لانى مش قادر اسامح يمكن حد يساعدنى

[MohaMed_Refaat]

انا والله عايز اقولك على الصح بس خايف اتكلم معاك فى حاجة و تطلع انت مدايق من حاجة تانية خالص .

يبقي الكلام رغى على الفاضي , و كويس انك امتلكت الجرأة لعرض موضوعك على المنتدى فما اكثر من الشخصيات المتدينة المحترمة , زى الحاج احمد و الدكتور احمد عبد الغنى , انتظر ارائهم و هما ان شاء الله يدلوك على اللى فيه الخير .

لا يا درش ولا يهمك ياباشا انا عارف انك من الاعضاء المحترمين جدا فى المنتدى .
وفعلا انا اترددت كتير فى عرض الموضوع بس لثقتى فى اخوانى اللى حيقفوا جمبى فى المنتدى هذة الثقة هى اللى خلتنى اعمل التوبيك
وانشاء اللة الحاج احمد يقدر يفيدنى لانى محاتج حد ينصحنى بجد فعلا
وشكرا على اهتمامك وردك يا درش
وجزاك اللة خيرا

[MohaMed_Refaat]

ربنا يهديك ويهدي والدتك ويكرمكم دنيا وآخرة
هو الموضوع محدش حيقدر يقول فيه كلمة تقدر تفيدك ... لإن محدش حيكون عارف التفاصيل زيك ... والشعارات والعبارات والكلام إللي ممكن يتقال في الحالات إللي زي ديه أنت عارفه
فلا أملك لك غير الدعاء إن ربنا يكرمك ويفك كربك وربنا إن شاء الله حيصلح ذات بينكم ... الأم أم مهما كانت قاسبة

امبن يا رب ربنا يهدى جميع المسلمين
وشكرا لردك واهتمامك .
فعلا الام ام ودة اللى انا عايز اعملة عايز استرد علاقتى الطبيعية مع والداتى زى اى ابن بس مش قادر .

[SOBKY]

يا محمد يا رفعت احنا هنا كلنا اخوان و بنحب بعض و بنحب الخير لبعض..
و يا رب نقدر نساعدك باي شكل من الاشكال ...

[MohaMed_Refaat]

عيب عليك يا محمد احنا هنا بنساعد بعض وبنفيد بعض

ووقت ما يكون حد فينا مخنوق اكيد عايز يفضفض

انا سامعك يا محمد في الي حابب تقوله وهعقب عليه

a.yakout

طبعا كلنا اخوات واكبر دليل انى وثقت فى اخوانى فى المنتدى وعلمت موضوع زى دة
ولكن انا اقصد اذا كان فى حد من ضعاف النفوس لكنى لا اقصد انهم موجودين بينا هنا فى المنتدى او بين اى حد من الاعضاء

[HAMZAWY]

معلش استحمل
اصبر واحتسب ولك الجنة
مهما والدتك عملت فيك ماينفعش تحاسبها ولا تغلط فيها ولا حتى تزعلها منك حتعيش حياة زى الزفت واخرة وحشة جدا

[MohaMed_Refaat]

معلش يا محمد انا هختلف معاك

مفيش حاجه اسمها خارج التحكم طالما فدماغك اصول معينه و قيم اتربينا عليها

وهقولك في ردي الجاي موضوع حصل قدام عيني

a.yakout

لا طبعا احيانا الظروف بتكون اقوى من البشر
ولكل نفس بشرية قدرة معينة على المسامحة وقدرة معينة على تقبل الظلم .
الرسول صلى اللة علية وسلم بيقول
ليس الشديد بالصرعة الشديد من يملك نفسة وقت الغضب .
ودة دليل على ان لكل نفس بشرية قدرة على التحمل تختلف من شخص لاخر .
والحديث بيتكلم على وقت الغضب فماباللك باللى يتحمل كتييييييير من المعاملة السيئة.

[mohamed777]

السلام عليكم ورحمة الله وبركاتة
ياستاذ محمد يقول الله سبحانة وتعالى فى سورة لقمان

بسم الله الرحمن الرحيم

وَوَصَّيْنَا الإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ (14)
وَإِن جَاهَدَاكَ عَلَى أَن تُشْرِكَ بِي مَا لَيْسَ لَكَ بِهِ عِلْمٌ فَلا تُطِعْهُمَا وَصَاحِبْهُمَا فِي الدُّنْيَا مَعْرُوفًا وَاتَّبِعْ سَبِيلَ مَنْ أَنَابَ إِلَيَّ ثُمَّ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ (15)
يعنى حتى لو امروا الواحد بالكفر فصاحبهما فى الدنيا معروفا واظن مافى شىء بعد المجاهده على الكفر يكون اعظم
انا ياما حصلى مشاكل مع والدي وبسبب هذين الايتين يلاقونى ساكت معاهم ويعرفوا مين اللي غلطان ويصلحونى
وثانى شىء جعلة الله بعد الشرك بة هو عقوق الوالدين
انا مش بقول الكلام ده كدرس فى معاملة الوالدين ولكن ليفكر كل انسان الف مرة قبل ان يتصرف تصرف مع والدية يغضب الله سبحانة وتعالى
استعن باللة واصبر واحتسب الاجر عن الله

[MohaMed_Refaat]

يا محمد يا رفعت احنا هنا كلنا اخوان و بنحب بعض و بنحب الخير لبعض..
و يا رب نقدر نساعدك باي شكل من الاشكال ...

