لماذا أقدم بنكا "الأهلى" و"مصر" على رفع الفائدة على شهادة الادخار لـ12,5%

[Imhotep]

بص يا احمد بك
قصة الدولار دى زيها زى حاجات كتير هيحلها الزمن و التطور و لما يبقى عندنا تعليم حقيقي و ثقافة و و و

انا هقولك حاجة محزنة. . . مش قلتلك من يزيد علما يزيد حزنا. . . مبارك سابلنا 36 مليار دولار احتياطى . . . صح. . . بس لانه كان عديم الرؤية. . . مفكرش حتى يحط مليار واحد منهم فى صندوق استثمارات سيادى . . . يعمل استثمارات فى العالم كله و يكسب. . . زى مين

اكبر صندوق استثمار ثروة سيادية فى العالم هو الصندوق النرويجى. . . بيستثمروا فيه عوائد تصديرهم للبترول. . . طيب الصندوق ده اللى بدأ سنة 1998. . . بدأ بكام. . . ب 300 مليون دولار. . . طيب وصلت استثماراته لكام فى يوليو الماضى. . . 1000 مليار دولار. . . ايوه. . . الف مليار دولار. . . فى 17 سنة

بلاش يا سيدى. . . الصندوق السيادى القطرى. . . بدأ بمليار دولار سنة 2005. . . دلوقتى كام قيمة اصوله. . . 300 مليار دولار

مش بقولك حاجة تحزن. . . خلينى ساكت و متقلبش عليا المواجع و كفاية كده فى القصة دى لانها حزينة

موضوع الحساب فى امريكا. . . عندهم حاجة اسمها secrecy act of 1970 حاول تقرأ عنه. . بيخلى البنك لازم يبلغ عن اى ايداعات نقدية تتجاوز ال 10000 دولار

المهم. . . خلينا فى الفزورة. . .

بما ان محدش عايز يقول رأى يقول ان الرئيس الجاى ديموقراطى. . . فأنا هعمل الدور ده . . . يعنى هعمل دور الشيطان و كمان المحامى بتاعه :-)

اولا. . . الاتجاهات الراديكالية اللى قال عليها الاخ hobiko . . . اساسها فى العالم كله ايديولوجى. . . زى النازيون الجدد و القمصان السود و غيرهم. . . اما امريكا فالايديولوجية بتاعتهم هى الدولار :-) ده يبان انه لصالح الجمهوريين بتوع البيزنس ده رأى . . . لكن الرأى المضاد انهم برضه هم هم نفس الجمهوريين بتوع الحروب و تخفيض الضرائب على الشركات و تخفيض ميزانيات الرعاية الاجتماعية

ثانيا. . . الديمقراطيبن بقيادة اوباما عملوا نجاحات زى انهاء حروب امريكا فى الخارج و الخروج بالاقتصاد من الركود بسبب ازمة 2008. . . ده رأى. . . بس الرأى المضاد ان ادارة اوباما عملت كل ده بتمن باهظ جدا. . . هو مضاعفة الدين العام الامريكى من 10 الى 20 تريليون دولار

ثالثا. . . المرشحين الديموقراطيين ابرزهم هيلارى كلينتون. . . عندها خبرة سياسية و زوجة رئيس سابق و وزيرة سابقة. . . ده رأى. . . الرأى المضاد انها دخلت الانتخابات الاولية قبل كده و فشلت فى الحصول على ترشيح الحزب. . . و عندها مشاكل عملتها اثناء وجودها وزيرة للخارجية

حد هيقولى طيب مين يعنى اللى جاى صدعتنا. . . هقوله. . . و بسجلها هنا و هفكركم بيها بعد ما الموضوع ده يروح الارشيف بس مش هيضيع. . .

ان اللى جاى هو هيلارى كلينتون. . . ليه

اولا انا اتأكدت انها هى اللى جاية لما لقيت ان دونالد ترامب هو اللى اسهمه عمالة تطلع قدامها. . . ليه. . . انا قلت فى تعليق سابق ان ترامب الناس مختلفة عليه. . . بس اللى كنت مخبيه. . . انه اراجوز و الناس عارفة عنه ده . . . و الناس هناك مش عبيطة و بتقرأ و تفهم و لما تقارنه بكلينتون كلينتون كفتها ارجح طبعا
نفس الكلام بس فى 2008. . . اتأكدت ان اوباما اللى جاى. . . لما لقيت المرشح الجمهورى اللى قصاده هو المومياء جون ماكين

