الشارع المضئ

[Samir Elshahawy]

السادة أعضاء نايل موتورز المحترمين

أسعد الله صباحكم ...

تعودنا في كل مواضيعنا و لقائاتنا ان نتحدث عن سلبيات الشارع و السلوكيات الخاطئة من مستخدميه و لكن في بعض الاحيان يأتي ذكر بعض المواقف الايجابية علي استحياء

لذا فكرت ان أفرد هذا الموضوع كي نتحدث عن الايجابيات فقط و المواقف و السلوكيات السوية علنا نقتدي بها و بدلا من ان تكون الايجابيات كومضات بالشارع المصري يصبح شارعنا كله الشارع المضئ

- مضئ بالايجابيات
- مضئ بالسلوكيات التي تنم عن تحضر ووعي

فليقص كل منا ما رأه في يومه من موقف ايجابي كي نستفيد منه و نقتدي به

و شكرا جزيلا علي حسن المشاركة

[نور القمر]

تصدق موضوع السلوكيات الايجابية فعلا نادرة
بس عندي قصه حصلت مرة مش ناسياها
مرة وانا رايحة المدرسة في شارع الهرم وما ادراك الهرم وزحمته خصوصا للي عايز يعدي الشارع بتكون ورطة حقيقيه
المهم كنا شوية كدة مش عارفين نعدي بسبب ان الكل مستعجل ومحدش عايز يهدي
راح اتوبيس غالبا كان نقل عام واقف بالورب وقفل الشارع علشان نعدي
بصراحة كانت حركة جدعنه منه ولو اني متأكدة وقتها ناس كتير اتضايقت من الحركة دي

هادعبس على مواقف تانية وراجعالك

[Samir Elshahawy]

حاجة غريبة جدا , خلاص الايجابيات اختفت من حياتنا , أكيد لو دورنا كده في الذاكرة هنلاقي حاجات , طيب اقولكم علي حاجة انا لسه كنت كاتب عن الحادثة اللي عملتها قبل رمضان بكام يوم و لولا ستر ربنا كانت العربية اتقلبت , لكن بعد ماوقفت لاقيت عربية لانسر ملاكي اسكندرية جت وقفت ورايا و نزل صاحبها يطمئن عليا و عرض مساعدته لي في تغيير فردة الكاوتش اللي ضربت و فضل واقف بعربيته ورايا قبل الملف مشغل الانتظار علشان العربيات اللي جاية تهدي و ماتلبسش فيا و مشي بعد ما بدأت انا اتحرك بالعربية

[Goodle]

متابع باهتمام
ولو لقيت حاجة هاقول اكيد :)

[Ayman_52]

مـــوضوع حلو جدا....الواحد بجد نفسه يسمع حاجات ايجابيه بقى....وانا بجد لو افتكرت اى حاجه هقولها على طول

موضوع مميز ...ومتــــــــــابع بأهتمــــــــــام

الف شكر ياباشا

[نور القمر]

امممممم تصدق بدأت افتكر حاجات كتير ايجابية
منساش حادثة فظيعه حصلت لزوج عمتي وعمتي واخوه و2 بيبهات بنات عمتي
كانو مسافرين الصعيد بعد 2 نص الليل
وكان معاهم مرسيدس وهو سواقته سريعه بجنون
العربية نزلت منه الابراهيمية وبيقول مكنش في ولا عربيه في الطريق
اخوه وعمتي كل واحد مسك بيبي ورفعه لفوق علشان العربية بدأت تغرق
وسبحان الله فجأة لقوا عربيات كتير وقفت ونزلوا انقذوهم والحمد لله
وجه مأمور بني سويف واستضافهم في بيته لحد الصبح
طبعا شنط الهدوم راحت وفلوسهم راحت اكيد كل ده فداهم
والمأمور وزوجته طبعا قاموا بالواجب معاهم وزيادة
واعتقد بقه في صداقة عائلية بعد كدة

[bee]

أحييك على موضوعك

رمضان الي فات ده كنت في المنصورة رايح للدكتور ومش لاقي مكان اركن فيه وفضلت الف الف .. وفي الاخر لقيت عسكري واقف قلتله انا عندي ميعاد م عالدكتور وبقالي ساعه بلف اعمل ايه دلوقتي ؟؟؟

