لماذا أقدم بنكا "الأهلى" و"مصر" على رفع الفائدة على شهادة الادخار لـ12,5%

[Imhotep]

فين ايقونة الاقتباااااس . . . الشكل الجديد مجننى

المهم. . . حبيبى طول عمرك يا حاج احمد و حصل خير و طول عمرك انسان محترم و ذوق

[Imhotep]

الاخ mohamed 2002
من امتى كان فى حاجة ماشية بعقل او منطق او قواعد فى بلدنا العزيزة و لا حد يقدر يقولك حتى بكرة ايه اللى ممكن يحصل بدرجة من اليقين تريحك من قلقك خاصة ان ظروفك انت ادرى الناس بها
لكن المنطق يقول الاتى. . . لو انت شاب صغير لسه متجوزتش. . . يبقى شقة طبعا. . . طب لو دى مدخرات و انت عندك شقة. . . ممكن شقة تانية بس خلى بالك من كذا عقبة فى الطريق منها سهولة التسييل و البيع و الشراء عند الاحتياج للفلوس و قرف الايجارات و كمان ان فى ضريبة عقارية على المسكن الثانى اعتقد هتطولك

الافضل لو تقدر تعمل مشروع. . . مينفعش. . . يبقى قدامك الشهادات . . . انما اللى انا اتنبح صوتى فى شرحه و الشئ المؤكد. . . انك لو اشتريت بهم دولار و احتفظت بهم تحت البلاطة املا فى ربح مستقبلى من فرق سعر البيع و الشراء بعد تلات سنين و لو كل الناس عملت زيك. . . يبقى ابشرك ان الشقة اللى ب 200 الف دلوقتى هتبقى ب 700 الف و لو كنت بتحلم تشترى عربية تمنها دلوقت 100 الف بعد تلات سنين هتلاقيها ب 200 الف على الاقل. . . و لو الدولار بعد 3 سنين زاد 50% و وصل 12 جنيه يعنى ال 200 الف بتوعك بسعر النهاردة دولارات هيجيبوا 276 الف يعنى تقريبا نفس قيمة الشهادات. . . بس ساعتها ابقى روح ناقش التجار اللى خلت الشقة ام 200 الف تمنها وصل 700 الف. . . و العربية اتضاعف تمنها. . . ما هو كله بيغلى على كله. . . بس مين الخسران و مين الكسبان. . . هتبقى انت ساعدت التجار تستغلك و تزود جشعها والحجة جاهزة . . . اصل الدولار غلى. . . و بالتالى هتمشى من ادامهم بتضرب كف بكف و تقول حزبنا الله و تدعى على اللى نصحك بالتحويل لدولارات اللى وصل خسايرك فى فرق اتمان الشقة و العربية اضعاف اضعاف ما ربحته من التحويل لدولار

التعامل فى العملة يا سادة ليس تجارة للافراد للمضاربة عليها. . . دى سلعة سيادية للدولة تشترى بها احتياجات المجتمع خاصة فى مجتمع يستورد كل شئ. . . و اللى سمع من حد عايش بره. . . هيعرف منه الاجراءات المشددة مع المواطنين فى التعاملات النقدية حتى داخل البنوك. . . فى امريكا لو حبيت تفتح حساب تحط فيه كام الف دولار كاش تلاقيه يقولك لحظة واحدة. . . و يرجعلك الموظف معاه مندوب من مكتب التحقيقات الفيدرالى بيدردش معاك انت جايب الفلوس دى منين و مصدرها ايه و انت شغلك ايه و عايش فين. . . و ابقى اثبت بقى . . . غير كده ممكن تتكلبش و انت قاعد لانك ببساطة مادمت تعمل بفلوس كاش تحت رادار الاقتصاد الرسمى و ملهاش مصدر واضح يمكن تتبعه . . . يبقى انت اكيد يا بتتاجر فى مخدرات يا سلاح يا جاى تحاول تغسل اموال استنى بقى لما يشوفوك جايبها منين. . ده فى عملة البلد نفسها . . . مش عملة اجنبية

احنا بس شاطرين نحلم و نقول نفسنا نبقى زى امريكا و اوروبا. . . تيجى بقى تنفذ حاجة على طريق انك تتقدم خطوة للامام من اللى بتعملها الناس دى فى نظامها. . . تلاقى الناس بتصوصو و محدش عاجبه و كله ماشى بدماغه اللى مريحاه و مش باصص غير لتحت رجليه

احلى حاجة فى الخطوة المفاجئة بتاعة رفع سعر الفايدة على الشهادات. . . انها روشت بتوع الدولار. . . يعنى عمالين يسألوا. . . يا ترى مين اللى عملها. . . هل هشام رامز اللى لسه استقالته ميعادها 26 نوفمبر . . . و لا الراجل الجديد. . . و لو الراجل الجديد. . . و داخل شادد اوى كده و زود 2% مرة واحدة فى خطوة تعبر عن عقلية تعمل بمبدأ الهجوم خير وسيلة للدفاع. . . يا ترى لو دى سياسته. . . هيعمل ايه بقى فى الصرافات. . . و هل عنده حلول للتعامل مع تحويلات المصريين فى الخارج. . . و هكذا. . . يالله . . . خلى اصحابنا اللى بيحبوا الدولار ياخدوا و يدوا مع نفسهم شوية زى اعلان البنك الاهلى. . . ما تروح تطمن على فلوسك :-)
شخصيا . . . اتمنى انهم يعوموا الجنيه مرة واحدة و نخلص من القصة دى و المتربحين منها. . . و ياكش يوصل تمنه 20 جنيه. . . خلينا نخلص و تخلص الحجج. . . و اللى يفتح بقه بعد كده من التجار و يقولك اصل أدولار مش عارف ماله يتعلق من رجليه :-)
الدولة بتعويم الجنيه بالتدريج واحدة واحدة عشان تقليل الاثار السلبية الاقتصادية لكده. . . بس هل الناس بتساعد نفسها و تسيب الدولار للدولة تشترى لهم به حاجاتهم و تحاول تحجيم جشع التجار. . . كثير من الناس باصص تحت رجليه بس و عايز يتربح من كده. . . عشان كده انا بقول يالله خليها خبطة واحدة و نخلص. . . و يحصل اللى يحصل. . . و بما انه لا يغير الله ما بقوم حتى يعفيروا ما بأنفسهم. . . و بالانجليزى God helps those who help themselves. . . يبقى عايزين نخلص بقى من القصة الحزينة دى

[7oda]

يعني ايهما افضل شراء شقة اومحل ولا الشهادات دي؟؟
كمان 3سنين
لو شقة ب 200000 سعرها حيبقي كام؟
لو شهادات ب 200000 بفوايدها حتساوي الشقة

لو سألت اى متخصص محايد و بيفهم هيقلك انك لازم تنوع استثماراتك و متركزش على أداه مالية واحدة و بكده تكون وزعت المخاطرة

يعنى لو تقدر تقسم الفلوس تلت اجزاء جزء تشترى بيه عقار و جزء تشترى بيه شهادات و جزء تشترى بيه دولار يبقى احسن بكتير انك تضع كل الفلوس فى عقار او شهادات

لو انت مش محتاج العقار يبققى اشترى بجزء شهادات و بجزء دولار

لو كنت مكانك كنت هشترى دولار بكل المبلغ

[Colin Chapman]

الى يقتنع يقتنع لنفسه و الى مش حيقتنع ... برضوا لنفسه

.. الى يقتنع يقتنع لنفسه و الى مش حيقتنع ... برضوا لنفسه

انا مقدر ان احيانا الواحد بيوصل لدرجة من التحمل لا يستطيع بعدها الاستمرار على طبيعته ... ربنا يعينك و يعيننا جميعا على الضغوط اليومية الحياتية
ahmed_eng2001

فيه حكمة قديمة بتقولك ايه. . . من يزيد علما يزيد حزنا. . . لانه بيشوف الامور بشكل اعمق و بيدرك الفرق بين الواقع و المأمول لكى تتحسن حياتنا و هذا ما يحزنه فى النهاية
Imhotep

[رحالة]

فعلا انا اعرف واحد في امريكا راح يحط الف دولار في حسابه
سالوه جبت الفلوس دي منين
ماعرفش يثبت مصدرها
ولحد النهاردة مرمي ف امن الدولة في نيويورك

[lonedoctor]

اذا كانت السيارة تالفة فلن يفيد اعادة الدهان او تغيير الزيت او حتي تغيير نوع الوقود بنوع افضل ولن تكون اكثر امانا لراكبيها

[hobiko]

خلينى احاول ابسط كلام الأستاذ ماهر ........ و يصححلى لو انا غلط

اللى استاذ ماهى عايز يقوله ...... ان ببساطة كلنا فى مركب واحدة

اللى بيحصل ان لما الأفراد العاديين تتجه لتحويل العملة المحلية للدولار بغرض الأتجار فيه و تحقيق ربح منه

ده غلط ...... لانه حييجى على دماغهم هما نفسهم بعد كده .......... و مش هما بس لأ البلد كلها

اللى بيحصل انهم كده بيضغطوا على الدولار اكتر و اكتر ......... بيزودوا الطلب اكتر يعنى

كده سعر الدولار حيزيد اكتر ......... بس حيزيد بشكل اكبر من لو كان الدولة بس او المستوردين هما بس اللى بيشتروه عشان يشتروا بيه احتياجات البلد

انت كده بتزود عبء اضافى

كده لما يزيد سعر الدولار اكثر و اكثر ........... موجه الغلاء بتزيد هى كمان بشكل متضاعف ..... لنها حتبقى جاية من ناحيتين ..... ناحية الدولة و المستوردين ........ و ناحية سعادتك

و لان التجار و المقاولون عندنا بيستهبلوا ...... فلو مثلا موجه الغلاء الناتجة ...... كانت حتسبب ان مثلا ثمن الشقة يزيد من 200 الف الى 300 الف ........ لأ .... بالضغط الأضافى اللى بنحطه كأفراد على الدولار بالأتجار و المضاربة فيه ...... ثمن الشقة حيوصل 400 الف

يبقى ما ساتفدناش حاجة ...... كده كده التضخم اكل المكسب اللى كسبناه من المضاربة فى الدولار و اكتر منه كمان

هى ديه الفكرة العامة ............ كله سلف و دين :)

[Imhotep]

الله ينور يا اخ hobiko على الشرح المبسط الذى لا استطيعه انا احيانا لسبب بسيط

جزء من عملى لدرجة انه اصبح ادمان يومى. . . افكر فيه و فى معطياته طوال اليوم حتى و انا نائم. . . هو متابعة الاخبار فى العالم كله على كل المستويات. . . و استخلاص و تحليل و استقراء المعلومات المهمة و استنباط او استخلاص اتجاهات او trends للاشياء او الاحداث الهامة. . . انا عارف ان ده كلام صعب اوى و مكلكع. . . يخلى حد يقول . . . يعنى انتى جاية اشتغلى ايييييه :-)
بس انا قلت قبل كده. . . و ظيفتى ان اعرف. . . و ان اقرأ. . . و ان احلل. . . و ان اتوقع احيانا كثيرة الى اين تسير الامور. . . و دى وظيفة نادرة اوى فى البلد دى بس ده قدرى و انا ايضا استمتع به لانه مناسب جدا لشخصيتى رغم كل متاعبه

المهم سيبنا منى و من شغلى. . . لكن اللى بيحصل ايه. . . ان دماغى شغالة طول الوقت بسبب كم المعلومات اللى بعملها processing فى دماغى حتى و انا نايم لدرجة انى عندى اضطراب فى النوم بسبب كده

طيب يا عم ياللى المعلومات مجنناك و صدعتنا. . . المعلومات بتقول ايه. . . بتقول ان اسعار السلع و الخدمات فى العالم كله بترخص. . . الا فى مصر فقط و البلاد اللى زيها . . . اللى الناس تعرفه حاجات بسيطة. . . منها برميل البترول اللى فقد 60 % من تمنه. . . و غيره كل المعادن الصناعية و مدخلات الصناعة. . . طب ده كمثال تأثيره ايه. . . تأثيره انه فى اوروبا كلها و اليابان و العالم المتقدم كله اسعار السلع و الخدمات بتنخفض بشكل مستمر لدرجة ان:

معدل زيادة الاسعار فى اوروبا الكوارتر اللى فات هو واحد من عشرة بالسالب. . . يعنى من الاخر اللى بتروح تشتريه النهاردة ب 100 يورو بكره ممكن تلاقيه ب 95

نفس الكلام اليابان اللى مسببين ان اقتصادهم دايما فى ركود و الاسعار تملى فى النازل بسبب انهم منضبطين جدا فى الاستهلاك. . . مش بيشتروا الا على اد اللى محتاجينه بالظبط. . . الدقة اليابانى بقى حتى فى بيوتهم و حياتهم الخاصة. . . و النتيجة ؟ الاسعار عندهم بقالها عشرات السنوات ثابتة بل و بتنزل

يا الله ده ايه الناس دى. . . انا عايز اروح اعيش فى بلد الاسعار فيها كل يوم بتنزل :-) اضف لكده ان دى بلاد منتجة لكل احتياجاتها انتاج غزير جدا و الفائض بتصدره و عملاتها قوية جدا لدرجة ان البنوك المركزية بتتدخل احيانا لاضعاف العملة عن عمد . . . لأ لأ لأ كده كتير اعصابى مش مستحملة :-) و ده اللى مخليهم عايشين فى الرخاء اللى هم فيه رغم كل الازمات العابرة. . . و اقل انسان عايش كويس و احتياجاته الاساسية متظبطة و حاسس بأنسانيته. . . مش ده الحلم بتاعنا برضه؟

طيب لما ده الحلم بتاعنا. . . و تلاقى الناس ماشية عكس العالم كله تماما فى كل حاجة و كل اتجاه. . . يبقى ازاى هنوصل للى غيرنا وصله من حياة كريمة طالما بنعمل عكسهم تماما؟ مستحيل طبعا. . . سبب ثورتى الاخيرة فى الموضوع ده. . .و استخدامى لكلمتى فلوطة و فهلوى اللى ضايقوا البعض و منهم حبايب قدام كانوا مش واخدين بالهم. . . هو انى طول اليوم كان قدامى بيانات اقتصادية و ارقام من العالم كله. . . كل حاجة فى النازل كأسعار و استهلاك و حتى انتاج بسبب قلة الطلب . . . ارجع للواقع بتاعنا الاقى العكس تماما. . . اقول فى نفسى لا حول و لا قوة الا بالله. . . و التناقض يبقى هيخلينى اتجنن. . . و الاسوأ ان الناس و سلوكياتها هى المسبب لكثير من الازمات او المساعد على تفاقمها. . . و بشوف ده بعينى من اللى بسمعه فى حياتى اليومية و بقرأه فى المنتدى هنا و غيره. . . عشان كده انا قلت فى تعليق سابق هنا. . . من يزيد علما يزيد حزنا. . . لانه بيشوف الصورة الكاملة الشاملة بدرجة كبيرة. . . و بالتالى بيشوف تناقضاتنا و عيوبنا كلها

احد الاصدقاء هنا و هو الاخ محمد طه mtak تملى بيشتكى انى مش بقول كل اللى بعرفه. . . و هو لانه ثاقب النظر فهو على حق. . . بس الفكرة و اللى هنا هجاوب فيها على النقطة دى. . . انه ليس كل ما يعرف يقال. . . لسبب بسيط. . . اننا فى مجتمع غير مثقف و غير مبنى على المعرفة. . . و بالتالى فمعلومة معينة او تفسيرها او اساءة ترجمتها ممكن تعمل ازمة كبيرة. . . فى ظل وجود نوعيات مثل منتفعين و متربحين و مخربين و متربصين كلنا عارفينهم كويس لانهم جزء من حياتنا اليومية و عارفين اغراضهم و فى النهاية اللى بيروح فى الرجلين الراجل و الست العاديبن البسطاء اللى ماشيين فى الشارع اللى و لا ليهم فى الاقتصاد و لا فى السياسة انما عايشين اليوم بيومه و كل همهم و حلمهم حياة كريمة مش حتى ليهم انما لولادهم

اتمنى اكون وضحت وجهة نظرى و سبب ثورتى النادر حدوثها التى استغربها الكثيرون ممن يعرفوننى هنا . . . و اتمنى اكون عملت ده بشكل بسيط لان دى اقصى قدرتى على التبسيط :-)

[Imhotep]

مثال ظريف و تقريبا كوميدى هقوله هنا فى شكل فزورة لكنه فى الواقع ممكن يبقى نعمة او نقمة على العالم كله لل 8 سنين الجايين. . . يالله ياج احمد . . . مسابقة اههيه زى بتوعك بتوع زمان. . . خلينا نخفف شوية من جو و كتمة الموضوع

سؤال بسيط. . . انتخابات امريكا العام القادم فى نهاية 2016. . . حد يقدر يقولى من هو رئيس امريكا القادم؟ حد هييجى يقولى انت كمان بتقرأ الودع و تفتح المندل. . . اه ده انت لاسع رسمى. . . هقوله لأ اطلاقا. . . الموضوع كله عبارة عن deductive logic و مش عارف ترجمتها بالعربى. . . يعنى مقدمات تجميعها مع بعض يؤدى الى نتائج. . . اللى يعرف المقدمات و يقرأها مظبوط هيعرف يوصل للنتائج المظبوطة بدرجة كبيرة من الدقة و قابلية عالية للتحقق فى الواقع. . . حد تانى هييجى يقولى يا عم انت بتقول ايه. . . الانتخابات لسه عليها سنة كاملة مين عارف هيحصل فيها ايه. . . هقوله اهو ده بقى جزء من شغل و طريقة عمل مخ العبد لله. . . ايه رأيك بقى. . . انا مطلوب منى اشوف قدام للدرجة دى

ها يالله عايزين مجتهدين يحلوا الفزورة. . . و اللى يقول مين او يحدد الشخص يقول ليه يعنى يوضح اسباب اختياره

[Imhotep]

نسيت اقول كمان انى هلعب دور محامى الشيطان the devil's advocate. . . يعنى ها challenge او هعمل تحدى للرأى اللى هيتقال و الاسباب بتاعته و هحاول افنده. . . لغاية ما نفلتر كل اللى هيتقال و نوصل لاجابة السؤال

[hobiko]

مثال ظريف و تقريبا كوميدى هقوله هنا فى شكل فزورة لكنه فى الواقع ممكن يبقى نعمة او نقمة على العالم كله لل 8 سنين الجايين. . . يالله ياج احمد . . . مسابقة اههيه زى بتوعك بتوع زمان. . . خلينا نخفف شوية من جو و كتمة الموضوع

سؤال بسيط. . . انتخابات امريكا العام القادم فى نهاية 2016. . . حد يقدر يقولى من هو رئيس امريكا القادم؟ حد هييجى يقولى انت كمان بتقرأ الودع و تفتح المندل. . . اه ده انت لاسع رسمى. . . هقوله لأ اطلاقا. . . الموضوع كله عبارة عن deductive logic و مش عارف ترجمتها بالعربى. . . يعنى مقدمات تجميعها مع بعض يؤدى الى نتائج. . . اللى يعرف المقدمات و يقرأها مظبوط هيعرف يوصل للنتائج المظبوطة بدرجة كبيرة من الدقة و قابلية عالية للتحقق فى الواقع. . . حد تانى هييجى يقولى يا عم انت بتقول ايه. . . الانتخابات لسه عليها سنة كاملة مين عارف هيحصل فيها ايه. . . هقوله اهو ده بقى جزء من شغل و طريقة عمل مخ العبد لله. . . ايه رأيك بقى. . . انا مطلوب منى اشوف قدام للدرجة دى

ها يالله عايزين مجتهدين يحلوا الفزورة. . . و اللى يقول مين او يحدد الشخص يقول ليه يعنى يوضح اسباب اختياره

اليمين الأمريكى ........ اللى هو الحزب الجمهورى

العالم كله بيزداد تطرفا ...... و بيزداد محافظة و اتجاه اكتر الى اليمين ايا كان ........ و ده الترند دلوقتى ....... حتى فى اوروبا

[Imhotep]

أفضل شئ فى الانترنت . . . انه جعل من اماكن زى المنتدى هنا ارشيف الكترونى للتاريخ. . . يعنى اللى بنكتبه مش بيروح و بالتالى و بيفضل مسجل. . . و بالتالى الكام مشاركة اللى جايبن هيبقوا للتاريخ. . . و هفكركم بيهم بعد بالظبط 14 شهر من دلوقت

المهم . . . نرحب بأول contender او مشارك و هو الاخ hobiko و برأيه

بس يسمحلى بقى بأنى العب دور محامى الشيطان بعرض الفكرة المضادة. . . و هى هواية عندى ابرع فيها . . . و انا هعرض الحجة و الحجة المضادة او ال counter argument بس هسيب قطع صغيرة ذات دلالة من رأيى هبقى اقولها فى النهاية لما اقول الخلاصة التى اعتقدها

الاتجاهات الراديكالية فعلا فى ازدياد فى العالم كله. . . لكن . . . الرأى المضاد. . . ان امريكا وضع خاص. . . حساباتهم مختلفة. . . هذا اولا

ثانيا. . . الجمهوريون بتوع بزنس و كلهم مليونيرات و مليارديرات بترول و شركات متعددة الجنسيات. . . و الاقتصاد الامريكى حاليا فى حالة جيدة و لو المواطن عايز الاقتصاد يستمر كويس يبقى من مصلحته ان حد جمهورى ييجى. . . ده الرأى اللى يؤيد. . . لكن الرأى المضاد ان الجمهوريين كمان بيحبوا يشجعوا الشركات و يخفضوا الضرايب و يهملوا برامج الرعاية الاجتماعية wellfare. . . و ده مش فى مصلحة المواطن

ثالثا. . . نيجى لاهم المرشحين الجمهوريين اللى غالبا هيستمروا لنهاية السبق. . . اهمهم دونالد ترامب. . . ملياردير كبير . . . فتخيل ممكن يقود الاقتصاد ازاى نحو مزيد من الازدهار و بالتالى ده ادعى ان الناس تنتخبه زى بيرلسكونى كده فى ايطاليا . . . هذه حجة فى مصلحته. . . لكن الحجة المضادة انه شخصية عليها خلاف بين الناس حتى الان رغم انه ماشى رأسا برأس امام الديموقراطيين يعنى الكفة متساوية حتى الان

دى خلاصة قصة الجمهوريبن و مرشحينهم فى عجالة. . . و انا لم احاول ان اميل لرأى و ارجحه بل عرضت الرأى و الرأى المضاد. . . لذلك مازال احتمال فوز الجمهوريين حسب الرأى السابق 50% كاملة بدون نقصان. . . ده عشان نصعب الفزورة

ها . . . مين يعلى المناقشة و يقول رأى فى صالح الديمقراطيين و يقول اسبابه. . .
عشان نخرج فى النهاية بخلاصة من وجهة نظرى المتواضعة و نتركها للزمن فى هذا الارشيف الالكترونى . . . ثم نعود اليها لنرى ماذا حدث

[ahmed_eng2001]

اضم صوتى لصوت الاستاذ hobiko , دونالد ترامب .. علشان بالفعل هو ملياردير .... و قادر على الصرف ببذخ على الانتخابات ... ده بالاضافة الى ان فى معظم رؤساء امريكا .... بييجى 2 جمهوريين تقريبا .. و واحد ديمقراطى ... ده غير التلميع الواضح الى بيبقوم بيه الاعلام الامريكى و الى فى الغالب موجه من دونالد ترامب نفسه

[ahmed_eng2001]

عزيزى الاستاذ ماهر ....

الاستاذ hobiko وضح وجهة النظر ببساطة بطريقة انا اشكره عليها ....
و من غير نقاش ... انا متفق معاه فى اغلب الفقرات ... و كمان فى الاطار العام

و لكن ..... اختلافى مع رأى الاستاذ ماهر فى عدة نقاط ليست اقتصادية مباشرة .. زى


نسبة الناس العادية الى بتشترى الدولار و تخزنه علشان تبيعه ... كام ؟؟!!! و تقدر تأثر على تداول الدولار فى السوق بنسبة كام ؟؟!!!

فى رأيى المتواضع ... النسبة دى قليلة مش كتيرة ... و لكن لأن حجم التداول فى الاصل قليل فالنسبة دى بتكون مأثرة

نوسع الموضوع شوية ... و نتكلم عن السوق السوداء .... السوق السوداء ( زيها زى الاقتصاد الموازى ) تظهر نتيجة نقص الدولار المتداول .. و قيام الحكومة باتخاذ قرارات تبدوا انها فى المصلحة العامة ....

احد طرق القضاء على السوق السوداء ... ببساطة ... زيادة التداول الدولارى لدرجة ان السوق يتشبع
نزود الدولار عن طريق .... الانتاج .... سواء كان زراعى او صناعى او سياحى ... زيادة الانتاج كفيلة بتعويض الفقد الناتج عن السوق السوداء ... ساعتها ممكن الحكومة تلعب بالقرارات زى ما هى عاوزة .... ترفع الفايدة ... تنزلها .. تعمل الى هى عايزاه .. لأنها على ارض صلبة

انما .. ترفع الفائدة على الجنيه ... فالناس تبيع الدولار الى محوشاها علشان تشترى جنيه و تحطه فى البنك ؟؟!!! لا اعتقد ان ده حيكون حل طويل الامد .... و فيه ناس قالت ان الدولار زاد سعره فى السوق السوداء بعض القروش

الناس مش مثقفة و لا تقرأ .... دى حقيقة ... و نحن كشعب ... فى حاجة ماسة للقراءة و التعلم دائما ... و نزود الكلام فى الموضوع ده ... و نعرف الناس يعنى ايه نتعلم .. و يعنى ايه نقرا ... و نبعد شوية عن نظام الثانوية العامة .... حفظ و صم الى يتحط امامك و خلاص .... طاب فيه المجهود و التعب فى تحصيل العلم و المعلومات ؟؟!!! مفيش

و لا أقدر انى الوم الناس الى بتحاول تكسب جنيهات قليلة من موضوع الدولار ده ... علشان هو شايف ان الناس الى حواليه كلهم بيعملوا كدة .... ليه ميكنش هوا كمان زيهم و ينوبه من الحب جانب ... هو شايف ان كل الناس بتنهب و الى بيعرف يكسب من الهوا مش بيتأخر .....
احنا محتاجين توعية للناس كلها ... و الكلام ده يستمر لسنين طويلة

للأسف انا معنديش معلومات حياتية عن اليابان و لا عن اوروبا ... الا ان الكلام الى قالوا الاستاذ ماهر صحيح تماما من حيث وفرة الانتاج و تقدم نوعية الخدمات و كذلك اسعارها

و انا محتاج من حضرتك توضيح اكتر عن موضوع فتح الحساب فى احد بنوك امريكا و التعديلات الى عملوها فيه .... علشان انا رحت مع واحد صاحبى و هو بيفتح حساب فى احد البنوك فى امريكا .... و كل الى طلبوه منه ال social security number ... و شوية معلومات بسيطة زى هو ساكن فين ... بس الكلام ده من كام سنة ... و تحديدا فى ولاية ميتشجن .. و على ما اتذكر ... البنك كان اسمه 3/8 .... او 5/8 ... حاجة شبه كدة .. كان اسمه غريب جدا !!!

اؤكد على نقطة تعليم الناس و تثقيفهم ... و عدم الملل من كدة لسنوات طويلة

متابع معاك

[ahmed_eng2001]

و على وزن الرؤساء القادمين ... اعتقد و الله اعلم .. ان رئيس وزراء انجلتر الاقادم ممكن يكون واحد اسمه جيرمى كورين ... رئيس حزب العمال الجديد ... دماغه طاقة شوية .. و ليه افكار غريبة .. بس ليه مؤيدين كتير ... و كان بيتعمله تلميع اعلامى فى الفترى الاخيرة