ثانيا كلينتون امرأة. . . و الدور الان على ان ترأس امريكا امرأة بعد ما السود خدوا حقهم معنويا عن الاضطهاد القديم بمجئ اول رئيس اسود لامريكا

ثالثا. . . اللى جاى بقى بعد كلينتون. . . هيبقى من اقليات تانية و عليكم خير. . . يعنى من اصل اسبانى. . . مثلى او مثلية. . . عادى جدا. . . لان هى دى امريكا . . . بلد التوازنات. . . و عشان يروجوا تملى انهم بلد المساواة فى الفرص بين الجميع و البقاء للاصلح

ميعادنا يناير 2017. . . لما افكركم بما سبق :-)

[ALYSALIM]

يعني ايهما افضل شراء شقة اومحل ولا الشهادات دي؟؟
كمان 3سنين
لو شقة ب 200000 سعرها حيبقي كام؟
لو شهادات ب 200000 بفوايدها حتساوي الشقة

شقة
ثم
دولارات
ثم
ذهب
ثم
شهادات

[ahmed_eng2001]

اما عن الحاجات المحزنة فحدث و لا حرج ... و قبل ما الحكومة/الرئيس توصل لصناديق استثمار و حاجات جميلة و افكار رائعة ... الاول لازم تكون فكرت فى الافكار الصغيرة الى تعمل تغيير للمواطن البسيط ... و يحس ان الحكومة/الرئيس هدفها بالفعل رفع معاناة الناس و التخفيف عنهم


بالرغم من ان كلامك عن هيلارى كلينتون صحيح و منطقى جدا ... بس اعتقادى الشخصى ان الشعب الامريكى مش حينتخبها ....
خلال تعاملى مع اكتر من شخص امريكى الاصل ( مجازا لأى حد جده مش امريكى الاصل ).... اجمع اغلبهم على عدم ارتياحهم لما يكون رئيسهم فى العمل .. واحدة ست

و زى ما حضرتك وضحت ... الجمهوريين بيمهدوا للاقتصاد من ناحية معينة ... و ييجوا الديمقراطيين يستفيدوا من الحاجات الى عملوها الجمهوريين ... بس مش بيعرفوا يكملوا .. علشان الجمهوريين ليهم نظام مختلف
و لو جينا اتكلمنا من وجهة نظر الديمقراطيين ... فتقريبا نفس الكلام من وجهة نظرهم هما

و فى اعتقادى الشخصى .... مش فارقة .. ينتخبوا زيد .. او عبيد

متابع معاك

[رحالة]

شقة
ثم
دولارات
ثم
ذهب
ثم
شهادات

دولاراااات !!!!
عايزين تخربوا البلد

فكر في الراجل الغلبان اللي عايز يهرب كام مليار لسويسرا
انتو مافيش في قلوبكم رحمة يا ظلمة

[ahmedwagdy03]

خلينى احاول ابسط كلام الأستاذ ماهر ........ و يصححلى لو انا غلط

اللى استاذ ماهى عايز يقوله ...... ان ببساطة كلنا فى مركب واحدة

اللى بيحصل ان لما الأفراد العاديين تتجه لتحويل العملة المحلية للدولار بغرض الأتجار فيه و تحقيق ربح منه

ده غلط ...... لانه حييجى على دماغهم هما نفسهم بعد كده .......... و مش هما بس لأ البلد كلها

اللى بيحصل انهم كده بيضغطوا على الدولار اكتر و اكتر ......... بيزودوا الطلب اكتر يعنى

كده سعر الدولار حيزيد اكتر ......... بس حيزيد بشكل اكبر من لو كان الدولة بس او المستوردين هما بس اللى بيشتروه عشان يشتروا بيه احتياجات البلد

انت كده بتزود عبء اضافى

كده لما يزيد سعر الدولار اكثر و اكثر ........... موجه الغلاء بتزيد هى كمان بشكل متضاعف ..... لنها حتبقى جاية من ناحيتين ..... ناحية الدولة و المستوردين ........ و ناحية سعادتك

و لان التجار و المقاولون عندنا بيستهبلوا ...... فلو مثلا موجه الغلاء الناتجة ...... كانت حتسبب ان مثلا ثمن الشقة يزيد من 200 الف الى 300 الف ........ لأ .... بالضغط الأضافى اللى بنحطه كأفراد على الدولار بالأتجار و المضاربة فيه ...... ثمن الشقة حيوصل 400 الف

يبقى ما ساتفدناش حاجة ...... كده كده التضخم اكل المكسب اللى كسبناه من المضاربة فى الدولار و اكتر منه كمان

هى ديه الفكرة العامة ............ كله سلف و دين :)

عمرك شفت حاجة بترخص فى البلد غير الجنية . يعنى لو الناس بطلت تحوش بالدولار الضغط حيخف و التجار مش حيغلوا الأسعار . ده كلام خيال يا ناس

يا سيدى إستغلال الأزمات و الجشع و الطمع و الإحتكار موجود فى النفس البشرية بالفطرة و لن يتم تحجيمها إلا بقوانين و رقابة من نظام قوى قادر على فرض سطوته على السوق و ليس دمية فى يد كبار التجار تحت ذريعة تشجيع الإستثمار

[hilal]

دولاراااات !!!!
عايزين تخربوا البلد

فكر في الراجل الغلبان اللي عايز يهرب كام مليار لسويسرا
انتو مافيش في قلوبكم رحمة يا ظلمة

كلمات ساخرة ولكنها حقيقية للاسف
رجال اعمال يهربون بأموالهم للخارج بعد تحويلها لدولارات
وحتى لا يتهمني فريق "طبلي طبل" بترويج الاشاعات
ارجعوا لحلقة وائل الابراشي مساء الامس 10 نوفمبر

[ESO101]

كلمات ساخرة ولكنها حقيقية للاسف
رجال اعمال يهربون بأموالهم للخارج بعد تحويلها لدولارات
وحتى لا يتهمني فريق "طبلي طبل" بترويج الاشاعات
ارجعوا لحلقة وائل الابراشي مساء الامس 10 نوفمبر

الضغط من الحكومة على رجال الأعمال فاق المعقول
بداية من الضرائب وحتى على الأرباح في البورصة و تحميلهم مسؤلية اتجاه المواطن الكسول الجاهل
ثم تقييد مستوردي السلع من الشركات الأجنبية بسقف 50 ألف دولار شهريًا
الحكومة مش سايبة حد ولا أظن كلمات وزير الأوقاف الفاسد في خطبة عيد الفطر 2014
بشأن إنفاق الأغنياء على الفقراء كانت إجتهادًا منه
وزي ما فيه مواطنين يهمهم مصلحتهم ( المؤقتة ) ومش مهم البلد
هتحرموا على رجال الأعمال ( إخراج أموالهم بعد تحويلها ) بالتحايل على القانون ليه ؟
بأي منطق

[Karim Alaa]

اهم رفعو قيمه الجنيه 20 قرش مره واحده ليعود 7.83 بيع مره اخرى

[Imhotep]

اهم رفعو قيمه الجنيه 20 قرش مره واحده ليعود 7.83 بيع مره اخرى

ههههههههههه ضحكتنى يا كريم بيه

خلى بتوع الدولار يعملوا دماغ من الروشة اللى شكلهم هايعيشوا فيها الايام الجاية. . . اللى كان بيحلم بيوم يشوف فيه الجنيه بيطلع امام الدولار. . . اهو جاله اليوم ده بأسرع مما يتخيل. . . اصل اللى الناس متعرفوش ان طارق عامر هو مهندس القضاء على السوق السودا فى 2004 لما نجح انه ينزل الدولار من 7.25 جنيه الى 5.5 جنيه. . . لما كان نائب محافظ البنك المركزى و قبل ما يمسك البنك الاهلى و اللى مش عارف كده يروح يراجع ال cv بتاعته و يعرف تاريخه

و لسه

و الواحد مش هيتعب قلبه و لا يشرح و لا يوضح

احنا نقعد و نتفرج و نشجع اللعبة الحلوة

و ادى تانى لعبة حلوة من طارق عامر . . . و ادى لينك الخبر:
الجنيه يرتفع أمام الدولار 20 قرشًا.. ويسجل 783 قرشًا للجهمور (تحديث) |اليوم السابع

معلش بس الخبر من اليوم الساقع غير الموثوق فى اخبارها. . . نستنى حد يخطف رجله للبنك يطمنا على صحة العملة الامريكية و سيبنا من الجنيه الكوخة الوحش بتاعنا اللى ملوش لازمة. . . مع ان الغريب ان فى نا ا ا ا س كتييييييير اوى بتستثمر فى الجنيه و استثمرت فيه 15 مليار جنيه لغاية دلوقت فى 3 ايام فقط لا غير. . . و ادى نتايج اول لعبة حلوة من طارق عامر حتى الان:
البنوك تستأنف بيع شهادة الـ12.5% بعد جمع 15.2 مليار جنيه خلال 3 أيام |اليوم السابع

