مشاركات الأعضاء بالنسبه لعددهم ... ظاهره غريبه

[د.أحمد سمير]

والله هذه نتيجة طبيعية جداً .. بل على العكس أنا أراها إيجابية ، فنسبة كبيرة من الأعضاء تكاد تقارب الثلثين في أغلب المنتديات والمواقع الافتراضية من واقع دراستي في رسالة الدكتوراه منعدمة المشاركة ، وهؤلاء إما بيكونوا أعضاء يستهدفون الحصول على المعلومة فقط ، أو أعضاء وقتيين دفعهم الفضول أو رغبة مؤقتة في الوصول إلينا ، ولكني أرى هنا أن هذه النسبة التي وصلنا إليها جيدة للغاية .
ولا تنسوا يا جماعة اننا منتدى تقني يعني مش كل شخص قادر على الإدلاء بدلوه في الموضوعات المطروحة فيه .
تقبلوا خالص مودتي

[modux]

اسمحولي اعمل مداخلة صغنتوتة

باعتباري من الاعضاء اللي كنت مش بشارك

يمكن وجهة نظري مش تعجب ناس كتير بس هقول عن الاسباب اللي خلتني ابقي active

اولا العربي : اسف اذا كان ده السبب بس انا عمري ما كتبت عربي علي الكمبيوتر

يمكن برده أحد الأسباب أن الأغلبية العظمى بتكتب بالعربى و الكتابة بالعربى بالنسبة لحد متعود يكتب انجليزى على طول صعبة طبعا ده غير أن لوحة المفاتيح بتاعته ممكن متكونش فيها حروف عربى , و يمكن يكون السبب كمان هو الكسل , يعنى بيكسل يكتب , أنا شخصيا الكتابة بالعربى بتاخد منى وقت , أنا عارف ممكن نكتب أنجليزى بس الأغلبية بتكتب عربى و العربى اللى بالحروف مش مكانه هنا أعتقد - و هذا رأى الشخصى - و تقبلوا تحياتى :D

اني عايز اكون مشرف علي احلي العربيات اللي بحبها ( الاوبل ) بس اكيد في ناس احسن مني في ده بس اديني بحاول

اني حسيت انكو فعلا مش مجرد ناس في سيت او فورم !!!
لا انتو فعلا اهل و اصحاب بجد

حسيت اني اناني اوي لو استفدت من غير ماافيد !!!

بس يا ريت رائي مش يزعلكو

[AHMAD_EMAD]

برضه يا جماعة الفترة اللي فاتت كانت فترة امتحانات ومناقشات مشاريع
واحد زيي لسه مناقش المشروع من 9 ساعات يا دوبك خدت دوش ونمت ولما صحيت علطول علي نايل موتورز
الفترة اللي فاتت كانت مقتصرة علي متابعة الاخبار اللي في شريط الاخبار بس
يمكن ناس كتير عجبهم الموقع واشتركوا ولكن بعد الامتحنات بيصيفوا او حاجة
لكن الموقع ده من اجمد مواقع السيارات وربنا يقلل الخناقات بين اعضاءه

[SAbuhashem]

I have a lot of topics and posts to post but i have no arabic keyboard and once i open a topic in english a little numer of members only who reply because of English i think :?
also to reply with an english in the topics will be not easy to explain as Egyptian accent in Arabic ( Like all the replies in the forum )

[ahmed1981]

أولا أشكر الأستاذ معتز على الإحصائية
ثانيا أنا شايف إن نتائج الإحصائية مبشرة بالخير

أما الإقتراحات (أننا نعمل حدود للمشاركات حتى يسمح بفتح موضوع جديد أو نعمل أقسام لا يدخلها إلا أصحاب مشاركات محددة أو نلغي إشتراك من لم يدخل لمدة شهر) ------------- أنا أعترض عليها كلها لأنها هتبوظ المنتدى

