استفسار عن المرتب المناسب للعيشه في مصر

[punisher]

لو واحد متجوز ومعاه مراته وطفلين وعايشين في دبي والراتب بتاعه في حدود ١٠٠٠٠ درهم بس بيصرف منهم تقريبا ٧٠٠٠ علي الاكل والشرب والسكن والمدارس من غير اي مصروفات للعلاج او الادويه

ينزل يستقر في مصر لما ياخد مرتب كام ؟

متقوليش خليه هناك احسن .

انا عايز اعرف كام مرتب تاخده في مصر يغنيك عن الغربه والبهدله وتعيش حياه كريمه وتحوش منه كمان

[MOUSTAFA_SAAD]

السؤال ده الوحيد اللى يعرف يجاوب عليه صح هو انت

[punisher]

ما ده اخويا مش انا

بس خلينا نقول لو عيله زيه وعايشين في مستوي كويس ومدارس كويسه يبقي محتاج كام ؟

هل مثلا ٥٠٠٠ // ١٠٠٠٠ // ١٥٠٠٠ // ٢٠٠٠٠ ؟

[Secret-Man]

حسب احتياجاتك انت ادرى بظروف مصاريفك الشهريه والالتزامات اى كان فى مصر او دبى
بس لو بنتكلم عن دبى 10 الاف دول لاسرة يادوب يعيشوا بس مع العلم ان فى من الاولاد مدارس ديه قصه تانيه لانه المدارس غاليه جدا فى الامارات

لو فى دبى او ابو ظبى من 15 الف وانت طالع ده افضل راتب لعيشه محترمه فى الامارات
فى مصر حسب برضه المكان الى انت عايش فيه والتزاماتك يعنى الى ساكن فى التجمع او اكتوبر او الرحاب غير الى ساكن فى مناطق متوسطة الدخل فى السكن والمصاريف اليوميه

[Mahmoud Naguib]

أنا هجابوك على السؤال ده بس تعالى نحسبها مع بعض
ف البداية زي ما الأستاذ moustafa_saad وضحلك محدش هيعرف يجابو على السؤال ده غير الشخص نفسه !

لو قلنا انك هتأجر مش هتسكن ف شقتك كدة حط 1000 ف المتوسط إيجار شقة صغيرة ف منطقة متوسطة يعني 12000 سنويا
لو أولادك دخلوا المدرسة خلاص وحابب تعلمهم هنا تعليم كويس يتناسب مع حياتك ف دبي احسب على الفرد 5000 سنويا ف المتوسط لو هيدخلوا مدرسة لغات متوسطة وغير دولية
مصاريف المعيشة المرتاحة هنا لأسرة بطفلين مش هتقل عن 3000 شهريا وده شامل الأكل والشرب واللبس والعلاج والإستهلاكات الشخصية

الملخص لو هتعيش ف شقة ملك يبقى أقل حاجة ممكن تقبل بيها ف مصر علشان تعيش مبسوط 5000 شهريا ودول يادوب هيكفوك كويس بس مش هتحوش منهم
ولو هتعيش ف ايجار زود 1000 أو أكتر على حسب المنطقة اللي هتسكن فيها

وأنا مش هقولك خليك هناك على طول بس على الاقل ف الوقت الحالي متنزلش لحين استقرار الأوضاع ووضوح الرؤية المستقبلية للبلد

[punisher]

هو فعلا بيدفع ١٤٠٠٠ درهم في الحضانه لبنته

هوا شقته موجوده في منطقه كويسه
و لما سألني قولتله ١٠٠٠٠ مناسب بس خايف اكون صدرته

يعني يا جماعه لو قولنا عيشه محترمه ليه واولاده يبقي محتاج كام ؟

انا عايز اقوله مبلغ بالزياده عشان ميتصدمش لو قولتله حاجه قليله

[MOUSTAFA_SAAD]

هو فعلا بيدفع ١٤٠٠٠ درهم في الحضانه لبنته

هوا شقته موجوده في منطقه كويسه
و لما سألني قولتله ١٠٠٠٠ مناسب بس خايف اكون صدرته

يعني يا جماعه لو قولنا عيشه محترمه ليه واولاده يبقي محتاج كام ؟

انا عايز اقوله مبلغ بالزياده عشان ميتصدمش لو قولتله حاجه قليله

انا رائى تقوله طالما ولاده و مراته معاه وده بيخفف احساس الغربه جدا وبيقدر يحوش 3000 درهم كل شهر يبقى يخليه هناك افضل على الاقل العيشه اامن واهدى وافضل من كل النواحى
الا اذا كان مش مرتاح فى شغله فده وضع تانى

[punisher]

هو فعلا مش مرتاح في شغله وحالته النفسيه مش كويسه وبيفكر يسيب الشغل بس كان ناوي ينزل مراته ويكمل لوحده لمده سنه وينزل

[punisher]

ال ٣٠٠٠ مش دايما لان بيجي عليه شهور مش بيحوش خاالص

بس كعيشه هما عايشين كويس جدا بس تحويش دي مش دايما

[brown-eyes]

من 10 ل 15 الف

[Bassem Youssef]

علي الاقل 15000 جنيه

ليا حد قريبي نفس الظروف دي تقريبا و بيصرف المبلغ المذكور

[volociximab]

طبعا هو اعلم بحاله
بس اقترح ينزل اسرته و يقعد يربط على نفسه يعمل مبلغ ينزل بيه مصر على ما يصرفه يشوف مكان تانى و يسافر
هو نازل عشان قرفان--لو رجع ممكن برضه يبقى اشد قرفا

[amrelsha3er]

سؤال صعب اجابته عند صاحب السؤال فعلا بتختلف حسب مصروف كل واحد بس غالبا من كلامك كده ومدارس وطفلين مش اقل من 5الاف فالشهر وانت قولت شقته تمليك ومدرسه هتبقى فالمتوسط للاولاد يعنى من 5ل7الاف معقول ان شاء الله

[omar101970]

انا مقيم انا واسرتى فى الكويت.
نصيحه مخلصه ما دام بيقدر يدخر 3 الاف درهم فى الشهر حتى لو مش بيدخر المبلغ دا كل شهر
ما دام عايش فى مستوى كويس مع اسرته فى الامارات فخليه يستمر هناك مهما كان تعبان فى شغله
كلنا تعبانين جدا فى شغلنا فى الخليج وفعلا بنقاسى جدا لكن الحمد لله بنتحمل وبنتعايش.

[ESO101]

لو دخله الشهري بين 10 - 15 وأكتر ينزل
معاناة الناس في مصر مش هتحس بيها
لو عايش في منطقة محترمة ودخلك كويس
لكن نصيحة مايستمرش في الضغط على نفسه
هيكسب فلوس على حساب حالته النفسية
لا مشكلة من النزول فترة عشان يكون قادر ياخد قرار
ويعيد شحن النفسية حتى لو مفيش الدخل القوي و فيها بعض الخسائر