ما في عرايس حلوه اهه

[volociximab]

و الله بصي الموضوع بقي مخيف
يعني زي ما في الاول لما كتبت الموضوع كنت متضايق ان عمري ما جلتي عروسه شكلها حتي يعتبر مقبول مقارنه بالبنت اللي شوفتها قاعده مع الشاب و للعلم البنت مكنتش يعني ملكه جمال كانت متوسطه الجمال بس مقارنه باللي شوفته تبقي ملكه جمال العالم
ثانيا تخيلت نفسي في يوم كده بقيت عريس لقطه و ان واحده زي القمر وافقت بيا و هي مش مقتنعه و شايفاني وحش و شكلي بالنسبه ليها مش مقبول بس وافقت عليا علشان المستوي اللي هعيشها فيه و العربيه و الفلوس اللي هديها ليها و كده يعني قبلت علشان العيشه المرتاحه مش علشان الشخص
طيب انا كده يبقي ذنبي ايه اني اتجوز واحده مش قبلاني من جواها كراجل و انسان بس قبلاني علشان عريس لقطه وهعيشها كويس و شافت ان ده الاهم
تخيلي بقي انك تتجوزي واحده بالشكل ده لا عمرها هتحبك و لا تحس نجيتك بأي مشاعر و بمجرد زوال المال هتبقي مفيش اي حاجه تدفعها انها تستمر معاكي

انت هتحس و تعرف ان فلانه عاوزاك لفلوسك او عوزاك لنفسك
مش عيب انها ترضى بيك لمنصبك بس ميكونش هذا هو السبب الوحيد
انت عاوز جمال بجانب الدين
طب ما هي عاوزة حاجات تانية بجانب الدين
و قد ذهب الشافعية الى ان من شروط الكفاءة الحرفة و العفة و الحرية و السلامة من العيوب و النسب
و ان كان ذلك المذهب مرجوح الا انه يظهر لك نظرة الانسان من الطرفين الى اشياء اخرى بجانب الدين
-----------انت بتحاول تحسبها بالورقة و القلم---صدقنى لما يجى نصيبك هتلاقى الموضوع ماشى عكس اى ورقة و قلم و انت مبسوط و هى مبسوطة

[إنسانة]

انتوا خرجتوا بره الموضوع ليه
السيده عربيه دايما شايفه الراجل العربي كائن وحش و شهواني و مسيطر
مهما هتعمل و هتقول مش هتغير التفكير اللي بيتزرع فيها من طفولتها
و بغض النظر هي بتحمي نفسها و لا لأ بموضوع المطالب المبالغ فيها لما يكون شكلها حلو
بس في الاخر هي بتعتبر نفسها صفقه و اللي يدفع فيها اكتر يشيل
لا علشان تحمي نفسها ولا تأمن نفسها
هي من الاخر شايفه انه ممكن شكلها يجيب لها جوازه احسن منصب اعلي للزوج شقه اكبر عربيه افخم الخ
تروخ تتجوز ليه واحد اقل ما دام ممكن تتجوز واحد اغني بغض النظر عن الاخلاقيات و غيره

لو صادفت بنت زي دي هتحس , هيبان بسرعة

وفيه اللي كدا وفيه اللي غير كدا

بالتوفيق

[إنسانة]

حضرتك دوري على جوجل window prostitution و الكلام ده بيحصل فى امستردام و غيرها ....... المشكلة انك موهومة بالغرب و على الفاضي

https://en.wikipedia.org/wiki/Prostitution_in_the_Netherlands

انا مش هرد وهكتفي بانك تدخل تقرأ

الموضوع في الاخر طلع "تجار جسد "

ايوه بالظبط هم دول سلع , عرض ومال

لو على القانون اللي من الدول القليلة اللي بتسمح بيه زي تركيا

على فكرة في السعودية وكافة الدول الخليجية فيه طائفة بتتجوز متعة >> مش مجرم الجواز دا

مهنة مستحقرة في كافة بقاع الارض وموجودة في كافة بقاع الارض

[إنسانة]