طبعا كلنا هنا اخوة
شكرا لردك واهتمامك
وجزاك اللة خير .

[MohaMed_Refaat]

معلش استحمل
اصبر واحتسب ولك الجنة
مهما والدتك عملت فيك ماينفعش تحاسبها ولا تغلط فيها ولا حتى تزعلها منك حتعيش حياة زى الزفت واخرة وحشة جدا

انا فعلا متضايق انى على خلاف مع والدتى ونفسى الخلاف يزول بس محتاج حد يدفعنى الى الطريق الصائب .
وينصحنى
(وذكر فان الذكرى تنفع المؤمنين)

[Ignition-Kid]

معلش اصبر واستحمل وانا عارف ان ده موقف من اصعب مايمكن , بجد صعب على اى حد لان دى والدتك مهما حصل.

طيب حضرتك ممكن تقولها على اللى مضايقك وموصلك للحاله دى , يعنى اتكلم معاها بصراحه وقلها قد ايه الموضوع تعبك وان كده صعب عليك.

ان شاء الله باذن الله كل حاجه تبقى تمام بس انت اصبر كده وحاول تتكلم معاها .

[nabaster]

الموقف باختصار يا محمد كان لشاب لسا يادوب مخلص الجامعه ولسا دي اول وظيفه هوا فيها

كان عينه علي بنت قريبته ومكنش ناوي يتقدم الا لما يحس انه قد الموضوع ده بحيس ميترفضش (لان كان يعتبر في فرق في المستوي الاجتماعي)

المهم الحمد لله ربنا وفقه وخطبها والكلام من ده بس كانت العقبه والدته وكل شويه مشاكل معاه

بس هوا كان رايه من دماغه ولحمد لله ربنا تممله علي خير واتجوز البنت دي

مش هقولك يا محمد انه عاش 15 سنه من اسوء سنين عمره كل يوم مشاكل وخناق وكل يوم نفس الموشح

بس زوجته دي اصراحه تستحق يتعمل ليها تمثال

استحملت والدته لكل الي كانت بتعمله معاها من شتيمه لتهزيق لكلام ميصحش يتقال علي زوجة ابنها

بلاوي يا محمد

ومكنتش حتي بتقول لجوزها علي الي حصل لما كان بيرجع من الشغل

وكانت تقوله روح زور مامتك لانها كانت مضايقه شويه

علي فكره يا محمد الولد ده وحيد علي 6 بنات

تخيل وصلت بالام دي بعد ما اتوفي جوزها (والد الشخص ده) انها وزعلت كل املاك جوزها علي البنات بس بدون اي اعتبار للولد ده مع انه ابنها الوحيد

بس هوا كان بيحتسب الاجر عند ربنا كان بيقول انا الحمد لله ربنا سترها عليا ومش محتاج اي شيء منها

بس كان بيقولها كلمه واحده بس

كان بيقولها مش هتلاقي غيري انا وولادي الي يشيلو الخشبه بتاعتك

واخد موقف من كل اخواته البنات

مر الوقت وحتي الشقه الي كانت فيها عطيتها لبنت من البنات وهيا راحت لشقه تانيه في دور عالي ومحدش كان مراعي ان العمر بيمشي لقدام مش بيرجع كله فرحان بالحاجات الوقتيه

كبرت وابتدت تعدي الـ 60 سنه

ومبقيتش تقدر تطلع للدور العالي وبنات امبارح الي كانو بيتمنولها الرضا ترضي

دلوقت كل واحده في شقه ومعاها جوزها مين طيب دلوقت الي هيستغني عن شقته؟؟؟

افتكرت دلوقت كل كلام ابنها دلوقت بس شافت عجزها وافتكرت ان القبر بيقرب

راحتله الشقه وعرضت عليها حسابها كله الي في البنك يكون تحت امره

علشان بس يرضي عنها ويسامحها

والله والمنظر ده شوفته قدام عيني والله العظيم وطت علي ايد مرات ابنها وكانت عايزه تبوسها وقالتلها انتي عملتي الي معملتهوش معايا بنت من البنات

كانت بتطلب بس انهم يسامحوها وانها فرقت في المعامله بس علشان العند ومعملتش حساب لاخرتها

بس ابنها رفض ياخد اي شيء وقالها الله اعلم مين هيموت قبل مين وسيبي كل شيء لوقته

البنات الي كانو امبارح فرحانين بالتوزيعه الي في نظرهم ده العدل

انهارده عرفو بقيمة اخوهم لما دي حصل معاها مشكله ومحدش عرف يخلصها غير اخوها

ولما دي كانت هتجوز بنتها ومفيش الي يشرفها غير اخوها ودي ودي ودي ودي

دلوقت بس عرفو بقيمته بس هوا متكلمش وكان بيراعي ربنا في العجوزه دي ولا كان بيلوم حد فيهم

