كلمتين لازم أقولهم عشان أنا جبت آخري بصراحه

[Abo_Mazen]

المبرراتي

شخصية موجوده في كل مكان وعلى كل المستويات ..

المبرراتي ..

دايما عنده تبرير لكل حاجه هو بيعملها ..سواء غلط أو صح ..تحسه والعياذ بالله بيستمد مبرراته من إبليس ذات نفسه ..معندوش مشكلة إنه يبرر أي حاجه ..أي حاجه ..لدرجة إنك تسمع منه مبررات عجيبه ..زي مثلا ..إنه معندوش مشكلة مراته تكلم زمايلها في الشغل ويكلموها في البيت ..أهو على الأقل يبقى الكلام قدامه ويبقى عارف أحسن ما تعمل كده من وراه ..أو زي مثلا ..إن ما ينفعش دولة زي مصر يتم حكمها حكم إسلامي عشان إحنا معانا غير مسلمين في البلد .... وهكذا ..

المشكلة بقى والمصيبه واللي خلاني أعمل الموضوع ده ..مش كل الكلام اللي أنا كاتبه فوق ده ..يا أخي قول اللي بيبرر ده هو حر ..ربنا هيحاسبه على حاجه هو عملها ..يبرر يحور يكذب ..أصل هو مش هيضحك على ربنا ..أو سبحانه وتعالى محدش يقدر يضلله

أومال المشكلة في مين ؟؟؟...

المشكلة في اللي بيبرر لغيره ..آه والله ..واحد بيبرر مصايب غيره ..يعني تلاقي واحد يعمل المصيبة وتلاقي معاه المبرراتيه يتوعه ..ده حتى هو ذات نفسه اللي عمل المصيبة مش بيبرر لنفسه وتلاقي في اللي بيبرر له ..

أشهر مبرراتيه ممكن نشوفهم في حياتنا ..اللي بيبرروا لرؤساءهم في العمل ..تلاقي المدير يعمل كل عمله والتانيه ..تلاقيه يظلم ده ..ويسرق ..ويعمل ..وتلاقي اللي بيبررله عمايله السوده ..تحت أي بند بقى ..تحت بند ..معلش أصله هو معذور ..والكلام هنا على المدير وبيكون على لسان اللي بيبرر ..معلش أصل إنت مش فاهم قصده أنا هقولك هو كان يقصد إيه ..معلش أصل هو طيب قوي بس إنت اللي جريت شكله ..أو تلاقي مثلا رئيس شركة ..واكل حق العمال ..وما بيدهومش نصيبهم في الأرباح السنوية ..ورغم كده ..تلاقي اللي طالع من وسط العمال ويمكن أجوع واحد فيهم ..وبرضه عمال يبرر ..وتلاقي رئيس الشركة ذات نفسه ما بيسوقش المبررات اللي المبرراتي بيبررها ليه ..وتلاقي المبرراتي ده هيموت نفسه عشان يقنع العمال إن رئيس الشركة ده بيموت نفسه عشانهم ..وإن هو عارف مصلحتهم أكتر منهم ..وإن لو كان فيه مكانش إتأخر عنهم ..والمصيبة الأكبر ..إن المبرراتي ده ما بياخدش حاجه من رئيس الشركة ..غير نظرة رضا ..آه والله ..نظرة رضا ..تخيل إنت لما المبرراتي ده يبيع نفسه عشان خاطر لما رئيس الشركة يكون طالع مكتبه كل يوم الصبح ما يسلمش على حد غير على المبرراتي بس ..ويبص له كده ويقوم مبتسم ..ده الكلام على رئيس الشركة..ويقوم مبتسم بقى للمبرراتي بتاعه ويقوم طالع مكتبه

وفي نوع تاني من المبرراتيه ..ودول بقى مفيش أكتر منهم ..اللي بيبرروا للحاكم ..تلاقي الحال رايح في مصيبة ..تلاقي الحال نازل لتحت ..ورغم كده تلاقي اللي بيبرر

العجيب بقى في الموضوع ..وده بصراحه اللي لفت نظري ..إن اللي بيبرر ده بيكون متعاص زينا ..يعني مثلا اللي بيبرر للحاكم ..تلاقيه بيعاني زينا ..أسعار عاليه ..ومرتبات متحجره مش بتزيد..وفي المقابل مرتبات الطبقة الحاكمه من جيش وشرطة وقضاء بتزيد وتعلى ..وممكن على مستوى شخصي بتلاقيه بيعاني عشان يعرف يحول دولارات من بره مصر أو العكس ..ودي حالات شفتها هنا من خلال مشاركات أعضاء ..وضرايب عاليه ..وإستغلال ..و وسايط ومحسوبيه عشان تعرف تاخد حقك ..وفساد ..وسلع بتتباع بره مصر في دول أغنى مننا بربع تمنها هنا في مصر ..وإحنا هنا بناخدها بأربع أضعاف تمنها بره ..ورغم كده ..تلاقيه برضه شغال تبرير للي بيحصل ..طيب ياعم إنت بتبرر لإيه ؟؟!!..طيب ما تقول على الغلط غلط ..وتقول على الفاسد فاسد ..وتقول على الصح صح ..إنت بتبرر في إيه ؟؟!!..بتبرر لمين؟؟!! ..الله ..يا عم إنت هتقف قدام ربنا لوحدك ..وبعدين إنت ليه بتحمل نفسك ما لا تجتمل ..إنت أصلا محدش طلب منك تبرير ..إنت ليه بتبرر للقتل ..ليه بتبرر للسرقة ..ليه بتبرر للظلم ..ليه بتبرر لأكل حقوق الناس ..بتبيع ناسك ليه ..الله ..المشكلة إن المبرراتي ده عامل زي الساحر ..أهو الساحر ده يقدر يسخر جن ويلبس الناس في بعض ويفرق بينهم ويجمع بينهم ويعمل مصايب ..وممكن يسخر شياطين عشان يتصنتوا ويعرفوا بعض أحداث المستقبل ..لكن رغم كده ..فقير وقذر وحقير ..أهو المبرراتي برضه كده ..يبرر لمصايب الغير ..وممكن يسحر الناس بكلامه الحلو اللي بيبذل فيه مجهود كبير قوي ..لو بذل نص المجهود ده لإظهار الحق مكانش بقي ده حاله ..وعلى الرغم كده ..فقير وحقير وقذر ..لا تلاقيه في منصب ..ولا تلاقيه في هبه أو مكافأة ..هو شغله إنه يبرر وبس ...عشان ينول نظرة رضا

أخيرا رسالتي إلى المبرراتي ..

كفاية عليك ذنوبك ..ما تشيلش ذنوب غيرك ..قابل ربنا باللي عليك بس ..لإن إنت كده بحالك ده ينطبق عليك قول الله سبحانه وتعالى .

((يحملون أوزارهم و أوزراَ مع أوزارهم))

وعايز أقول للمبرراتي كمان ..والله العظيم اللي إنت بتدافع عنه ده النهارده مش هيعرفك أصلا يوم القيامة ..وإنت ذات نفسك هتدور على حد يدافع عنك ..وياريت تلاقي ..قال الله سبحانه وتعالى ...

((ها أنتم هؤلاء جادلتم عنهم في الحياة الدنيا فمن يجادل الله عنهم يوم القيامة أم من يكون عليهم وكيلا))


بس خلاص ..كلمتين كده من غيظي قلتهم

[Bassem Youssef]

هو انا عايز امشي من البلد المقرفه دي من قليل ؟؟؟

انا متفهم المبرراتي او المطبلاتي اللي بياخد فلوس او منصب او واسطه

لكن المبرراتي او المطبلاتي اللي مش بياخد فلوس و لا منصب و لا واسطه و شغال تبرير و تطبيل ببلاش ... اه و الله ببلاش ... و حاله فقر و ضنك

طب بتبرر ليه و بتطبل ليه ؟؟؟ مستفيد ايه ؟؟؟

لا و ايه كمان ؟؟؟ يعد يشتم فيك و يخونك و يطلعك حمار مش فاهم حاجه لمجرد انك مش بتبرر او بتطبل زيه ... عشان انت بتقول كلمه حق يتعمل معاك كده

و الله في نماذج قذره قدامي بيستلفوا عشان ياكلوا ... بيستلفوا عشان يجيبوا حفاضات للعيال ... بيستلفوا عشان يدفعوا الايجار ... و نفس الوقت يقولك "البلد دي احسن من غيرها" "يعني اللي يمسك البلد عايزين منه ايه" "مش احسن من سوريا و العراق"

ربنا يخرجنا منها علي خير

[mr_vampire]

انتا بتنتقد المبرراتي !!!!

انتا اكيد من اعداء الوتن.