المرأة الغربية يتاجر بجسمها فى كل شيء سواء بمقابل او بدون مقابل
زمان فى القرن 19 كان الرجل ممكن يبيع مراته او بنته فى بريطانيا
هناك نصوص من العهد القديم تؤيد بيع الرجل لبنته
دلوقت الامر اسخم
بمزاجها و ببلاش او بمقابل الراجل هياخد منها ما يشاء
اسلوب الحياة الغربي غير مناسب للمرأة-لأن المرأة تحتاج للامان النفسي و الاستقرار و الاسرة اكثر من انها تنتقل من احضان هذا الى احضان ذاك و لكن المرأة مضطرة الى مجاراة الرجل الذى بطبعه يحب التطلع الى ما ليس فى يديه--لو عنده السمرا يجرب البيضا و لو عنده واحده يفكر فى التانيه---و هذا حطم الاسرة الغربية
المجتمع الغربي متقدم ماديا لكن لا يمكننا قول ذلك اجتماعيا--يكفى ان نرى احصائيات عمليات الاجهاض التى يجريها البنات فى المرحلة الثانوية على سبيل المثال

البشرية تخلصت من الامور دي

و في الاسلام فيه اماء وجواري وسبايا اتحرم ؟

دي بتجبر وملهاش ارادة

[msobhy]

انا قاعد متابع الموضوع ورفضت انى اكمل فيه لكذا سبب - لكن ما علينا
هانرجع مبدئيا لصاحب الموضوع
يا سيدى الفاضل شيل من دماغك فكرة الجمال - دور على اى واحده مقبوله بس تكون من اصل كريم وفعلا الدنيا هاتختلف - هاتلاقى اللى بتبنى معاك وفعلا واقفه فى ظهرك

الاخ العضو الفاضل اللى بيسألنى انى لسه بدور على الزواج - لأ يا سيدى انا متزوج - لكن مجازا بقول لحضرتك لو مكانك هاعمل ايه

بخصوص ان نسبة العنوسه فى الرجال اكثر من السيدات - نظريا الكلام ده غير صحيح - نسبة الذكوره الى الانوثه فى مصر تقريبا 45% ذكور الى 55% اناث ومش متأكد من الرقم
اللى اعرفه انى خالتى شغاله فى مصنع أدويه وعندها فوق ال 300 بنت منهم تقريبا 200 واحده عوانس (وان كنت برفض اللفظ القذر ده)
شركتى فيها اكتر من 50 بنت غير متزوجه وقاربو او عدوا ال 30

بخصوص ان البنات بتباع وتستغل بشكل اسواق العبيد - الكلام ده بمنتهى الهدوء غير صحيح - موجود بنسب بسيطه وبس .......... ولكن
من مساوئ المجتمعات الغربيه ان مفهوم الاسره بدأ فى الانهيار الفعلى - الكل عايز يقضيها وبس ومع اختلاف العادات والتقاليد عن عندنا اوقات بتلاقى انهيار اخلاقى لمجرد كل طرف ياخد غرضه من التانى
بخصوص ان بلوندايه تشقط واحد غنى ............. طبعا ده بيحصل

بخصوص الانثى المصريه الا من رحم ربى
مشكلتها الاولى انها غبيه - مشكلتها الثانيه انها بتتعامل مع ذكر غبى والمشكله الاخيره انها عايشه فى مجتمع غبى
البنت بيتزرع جواها منذ نعومة اظافرها كم افكار خاطئه مهوله
توصل سن المراهقه يبدأ الانهيار الحقيقى
توصل لسن 20 سنه تبدأ المخاوف تقتلها من كتر خوفها من العنوسه
وبعد الجواز تبدأ تخاف من تأخر الانجاب
وبعد الانجاب تبدأ تخاف من اى حاجه
الزوجه المصريه ثقافتها مبنيه على المسلسلات التركى وبنت خالتها اللى اتجوزت تاجر ادوات صحيه قد الدنيا وانها ازاى توقف أهل جوزها عند حدهم
الزوجه المصريه فاشله - زى ما برضو الزوج المصرى والاب المصرى فاشل
هانرجع الموضوع للظروف المحيطه - للتربيه - للوضع المادى - فى النهايه احنا كلنا جزء من المجتمع الفاشل المهترئ اللى احنا عايشين فيه

وجهة نظرى ان الزوجه المصريه فاشله بنسبة 80%
الزوج المصرى فاشل بنسبة 60%
يعنى الزوجه اكثر فشلا - من وجهة نظرى ايوه ---------- لكن فى النهايه الاتنين فاشلين
يوم ما تلاقوا المجتمع بتاعنا ناجح عمليا واقتصاديا وعلميا ساعتها هايبقى الزوج والزوجه المصريه ليهم لازمه

بالمناسبه المصرى لما بيتزوج غير المصريه فى اغلب الاحوال ربنا بيكرمه - ليه صديق متزوج مغربيه - هو نفسه بيعترف انهم نجحوا بسببها - عادتها وتقاليدها مناسبه جدا لظروفنا -------يعنى نجاحه بسبب ان الطرف التانى ناجح - يعنى مش الاتنين فشله

انا داخل اناااااااااااااااااااااااااااااااااااام

[ESO101]

راحتها في كرامتها وحريتها

المرأة الطبيعية ماينفعش تخلي حد يصرف عليها مابترتحش للطريقة دي

هترتاح ومراتك بتصرف عليك ؟

لاء طبعًا مش مقبول وحدة تصرف على جوزها ..
ولا حتى يستفيد منها ماديًا بأي شكل ..
و بعيدًا عن كل حاجة.. دي قيم الواحد بيتربى عليها من صغره
أصلها في النهاية مابتتحسبش كدا .. مش مين يصرف على مين
كدا تحول لصراع بين الرجل والمرأة .. والمقصود بالأسرة الألفة والمحبة والتعاون
شخص يكمل شخص
وماتفهميش من كلامي إني ضد مساهمة المرأة في البيت ..
لو دا شيء مهم بالنسبالها مش لإن الراجل مش قادر يشيل البيت لوحده .. ولكن لإنها هتكون مرتاحة كدا
إيه المشكلة ؟
وبالمناسبة في المجتمع المصري كتير من البيت مفتوحة بمساهمة الزوجين
وبيكون السبب قلة الدخل والغلاء .. فمبدأ التعاون مش مرفوض
ولكن حضرتك معتمدة في فكرتك مبدأ التساوي المطلق عشان محدش يبقى مسيطر على التاني
وأنا مش هختلف مبدئيًا
ولكن لما الوحدة بتشتغل .. مش فيه رئيس في العمل ؟ موظفين ممكن ؟ سواقين وغيره
لو خرجت من بيتها هربًا من سيطرة زوجها .. هتتعرض لسيطرة كام شخص برا ؟
غير إنك أساسًا مش فاهمة مبدأ السيطرة أو القوامة .. أو واخدة صورة مش صحيحة عنه
وكرامتها وحريتها محفوظة داخل بيتها بتشتغل أو مش بتشتغل
المفاهيم اللي تشكلتلك عن الجواز إنسيها كلها .. لإنها وصلتلك في أبشع صورها
وياريت مكنتيش رديتي على الحجات المتعلقة بالمرأة الغربية .. وكفاية لحد كدا
فيه ناس فاكرة فعلًا الناس هناك كلهم أو غالبيتهم شغالين بيبعوا أجسادهم ..
أول ماتقوليله غرب يتخيل بنت بتمارس البغاء .. ويتحفك بالتصورات اللي شفناها كلنا
بعيدًا عن إنها فكرة مش صحيحة .. العادات مختلفة .. و دا شيء يخصهم طبعًا .. محدش هيمشي الكون بمزاجه
اللي بتناقشيه مش مهتم بالثورة الحضارية والعلمية والإنسانية شيء عمره ماهيتفهم للفئة دي ..
على رأي مصطفى محمود .. تحولنا لنسانيس ..
وعلى فكرة موضوع السبايا شوفي مثلًا اللي حصل وقت إحتلال اليابان للصين .. عملوا إيه في الأسيرات
فكري كدا في أفضل الحلول الممكنة للمشكلة دي .. مع فرق الزمن والفكر
أهلًا بكِ في العالم الثالث

[ESO101]

بخصوص ان نسبة العنوسه فى الرجال اكثر من السيدات - نظريا الكلام ده غير صحيح - نسبة الذكوره الى الانوثه فى مصر تقريبا 45% ذكور الى 55% اناث ومش متأكد من الرقم
اللى اعرفه انى خالتى شغاله فى مصنع أدويه وعندها فوق ال 300 بنت منهم تقريبا 200 واحده عوانس (وان كنت برفض اللفظ القذر ده)
شركتى فيها اكتر من 50 بنت غير متزوجه وقاربو او عدوا ال 30

مصنع الأدوية اللي بتشتغل فيه السيدة خالتك يمكن متعمد توظيف السيدات ..
النظر بالعين .. أو إعتماد شهادات الناس مش مقياس
الإحصائيات الرسمية المصرية والعالمية .. الذكور دائمًا نسبهم أعلى من الإناث
و غالبًا الفرق مش بيصل ولا بيقترب لـ 5% دي نسبة مهولة
المصدر من الجهاز المركزي للتعبئة والإحصاء ( هنا ) الفرق لصالح الذكور مليون و 800 ألف تقريبًا
دي إحصائيات 2015 وجميع السنوات السابقة نسبة الذكور دائمًا اعلى ودا شيء عالمي

وجهة نظرى ان الزوجه المصريه فاشله بنسبة 80%
الزوج المصرى فاشل بنسبة 60%
يعنى الزوجه اكثر فشلا - من وجهة نظرى ايوه ---------- لكن فى النهايه الاتنين فاشلين
يوم ما تلاقوا المجتمع بتاعنا ناجح عمليا واقتصاديا وعلميا ساعتها هايبقى الزوج والزوجه المصريه ليهم لازمه

بالمناسبه المصرى لما بيتزوج غير المصريه فى اغلب الاحوال ربنا بيكرمه - ليه صديق متزوج مغربيه - هو نفسه بيعترف انهم نجحوا بسببها - عادتها وتقاليدها مناسبه جدا لظروفنا -------يعنى نجاحه بسبب ان الطرف التانى ناجح - يعنى مش الاتنين فشله

انا داخل اناااااااااااااااااااااااااااااااااااام

أنا زوجتي من أصل مغربي .. وجوازنا بيمر بمشاكل كثيرة جدًا قد تصل للطلاق
نسبة الطلاق في المغرب وصلت لـ 80%
لو تلاحظ إن نسب الطلاق عالميًا مرتفعة ..هتفهم إن دي سنة الحياة
لا مغربية ولا مصرية ولا أمريكانية .. استخلصت من تجربتين جواز إن جواز الصالونات نادرًا مايبقى ناجح

[msobhy]

بخصوص ان نسبة العنوسه فى الرجال اكثر من السيدات - نظريا الكلام ده غير صحيح - نسبة الذكوره الى الانوثه فى مصر تقريبا 45% ذكور الى 55% اناث ومش متأكد من الرقم

يا جماعه انا اسف جدا على المعلومه الخاطئه اللى كتبتها وان كنت كاتب انى مش متأكد من الرقم
بناءا على تقارير الجهاز المركزى للتعبئة العامة والاحصاء لسنة 2015
عدد الذكور 44.880.233
عدد الاناث 43.083.043
يعنى الذكور تمثل 51% من المجتمع المصرى
للمره التانيه بأعتذر عن المعلومه الخاطئه
شكرا أ/ eso101 على تصحيح المعلومه

[msobhy]

أنا زوجتي من أصل مغربي .. وجوازنا بيمر بمشاكل كثيرة جدًا قد تصل للطلاق

نسبة الطلاق في المغرب وصلت لـ 80%
لو تلاحظ إن نسب الطلاق عالميًا مرتفعة ..هتفهم إن دي سنة الحياة
لا مغربية ولا مصرية ولا أمريكانية .. استخلصت من تجربتين جواز إن جواز الصالونات نادرًا مايبقى ناجح

اولا انا بحسدك على صراحتك (اللى مقدرش اتكلم بيها)
صديقى كان متزوج قبل زواجه من البنت المغربيه من بنت مصريه - المصريه حرفيا كرهته فى حياته
البنت المغربيه على كلامه احسن بمراحل وسنوات ضوئيه من البنت المصريه وديه التجربه اللى قدامى

بخصوص بقى موضوع الطلاق حدث ولا حرج
انا تقريبا نص اللى شغالين معايا مطلقات - الجميل فى الموضوع انى اكتشفت بالصدفه البحته ان نص رجالة الشركه برضو مطلقين لكن مش بيقولوا

اللى انت طلعت بيه من تجربتين زواج انا طلعت بيه قبلك بس مع تعديل بسيط
انت بتقول جواز الصالونات نادرا ما بينجح
انا بقول الزواج فى مصر او بره مصر بصفه عامه نادرا ما بينجح

شكرا على تصحيح المعلومه

[volociximab]

النظرة العامة بوجه عام عندكم قاتمة لا ادرى لماذا
معظم من امامى من المتزوجين غير مطلقين و زواجهم ناجح
طبعا لا يخلو الامر من مشاكل

[msobhy]

النظرة العامة بوجه عام عندكم قاتمة لا ادرى لماذا
معظم من امامى من المتزوجين غير مطلقين و زواجهم ناجح
طبعا لا يخلو الامر من مشاكل

النجاح نسبي - يختلف من شخص الى اخر
ويا ريت نفرق ما بين الزواج الناجح - والزواج القائم