واتوفت امه يا محمد بس اخر كلمه قالتها وكان هوا جمبها انه يارب يكون مسامحها

معلش يا محمد الموقف ممكن يكون طويل شويه

بس ده مش موقف ده عمر

بس بتمني تستفيد من الموقف ده وتراعي ربنا في والدتك وسيب الايام تثبتلها انتا مين

الزمن كفيل بأي شيء

ومتنساش ان دي والدتك

ده ملخص يا محمد وما خفي كان اعظم واعظم واعظم

A.Yakout

[الغزالى]

يا استاز محمد ربنا يسهلك امورك انت والحاجة عشان فعلان المشاكل مع الامهات دى بجد بتبقى كارثة وانا بئولك كة عن ترجبة معايا انا شخصيا وبجد بجد الام لقدر اللة لو دعت عليك وعزرونى فى الكلمة دى بجد بتبقى حاجة صعبة خصوصا لو هى كمان عندها حق فا ربنا يستر علينا وسهلنا احنا كل حابيبنا فى المنتدى وروق كدة بكرةة العيد وى هانعيد ماااااااااااااااااااااااء

[E30power]

انا عارف انك مش مستنى نصيحة من حد بس نفسك تفضتفض مع اهلك وحبايبك فى المنتدى .....انا مش هرغى كتير بس هقولك الى حاصل للاخويا .... حصل خلاف من سنتين بسبب اختى وجوزها والمهم اخويا شد معاة وكلنا قلنا الطلاق بس امى مرضيتش ووقفت فى صفة علشان ابن اخوتى ميترباش من غير اب ....واخويا حلف بالطلاق ان اختى لو رجعت لهى امة ولا يعرفها ولا هيكلمها تانى .... والحمد لله امى قدرت تختار صح لصالح بنتها وابنها الى ملهوش ذنب وخصوصا ان جوز اختى يبقى ابن خالى ومتوفى وهو جى نيتة خير .....وبقالة اكتر من سنتين لحد دلوقتى مش بيكلمها ولا بيكلم اختى وخلف ولا حتى عزم امى على السبوع.......والله والله مراتة وحماتة بتتحايل على امى انها تحاول تعقلة وترضى علية ...ومراتة هتتجنن من المشاكل الى عمالة تقابلة فى الشغل لدرجة انوا باع عربيتة واخر مرة تعب جامد وكان بيعيط علشان خايف يحصلة حاجة ومزعل امى منة لكن للاسف كلة راكب دماغة ومستنى التانى يبدا ..........شكلى برضك رغيت كتير :) .....
فعلا مهما كبرت انتا فى نظرها عيل ومسؤل منها......

[pro_samir]

أهم حاجة عليك بالدعاء بصدق وبكثرة ان ربنا يصفي نفسيتك من ناحيتها ... وحاول تنسي

[Sameh]

يا أستاذ محمد عايز أقولك كلمتين يا ريت تفكر فيهم
ماتعرفش الخير فين ويمكن اللى انت زعلان منه دلوقتى يكون هو الخير ليك بعدين سواء فى الدنيا أو فى الأخرة ، وربنا مابيضيعش عمل حد خلى بالك سواء بصبره أو إحتسابه أو رضاه أو إكرامه لأمه وربنا عالم باللى بيحصل واللى هيحصل وهو اللى مقدر ده إنه يحصل لحكمة هو بس اللى يعلمها
فياريت توقن إن ما يصيبك لم يكن ليخطأك وما أخطأك لم يكن ليصيبك ، وإن ربنا إختارك إنت تحديداً للقدر ده لحكمة عنده هو ، وإن ربنا مش ظالم أبداً بالعكس هو العدل ذاته ولا يمكن يظلم عباده بأقدار هو اللى كتبها ليهم ، عارف يعنى إيه كتبها لهم مش عليهم ؟
(قل لن يصيبنا إلا ما كتب الله لنا) لنا مش علينا ، يعنى اللى كتبه ربنا وقدره هو الخير ولصالحك مش عليك فتأكد إن الجزاء الخير فى إنتظارك إن شاء الله بس بشروط
أولها إنك تصبر و تحتسب ، يعنى تصبر وانت تبتغى بصبرك ده وجه الله وتطلب منه إنه يعوضك خير منه
ثانيها إياك تزعل أمك أو تعاملها بسوء مهما حصل وإلا تخسر خسارتين ، تخسر فى الإمتحان اللى ربنا بيبتليك بيه عشان يشوف هتصبر ولا هتفجر ، وهتخسر إنك ترتكب أكبر معصية ربنا حذر منها وأشار ليها بعد مسأله عبادته مباشرة لبيان أهميتها وعظم قدرها عنده سبحانه
فاصبر وتيقن إن اللى بيحصلك أياً كان فيه الخير ليك ، والخير ده مش هتناله غير بصبرك وإحتسابك وبرك بأمك ، ودايماً إختلق الأعذار للناس وسامحهم وخصوصاً لو أمك ، وخليك انت الأحسن وربنا عالم بكل اللى بيحصل ومش هيظلمك أبداً ولا هيضيع أجرك (إن الله لا يضيع أجر المحسنين)