[Abo_Mazen]

هو أنا جبت آخري من شوية ..ياراجل ده في مبرراتيه لما تتكلم معاهم بطنك بتمغص من القرف اللي إنت شايفه قدامك ..ويوم ما تغلبه وترد عليه كلامه ...يبقى قدامه حل من الإثنين ..يا تصيبه سكته كلامية غير مبرره ..أو تلاقيه بيظيط في أي هبل

[تامر.محمد]

اعمل بقى زي حالاتي و ريح دماغك و سيبهم في الـ(لالا لاند) اللي هما عايشين فيها دي :)
بياخدوا عقابهم (انها متنيلة على دماغهم و عمالة تتنيل اكتر و اكتر) من جنس عملهم اللي هو التطبيل بالكذب , و الرضا و التطبيل (مش حتى السكوت) على الخراب
هما كدبوا الكدبة و صدقوها و الكلام فيهم مش هايحوأ فسيبهم ياخدوا على دماغهم لحد ما يبان لهم صاحب , لو بان اصلا :)

انا بطلت اتكلم سياسة مع اي حد منهم , الا اللي امره يهمني و شكله ناقصه معلومات مش ناقصه ضمير
غير كده يا باسكت خالص يا بادي عالنفوخ :)

[تامر.محمد]

و على فكرة يا ابو ماذن , اوعدك انك لما يترد عليك في التوبيك التاني
هاينطبق عليك بالظبط كلامي اللي في المشاركة اللي قبلك , و تحدي :)

[rotanamasoud]

شبه الامعه فى حديث بس مش فاكر النص بيقول فى ما معناه لا يكن احدكم امعه قالو وما الامعه يا رسول الله قال الذى مع الناس يتبع ما يتبعونه (يعنى بيطبل لاى اتجاه حتى لو اتعكس ولا يشغل عقله اطلاقا راكب الموجه وشغال)

[Abo_Mazen]

شبه الامعه فى حديث بس مش فاكر النص بيقول فى ما معناه لا يكن احدكم امعه قالو وما الامعه يا رسول الله قال الذى مع الناس يتبع ما يتبعونه (يعنى بيطبل لاى اتجاه حتى لو اتعكس ولا يشغل عقله اطلاقا راكب الموجه وشغال)

هما حافظين ...مش فاهمين ..

[Ahmedmiy]

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

So What !!!

https://www.youtube.com/watch?v=4o-X0uIF2f4

https://www.youtube.com/watch?v=30cxeG2Bgd4

خمس دقائق ختام الحلقة قبائل الانكا

So What !!!

https://www.youtube.com/watch?v=FTHu6PpXifI

سبحان الله العظيم وبحمده

[svneleven]

ده مش انا لوحدي. طب الحمد لله لسه فيه ناس عاقلين.

[amr011111]

مفيش حد صح مطلق بنسبة مائة فى المائه
ولا خطأ مطلق بنسبة مائة فى المائه
كل حد له ما له وعليه ما عليه

[svneleven]

ده مش انا لوحدي. طب الحمد لله لسه فيه ناس عاقلين.

[عزيز محمد]

العصبية = تعصب الإنسان لشيء معين (رأي، شخص، جماعة، نادي، ...) بشكل يعميه عن رؤية عيوبه ويدفعه لتصرفات غير منطقية، هو عيب موجود في غالبية البشر ومن قديم الأزل، فمثلا كان العرب يتعصبون لقبائلهم وعائلاتهم ويفخرون بأنسابهم بشكل مبالغ فيه، وحديثا الناس بتتعصب لفرق كرة واتجاهات سياسية وانتماءات قومية وعرقية ومذهبية.

يقول الله عز وجل: ( يا أيها الذين آمنوا كونوا قوامين لله شهداء بالقسط ولا يجرمنكم شنآن قوم على ألا تعدلوا اعدلوا هو أقرب للتقوى واتقوا الله إن الله خبير بما تعملون ) .

مما يعني أن الطبيعة البشرية تميل إلى عدم العدل وترك المنطقية عند الحكم أو تقييم طرف آخر غير محبوب

وفيما يخص السيارات، فياما خلافات نشبت في المنتدى بسبب تعصب مالكي السيارات لسياراتهم، وكل واحد شايف إن سيارته هي أفضل سيارة في العالم، ولما يغيرها لنوع تاني ييقى النوع الجديد هو أفضل نوع في العالم.

والشخص دا شايف نفسه دائما على صواب، وتعريفه للحق أنه هو الموقف الذي يتخذه الآن، مع تجاهل تام لكافة المواقف السابقة التي كان فيها على خطأ.

فمعلش، هي الدنيا كدا

[الاستاذ]

رغم ان الموضوع فى اسقاط سياسى بس ماغلينا بلاش نحولة للسياسه
بس الحل بقا انك تشوفلك بلد مفيش فيها ناس بتبرر وتعيش فيها عشان ياراجل تريح
نفسك من التبرير بقا

[JOHN YOUSSEF]

رغم ان الموضوع فى اسقاط سياسى بس ماغلينا بلاش نحولة للسياسه
بس الحل بقا انك تشوفلك بلد مفيش فيها ناس بتبرر وتعيش فيها عشان ياراجل تريح
نفسك من التبرير بقا

استاذ يا الاستاذ