هتلاقي ناس داخلة تكتب أي حاجة عشان معلومة تعرف تاخدها
وبعدين في ناس بتدخل عشان مشكلة معينة في عربيته مثلا وياخد الردود يستفيد بيها
خير مفيش مانع من كده لأننا بنعرض العلم اللي نعرفه لإفادة الناس لله مش طالبين مقابل من حد
وبعد كده لما يستفيد من الردود هتلاقيه بيعمل دعاية طيبة لمنتدانا من نفسه
والله أعلم

[Tamer-Ezzat]

طيب المشاركات اللى اتمسحت مصيرها ايه ؟؟؟

طيب أ،ا مثلا شاركت فى كونتاك مشاركات عديدة وتقريبا مرة واحدة لقيت المشاركات كلها اتمسحت لمجرد انى قلت ان المنتدى بقى شئ مقرف (المشكلة اللى حصلت مع Payoo ) من بعدها قررت انى اصبح مطلع فقط وساعات كثيرة بحاول أمسك نفسى بس المرة دى مقدرتش وبحاول اوضح موقف ...
TEA

[memo_hefnawy]

بجد يا جماعه مش عارف أشكر كل من قال رايه و شارك بيه إذاى :)

بجد الواحد بيحس إنه فعلا وسط أسرته و بيته , كل من قال رأيه مشكور و كل من حاول بإقتراح جزاه الله خيرا و أنا مع ahmed1981 فى كلامه و مع الناس إللى قالت إن العربى بيتعب و يمنع ناس كثير

لدرجة أنا واحد صاحبى جالى قالى مش بعرف أكتب عربى و عندى إستفسار ممكن تكتبوهلى !!! و الله دى حقيقه
أنا زمان أول ما شاركت فى كونتاكت كنت بطئ جدا فى العربى بس مع الوقت عشان أتواصل مع الناس جييت على نفسى و بقيت أكتب بالعربى لحد ما بقيت أكتب فى بنفس سرعتى فى الإنجليزى تقريبا

و ذى ماقال وائل برده إحنا فى منتدى تقنى و ذى ما قال أحمد حسن إحنا كام واحد بيحضر إجتماعات إتحاد الملاك ؟ و كام و كام ................................للأسف إحنا إعلامنا زرع السلبية فى الناس على مرور ال 50 سنة إللى فاتت لحد ما أصبح الناس سلبيين لدرجة تفوق جمود الجليد

بس أدينا بنحاول و كل يوم بينضملنا عضو إيجابى جديد واحد هو مكسب لنا جميعا لأنه كلما ذاد الإيجابيون زادت المعرفه و زاد العلم لنا جميعا

وربنا يديم المعروف

[مصراوي جدا]

عندي سؤال بخصوص الاحصائيات ممكن لو عرفنا اجابته نفهم اكتر ليه فيه أعضاء كتير مش بتشارك
السؤال هو :
هل في الاحصائيات الجميلة دي احصائية تعرفنا عدد مرات دخول كل عضو الى المنتدى ويتم تصنيف الأعضاء على هذا الأساس
عايز أقول ان ممكن يكون فيه عضو بيدخل يوميا مرة واتنين وتلاته وبيستفيد ومتابع كل الموضوعات انما مش بيشارك لأحد الأسباب اللى ذكرها الأخوة الأفاضل
انما برضه ممكن نفاجأ من الاحصائية دي ان فيه نسبة كبيرة جدا من اللي مش بيشاركوا يكونوا دخلوا مرة واحدة ولا مرات معدودة أو مرة كل كام شهر
لكن في اي حال من الأحوال انا ضد فكرة وقف عضوية اي عضو لمجرد انه مش بيشارك

[memo_hefnawy]

مفيش وقف عضويات يا جماعه لأن المنتدى لنا جميعا و العلم للجميع لا يحق لأحد أن يقتصره على المشاكرين

أما مرات الدخول فمعظم الأعضاء إللى مش بتشارك بتدخل بس مش كثير

[Islam_galal]

ممكن نضيف تصنيف للعضو الذي لم يشارك لمدة شهرين مثلا : عضو مطنش :lol:
و بعد 6 شهور يبقي: عضو صدر له قرار هدم
و بعد 9 شهور نوقف عضويته

اما العضو الذي لا يدخل لمدة 3 شهور فاعتقد ان دي فترة معقولة لالغاء العضوية

[Mo3taz Selim]

شاكر لكم جميعا مناقشاتكم للموضوع و أسبابه :D :D
و من مشاركاتكم فى الموضوع نستطيع أن نخرج ببعض الأسباب و منها
- عدم سرعة الردود من جانب المشرفين عن الأستفسارات المقدمه من قبل الأعضاء و ده أعتقد إنه ليس عيبا بل ميزه لأن الإجابه إذا كانت متاحه عند المشرف لن يبخل بها بل أعتقد إن الكثيرين من الأعضاء و المشرفين يفضلون التأكد من الأجابه أولا قبل طرحها و ذلك مراعاة للأمانه.
- بالنسبه لشريط الموضوعات و عدم ظهوره داخل الصفحات فأعتقد إن ده مسألة وقت حتى الأنتقال إلى هوست أخر يكون أقوى
- أما موضوع إلغاء عضوية من لم يشارك فأنا ضده تماما ... لأننا كده هاندى صوره سيئه عننا للناس ...
- و بخصوص موضوع السلبيه ... فبصراحه كده و مش هاخبى عليكم انا فعلا كنت سلبى فى البدايه أيام كونتاكت و كنت بأخاف إنى أشارك يمكن تكون معلومتى مش صحيحه أو أسلوبى ما يعجبش حد ... لكن واحده واحده تشجعت
- أما حكاية الخوف من المشاركه لعدم الخوض فى خلافات أو حدوث منازعات فأعتقد إن ده ليس له ما يبرره لأننا فى الأول و فى الأخر إخوه و الأختلاف فى وجهات النظر لا يفسد للود قضيه كما يقال
- و بالنسبه لمشكلة الكتابه بالعربى ... أنا شايف إنها مش مشكله كبيره أوى لأن الواحد ممكن يتعلم الكتابه بالتكرار و الأستمرار و انا فعلا فى البدايه كنت بطىء جدا ... لكن دلوقتى الحمد لله و صلت لمرحله معقوله..

أعتقد ممكن نجرب موضوع لسه مفكر فيه حالا و أعتقد اللى يجاوبنا فى الموضوع ده هو المهندس محمود حفناوى ... الفكره هى إننا ممكن نبعت رسالة تذكير بصفه دوريه لكل عضو تذكره بأنه عضو معنا و إننا فى انتظار مشاركاته المثمره و ده ممكن يشجعه و يديله إحساس إن هناك من ينتظر تواجده أو شىء من هذا القبيل

و أرجوا منكم طرح حلول أخرى كى نستفيد جميعا و يزداد التواصل بيننا

[Abonora]

أولا أشكر الأستاذ معتز على الإحصائية
ثانيا أنا شايف إن نتائج الإحصائية مبشرة بالخير

أما الإقتراحات (أننا نعمل حدود للمشاركات حتى يسمح بفتح موضوع جديد أو نعمل أقسام لا يدخلها إلا أصحاب مشاركات محددة أو نلغي إشتراك من لم يدخل لمدة شهر) ------------- أنا أعترض عليها كلها لأنها هتبوظ المنتدى

هتلاقي ناس داخلة تكتب أي حاجة عشان معلومة تعرف تاخدها
وبعدين في ناس بتدخل عشان مشكلة معينة في عربيته مثلا وياخد الردود يستفيد بيها
خير مفيش مانع من كده لأننا بنعرض العلم اللي نعرفه لإفادة الناس لله مش طالبين مقابل من حد
وبعد كده لما يستفيد من الردود هتلاقيه بيعمل دعاية طيبة لمنتدانا من نفسه
والله أعلم

