منتهى قله الادب

[ams]

انا حصل معايا و مع والدي موقف عمري ما هنساه

كنا بنجيب باقي الورق بتاع العربية من المعرض اللي اشتريناها منه عشان نبدأ حوارات الترخيص ...
و المعرض برضه في مكان زحمة و سوق و في ناس كتير ماشية عاليمين و عالشمال و في النص و كدا..
كان والدي هو اللي سايق و كان في واحدة في من شكلها كدا جامعية يعني في سنى ولا حاجة ماشية قدام عربيتان بالظبط ... اقول لأبويا كلكسلها عشان توسع .. يوقللي لأ الكلاكس بيعمل إزعاج عالفاضي.. اقوله يا بابا انت هنا في مصر مش في دبي يقوللي لأ ... راحت البنت واقفة فجأة معرفش لية و العربية لمستها!
و جاتلنا بقى
هو مفيش كلاكس
و اللي اخترع الكلاكس عمله لية
و كلام من دا
و والدي يقولها انا اسف يا آنسة بس انت اللي وقفتي في نص الشارع فجأة .. مفيش فايدة و مشيت و هي بتبرطم.!!
طبعاً بعض الناس في الشارع : ما تحاسب يا أستاذ على الغلابة اللي في الشارع ..
طبعاً كل دا و العربية مكنتش لسة علقت نمر!!!

والدك راجل محترم ربنا يكرمه

[sarah5]

فعلا الناس بقت غريبة اوي تديهم في كلاكسات عشان يوسعوا زي ميكونوا مبيسمعوش انا بقيت اريح دماغي واستناهم يمشوا براحتهم وانا عموما بحاول اكون كويسة واعدي كل الناس واستناهم لدرجة ان الناس من كتر انهم اتعودوا علي قلة الزوق لما بقفلهم عشان يعدوا مبيصدقوش بنفضل سنة نتعازم وطبعا مبسلمش من كلاكسات العربيات اللي ورايا كل واحد لازم يكون عنده ضمير ورحمة اقصد ان كل واحد لازم يبدأ من نفسه وميقولش مهو كل الناس بتعمل كده واحنا ليه نغلط طالما في ايدينا ان احنا علي الاقل نكون كويسين ياريت بلاش خناقات في الشارع لانها احيانا بتعمل مشاكل اكتر وشكرا

[aboalm]

أنا حا أضحكم انا متعود على الوقوف لو فى حد عايز يعدى خصوصا لو سنه كبير . كان عندى شغل فى المنصوره و لاحظت هناك انك علشان تعدى الشارع محتاج لعملية انتحاريه بصراحه ما حدش بيقف نهائى تقريبا غير لو كانت حركة الشارع متوقفه لوحدها .المهم كنت بعربيتى وجت واحده ست بتعدى فوقفت لها زى ما انا متعود هيا طبعا مش متعوده و مش رضيت تعدى بصيت لها و شاورت بأيدى اتفضلى فضلت تبص لى و مش مقتنعه كأنى عايز اخبطها مثلا لو جت تعدى فضلنا نبص لبعض بتاع 15 او 20 ثانيه و فى الاخر برضه مش اقتنعت انها تعدى

[ashouhdy]

انا ابديت الاحظ ان دة مش قلة ذوق بس
دة حقد طبقى كأن اللى راكب عربية دة سارقها او حرامى او فلوسة مش حلال
عشان كدة دايما بقيت متوقع رد فعل الناس اللى فى الشارع
مستحيل حد يقف مع صاحب العربية حتى لو على حق دايما بيقوفوا مع اللى ماشى ع رجلة
طبعا مش بعمم ع الكل بس 90% حقد طبقى و نظرات غل و قرف للألى سايق العربية من السادة المشاة الطبعيين
و اللى اكدلى كدة
فى المناطق الراقية مهما كان الزحام الناس بتوسع للكلاكس عادى و مش بتبص ع العربية ولا اللى سايقها
فى المناطق الشعبية الفقيرة 90% لازم
1) يقف تماما يبصلك بقرف
2) يقولك عدى بقرف كأنة بيشتمك و كأنة بيمنن عليك بحق اللى هو حقك اصلا شارع دة مش رصيف
3)بعد ما تمشى لازم تسمع كلمة مش تمام مثال: ما هو لاقيها بالساهل و مش تعبان فى الفلوس و بابا جايبهالوة حتى لو كنت راجل كبير و بشعر ابيض

الكلمة الاكثر أنتشارا هو انتوا عشان راكبين عربيات تدوسوا على الناس الغلابة اللى ع رجليهم زيينا
و يا ويلك يا سواد ليلك لو فكرت ترد حتلاقى الشارع كلة عليك بالشتيمة و احيانا الضرب ع امثلة انت كمان بترد

فدة يا جماعة مش قلة ذوق ذى ما بتقولوا دة حقد طبقى و غل بجد
فى الاول كانوا بيصعبوا عليا و كنت ذوق
دلوقتى و أقسم بالله بتجنب المرور فى المناطق الشعبية الزحمة و بفضل ادفع اكتر من مناطق اغلى ذى كارفور و الهايبر عشان محتكش مع الناس اللى ذى دول

مش عايز حد يزعل منى بس دى الحقيقة و ذى ما فى الكويس فى العدل وانا قلت 90% مش كلهم

العبد لله سايق فيرنا بالتقسيط ومن مالى الخاص الحمد لله يعنى مش مرسيدس ولا بى أم

لكن انا شايف و حاسس ان البلد بقت غابة و المناطق الشعبية الزحمة خلاص على وشك الانفجار و التهام كل اللى حوالايها
و للعلم بالشىء انا عارف ان ملهمش ذنب للى هما فية هى البلد و المستوى الاقتصادى اللى عمل فيهم كدة و اكيد الظروف لو احسن مكنش حيكون دة الحال

دلوقتى انا بمشى و اللى يقول يقول بسمع و اسكت لانى عالاف لو وقفت حتبهدل و اتسرق و اتشتم
دة واحد قاللى يا ناس غور انت و عربيتك بقولة متشكرين راح مهبد ع الازاز و سقف العربية و ذعق وشتايم كأنى قلتلة حاجة تانية
حسبى الله ونعم الوكيل