تقرير رحلة الاقصـر وأسـوان بالتفصيل ( بالصور والفيديو )

[Elawany13]

[img3]http://i.imgur.com/SUAgH.png[/img3]



تابع زيارة البر الغربى للأقصر

- معبد حتشبسوت الجنائزى بالدير البحرى -

بعد ورشةالألباستر ركبنا الاتوبيس وتوجهنا الى معبد حتشبسوت بالقرب من وادى الملوك
أنشيء معبد حتشبسوت خلال الأسرة الثامنة عشر بجانب معبد منتوحتب ويقع خلفه وادى الملوك الشهير ، يتميز بكبره وهو لا يزال يبهر الزوار بجماله وبتصميمه الفريد ، فهو يختلف عن المعابد التي كانت تبنى في طيبة (الأقصر) على الضفة الشرقية من النيل.
يتكون المعبد من ثلاثة طوابق متتابعة على شرفات مفتوحة. بني المعبد من الحجر الجيري ، ونصبت أمام أعمدة الطابق الثاني تماثيل من الحجر الجيري لأوزوريس وللملكة حتشبسوت في توزيع جميل. في الأصل كانت تلك التماثيل ملونة ، ولم يبقى من الألوان الآن إلا بعض الآثار ، وبعض التماثيل في حالة جيدة تماما تدل على اناقة تصميم المعبد وجماله.
يتميز معبد حتشبسوت في نفس الوقت بأن نجد على جدرانه نقوشا لبعثات بحرية أرسلتها الملكة حتشبسوت إلى بلاد بونت للتجارة واحضار البخور والمر من تلك البلاد . كان الفراعنة يقدمون البخور إلى آلهتهم ليحظوا برضاهم
أقام الأقباط إبان مطلع المسيحية ديرا للعبادة على معبد حتشبسوت . واستمر الدير قائما حتى القرن الحادي عشر . وفي القرن التاسع عشر عثر العالمان الاثريان "أوجوست مريت" و "إدوارد نافي" على بقايا الدير . وعملا على إزالة انقاض الدير لرؤية ما تحته من أثار المعبد . وقد دوّن نافي أعماله بإسهاب في 7 كتب تحت عنوان :"معبد الدير البحري" خلال الأعوام 1894 - 1898

اسيبكم مع الصور

[Elawany13]

[img3]http://i.imgur.com/SUAgH.png[/img3]



تابع زيارة البر الغربى للأقصر

- عملاقى ممنون-

يقع على الضفة الغربية لنهر النيل شاهدناه فى الاتوبيس اثناء العودة من وادى الملوك ومعبد حتشبسوت الى النايل كروز فتوقفنا عندهما للتعرف عليهما وإلتقاط الصور التذكارية

من هما عمالقى ممنون؟

عمالقة ممنون هي عبارة عن تمثالين كبيرة الحجم ، وهذان التمثالان يمثلان الملك امنحوتب الثالث وهو جالس على العرش ويحرس عالم الموتى الذى يقع خلفه مباشرة (وادى الملوك) ، ويبلغ طول كل واحد من التمثالين ٢١ متراً أى بإرتفاع مبنى من 7 طوابق ، كانا التمثالين عبارة عن حطام ويعتقد ان سبب الحطام هو زلزال عنيف اصاب المنطقة عام 27 ق.م ، ولكن بعثة اثرية استطاعت العثور على حطام التمثالين واعادة بنائهما ، وبلغ وزن كل تمثال اكثر من ٧٠٠ طن.


سبب التسميه
-------------
تناقلت الروايات أن الجزء العلوى من التمثال الشمالى والذى أطاح به زلزال عام 27 ق . م كان يصدر منه صوت غريب لمرور الرياح من خلاله يزداد فى فترة الفجر، وذلك بسبب التصدع الذى حدث به، لذلك أطلق عليه الزوار اليونانيون أسم “ممنون” وهو ذلك البطل الأسطورى الذى ساعد أهل طروادة عند حصارها فقتله أخوه الإغريقى، فطلبت أمه وهى تبكى من الإله زيوس أن يميز ابنها عن بقية البشر، فكان يظهر لها صوته فى الفجر، فكانت تبكى عند سماع هذا الصوت، وبعدما قام الإمبراطور “سبتميوس سفيروس” بترميم التمثال لم يعد يسمع هذا الغناء أبدًا. ومن أجل شهرة الأصوات التى تخرج من التمثال جاء السائحون من مختلف أنحاء العالم لمشاهدتها، فقد قام الإمبراطور “هارديانوس” وزوجته “سابينا” بزيارته عام 130م كما سجل بعض أعضاء البلاط أسماءهم على هذين التمثالين.

اسيبكم مع الصور

[Elawany13]

[img3]http://i.imgur.com/SUAgH.png[/img3]



- معبد الكرنك الصوت والضوء -

بعد اليوم الطويل الحافل بالنشاط فى البر الغربى رجعنا الى النايل كروز وتنتاولنا الغداء وارتحنا لفترة قصيره
ثم استئنفنا برنامج الرحلة وكان زيارة معبد الكرنك فى البر الشرقى مساءا لمشاهدة عرض الصوت والضوء
هذه العروض بتكون يوميه ولكن بلغات مختلفة وللأسف هذا اليوم كان مخصصص للغة الإيطاليه
ولكن مشرف الرحلة تمكن من الحصول على عرض خاص لنا باللغه العربية وكان هذا الجزء من البرنامج اختياريا ب 30 جنيه
وبصراحة العرض كان مبهر ومشوق جدا جدا
وكنت مصوره فيديو ولكن للأسف بسبب الإضاءة الضعيفه اصبح غير مجدى
وبعد عودتنا من عرض الصوت والضوء كان فيه جوله حره فى اسواق وشوارع الاقصر
منظر معبد الاقصر امام المرسى كان خيالى بالليل الاضاءه عليه تحفة فنيه
الشوارع هناك جميلة ونظيفة والناس محترمين وطيبين مشوفتش الاشكال الضاله اللى بنشوفها فى شوارعنا
مشوفتش بلطجى مستولى على رصيف وبياخد اتاوات من اصحاب السيارات علشان الركنه
بصراحة الاقصر واسوان بلاد مريحة نفسيا جدا للعيشه فيها
وكان فيه برنامج اختيارى بيتم التجهيز له غدا وهو البالون قيمة الاشتراك فيه 250 جنيه
واللى يحب يطلعه لازم يصحى الساعه 3:30 فجراً لمقابله مندوب شركة السياحة لإصطحابه الى البر الغربى
لركوب البالون وسط حراسة وتأمين شامل من الجيش والشرطة وعربات الاسعاف بعد حادث السياح الشهير
ولكن للأسف لم يكن هناك وقت كافى للنوم وتانى يوم هيكون حافل وفى نهايته سفر فى قطار الصعيد للعودة اللى القاهره
فلم اتمكن من الاشتراك فى البالون وآثرت انى انام ساعتين زيادة علشان اكون مرتاح تانى يوم
وبكده انتهى اليوم وباقى لنا اليوم الأخير وهوه غدا هنعمل تسجيل خروج من الفندق العائم صباحاً بعد الافطار
ثم سنتوجه لزيارة معبد الكرنك نهارا ومعبد الاقصر ثم مغادرة البلاد

انتظر المزيد من الصور والمعلومات عن معبد الكرنك فى المشاركة القادمة
عند اعادة زيارته تانى يوم نهاراً

اسيبكم مع الصور

[إنسانة]

تقرير رائع تسلم

[Elawany13]

شكرا جزيلا

[shoma]

تقرير رائع عن اماكن أروع خسارة أنهم مش بيضيفوا معبد دندرة للرحلة

[Elawany13]

تقرير رائع عن اماكن أروع خسارة أنهم مش بيضيفوا معبد دندرة للرحلة

معرفهوش ولا سمعت عنه
كان نفسى اروح معبد ابو سمبل

[tawfik346]

عظيم فعلا تسلم ايدك

[drcobra]

