مشاركات الأعضاء بالنسبه لعددهم ... ظاهره غريبه

[Mo3taz Selim]

السلام عليكم و رحمة الله و بركاته
... النهارده كان يوم رياضى عندى فى العمل .... المهم دخلت على السايت بتاعنا و دخلت على قائمة الأعضاء ....
و وجدت حاجه غريبه جدا إن إحنا دلوقتى وصلنا 1685 عضو و لله الحمد ... طبعا مش دى الحاجه الغريبه .... الأكثر من غريب فعلا و اللى كان بالنسبه لى صدمه غير متوقعه إن 1685 عضو دول منهم 870 عضو عدد مشاركاتهم 0 و الله عدد مشاركاتهم صفر يعنى أكثر من 50 % من العدد الكلى للأعضاء....
و 136 عضو عدد مشاركاتهم 1 و عدد 71 عضو عدد مشاركاتهم 2
و 342 عضو عدد مشاركاته من 10 إلى 500 مشاركه و 20 عضو فقط مشاركاتهم أكثر من 500
المهم عملت أحصائيه كده على أدى






تفتكروا أيه السبب اللى يخلى أكثر من 50% من عدد الأعضاء يتابعوا فقط دون أى مشاركه سوى تسجيل أسمائهم فى السايت كأعضاء؟؟؟؟

[temoo_110]

واللهى الله ينور عليك يا استاذ معتز
انا كان فى دماغى الموضوع ده وفكرت فيه كزا مره ومكنتش لاقى ليه حل
بس اللى جاه فى دماغى هو ان المشاركات قلت وناس كتير مش بتشارك
انا من رائى الشخصى وممكن اكون غلطان
اولا عدم اهتمام المشرفين بالرد السريع على اساس اللى بيعمل موضوع او بيسئال سؤال بيبقى محتاج الرد على السرعة وده بصراحة مش بلاقيه من المشرفين المفروض المشرفين تزيد شوية ويقسمو الوقت فى التواجد فى الموقع
تانى حاجة شريط المواضيع كان بيطلع فى كل صفحات الموقع ودلوقتى مش بيطلع غير فى الصفحة الرئيسية انا واحد من الناس بدخل على المنتدى الهيونداى على طول وقليل قوى لما بطلع الصفحة الرئيسية فبردوه الموضوع ده يكون ليه حل
ثالثا بعض المنشاكل اللى بتحدث بين الاعضاء بتخلى ناس ياما تخاف تشارك خوفا من الدخول فى مشاكل هما فى غنى عنها
وياريت اكون افتدت جزء بسيط من الواقع

[معاذ الشرباصى]

اولا شكرا جدا على الاحصائيات الجميلة دى

ممكن يكون سببها كذا حاجة

اولا فى كذا حد بيعمل اشتراك لمجرد انه يضع اعلان فى قسم البيع و الشراء

و فى ناس كتير, ودى اظن الغالبية بتتابع بس, ممكن بسب انه معندوش معلومة يضيقها, و ممكن انه معندوش جرأة انه يشارك (بيحرج, مش عارف يعبر عن سؤاله,شاف نقاش حاد بين كذا عضو,الخ....)

و فى برضه مجموعة كل اما تلاقى موقع جديد تشارك فيه و خلاص, و ممكن ميدخلش تانى

[Nader]

في الغالب دول اشتركوا بس علشان يقدروا يتابعوا كل الاقسام وممكن يكونوا معندهمش الخبرة الكافية للرد علي اي مشاركة.

بس دي ظاهرة سلبية مش ايجابية لان لازم الكل يفيد ويستفيد يعني مينفعش يبقي متلقي بس.

المفروض نخلي بغض الاقسام العليها ضغط او اقبال كبير من الاعضاء يكون لها حد ادني من المشاركات للتمكن من الدخول اليها.

[معاذ الشرباصى]

المفروض نخلي بغض الاقسام العليها ضغط او اقبال كبير من الاعضاء يكون لها حد ادني من المشاركات للتمكن من الدخول اليها.

ساعتها هتلاقيهم بيكتبوا اى حاجة فى اى حتة علشان يوصل لعدد المشاركات المطلوب و خلاص

صعب اوى الحل ده

[Nader]

طيب حد شايف حلول تانية؟؟

[temoo_110]

المفروض نخلي بغض الاقسام العليها ضغط او اقبال كبير من الاعضاء يكون لها حد ادني من المشاركات للتمكن من الدخول اليها.

ساعتها هتلاقيهم بيكتبوا اى حاجة فى اى حتة علشان يوصل لعدد المشاركات المطلوب و خلاص

صعب اوى الحل ده

عندك حق

[معاذ الشرباصى]

الحل اللى فى دماغى دلوقت ان العضو اللى مبيشاركش تتلغى العضوية بعد فترة (شهر مثلا من غير نشاط)

كده الى حد ما هيبقى فى رقم قريب من الفعلى للاعضاء الحقيقين للموقع, و العضو اللى فعلا حريص انه يفضل, هيخلى اشتراكه شغال على طول

كان فى حاجة بتتعمل زمان فى موقع ahly.com

و هى انك علشان تفتح موضوع لازم مشاركاتك تعدى ال 50 مشاركة

و المشاركات دى تبقى حقيقية, مش بتكتب اى حاجة فى اى حتة

و لو لقوا عضوا بيعمل كده, يلغى عضويته

بس مظنش برده ان ده كويس

لأن, العضو المشترك جديد بيبقى عاوز يسأل (المفروض يعنى) فمينفعش تمنعه انه يفتح موضوع جديد

[Abonora]

بصراحة انا مش شايفها مشكلة اوى خاصة وان مجتمع السيارات في مصر فعلا معلوماتة ضعيفة ومشوشة عن السيارات فضلا عن ان الوضع الطبيعي لاي مجتمع علي النت او غيرة ان تبقي نسبة المشاركين والمفيدين اقل من الربع كمان بس ده مش معناه اننا نحاول نفرض علي الناس انها تشارك يكفي دورنا في توعية الناس وتثقيفهم وده بشكل غير مباشر هيرفع من نسبة الاعضاء المشاركين

[Nader]

هي فكرة حلوة بس احنا هنا معندناش حد متفرغ للمتابعة وكدة فهيبقي صعب شوية.

[temoo_110]

هي فكرة حلوة بس احنا هنا معندناش حد متفرغ للمتابعة وكدة فهيبقي صعب شوية.

انا مقولتش حد يتفرغ لو لكل قسم تلات مشرفين مقسمين الوقت على فترة 12 ساعة او 18 ساعة اى حد هيكتب موضوع هيلاقى رد عليه وبصراحة يا استاذ نادر انت اكتر واحد فى المنتدى ده بيرود بسرعة حتى لو معندكش خلفية عن السؤال بتنصح اللى بيسائل ايه ممكن يعملوه

[Nader]

بصراحة انا مش شايفها مشكلة اوى خاصة وان مجتمع السيارات في مصر فعلا معلوماتة ضعيفة ومشوشة عن السيارات فضلا عن ان الوضع الطبيعي لاي مجتمع علي النت او غيرة ان تبقي نسبة المشاركين والمفيدين اقل من الربع

انا بقول بالنسبة للاحصائية علشان يكون في ارقام ونسب صحيحة يعني احنا نعتبر اقل من 1000 عضو لو هنتكلم عن نسب فعلية.

[اسلام المصرى]

يمكن برده أحد الأسباب أن الأغلبية العظمى بتكتب بالعربى و الكتابة بالعربى بالنسبة لحد متعود يكتب انجليزى على طول صعبة طبعا ده غير أن لوحة المفاتيح بتاعته ممكن متكونش فيها حروف عربى , و يمكن يكون السبب كمان هو الكسل , يعنى بيكسل يكتب , أنا شخصيا الكتابة بالعربى بتاخد منى وقت , أنا عارف ممكن نكتب أنجليزى بس الأغلبية بتكتب عربى و العربى اللى بالحروف مش مكانه هنا أعتقد - و هذا رأى الشخصى - و تقبلوا تحياتى :D

[Ahmed Hassan]

طيب احنا بنبص على المنتدى بس ليه؟؟ هو كام واحد من المسجلين في القوائم الانتخابيه بيشاركو في اللانتخابات؟
بلاش دي.. كام واحد بيشارك في اجتماعات النادي اللي مشترك فيه؟؟
بلاش دي كمان... كام واحد بشارك في اجتماعات اتحاد ملاك العماره الي هوه ساكن فيها؟؟؟

[vooooo]

يا شباب انا شايف ان المنتدى هنا أحسن من منتديات ابتدت قبلنا

دخلت على منتديات للسيارات من فتره و مافهاش كميه المعلومات ولا الناس اللى هنا و المشاركات برضه مش قد كده
و ممكن واحد يكتب موضوع و مايتردش عليه او ممكن يرد على نفسه

بس احنا مانقارنش نفسنا بالأسوأ و لازم نطور من نفسنا

بس أكيد فيه اعضاء أشتركوا فى المنتدى و لظروفهم مايقدروش يدخلوا المنتدى غير مره واحده فى الشهر او دخلوا و نسيوا الباسوورد او اشتركوا و مش عايزين يدخلوا تانى

فيه حل بسيط

تتلغى عضويه المشترك فى حاله عدم دخوله المنتدى لمده اسبوعين بس ممكن تتجدد تانى لو طلب ده
لكن مانحرمش اللى بيدخل المنتدى علشان يستفيد بمعلومه لأن المنتدى هنا للأفاده لكن مش علشان مشاركات كتير و خلاص