..بس في عربيه تانيه بيعها أحسن وليها سوق ..بتنازل عن العربية اللي عجباه عشان خاطر يجيب عربيه يعرف ببيعها بعد كده ..طيب ده كلام برضه ؟؟؟!!!

[Abo_Mazen]

شكرا لحضرتك موضوع مهم ومفيد .. انا رأيي ان الأحكام دون علم او درايه من ناس كتير هيا اللى بتكون رأى عام او قاعده خطأ عن كل حاجه مش السيارات فقط ..
وفى السيارات نتيجه انتشار المستعمل بسبب الوضع الاقتصادى ممكن واحد يقع فى عربيه تعبانه تعقده من الماركة دى وينشر تجربه سلبيه عنها
برغم انها ممكن يكون عمرها الافتراضى انتهى وعملت اللى عليها وزياده .. تحياتى لك .

تصدق دي فعلا نقطه مهمة ..من أهم المعايير اللي بتكون ثقافتنا عن العربيات هي معلومات من الآخرين ..يعني تلاقي واحد مثلا كاره عربية معينة ..وهو عمره ما ركبها ..وكل فكرته عن العربية دي كونها من خلال تجربة واحد يعرفه

[fepsceasar]

اعادة البيع : يا سيدى وانت ضامن وانت راكب العربية ان لا انت ولا العربية يحصلكوا حاجة علشان تقول اعادة بيع.. وان كان السبب ممكن يكون ان العربية بالنسبة لنا تحويشة عمر مش سلعة استهلاكية زى باقى دول العالم
سهولة الصيانة: كلمة مطاطة للغاية لانك ممكن تجيب 128 لكن قطع غيار مضروبة وصنايعي تعبان يزهقوك وتبقى فعلا مبسوط ان اى حد بيشتغل فيها والحقيقة ان اى حد بيعك فيها .. كفاية تعرف الميكانيكية اللى بتشتغل فى عربيتك وتتعامل مع الكويسين فيهم ايا كان نوع عربيتك وبعدين كل العربيات فى ناس بتشتغل فيها واحيانا بيكونا فنيين ومهندسين سابقين او حاللين فى التوكيل وبيكونوا احسن من بتوع العربيات المشهورة او البياعة بلغة السوق اللى واخدنها بالدراع
توفير البنزين: فعلا معيا موضوعى قابل للقياس
زهر والمونيوم وكبالن وفيها كمبيوتر ازاى لحد سنة 2015 وواحد يقولك العربية دى بلاش منها اصل فيها كمبيوتر!! ده على العموم بيثبت اننا بنحكم بمعايير تنتمى لجيل مضى زى اللى كانوا بيقولوا من عشرين سنة اصل دى على كبالن مع ان ده الاتجاه العام وما حدش بيتكلم فى الموضوع ده دلوقتى دول بقى امتدادهم اللى لسة فى 2015 يقولك اصل فيها كمبيوتر وحساسات .. يا اخوانا الكلام ده ممكن فى التسعينيات مش دلوقتى
للاسف الثقافة دى سبب اننا حارمين نفسنا من عربيات محترمة علشان نمشى فى الصف ونتبع الثقافة السائدة

[مُصْطٓفٓى]

نسيت موضوع التوكيل
عربيات كتير رائعة وتوكيلها سئ

علو العربية عشان المطبات

صاجها ضعيف ولا ورق

دولة الصنع
ابعد عن الالماني قطع غياره غالية
خليك في الكوري قطع غياره رخيصة
اشتغالات

واسعة ولا ضيقة

اسم العربية
وده مرتبط بإعادة البيع
يعني هيونداي جراند اي تن فاضية من عوامل الأمان
احسن من سوزوكي سويفت اللي مظبطين عوامل الأمان فيها

كام سي سي

[ENG.MaRk]

تقرير ممتاز عن حالة الشعب اللي تفكيره غريب جداً ... للأسف الشعب المصري فقير فعلاً إلا فئة قليلة جداً و العربيات بالنسبالهم غالية ف اللي بياخد قرار إنه يشتري عربية ده يبقي بطل لأنه بيبقي دافع فيها ممكن جزء كبير من تحويشة عمره و اللي بيفكر في إعادة البيع ديه الفئة اللي بتحب تغير عربيات كتير كل سنتين أو 3 بالكتير علشان كدة بيبقي مش عايز يخسر ... التوكيلات مش بتوفر خدمة كاملة لأن العمال و المهندسين هناك (إلا فئة قليلة جداً) مش فاهمين حاجة فعلاً و أنا حزنت لما رحت توكيل Bavarian Auto و مش ده مستوي عمال BMW اللي اشتغلت معاهم و أشرفت عليهم في ألمانيا ... أكتر من صديق ليّ و بالذات في السعودية عملوا حوادث خرجوا منها بأعجوبة و العربيات كانت شبه total loss و لكن التأمين و التوكيل تكفل بكل حاجة و العربيات رجعت زي الفل و ده مش موجود في مصر و لو لا قدر الله عملت حادثة التأمين هيخنقك لحد ما تطلع منه بcompromise يرضيك ... البنزين برة رخيص لأنه عموماً يتبع قانون "العرض و الطلب" بدليل إن لتر ال91 ب 47 هللة بينما اللتر في مصر ب 2.60 جنيه ... خطأ فادح في الشعب المصري و هو إنه بيتكسف يقول "مش عارف" و لازم يفتي و ده بيسبب كارثة و نشر أفكار و معلومات خاطئة و فتي و بالتالي ممكن ثقافة واحد عن العربيات تلاقيها كلها معلومات خاطئة و مصمم ينشرها ... شركات العربيات بقي الtrend بتاعها هو استخدام مواتير صغيرة مع turbo charger و ده مش بمزاجهم إنما إجبار من الحكومات للحفاظ علي البيئة و تقليل الfuel consumption ... خلاصة الكلام الشعب المصري مقهور و مظلوم و صعبان عليّ جداً

[Abo_Mazen]

تقرير ممتاز عن حالة الشعب اللي تفكيره غريب جداً ... للأسف الشعب المصري فقير فعلاً إلا فئة قليلة جداً و العربيات بالنسبالهم غالية ف اللي بياخد قرار إنه يشتري عربية ده يبقي بطل لأنه بيبقي دافع فيها ممكن جزء كبير من تحويشة عمره و اللي بيفكر في إعادة البيع ديه الفئة اللي بتحب تغير عربيات كتير كل سنتين أو 3 بالكتير علشان كدة بيبقي مش عايز يخسر ... التوكيلات مش بتوفر خدمة كاملة لأن العمال و المهندسين هناك (إلا فئة قليلة جداً) مش فاهمين حاجة فعلاً و أنا حزنت لما رحت توكيل bavarian auto و مش ده مستوي عمال bmw اللي اشتغلت معاهم و أشرفت عليهم في ألمانيا ... أكتر من صديق ليّ و بالذات في السعودية عملوا حوادث خرجوا منها بأعجوبة و العربيات كانت شبه total loss و لكن التأمين و التوكيل تكفل بكل حاجة و العربيات رجعت زي الفل و ده مش موجود في مصر و لو لا قدر الله عملت حادثة التأمين هيخنقك لحد ما تطلع منه بcompromise يرضيك ... البنزين برة رخيص لأنه عموماً يتبع قانون "العرض و الطلب" بدليل إن لتر ال91 ب 47 هلله بينما اللتر في مصر ب 2.60 جنيه ... خطأ فادح في الشعب المصري و هو إنه بيتكسف يقول "مش عارف" و لازم يفتي و ده بيسبب كارثة و نشر أفكار و معلومات خاطئة و فتي و بالتالي ممكن ثقافة واحد عن العربيات تلاقيها كلها معلومات خاطئة و مصمم ينشرها ... شركات العربيات بقي الtrend بتاعها هو استخدام مواتير صغيرة مع turbo charger و ده مش بمزاجهم إنما إجبار من الحكومات للحفاظ علي البيئة و تقليل الfuel consumption ... خلاصة الكلام الشعب المصري مقهور و مظلوم و صعبان عليّ جداً

ما هو الشعب اللي حضرتك بتقول عليه ده مقهور ومظلوم وصعبان عليك ..لو يفتح دماغه شويه ...هتفرق معاه في حاجات كتيييير

[ENG.MaRk]

ما هو الشعب اللي حضرتك بتقول عليه ده مقهور ومظلوم وصعبان عليك ..لو يفتح دماغه شويه ...هتفرق معاه في حاجات كتيييير

الشعب مش بإيده الموضوع أكبر بكتير مما تتخيل ... أنا عندي اقتناع تام إن لو الشعب قاطع شراء العربيات لمدة 6 شهور هتلاقي العربيات سعرها نزل النص تقريباً و ديه هتبقي ضربة قاضية للجمارك و التجار و التوكيلات و كل حاجة مش شغالة في البلد بما يرضي الله ... لكن علشان تقنع شعب كامل إنه يعمل كدة ده شبه مستحيل

[Abo_Mazen]

الشعب مش بإيده الموضوع أكبر بكتير مما تتخيل ... أنا عندي اقتناع تام إن لو الشعب قاطع شراء العربيات لمدة 6 شهور هتلاقي العربيات سعرها نزل النص تقريباً و ديه هتبقي ضربة قاضية للجمارك و التجار و التوكيلات و كل حاجة مش شغالة في البلد بما يرضي الله ... لكن علشان تقنع شعب كامل إنه يعمل كدة ده شبه مستحيل

التوعية ياباشا ..التوعية ..آفة هذا المجتمع الجهل ..

[ENG.MaRk]

التوعية ياباشا ..التوعية ..آفة هذا المجتمع الجهل ..

بالضبط كدة الجهل آفة هذا المجتمع بس المشكلة إن الشعب بيفضل الكلام عن الفعل و ده اللي مأخرنا

[Abo_Mazen]

بالضبط كدة الجهل آفة هذا المجتمع بس المشكلة إن الشعب بيفضل الكلام عن الفعل و ده اللي مأخرنا

يا باشا ما هو المصري ده بتاع إحنا اللي دهنا الهوا دوكو

[مُصْطٓفٓى]

عندما تتغابي الدولة في فرض جمارك وضرائب على عوامل امان السيارات بدلا من دعمها او اشتراطها او حتى تحمل الدولة لتكلفة إضافتها
فلا ينكر احد ان الدولة تريد إبادة شعبها

[م أحمد]

يا ريت تعديل العنوان لسيارته الجديدة

علشان ثقافة اختيار القديم هتلاقى فيها الاعجب

تلاقى واحد ماشى بكبوت العربية و سقفها مكلحين و لونهم ضايع من الشمس و دا علشان تبقى ما رشتش