TE Data طلعت روحي وكرهتني في النت

[moudy88]

بقالي 16 يوم والنت مقطوع عندي واخواننا بتوع الدعم الفني مطنشين بكل تناكه ... الحكايه ان الdsl connection قاطع ...وبيجي لما استخدام التليفون وبيقطع لما بقفل التليفون ...وكلمتهم وقالولي ان العيب من شركة الاتصالات ...بتوع السنترال جيهم مشكورين مرتين واتاكدوا ان كل الوصلات سليمه ومفيش مشاكل من ناحيتهم ..وبعد كده كلمت بتوع TE DATA برده مش مصدقين ..وبيردو بكل عجرفه وان العيب مش من عندهم ...وانا دلوقت خسرت 16 يوم من الشهر اللي الفات والشهر خلص ومش عارف ادفع الاشتراك ولا هاخسر الشهر كامل وكلمت الدعم الفني على النت ( chat ) وقالي ادفع الاول وبعد اشتكي وقلته انا ايه اللي ضمنني اني ماخسرش الشهر لو دفعت ..قالي ( iam not gurantee you anything ) ..وانا اصلا من اول لما اشتركت معاهم من سنه ونص والنت بيقطع في اوقات من اليوم وكنت بستحمل وبقول عادي بيحصل عند كل الناس ...وبصراحه انا عايز اشتيكهم وعايز ارجع حقي ومش عايز اتنازل زي معظم المصريين اللي بالسهل بيتنازلوا عن حقهم ...ياريت اللي عنده حل يقول وياريت رقم الشكاوى بتاع هيئه الاتصالات

[mramzy]

بينى وبينك من ساعه مابقى 70 % وهما اتغروا وبقوا كلهم مشاكل غلبوا لينك والله
احسن شكره عن تجربه فى الدعم والاهتمام بالعميل الله يرحمها ايجى نت ( اشترتها اتصالات هى ونور اون لاين )

[Sharky]

المشكلة دى كانت عندى + ان التليفون كان بيوش ووصل فى الاخر إنه يشتغل نصف ساعة و يفصل نصف ساعة و فى الأخر طلع العيب من المصرية للإتصالات مش شركة لينك

و بعد خناقات و الشكوى للـ NTRA تم نقلى على Box جديد لحل هذه المشكلة

[M.Mostafa80]

هيئه الأتصالات رقمها 155 وانا طالع عينى معاهم بردو أنا قعد عندى يومين مزاولنى أحلى مزاوله يقطع ويرجع فى الساعه مالا يقل عن 15 مره
حاجه تخنق

[NaderNabil]

ممكن تجيب أفو ميتر و تقيس الفولت الخارج بتاع الكهرباء من الفيش؟

جرب و قولي النتيجة

[morsi]

اللى اغرب من كل ده ياجماعة أن أخر كل شهر يعنى تقريباً من يوم 28 بيكون النت مظبوط جداً وسريع جداً طبعاً علشان لما الناس تروح تدفع الاشتراك ماتشتكيش من التقطيع والبطء وبعد كدا على يوم 5 فى الشهر يرجع تانى النت هباب وبلى ازرق وبطء وتقطيع.حد لاحظ الموضوع ده؟

[moudy88]

المشكلة دى كانت عندى + ان التليفون كان بيوش ووصل فى الاخر إنه يشتغل نصف ساعة و يفصل نصف ساعة و فى الأخر طلع العيب من المصرية للإتصالات مش شركة لينك

و بعد خناقات و الشكوى للـ NTRA تم نقلى على Box جديد لحل هذه المشكلة

ماهو بتوع المصريه للاتصالات قالوا العيب مش من عندهم وان العيب من ان الشبكه واقعه من te data ...وهبتدي النهارده رحله الشكاوي مع NTRA وربنا يسهل

ممكن تجيب أفو ميتر و تقيس الفولت الخارج بتاع الكهرباء من الفيش؟

جرب و قولي النتيجة

ممكن حضرتك توضح اكتر .... يعني اضبط الافو على ايه واقيس من الخارجي بتاع فيش التليفون ؟ (معلش اصل انا لسه طالب في اتصالات )

[أحمد كمال]

أظبط الافو على انه يقيس الفولت

و حط الطرفين على طرفي سلك التليفون اللي فيهم الحرارة



برضه جرب تغير السبليتر يمكن يكون معيوب ....

[sab3aawy]

انا بقى عندى حاجة اغرب من كدة حاليا ومش فاهمها

حرارة المصرية للاتصالات مقطوعة، لكن DSL بتاع TE-data شغال


حد فاهم ده يبقى ايه؟

[Ahmed Selim]

ممكن يكون الكابل اللى راجع من السبليتر على التليفون يا باشا

[أبو صلاح]

انا بقى عندى حاجة اغرب من كدة حاليا ومش فاهمها

حرارة المصرية للاتصالات مقطوعة، لكن dsl بتاع te-data شغال


حد فاهم ده يبقى ايه؟

ساعات بتحصل عندي بالذات لما يكون متأخر علي فاتورة ومدفعتهاش والمصرية فصلت الخط
لكن لو النت قطع عنك بسبب عدم السداد ورحت دفعت لما ييجو يرجعوا النت عندك تاني وانت مدفعتش فاتورة التليفون المصرية للاتصالات مش هترضى
وهترد عليك شركة النت وتقولك ادفع فاتورة التليفون الاول
ده كلام واقعي حصل معايا

[أحمد كمال]

انا بقى عندى حاجة اغرب من كدة حاليا ومش فاهمها

حرارة المصرية للاتصالات مقطوعة، لكن DSL بتاع TE-data شغال


حد فاهم ده يبقى ايه؟

شوف يا سيدي

ال DSL ده كتكنولوجيا عبارة عن Overlay Network

يعني شبكة فوق شبكة

يعني ايه؟

اول ما بدا انتشار ال Broadband كان الاتجاه في امريكا لاستخدام ال Cable Network

و دي شبكة كابلات بتاعة قنوات تليفزيونية

قالوا مانحط عليها انترنت كمان و تبقى فل

المشكلة الكبيرة ان الموضوع ده محتاج Infrastructure و استثمار وهمي


مهندس كندي صايع فكر في فكرة تانية


قال ما نستغل البنية التحتية بتاعة خطوط التليفون العادية

Twisted Pair

المشكلة المعروفة لكل من استخدم ال Dial Up

ان خط التليفون النحاسي Copper wire مش بيشيل سرعة اعلى من 56 كيلوبت/ ثانية و دي سرعة تعبانة جدا


الصايع ده قال ده كلام سليم بس احنا بنستغل حيز ترددي صغير جدا من الخط اللي هو بتاع الصوت اللي هو 4 كيلو هرتز


طيب قال احنا ممكن نفتح عشرات القنوات على نفس الخط

كل قناة سرعتها 56 بس على تردد مختلف


و كمان نبعد غن الحيز الترددي بتاع ال 4 كيلوهرتز عشان ما نشغلش خط التليفون و تقدر تستعمل التليفون و النت شغال


كده هو حقق المعادلة الصعبة ....


اللي بيحصل ايه بقى



الخط بتاعك في السنترال بيبقى مصدره السويتش الضخم بتاع الخطوط كلها ..... بيخرج كابل من السويتش ده لحاجة اسمها الفريم و دي اللي واصل عليها الخطوط من السنترال لتحت الارض لحد بيتك ..... في بيتك الخط واصل على عدد التليفون و شغال عادي جدا


عشان ال DSL يشتغل لازم نعمل حاجتين

شركة ال DSL بتعمل حاجة اسمها "تدبيس الخط"


هما بيبقى عندهم في السنترال حاجة اسمها DSLAM
DSL Access Multiplexer

ده جهاز واصل بالانترنت بسرعة عالية جدا و بيتوصل بخطوط المشتركين

بيقطعوا الاتصال بين السويتش و الفريم للخط بتاعك

و بيبقى الخط واصل كالاتي

السويتش ---------- ال DSLAM ------------ الفريم ------------- الكابينة في شارعكم ------------ بيتك


ال DSLAM بتديك التوصيلة بتاعة الانترنت على الترددات اللي فوق 4 كيلو هرتز

عشان كده انت في البيت بتحتاج سبليتر ..... ال DSLAM بيدمج خطين في بعض اللي هما التليفون و الانترنت ... و السبليتر في بيتك بيرجع يفصلهم تاني خطين

و هو ببساطة عبارة عن فلترين ..... Low Pass Filter and High Pass Filter

و الاتنين ال Threshold بتاعهم 4 كيلوهرتز

يعني الاول بيعدي الترددات تحت 4 كيلوهرتز فقط ( و ده البورت بتاع التليفون)

و التاني فوق 4 كيلوهرتز فقط (و ده بتاع الراوتر او مودم ال DSL)






كل المقدمة دي عشان في الاخر نوصل لان ازاي الخط يبقى مش شغال Voice بس شغال Data

ان المصرية للاتصالات لما تحب تقطع عنك الحرارة بتقطعها بانها تعمل لك Disable عالسويتش

بس بتفضل الوصلة من ال DSLAM للفريم للكابينة للبيت للسبليتر للراوتر سليمة :)




انا مرة قدمت على نقل خط التليفون لمكان اخر

قطعوا عني الحرارة

و اتاخرت في العزال

الخلاصة اني قعدت شهرين ال DSL شغال زي الفل بس مفيش حرارة هههههههههه


ارجو اني اكون افدتكم

[galilio_mad]

tedata من اسوأ شركات الانترنت فى مصر , خدمة و معاملة و كله كله
لمل غيرت الشركة ركبت معاهم و لغيت بعد 3 اسابيع بعد ييجى 15 مكالمة خدمة عملاء و شكوتين فى تنظيم الاتصالات
و ركبت مع لينك و بكل امانة من شهر 8 اللى فات مكلمتش الدعم الفنى غير مرة واحدة و كانت مشكلة عامة و رجعت الخدمة بعد نص ساعة

كذا حد اعرفه بيشتكوا من tedata فى سنترالات زى الماظة , مصر الجديدة , النزهة , مدينة نصر , القبة
كفاية حضراتكم لما تروحوا اى مركز ليهم تسمعوا كمية زعيق و شتيمة و خناق من الناس اللى طلع عنيها معاهم

[marsguy]

في حاجه مهمه

دايماً اللي بيبان هم الناس المتضايقين

عشان طبيعي اللي متضايق بيروح يزعق وصوته بيعلي والكل بياخد باله منه، لكن الراضي والمبسوط بيروح يدفع ويمشي في سلام

على فكره أنا مشترك في تي إي داتا بقالي 5 سنين وما حصلتليش معاهم تقريباً ولا مشكله

ويكفي إن لما الكابلات البحريه إتقطعت النت قطعت عند أصحابي المشتركين في شركات تانيه وما قطعتش عندي

وعل فكره، الـ ntra دية فكره كويسه

عشان كتير بيكون كل شركه فعلاً شايفه إن ما عندهمش مشكله، فا لازم اللي يحكم بينهم يكون حد محايد ويكون فاهم في شغل الشركتين.

[أبومعاذ]

بقالي 16 يوم والنت مقطوع عندي واخواننا بتوع الدعم الفني مطنشين بكل تناكه ... الحكايه ان الdsl connection قاطع ...وبيجي لما استخدام التليفون وبيقطع لما بقفل التليفون ...وكلمتهم وقالولي ان العيب من شركة الاتصالات ...بتوع السنترال جيهم مشكورين مرتين واتاكدوا ان كل الوصلات سليمه ومفيش مشاكل من ناحيتهم ..وبعد كده كلمت بتوع TE DATA برده مش مصدقين ..وبيردو بكل عجرفه وان العيب مش من عندهم ...وانا دلوقت خسرت 16 يوم من الشهر اللي الفات والشهر خلص ومش عارف ادفع الاشتراك ولا هاخسر الشهر كامل وكلمت الدعم الفني على النت ( chat ) وقالي ادفع الاول وبعد اشتكي وقلته انا ايه اللي ضمنني اني ماخسرش الشهر لو دفعت ..قالي ( iam not gurantee you anything ) ..وانا اصلا من اول لما اشتركت معاهم من سنه ونص والنت بيقطع في اوقات من اليوم وكنت بستحمل وبقول عادي بيحصل عند كل الناس ...وبصراحه انا عايز اشتيكهم وعايز ارجع حقي ومش عايز اتنازل زي معظم المصريين اللي بالسهل بيتنازلوا عن حقهم ...ياريت اللي عنده حل يقول وياريت رقم الشكاوى بتاع هيئه الاتصالات

أغلب المشاكل اللي من النوعية دي بتكون بسبب التركيب الخاطئ من ناحية حضرتك او سلك التليفون عليه noise تمنع الdsl
تركيب ال dsl السليم بيكون عن طريق فصل خط التليفون عند اول دخلة ليه في الشقة و تركيب السبليتر ثم التوزيع من بعد السبليتر للحرارة و الdsl بحيث لو عند حضرتك 3 او 4 فيش تليفون في الشقة يكونوا كلهم واخدين من مصدر واحد في الاخر اللي هوا السبليتر
بتوع المصرية للاتصالات مبيفهموش dsl فلما بييجي عند حضرتك بيجرب خط التليفون (الحرارة) و يقولك الخط تمام لكن في معلومة مهمة ان الخط ممكن يكون شغال حرارة و مش شغال دي اس ال لان الدي اس ال بيحتاج الخط يكون حالته ممتازة و دا مش موجود في اغلب خطوط التليفون
ابعتلي رسالة على الخاص فيها رقم تليفون ال dsl وربنا يسهل