الله ينور

[zrzr1]

والله استمتعت بالصور وان شاء الله هعمل الرحلة دي.. تسلم ايدك

[Elawany13]

الله يسلمكم ويبارك فيكم
ربنا يقدرنا على تنشيط السياحة الداخليه ههههههههههههههه

[Elawany13]

[img3]http://i.imgur.com/SUAgH.png[/img3]



- اليوم الأخير فى الأقصر -

- معبد الكرنك نهارا -

صحينا الصبح وتناولنا الافطار وجهازنا الحقائب وعملنا تسجيل خروج من الفندق
مشرف الرحلة حجزلنا غرفة للسيدات وغرفه للرجال داى يوز وتركنا الحقائب فى الفندق العائم وتوجهنا الى الاتوبيس لزيارة معبد الكرنك

معابد الكرنك يقع فى البر الشرقى للنيل وهو المعبد المخصص للاحتفالات والحياة
حيث خصص الفراعنة البر الغربى للنيل للجنائز والأموات فنجد فيه وادى الملوك ومعبد حتشبسوت الجنائزى والبر الشرقى للاحتفالات والحياة فنجد فيه مجموعة معابد الكرنك ومعبد الأقصر
ويعد معبد الكرنك من علامات الأقصر في مصر المميزة حيث كان كل ملك من الملوك المتعاقبين يحاول جعل معبده الأكثر روعة. ليتميز به عن سلفه لذلك تحولت معابدالكرنك إلى دليل كامل وتشكيلة تظهر مراحل تطور الفنّ المصري القديم والهندسة المعمارية الفرعونية المميزة.
يتميز معبد الكرنك الكبير بعروض الصوت والضوء الساحرة التي تقام كل مساء، والتي تعتبر طريقة رائعة لاكتشاف معبد الكرنك. تبعد المسافة بين الأقصر والكرنك 3 كيلومترات، يتخللها علي جانبي الطريق عدداً كبيراً من تماثيل أبي الهول الصغيرة أو ما يعرف بطريق الكباش. ويعتبر معبد الكرنك أكبر دار للعبادة مُسَوَّر على وجه الأرض

اسيبكم مع الصور













طريق الكباش الشهير بمعبد الكرنك












فى هذا المكان تم تصوير فيلم صراع فى الوادى لفاتن حمامه وعمر الشريف






البحيرة المقدسة
هذه البحيرة كانت متصله بنهر النيل
وكانت المكان الذى يتوضأ فيه الكهنه





مسلتين لحتشبسوت فى معبد الكرنك كانت القميتن مطليتين بالذهب والفضه الشمس بتضرب فيها وتنعكس وبتعمل بريق علشان عامة الشعب يعرفوا مكان دور العبادة
اعتقد ان فكرة المأذنه فى المساجد دلوقتى مأخوذه من المسلة والله اعلم

[Elawany13]

[img3]http://i.imgur.com/SUAgH.png[/img3]



- اليوم الأخير فى الأقصر -

- معبد الأقصر -



معبد كبير من المعابد المصرية القديمة المعقدة يقع على الضفة الشرقية لنهر النيل في مدينة الأقصر اليوم المعروفة باسم (طيبة القديمة). تأسس سنة 1400 قبل الميلاد
يعتبر معبد الاقصر شاهد حي على استمرارية تاريخ مصر في الفترة الممتدة من حكم الأسرة الثانية عشرة من المصريين القدامى حتى القرن الرابع عشر بعد الميلاد عندما تمّ بناء مسجد إحياءً لذكرى أبو الحجاج الذي بشر بالإسلام في الأقصر.
وقد قام الكثير من الفراعنة كل بدوره في بناء هذا المعبد على مرّ السنين، وكان من بينهم الملك توت عنخ آمون والملكة حتشبسوت والملك رمسيس الثاني والملك أمنحوتب الثالث: فتنقلك في المعبد يمكنك من رؤية مساهمة كل من هؤلاء والتي تشهد عليها تماثيلهم وصورهم المنحوتة على الجدران.كما أنّ الاسكندر الاكبر والرومان ومن بعدهم المسيحيين قد تركوا أثارهم في المعبد.
ويتميّز معبد الأقصر بحفظه المذهل للأحداث التاريخية، بحيث يمكنك أن تشهد وصف معركة قادش وروايات تصف أحداث الاحتفال بالعام الجديد، وغير ذلك من القصص التي تروى عن بطولات الفرعون المنقوشة على أعمدة المعابد ومسلاتها وجدرانها



مسلات المعبد
------------------
كان يتقدم صرح الملك رمسيس الثاني مسلتين من حجر الجرانيت الوردى تزين الغربية منهما الآن ميدان الكونكورد في باريس منذ عام 1836 وارتفاعها 22,84 مترا وتزن 220 طنا، اما المسلة الشرقية وهي القائمة الآن امام البرج الشمالي فيبلغ ارتفاعها 22,52 مترا وارتفاع قاعدتها 2,51 مترا ويبلغ وزنها 257 طن
ولعل السبب من وجود المسلة امام صرح المعبد ربما - بجانب كونها رمز من رموز الشمس - لتعلن من بعيد عن مكان المعبد، وخاصة ان هذه المسلات ذات قمام مدببة وكانت مغطاة - أغلب الظن - بطبقة نحاسية مذهبة حتى تظل براقة ساطعة.




مسجد أبى الحجاج
-----------------------
شيد مسجد أبي الحجاج الأقصري سنة 658 هـ (1286م) ـ الذي يرجع إلى العصر الأيوبي ـ على الجانب الشمالي الشرقي من معبد الأقصر. ويشبه المسجد في شكله المعمارى المساجد الفاطمية القديمة، وهو عبارة عن مساحة صغيرة مربعة، مغطاة بسقف خشبى. يبلغ ارتفاع مدخله 12 متراً، ويخلو من الزخارف الهندسية والنباتية واللوحات الخطية المعروفة في العمارة الإسلامية، ويعلو المسجد شريط من الشرفات المبنية بالطوب الأحمر



توسيع المسجد وترميمه
-----------------------------
أجريت للمسجد عدة عمارات وتوسعات؛ إذ أعيد بناء المسجد في القرن التاسع عشر الميلادي، وتم ترميمه أوائل القرن العشرين، وخلال النصف الأول من القرن نفسه أنشئ مسجد جديد على الطراز ذاته بجوار المسجد القديم. وفي سنة 2009 انتهت أعمال ترميم في المسجد استغرقت عامين تحت إشراف المجلس الأعلى للآثار، وبلغت تكلفتها سبعة ملايين جنيه مصري، وشملت العمارة الجديدة توسعة ساحة الصلاة وتدعيم القبة، وتغيير الأسقف، بعد أن تعرض المسجد لحريق في يونيو 2007، وأثناء ذلك الترميم كُشف عن جدران المعبد التي كانت مطلية بدهانات تغطى معالم الأثر، وعند إزالتها ظهرت أعمدة وأعتاب عليها كتابات مصرية قديمة ترجع إلى عصر رمسيس الثاني

اسيبكم مع الصور

[Elawany13]

[img3]http://i.imgur.com/SUAgH.png[/img3]



- اليوم الأخير فى الأقصر -

- التوجه الى محطة قطار الأقصر -



رجعنا تانى للنايل كروز استريحنا شويه فى غرف الداى يوز وبعد كده أخدنا الحقائب وركبنا الاتوبيس للوصول الى محطة قطار الأقصر



هناك تجولنا شويه فى الأسواق القريبه من المحطة واتغدنيا فى مطعم قريب وركبنا قطار الـ V.I.P الجديد
وديه كانت تانى رحلة ليه كان زيرو بمعنى الكلمة

رحلة الذهاب من القاهره الى اسوان كانت فى قطار درجة أولى مكيفة التذكرة بـ 131 جنيه
الكراسى فخمة جدا وعريضة جدا بس القطار قديم ومتبهدل وعزل الصوت والاهتزازات جوه القطار سيئة جدا والحمامات زفت وقطران



ديه صورة كراسى قطار الصعيد السيئ جدا اللى ركبناه من القاهره الى اسوان

وانا راجع ركبت الـ V.I.P من الاقصر الدرجة الثانية بـ 150 جنيه مع العلم ان المسافة بين الاقصر واسوان حوالى 3 ساعات .. طبعا القطار علشان لسه داخل الخدمة جديد فهو لسه بشوكه بس بصراجة مش زى ما كنت متوقع ...مش معجزة ياعنى انا كنت راكب قطار درجة تانية مكيفة كان زيه بالضبط بس اللى بيزيد عليه ان فيه واى فاى مجانى بس زى قلته كل شوية يفصل وبطيئ جدا الكراسى ومساند الكراسى ضيقه جدا زى كراسى الدرجة التانية المكيفة النضيفة وموصلش لمستوى كراسى الدرجة الاولى كنت سامع ان فيه فيش كهرباء فى كل كرسى فوجئنا انها فيشه واحده فقط فى عربة القطار كله !!!
الجرار بتاع القطار جرار عادى جدا ومش سريع ولا نيله زى اى قطار وقفنا واتعطلنا كتير فى السكة مش V.I.P خالص



الميزة الوحيده العملية اللى فيه الحمامات كل عربة فيها 2 حمام فى منتهى النظافة والشياكة وفيه شاشة بتوضحلك هل الحمام فاضى ولا مشغول وفيها مياه ومناديل وصابون وفيه عامل واقف عليها بيتابع نظافتها ومش بيشحت











- نصائح لهذه الرحلة -

أولاً : طبعا لازم يكون معاك غيارات ولبس يكفى 3 أيام وأكل وشرب سندويتشات خفيفة كده وعصائر ومياه للرحلة الطويلة بس احذر من الحمامات لو هتركب قطار الصعيد الدرجة الأولى المكيفة حمامات زباله لا تصلح للاستهلاك الآدمى .. انما لو هتركب ال V.I.P حمامات 5 نجوم وفى منتهى النظافة

ثانيا : الموبايل لازم يكن مشحون على الآخر وياريت لو معاك باور بانك هيريحك جدا ولو هتركب قطار V.I.P
يكون معاك مشترك كهرباء ... لان كل عربية بيكون فيها فيشتين كهرباء بيخدموا العربية كلها



كنت محظوظ جدا ان فيشة الكهرباء الوحيده فى العربة جنب رجل ابنى



كنت عامل اللاب توب مشترك U.S.B لتوصيل العديد من الموبايلات لشحنها

ثالثا : انا لما روحت فى الصيف وفى الحر تعبنا جدا من التكييف البارد وكانت سقعه رهيبه بالذات فى قطار V.I.P
وكنت لابس كذا تيشرت فوق بعضه وكنت بحلم ان يبقى معايا جاكت شتوى تقيل علشان احس بالدفئ طبعا احنا دلوقتى فى الشتاء مش عارف بقى الآيه هتتعكس وهيبقى القطار حر ولا ايه ههههههههههه



رابعا : إلبس طبعا لبس مريح للمشى والحركة بالنسبة للمزارات الحركة بتكون بالاتوبيسات والحناطير والمشى مش كتير انما الجولات الحرة انت وراحتك بقى إمشى زى ما انت عاوز .... ادارة النايل كروز عملوا حركة جميلة قوى عملوا حفلة اسمها حفلة الجلابيه كل الناس اللى على النايل كروز مصريين وسائحين لبسوا العبايات والجلالليب والقعده بقت مرحرحه ومن ساعتها والتجول بالجلابيه أو العبايه فى الفندق العائم بقى حاجه طبيعية ولا تضر بالسياحة بالعكس هههههههههههههه



حفلة الجلابيه




جانب من الحفلات الترفيهيه على النايل كروز تصميم اشكال بالفوطه

خامسا : بالنسبة لركوب القطار فى بتاعه كده بتلف حوالين الرقبة (مسند للرقبة) علشان تسند راسك عليها وتريح اثناء الرحلة انصحك تجيب منهم ليك ولمرافقيك هتبقى اثمن حاجه فى الوقت ده شوفتها بتتباع فى كارفور فى قسم السيارات هبقى ديه صورتها



سادسا : بالنسبة للنايل كروز انت بتاخد خدمة 5 نجوم هتلاقى تكييف مركزى محترم ولحافات فايبر بزيادة .. رغم ان الجو كان حار جدا الا انى كنت بنام وبستغطى كويس باللحاف بسبب برودة التكييف بس عيبه ان مكنش فيه تحكم فى درجة الحرارة بس ممكن تتحكم فى سرعة المروحة فقط



سابعاً : بالنسبة لشراء الهدايا من هناك فالحالة هناك تعتبر ضنك بسبب قلة السياح ومحتاج شخص بيعرف يفاصل ويقدر قيمة الحاجه الحقيقية وإلا هينضحك عليه
ياعنى ممكن تسأل على تحف فرعونيه مثلا عجبتك هيقولك بعشرين ممكن كمان شويه تلاقى اخوه قاعد على نفس الفرشة ويقولك عشره وممكن تفاصل معاه وتنزلها لخمسه فخد بالك واحذر علشان مينضحكش عليك فيه هناك تمور كويسه ومشهورين بالكركديه الاسوان والفول السودانى الاسوانى بس عادى ياعنى انا مش حاسس بفروق كبيره

ثامناً : المصاريف انت مش محتاج فى ايدك فلوس كتيره علشان الحركة الكتيره بس لو معاك فلوس ممكن تسيبهم فى الخزنة اللى فى غرفتك فى النايل كروز وكده كده المرسى بيكون فى قلب مدينة أسوان والأقصر والبنوك وماكينات الـ A.T.M حواليك فى كل مكان



تاسعاً : بالنسبة للأطفال فى سن المرحلة الابتدائية طبعا بيقريفوا بسرعهومبيعجبهمش العجب وكانوا بيزهقوا بسرعه فى المعابد بس كانوا فى قمة الاستمتاع بالإقامه فى النايل كروز وبالأوبن بوفيه الأكل كان جميل جدا ومتنوع وحمام السباحة طبعا كان ليه معزة خاصه











عاشراً : بالنسبة للبالون اكيد متعه كبيرة وكان نفسى اطلعه بس حسيت ان سعره مبالغ فيه 250 جنيه وكان الحجز تبع شركة مصر للسياحة اللى كانت معانا باتوبيساتها ومرشدها السياحى بس انا سمعت انك لو طلعت مع نفسك وفاصلت ممكن تطلع نفس الرحلة ب 100 جنيه بس مش هى ديه المشكلة كان ممكن اطلعها اهى مره فى العمر
المشكلة الاكبر انها كانت فى وقت ضيق وصعب جدا بالنسبة لبرنامج الرحلة
طبعا كنت نايم متأخر بعد جولة حره فى الاقصر وعلشان تطلع البالون لازم تصحى 3:30 فجرا وكانت فى آخر يوم لينا فى الاقصر ياعنى يوم طويل وعريض وهنختمه بالسفر فى قطار الصعيد فمعرفتش اطلعها للأسف بالنسبة للأمان زمان رحلات البالون كانت غير آمنهكان كل من هب ودب ومعاه قرشين يجيب بالون ويشغله بدون رقابه فعاله تذكر حاجه كده زى التكاتيك فى شوارعنا بعد حادث السياح الشهير اتلغت رحلات البالون تماما وبعد فترة رجعت تانى لبعض الشركات فقط مش لكل من هب ودب بتدابير أمنيه صارمة وحراسة من الجيش والشرطه وعربيات اسعاف ومطافى بيكونوا متواجدين لحمايتك اثناء الرحلة وبقت آمنه تماما

- تمت بحمد الله -
وبكده انتهت الرحلة الممتعه ورجعنا فى قمة الراحة النفسيه والاعصاب هادئة ومسترخيه تماماً

[ahmed_eng2001]

تقرير رائع و مشوق جدا .... مشكور على نقل التجربة