انا بصراحة مستنى رد من بتوع السوق السودا. . . مش شايف لعبة حلوة لغاية دلوقت غير اشاعة ان الدولار وصل 9 جنيه اللى عمالين يروجوا لها و مش شايفها جايبة نتيجة. . . عايزين مستوى اقوى من الاداء. . . لان اللى هيكسب هديله فلوسى انا شخصيا. . . يعنى يا اما هنزل اعمل شهادات يا اما هنزل اشترى دولار ان شالله كان ب 20 جنيه و انا راضى و مرضى و لا هتكلم عن تضخم و لا اسعار و لا شئ بتاتا. . . يالله يا جماعة همتكم معانا. . . عايز احدد موقفى. . . ساعدونى من فضلكم. . . ههههههههههههه

[hilal]

سبحان الله
هاجمنا هشام رامز عندما قام بتخفيض سعر الصرف ، وقلنا أن ما فعله جريمة بحق الجنيه المصري
دافعتم عنه وقلتم لابد من التخفيض لتشجيع الصادرات والحد من الواردات ، والحفاظ على الاحتياطي النقدي

الآن قام طارق عامر بسياسة عكسية برفع سعر الصرف ، راح فين كلامكم عن تشجيع الصادرات والحقاظ على الاحتياطي؟

عموما نكرر ما سبق أن ذكرناه:
السياسة النقدية وحدها يمكن ان تحدث الاثر الايجابي في تحريك سعر الصرف بالاتجاه المطلوب على المدى القصير فقط ، حيث توكل مهمة تحقيق استقرار سعر الصرف على المدى الطويل الى السياسة الاقتصادية بالدرجة الاولى والى السياسة النقدية ثانيا.
لذلك يأتي نبأ الافراج عن صلاح دياب تصحيحا لخطأ فادح بالقبض عليه مما كان له أثر بالغ على مجتمع رجال الاعمال

[hobiko]

لذلك يأتي نبأ الافراج عن صلاح دياب تصحيحا لخطأ فادح بالقبض عليه مما كان له أثر بالغ على مجتمع رجال الاعمال

سبحان الله انا كمان

على المنتدى ده ......... لما كان بناقش تهجيصة فرض ضريبه 400 جنيه على تذاكر السفر بالطيران

الناس كلها كانت داخله تقول ........... روحوا خدوا الفلوس من رجال الأعمال الحرامية

لما الحكومة بدأت تتعرض لهم و تضغط عليهم ....... مش صلاح دياب بس ...... لأ و محمود الجمال و 16 رجل اعمل تانيين و قبليهم رجل الأعمال أيمن الجميل فى قضية رشوة وزارة الزراعة و تحفظت على اموالهم

بقى الحكومة بتضرب الأستثمار و بتبهدل رجال الأعمال !!!!!!

نفس اللى حصل لما الحكومة فرضت ضريبة الأرباح الرأسمالية على البورصة .......... اتشتمت و اتهاجمت من طوب الأرض ...... بحجة برضه ضرب البورصة و تطفيش المستثمرين ....... لغاية لما الحكومة لغتها .......... اتشتمت برضه من هما هما نفس الناس :)

[hilal]

سبحان الله انا كمان

على المنتدى ده ......... لما كان بناقش تهجيصة فرض ضريبه 400 جنيه على تذاكر السفر بالطيران

الناس كلها كانت داخله تقول ........... روحوا خدوا الفلوس من رجال الأعمال الحرامية

لما الحكومة بدأت تتعرض لهم و تضغط عليهم ....... مش صلاح دياب بس ...... لأ و محمود الجمال و 16 رجل اعمل تانيين و قبليهم رجل الأعمال أيمن الجميل فى قضية رشوة وزارة الزراعة و تحفظت على اموالهم

بقى الحكومة بتضرب الأستثمار و بتبهدل رجال الأعمال !!!!!!

نفس اللى حصل لما الحكومة فرضت ضريبة الأرباح الرأسمالية على البورصة .......... اتشتمت و اتهاجمت من طوب الأرض ...... بحجة برضه ضرب البورصة و تطفيش المستثمرين ....... لغاية لما الحكومة لغتها .......... اتشتمت برضه من هما هما نفس الناس :)

سيدي الفاضل
إذا كنا ننظر لمصلحة البلد فعلا فلابد من سياسة اقتصادية سليمة تساندها سياسة نقدية سليمة
السياسة الاقتصادية السليمة هي التي تهدف إلى تشجيع الاستثمار والانتاج السلعي والخدمي وليس تخويف رجال الاعمال ودفعهم دفعا لتهريب أموالهم وتصفية أعمالهم ، هذا يؤدي إلى زيادة الضغوط على الجنيه المصري ، ولن تفلح أي سياسة نقدية في إصلاح الوضع.

دعني أضرب لك مثالا بسيطا عن أضرار السياسة النقدية:
الناس فرحانة برفع سعر الفائدة على الجنيه ، هذه السياسة ترفع سعر الجنيه مؤقتا في الاجل القصير ، ولكنها ضد سياسة تشجيع الاستثمار والانفاق ، وسوف تؤدي إلى ركود الاقتصاد في الاجل الطويل حيث يتجه الناس الى الادخار في البنوك ، ويرفع تكلفة الاقتراض على المستثمرين

تحياتي

[ESO101]

بالمناسبة لوم الأفراد دائمًا يدل على الفشل
يعني إيه الحكومة تاخد قرارات بناءً على شوية هلاسين
السيسي ناقصه مستشارين على درجة عالية من المهنية
دي الحقيقة
محدش يقولي الحكومة ..
كلنا عارفين إن السيسي اللي بيحرك كل حاجة وخصوصًا ملف رجال الأعمال
البلد كلها بتمر بفترة زي الزفت .. والسيسي عنده الشجاعة الكافية للضرب تحت الحزام
لكبار رجال الأعمال .. أمال الصغيرين هيعمل فيهم إيه !

[ALYSALIM]

صلاح دياب اتمسك في الاول عشان فساد ورشوة وتربح ثم قالو عشان حيازة سلاح ثم قالو عشان بلاغ
طريقة القبض وتوقيت اقبض وطريقة الافراج تخللي فيه دايما شك زي قضية حسن مالك بتاع الاخوان متاجرة بالعملة وضرب اقتصاد البلد ثم الانتماء لجماعة محظورة

الشعب الحقيقي هيبقي في يوم المني لما الجنيه يساوي دولار لانه بيقبض بالجنيه هتبقي كل حاجة رخيصة يعني الشقة اللي تمنها مليون جنيه هتبقي ب125 الف بس يقدر يعيش وياكل ويشرب ويتعلم بمرتبه
لكن اللي بيحصل من تخبط سياسات الحكومة 0(مش السيسي) بيخلي الدولار يعلي ماينزلش ابدا
وده مش في صالح المواطن
تخيل السيسي جه والدولار ب 7 جنيه وربنا رزقة بناس بتفهم اقتصاد كان بقي الوضع كده؟ كان الدولار زمانه بقي ب6 او 6.5 واالازمة دي عمرها ماتحصل وعجلة االانتاج هتدور غصب عن الكل
لكن انا مش عارف الحكومات المصرية بتعمل ليه كده
ليه مفيش ابتكار في الحلول كل حلولهم منقولة من كتاب واحد مكتوب في دول تانيه وضعها مختلف وطبيعتها مختلفه
اما الشعب فبيحاول انقاذ نفسه هو لا هيحل ولا يربط ده لانه مفيش في ايده الا اقل القليل
والباقي متحكم فيه حيتان الاقتصاد ومتنفذي الدولة

[hobiko]

سيدي الفاضل
إذا كنا ننظر لمصلحة البلد فعلا فلابد من سياسة اقتصادية سليمة تساندها سياسة نقدية سليمة
السياسة الاقتصادية السليمة هي التي تهدف إلى تشجيع الاستثمار والانتاج السلعي والخدمي وليس تخويف رجال الاعمال ودفعهم دفعا لتهريب أموالهم وتصفية أعمالهم ، هذا يؤدي إلى زيادة الضغوط على الجنيه المصري ، ولن تفلح أي سياسة نقدية في إصلاح الوضع.

دعني أضرب لك مثالا بسيطا عن أضرار السياسة النقدية:
الناس فرحانة برفع سعر الفائدة على الجنيه ، هذه السياسة ترفع سعر الجنيه مؤقتا في الاجل القصير ، ولكنها ضد سياسة تشجيع الاستثمار والانفاق ، وسوف تؤدي إلى ركود الاقتصاد في الاجل الطويل حيث يتجه الناس الى الادخار في البنوك ، ويرفع تكلفة الاقتراض على المستثمرين

تحياتي

انا موافق على فكرة تشجيع رجال الأعمال و الأستثمار ......... انا برصد بس التناقض اللى فيه البعض مش حضرتك

اللى كل ما تكلمهم فى حاجة يقولك خد من رجال الأعمال ..... دول سايبين رجال الأعمال

على اساس ان المطلوب هو ان الحكومة تأمم رجال الأعمال مثلا و لا ايه مش فاهم !!!