خلاني ركنت تحت علامة ممنوع الوقوف وقالي ملكش دعوه انا مش بمشي قبل ساعتين :D

[Abohmaid]

الموضوع دة جامد جدا واشكرك على الفكرة الحلوة دى

انا بقى كنت راكب العربية ةةقفت فى اشارة العباسية فى اتجاة جامعة عين شمس وكان يوسف ابنى قاعد جنبى(6 سنوات) ونا كنت لابس الحزام وفجأة ظهر عقيد فى المرور وجة عند يوسف وقاللو انت مش لابس الحزام لية قلت علية العوض فى الرخص:k14:
قلتلة هوة بيحاول يلبس الحزام بس هوة بيخنقة قاللى يبقى يقعد ورا او يلبسة بطريق معينة وشرحها ليوسف وراح مطبطب عليو وفتحت الاشارة ومشينا

وكان تعليق يوسف( اية الضايط اللطيف دة ) وكل فترة يفتكرة ويقوللى انا نفسى اشوفة ..... وعجبى

[Samir Elshahawy]

انا بقى كنت راكب العربية ةةقفت فى اشارة العباسية فى اتجاة جامعة عين شمس وكان يوسف ابنى قاعد جنبى(6 سنوات) ونا كنت لابس الحزام وفجأة ظهر عقيد فى المرور وجة عند يوسف وقاللو انت مش لابس الحزام لية قلت علية العوض فى الرخص:k14:
قلتلة هوة بيحاول يلبس الحزام بس هوة بيخنقة قاللى يبقى يقعد ورا او يلبسة بطريق معينة وشرحها ليوسف وراح مطبطب عليو وفتحت الاشارة ومشينا

وكان تعليق يوسف( اية الضايط اللطيف دة ) وكل فترة يفتكرة ويقوللى انا نفسى اشوفة ..... وعجبى

انا اللي بأحييك و بأشكرك علي مشاركتك الجميلة و اللي أكدت لنا ان رجال المرور عندنا بخير طالما بيطبقوا القانون بروحه قبل نصوصه

[Mohd_Adel_Amin]

أنا مرة كنت بوصل والدي لمركز علاج طبيعي في المعادي علشان كان عنده انزلاق غضروفي وكان نايم على الكنبة ورا ..
لقيت لجنة في الطريق والأمين وقفني وقالي النمر مش واضحة ولسه هيكتب مخالفة لقيت الظابط جه وخد الرخص منه وقالي النمر مش واضحة ليه يا محمد ؟؟ قلتله انا مستلمها من المرور كده ومفضيتش ادهنها ..
قالي الف سلامة على الحج هو تعبان ؟
قلتله آه وانا رايح اوصله العيادة .
قالي طيب انا مش هعملك مخالفة بس أول ما تروح عايزك تدهن النمر علشان ممكن واحد غيري يغلس عليك ويعملك مخالفة , و خلي الحج يدعيلي , ورجعلي الرخص ثاني .

[نور القمر]

كان معايا من فترة 127 وكنت بمون وجيت خارجة العربية وقفت ومش راضيه تدور
بتوع النزينه مسألوش فيا يدوب زقوها شويه علشان يوسعوا لباقي العربيات

كان فيه عربيه معدية جنبي فيها شباب واحد نزل يزق معرفتش ادورها معاه
راح خلاني نزلت خالص وهو دورها واصحابه زقوا
حسيت انه انقذني لان اول مرة عربيه تقف مني وحسيت اني متورطة
فضلت مراعيه انها متبطلش تاني في السكة والحمد لله مبطلش غير على ناصية شارعنا واتصلت بقرايبي اتصرفوا فيها

[mahamedaraby]

اكيد طبعا فى حياه كل واحد فينا مواقف ايجابيه من ناس تانيه

بس انا مواقفى اللى حصلتى الايجابيه اللى فكرها مكنتش ليه علاقه بالشارع او المرور

واحب اقولك ان الموضوع جامد علشان بتفكر الواحد ان لسه الدنيا بخير

[moh_kamal67]

عزيزى المهندس SE_coralsea :
فى سنة 1988 كنا شباب صغير كل واحد فينا معاه عربية العيلة ولكن عند الخروج كنا كل 5 يتجمعوا فى عربية واحدة ، واحنا فى ميدان الحجاز امام الامن الصناعى لقينا عربية فيورا فيها شابتين العجلة نايمة ومحدش سائل فيهم ، نزلنا احنا الخمسة هات يارفع وتغيير وتنزيل فى دقائق ورجعنا مسرعين ركبنا العربية وكانوا الشابتين مذهولين لاننا لم ننطق كلمة (وكانوا لا بسين سواريه ومحتاسين ) ومشينا وهم منهالين شكر
اما هذا الصيف وانا راجع من الساحل الشمالى والعربية معملتش 4000 كم دخل مسمار قلاووظ كبير قوى حسيت بيه فى العجلة وكام كيلوا وانا على سرعة 80 انفجرت العجلة الخلفية يمين ، سبت العربية لما هدت ووقفت ، ساعة انفجارها كنت بتخطى عربية نص نقل 2.5 طن شاسيه طويل من اسكندرية ، وقفوا ونزلوا بسرعة عايز حاجة يابيه ، انا كان وشى اصفر قلت لهم انا موش قادر اغير العجلة لو سمحتم غيروهالى وهااحاسبكم نطوا 2 فى 5 دقائق كانوا مغيرينها واكتشفوا ان الفيرنا الصامولة بتبقى ماسكة الطاسة ، وحاولت اديلهم فلوس نهرونى وقالوا توصل بالسلامة ، وكان اصلا الطريق غريب على يمينك ملاحات وعلى شمالك بحر وكنت اول مرة امشى فيه
وهناك المزيد المرة القادمة

[Samir Elshahawy]

منذ عامين و عندما كنت حديث عهد بالقيادة و كنت عائدا الي منزلي بسيارتي الجديدة علي طريق السويس بسرعة اقل من السيارات الاخري التي كانت تتخطي من يميني فأردت أن افسح لهم الطريق و أن اسير في الحارة اليمني و فعلا اعطيت اشارة جهة اليمين و انتظرت ان تفسح السيارات القادمة من الخلف لي مجال و لكنها جميعا كانت مسرعة و راغبة في التخطي دون انتظار حتي جاءت سيارة لانوس اخري تقودها سيدة - نعم سيدة - فظلت تسير خلفي جهة اليمين حاجزة بذلك السيارات التي خلفها و أعطتني اشارة جهة اليسار ففهمت انها تريدني أن أغير حارتي و انها بذلك تعطيني الفرصة و انها شعرت بمدي الحيرة و الارتباك اللذان تملكاني امام سرعة من حولي و عدم مبالاتهم بالاشارة التي اعطيتها لهم , و فعلا غيرت الحارة كي أسير يمين الطريق بينما مرت هي من يساري و خلفها باقي السيارات

و منذ ذلك اليوم و أنا أفعل نفس الشئ مع كل من أجده مرتبكا حيث انتظر خلفه و اشغل اشارة الانتظار للسيارات الاخري من ورائي و امنح من أمامي الفرصة كي يتخذ يمين الطريق كي يسير علي مهل في أمان و ذلك كنوع من رد الجميل لتلك السيدة

[Samir Elshahawy]

في حاجة غريبة لاحظتها اليومين اللي فاتوا اثناء رحلتي الذهاب و العودة من و الي العمل الا و هي انه بالرغم من عدد السيارات المتزايد علي الطريق و التكدس المروري الا ان هناك حالة غريبة من التعاون من جميع سائقي السيارات و خاصة الملاكي

خير اللهم اجعله خير , فعلا وقت الذهاب او العودة انخفض الي 20 دقيقة بدلا من 45 دقيقة و الجميل ان ماحدش بيجري و لا بيعمل غرز الا في أضيق الحدود بل المدهش هو التزام الكثير من السيارات و علي الاخص - و دي بقي المفاجاة - الميكروباصات علي الخط ده بالحارات و الاشارات :k49:

مش بقول لكم حاجة غريبة ,
يارب ديمها نعمة و احفظها من الزوال ,
خايف اكون بأحلم :k27: