تجربتى معا الريجيم :(

[Hussein_Ramdan]

نهارده عايز احكى تجربتى معا الريجيم
انا كان وزنى وصل الى 170
او انا مش بحب المسمى دة انا بحب اسمى نمط حياه
عشان نمط حياتك هو الى بيتحكم فى وزنك
بمعنى انا قدرت اغير وزنى مش بالريجيم بنمط الحياه
انا كان بداءت تظهر عليا بعض الامراض مثل
الام فظيع فى المفاصل - ضربات قلب سريعه - انسداد فى الشراين بسبب الدهون -
ارتجاع فى المرىء كان بيسبب ليا حموضه مستمره - انقطاع النفس اثناء النوم لدرجه كانت
مراتى بتصحينى من النوم بتفتكرنى موت :)
خد القرار وخسيت عشان نفسى مش عشان حد ولاة عشان ارضى حد
وبداءت
وكانت البدايه صعبه . لكن كملت لدرجه دلوقتى الوضع اصبح طبعيى
1- اكل صحى وبدقك اكتر من مره قبل ما اكل حاجه اعرف سعرتها الحراريه اد ايه
2- الرياضه ثم الرياضه ثم الرياضه انا مش بقولك روح العب حديد وكمال اجسام
للعم انا ممسكتش دنبل او بار خلاص فتره انقاص الوزن العمليه كلها العاب هوائيه مثلا الجرى وما شابه
3- لازم تفطر بدرى وتفطر كويس كمان عشان دى الشراره الى جسمك بياخدها عشان يبداء حرق اعتبرها زاى البنزين الى بيشغل العربيه
لو جسمك مخدش الشراره دى الصبح وفطرات اخر النها او بعد الساعه 2 ظهرا انسى كده اى اكل هتحول لدهون جوة جسمك
4 - انا قدرت انزل وزنى من غير دكتور انا مش مقتنع خالص بدكتور الريجيم
5- ابعد عن الناس الى بتبيع الوهم زاى منتجات التخسيس الى بتيجى فى التلفزيون عشان الناس دى هدفها الناس الى عايزه تخس بدون مجهود
وده عمرو ما هيحصل
6- نصيحه صدقنى بعد ما تخس هتندم على كل ساعه ضاعت من عمرك من غير ما تخس
انا لسه مكمل فى طريقى لخايه ما اجيب وزن ال 80 كيلو
وبردو خلال الفتره الى جايه هنزل صورى

[Mohamed_Hamid]

انا شغال دلوقت برضه بقالى 10 ايام والحمد لله نزلت حوالى 3 كيلو

[No Comment]

لك منى كل إحترام لمثابرتك ولإرادتك القوية

[Hussein_Ramdan]

انا شغال دلوقت برضه بقالى 10 ايام والحمد لله نزلت حوالى 3 كيلو

تمام كمل بس خالى بالك او فتره ممكن تنزل 7 كيلو فى اسبوع وده بيكون عباره عن المياه فى الجسم
لكن كمل وهتبدى تنزل دهون بعد تانى اسبوع وكمل هتوصل لهدفك

[abo_salah]

انت بطل ... هاعمل زيك
انا مش عارف انزل 30 كيلو بقالي سنه ونص بسبب عادات الاكل الغلط كل يوم
ربنا يكون في عونك وتستمر وتوصل للوزن اللي عايزه

[amr011111]

الف مبروك.

[melouk1]

عااااااااش :)
تابع معانا و قولنا عملت ايه
بالتوفيق

[دينا صالح]

إرادة من حديد .. كل الاحترام .. أنا عمره ما نفع معايا ولا رجيم

[acura]

بسم الله ما شاء الله على الارادة الحديد والشجاعة، شكلك احلو وكمان صغرت في السن ما شاء الله، كفاية انك بتدخل اي محل ملابس تلاقي اللي انت عايزه في الغالب بدون مشكلة المقاسات، انت قولت اسلوب حياة وفعلا الاحساس بالتغيير بيكون في كل مجالات الحياة ربنا يوفقك ويوفق كل واحد عايز يخس واقدر انا كمان انزل كام كيلو اصل الشتا داخل والخسسان بيكون صعب شوية، بالتوفيق.

[Hussein_Ramdan]

عااااااااش :)
تابع معانا و قولنا عملت ايه
بالتوفيق

اكيد انا داخل دلوقتى فى مستوى تانى ابتديت العب حديد وعامل كورس خلال ست شهور ان شاء الله هنزل صورى معاكو

[Hussein_Ramdan]

إرادة من حديد .. كل الاحترام .. أنا عمره ما نفع معايا ولا رجيم

هههههههه كلمه السر لبوظان الريجيم والفشل هبداء من بكره او هبداء من اول الاسبوع ههههههههههههه
بس فى مره هتمشى معاك

[Hussein_Ramdan]

بسم الله ما شاء الله على الارادة الحديد والشجاعة، شكلك احلو وكمان صغرت في السن ما شاء الله، كفاية انك بتدخل اي محل ملابس تلاقي اللي انت عايزه في الغالب بدون مشكلة المقاسات، انت قولت اسلوب حياة وفعلا الاحساس بالتغيير بيكون في كل مجالات الحياة ربنا يوفقك ويوفق كل واحد عايز يخس واقدر انا كمان انزل كام كيلو اصل الشتا داخل والخسسان بيكون صعب شوية، بالتوفيق.

انا كنت فى ماساااااااااااااااااااه والله بمعنى الكلمه
انا كنت بلبس من محل واحد
انا هقول ليكو على حاجه فعلا كانت تعبانى نفسيا الصوره الى وخدها دى كانت فى فرح اخويا وللاسف ماكنتش لاقى حاجه البسها غير فى المحل الى بيجيب منو وكان مقاسات خاصه
انا كنت بلبس فى البناطلون الجينز مقاس 68 وكمان اوقات 70
الحمد لله دلوقتى بلبس من اى محل ومقاس 42 وكمان بلف على المحلات انا الى انقى واختار وتنك عليهم ههههههههههههه
بالعكس احسن تخسيس فى الشتا النفسيه بتكون مرتاحه وكمان بتلبس تقيل وانتا بتخس محدش بياخد بالو منك وبتظهر على الصيف بالفورمه الجديده
انا هوريك صوره ليا تعليقا على كلامك بخصوص انى احلويت دى هههههههه دة كرم منك وعينك هى الى حلوة لكن انا هوريك صوره قبل ما اخس هتحس بالتعب على وشى
شوف وشى فى الصوره الى تحت منظرى كان عامل ازاى وفوق بعد الريجيم

[Specialist]

والله برافو عليك يا أفندم بجد ,, أحيــــــــــــك بشده ..

أنا بقي عملت العكس تقريبا , بس بحاول ألحق نفسي الفترة دي ..

من زمـــــان و أنا رياضي و بلعب رياضة و جيم و مواظب علي نظام أكل معقول , و كان وزني 100 كيلو , بعد كده نزلت لـ 80 كيلو في 4 شهور في 2010 ,,
و حصل ظرف كده , للأسف خلاني بطلت رياضة و دوست في الأكل بغباء , لحد لما وصلت لـ 160 كيلو في 8 أشهور,,

يعد ثورة يناير كده, نزلت تاني من 160 كيلو لـ 100 كيلو بالجيم و نظام أكل في خلال 8 شهور علي ما أتذكر ,, و فضلت ثابت علي كده لحد السنة اللي فاتت ,,

للأسف عملت حادثة مميتة بالعربية , خليتني قاعد في البيت للعلاج لمدة 4 شهور ,, فتخنت لـ 140 كيلو تاني ,,

و بدأت من 5 شهور نظام رياضة و جيم , و نظام أكل ملخبط نوعا ما , و الحمدلله نزلت و بقيت 120 كيلو , و ثبتّ شوية علي الوزن ده ,,

و جاري حاليا الأستمرار في الرياضة و تنظيم الأكل علي قد ما أقدر , لحين لما أوصل 80 كيلو تاني إن شاءالله ..


الموضوع فعلآ محتاج أرادة من حديد, و كل لما تشوف نفسك بتبقي أحسن و صحتك تبقي أحسن , هتتشجع أنك تخس أكتر ,,

الله يعيننا و يعين كل الشباب .. :)

[احمد المصرى]

ما شاء الله عليك بجد ربنا يحميك كمل كمان شويه لحد لما تنزل ل 90 او اقل

[wallace]

ما شاء الله ربنا يوفقك وتخس بصحة وتكون بخير

بص اسمحلي فيه بنقطة بختلف معاك فيها وللعلم إنها ملهاش أي إستناد علمي ,ولو فيه إستناد علمي مش مجرد كلام مكتوب علي مواقع ياريت تطرحة

لازم تفطر بدرى وتفطر كويس كمان عشان دى الشراره الى جسمك بياخدها عشان يبداء حرق اعتبرها زاى البنزين الى بيشغل العربيه
لو جسمك مخدش الشراره دى الصبح وفطرات اخر النها او بعد الساعه 2 ظهرا انسى كده اى اكل هتحول لدهون جوة جسمك

اة الفطار مفيد وكويس وكل حاجة والتغذية مطلوبة ومهمة لكن لو فوت وجبة الفطار هتخس برضوا عادي جداً ولو كلت بعد 2 الظهر مش هتتحول لدهون ولا حاجة ,المهم انك تعرف الـ tdee وهو معدل حرق جسمك اليومي للسعرات + النشاط الاعتيادي ليك وتحاول تنقص عنه في حدود 500 كالوري

وربنا يوفقك دائماً