انا متفق معاك تماما ومع الدكتور احمد في كون ديه ظاهرة طبيعية

تاكيدا لكلام ahmed1981 هو تجربتي الشخصية مع منتدى كونتكت وده لان كونتكت مكانش اول منتدى اشترك فيه سواء عربي او مصرى او تقني بحكم مجالي كمهندس كمبيوتر وتخصصي الفرعي في نظم تشغيل وتقنيات مش متداولة في مصر اوي فبهتم اني اشترك في منتديات تقنية برة بس عمرى ما شاركت فيها قوى وفي منتديات مشاركتش فيها خالص وبكتفي بالمتابعة
طب هتقولى ايه اللي خلاك تشترك بفاعلية في كونتكت

اول مرة عملت مشاركة عشان اسئل عن البرايد سابا لانها كانت مجهولة لناس كتير وعايز اسمع من حد معاه نفس العربية وقدرا لقيت واحد بيرد عليا وبيقولي انها عربية حلوة وهيا نفسها البرايد القديمة مع تعديلات طفيفة حاولت اكلمة تاني اختفي بس لقيت هاني فراج بيرد عليا بداله وبياكد المعلومة

لما روحت واتفرجت عليها (وبحكم اني معايا برايد عصفورة) اتاكدت من الكلام واتحط اول اساس لثقتي في معلومات المنتدى

بعدها كملت دعبسة علي النت حتى سئلت ناس ايرانين وسورين علي الشات عن العربية فاطمنت اكتر واشتريتها

ولما جبتها كنت حاسس ان جزء من سعادتي بالعربية راجع لفضل كونتكت في تاكيد اختيارى

وفي اول اسبوع باظ فيوز مسؤول عن الكاسيت والاريال الكهرباء والساعة والولاعة تخيل عربيتك زيرو من غير كل ده حتي شريط القران مش عارف تشغلة

بعت المشكلة في كونتكت لقيت هاني فراج رد عليا وقالي علي الفيوز ورقمة ومكانة وووو
تاني يوم غيرتة لقيت كل حاجة اشتغلت

مبقيتش عارف اشكره ازاي واول ما لقيت فرصة انى اشوف الناس ديه في المقابلة روحت ومكنتش مصدق نفسي لما وصلت الربوة ولقيت في ناس فعلا موجوده وطبعا قعدتي معاهم اكدتلي ان الناس ديه ممتازة وساعتها شوفت هاني فراج وكريم منير وحفناوى وسبعاوي وشريف المصرى بجد حبيت الناس ديه وبقي الموضوع اكبر من منتدى وعربيات وده اللي خلانا نفكر في نايل موتورز ونشيل عبء انشاءة وتطويرة عشان بقي بيت او قهوة زي ما بيقول كريم تلمنا مع الناس اللي بنحبهم
معلش انا طولت عليكم بس حبيت اوضحلكم ان تعلق الناس بالمنتدى واصرارهم علي المشاركة مش بيجي من فراغ او من ضغط او اجبار بس بيجي لما تحب الناس اللي في المكان وتبقي واحد منهم

اخوكم وائل مجدى (ابونورا)

[مهندس محمد صلاح]

اقتراح الاخ معاذ اننا نلغى عضوية اللى ما بيشاركش ده فيه شوية ظلم لان مش المطلوب من العضو المشاركة الكتابية للعضو بقدر ما المطلوب انه يستفيد من المعلومه .. انت ممكن تلاقى 100 واحد بيركبوا عربيات ويسوقوا لكن منهم 5 فقط يفهموا فى الميكانيكا .. بالظبط كده المنتدى فيه 1600 واحد بيتلقوا المعلومه منهم عشرين تلاتين واحد فقط عندهم معلومات او ملكة توصيل المعلومه للناس وانا اعتقد انه كلما قل عدد المشاركين بمعلومات سليمه ومقنعه افضل من مشاركة الكثير بمعلومات متضاربه ومش سليمة وحتبقى فوضى معلوماتية .. وزى ما قال الاخ ابو نورا ان دورنا فى توعية الناس وتثقيفهم مش تطفيشهم من المنتدى . وبعدين برضة نضع فى الاعتبار ملحوظة الاخ اسلام ان مش كل الناس سريع او بيعرف فى كتابة اللغة العربية او ان الكى برد بتاعه مش مجهز للعربى .. بالنسبة للاخ فووووو انا شايف انك تلغى عضويه واحد ما دخلش المنتدى لمدة اسبوعين ظلم افرض عنده ظروف سفر مثلا او اى ظروف تانيه منعته من الدخول وبعدين ايه اللى حنستفاده من اننا نلغى عضويته .. خسرنا واحد والسلام .. وكلام الدكتور احمد سمير مقنع طبعا ان معظم الناس وانا واحد منهم دفعهم الفضول او الرغبة فى الوصول الينا ومش كل شخص قادر على الادلاء بدلوه فى الموضوعات .. وعلى فكرة انا واحد من الناس اللى اتمنى يصل عددنا الى 10000 متابع وكفايه علينا 100 واحد بس نستفيد منهم

[goodwave]

موضوع حيوي وشكرا على طرحه يا استاذ معتز! بس انا والله شايف ان السلبية في المنتدى قلت جدا عن الاول وان كنت واحد من الاعضاء السلبيين وحبة حبة بدات اشارك. مش بس موضوع خبرة ! لا! دة بردة موضوع حب وفهم لقواعد المنتدى والعقليات المشاركة.

يعني مثلا انا عضو نشيط قوي بس عمري ما شاركت في الاراء الفنية ولا المنتدى التعليمي ! لية؟ لاني مبفهمش فيهم! على الجانب الاخر تلاقيني لابد دايما في ورشة نايل موتورز والموقع التعليمي. لية؟ علشان غاوي اتعلم.

وبناء علية:

1- اتفق ان المنتدى للجميع ولا يجب حجب عضوية عضو إلا إذا انعدمت زيارته للموقع اكتر من 6 شهور.

2- الموقع للجميع واعتقد المتفرجين والمتصفحين للمنتدى بيعملوا للمنتدى دعاية اكتر من المشاركين والمشرفين!

3- موضوع تقييم العضو على انه نشيط او فعال او كذا او كذا يحتاج اعادة نظر! اتفق ان عدد المشاركات مهم ولكن المحتوى بتاع المشاركات يجب ان ياخذ في عين الاعتبار ويجب ان يخضع (إن امكن) لرقابة الاشراف.

مثلا انا لو عضو جديد و جيت كدة قضيت يوم كامل قدام شاشة الكمبيوتر داخل المنتدي مش بعمل حاجة غير اني استعرض موضوع وادوس على زر الرد واكتب "شكرا" او "الله ينور" او "مجهود رائع" او "smiling face" حبص الاقي نفسي في اخر اليوم بقيت عضو فعال او عضو ذهبي! مش كدة ؟

فرجاء من الادارة اعادة النظر في هذا الموضوع ومن الممكن وضع حد ادنى للسطور او الكلمات لكي تعتبر مشاركة.

ممكن بردة انشاء موضوع جديد للمناقشة يحتسب لة اكثر من نقطة.

فيما عدا ذلك منتدانا زي الفل وربنا يزيد ويبارك

[Mina W]

بالطبع المشاركة السلبية غير محببة، بس فى ناس زى كده ياما لسة جايب عربية جديد و ميعرفش فيها او معندوش عربية اصلا 8) ، و بالطبع بيبقى مشاركته قليلة او معدومة.
لكن الغريب ان اكيد كل واحد منا بيحصل معاه موقف ممكن يكتبه علشان غير يتنبه او يستفيد، يعنى انا مثلا سألت على صيانة العربية البيكانتو محدش رد عليا، و انا متأكد ان فى ناس معاها العربية و مشتركه فى المنتدى و كل اللى كنت عايز اعرفه ايه اللى بيحصل فى صيانة 5000 و ده مش محتاج غير ان كل واحد يساهم باللى يعرفه من خلال تجربته، قد يصيب او يخطى بس فى الحالتين افاد، لان حتى لو اخطىء اكيد حد هياخد باله و هيقول انه ده خطأ و بالتالى هيمنع ان حد يكرر نفس الخطأ. :arrow: