إعـــــــلان

Collapse

.

,
See more
See less

حوار من القلب للقلب - الجزء الأول

Collapse
This topic is closed.
X
X
 
  • Filter
  • الوقت
  • Show
Clear All
new posts

  • المشاركة الأصلية كتبت بواسطة نور القمر مشاهدة المشاركة
    رنا اتفضلي الميلك شيك في الفاصل


    انتى مش هتبطلى المشاريب المضروبة دى بقي يا نو ولا ايه ؟؟

    Comment


    • المشاركة الأصلية كتبت بواسطة نور القمر مشاهدة المشاركة



      سيداتي آنساتي سادتي النهاردة معانا ضيفه جديدة من نايل موتورز
      بنوته امورة دمها خفيف محبوبة من الجميع لزوقها في الردود رحبوا معي بــ

      "
      "
      "
      "
      "
      "
      R A N A


      او بيردي او بيردي سابقا

      مبدئياً ربنا يخليكي يانور على ذوقك وكلامك الرقيق ده واللي حاساه كتير عليا اوي
      ثانياً بقي كل دي اسئلة ايش حال إن مكنتش موصياكي عليا يانووووووووووووور
      شكلك متوصتيش عيا إنتي اتوصيتي بيااااااا
      عموما ماشي
      استعنا علي الشقا بالله
      نبتدي بقي
      بسم الله الرحمن الرحيم


      رنا الجميلة اسمحيلنا في البداية نتعرف عليكي اكتر بنبذة مختصرة عنك
      انا ياستي رنا من القاهرة واسكن في القاهرة برده عندي 27 سنة ونص حاصلة على ليسانس اداب وتربية قسم لغة انجليزية دفعة 2002

      وبشتغل مساعد مدير عام في إحدى شركات القطاع الخاص

      ايه احلام رنا اللي قدرت تحققها
      انا كنت بحلم اني اتفوق في دراستي والحمد لله فعلا عديت كل مراحل الدراسة بتفوق وكنت شاطرة اوي ومجموعي في ثانوية عامة كان 92.5% أدبي
      واتخرجت من الكلية بتقدير جيد والحمد لله مكنتش بدبلر ولا بشيل مواد للسنة اللي بعديها وده طبعا توفيق من ربنا سبحانه وتعالي وطبعاً دعا الوالدين
      وكنت بحلم اني اشتغل وفعلا اشتغلت واتنقلت من شركة للتانية وبقيت كويسة في مجال شغلي بشهادة مديري من من كذا سنة والحمد لله
      وكنت بحلم اني اتعلم السواقة واجيب عربية وحققت الحلم الحمد لله
      وايه الاحلام اللي لسه هتحققها ان شاء الله
      بعد مابعت عربيتي طبعا بحلم اني اجيب عربية جديدة بقي ان شاء الله
      بحلم كمان اني اعمل حاجة افيد بيها الناس وارضي بيها ربنا وتكون في ميزان حسناتي بس لسة لم تتاح لي الفرصة لده
      بحلم اني يكون عندي اسرة ناجحة (إن شاء الله) لما اتجوز واجيب اطفال بحلم اربيهم كويس ويتعلموا امور دينهم ودنياهم على حد سواء
      رنا ايه رايك في الناس المنفسنه .. وياترى انتي ممكن تنفسني من ايه ؟؟

      بصي هو كلنا عندنا حب التنافس والغيرة الهادفة اللي تخلينا نحاول نتفوق في مجالنا ونحسن من نفسنا بدون مانضر الاخرين لكن متوصلش لدرجة اننا نتسبب في فقدان الاخرين مايملكونه عشان النفسنة دي
      ساعتها دي بتكون مرض ادعو الله إنه يشفي الناس المنفسنة منه وادعي ربنا اني ميبتلنيش ولا يبتلي حد بالمرض ده
      وعموما الناس المنفسنة بصراحة مش بعرف اتعامل معاهم اصلا
      وبحاول اتجنبهم علي قد ماقدر

      ممكن وصفه سحرية من رنا لاعضاء وعضوات المنتدى عن طريقه تجعل العضو محبوب من باقي الاعضاء
      هو الموضوع بسيط إننا نحاول منقولش ردود مستفزة تمس اراء أو شخصيات الأعضاء يعني لو فكرنا شوية في ردودنا وتأثيرها على باقي الأعضاء قبل مانردها صدقيني حاجات كتير ممكن تتغير وكمان منفضلش متحيزين لرأينا حتى لو كان خطأ (رغم إن كِبر البني ادم كتير بيمنعه من إنه يعلن إنه كان مخطئ في رأيه) لكن اللي يقدر يتغلب على الحتة دي يبقي فعلا من جواه انسان طيب وخلوق
      كمان إن اي حد فينا يعرف معلومة مفيدة (بس الاول يتأكد من مصادرها) يقولها لباقي الأعضاء عشان تحقيق الإستفادة
      وخدمة الناس هي اكتر حاجة تخليهم يحبوك (خير الناس انفعهم للناس)

      انتي لما تحسي انك غلطتي في حق حد سهل عليكي الاعتذار ولا لأ؟؟
      سهل جدا إني اعتذرله وافضل اعتذر لحد ماتأكد إنه سامحني لإن الحق ده هايفضل متعلق عند ربنا ليوم القيامة وهانتحاسب عليه
      وعلى فكرة أنا مش شايفة إن الإعتذار شئ يقلل من قدر صاحبه بالعكس ده بيعليه اكتر واكتر في نظر كل الناس حتى لو لم يقُبل إعتذاره وبيدل كمان على أنه انسان قوي قدر يتغلب على كبر نفسه واعتذر
      ناس كتير اوي اضعف من إنها تتغلب على كبر نفسها وتعتذر
      وصدقيني كلمة أنا اسف ليها مفعول السحر على ناس كتير حتى لو مسامحش من جواه مبيقدرش يعاتب أو يلوم بعدها

      لماحد يواجهك بصفه مش عاجباه في شخصيتك بتحاولي تغيري من نفسك ولا لأ؟؟
      بحاول على قد ماقدر بس ساعات بيكون صعب ومش بإيدي اني اغير من نفسي في الحتة دي
      أو لو اتغيرت شوية ورجعت تاني بكون من جوايا زعلانة من نفسي أوي بس بيكون خارج عن ارادتي طبعا
      بس شرف المحاولة يكفيني

      رنا ممكن كلمة مختصرة عن كل مما يأتي
      رغم إني مش بحب اتكلم كتير في الدين عشان القلق والمشاكل اللي بشوفها في المناقشات اللي من النوع ده إلا إني هارد وربنا يستر بقي
      الحجاب
      فرض على كل مسلمة عاقلة بالغة
      النقاب
      فضيلة في بعض المذاهب وفرض في مذاهب أخرى

      وليا ملحوظة بسيطة هنا أحب أقولها إن عندنا في الدين اكتر من مسألة خلافية منهم النقاب
      والقاعدة الفقهية بتقول لا إنكار في المسائل الخلافية ولكن الإنكار في المتفق عليه

      نايل موتورز
      منتدايا المُفضَل

      الصداقة
      أجمل شئ في حياة الفرد "لو كانت حقيقية"

      الاطفال
      نعمة من نعم الله

      الزواج
      قسمة ونصيب

      رنا اتفضلي الميلك شيك في الفاصل


      ميرسي أوي على الميلك شيك ده وعرفتي منين اني بحبه بالفرواله
      اشربه الميلك شيك الأول وبعدين اكمل بقي

      Comment


      • i think will be good i dea
        [RIGHT][I][SIZE=3]Fight Like a brave [/SIZE]
        [/I] [/RIGHT]

        Comment


        • ايه اول علقة اخدتيها يا رنة !

          كام مرة وانتى صغيرة الفلوس ضاعت منك !

          ايه احسن مكان فى القاهرة بتحبى تروحيه !

          ايه اكتر موقف محرج حصل لك !

          ايه اعلى درجة جبتيها فى حياتك الدراسية !

          ايه اكتر حاجة بتعرفى تعمليها وناجحة فيها وايه اكتر حاجة فاشلة فيها ومش هتعرفى تعمليها ابداااا !

          بتعرفى تطبخى :) !

          ايه هو شعورك لو ابنك راح يحارب !

          سنة 2009 تديها كام فى المية من السنين اللى فاتت من حيث السعادة والفرحة وكذلك !

          ونصيحة اوعى تشربي حاجة اصفرا من بتوع نور دول ..

          Comment


          • تريبل م انت شربت اصفرا واحمرا واخضرا وانت كويس اهو مفيش فيك حاجة
            بلاش تسوء سمعة البوفيه بتاعي يا درش

            Comment


            • المشاركة الأصلية كتبت بواسطة نور القمر مشاهدة المشاركة
              تريبل م انت شربت اصفرا واحمرا واخضرا وانت كويس اهو مفيش فيك حاجة
              بلاش تسوء سمعة البوفيه بتاعي يا درش
              هاهاها ده انتى اخدتى اجابات منى بالعافية .
              و كنت نايم نوم تغطاطيسي .. وخليتينى اقول ان انا المسئول عن تفجيرات المنتدى فى الفترة الماضية .
              يلا مش مهم متخافيش انا مش هقول لرنا على حاجة ..

              Comment


              • المشاركة الأصلية كتبت بواسطة نور القمر مشاهدة المشاركة


                اهلا بكم من جديد بعد الفاصل

                رنا اسمحيلنا نتعرف على جانب جديد من شخصيتك
                رنا هل تفضلي الزواج التقليدي ام الزواج عن حب؟؟

                بصي هو الموضوع ده شائك جدا
                وانا نفسي محتارة فيه لحد الآن ومش عارفة الاقيله إجابة لو حد يعرفله اجابة يقوللي
                يعني أنا عن نفسي ساعات بفضل الجواز التقليدي لإنه أأمن للبنت دينياً واجتماعياً
                لإني عشان افتح باب لحد يحبني واحبه هاتبقي مغامرة مش محسوبة بصراحة وساعتها انا اللي هاخسر لو هو طلع انسان مش كويس ومش جاد
                خصوصا إن دماغ الناس بقت وحشة اوي ومجرد مالبنت بتسمح لحد يدخل حياتها ويقرب منها ممكن يسيئوا بيها الظنون

                وفي نفس الوقت انا نفسي اللي اتجوزه اكون بحبه وعارفاه ومتوافقة معاه

                هي معادلة صعبة جدا بس ممكن المعرفة المبدئية تكون بالطريقة التقليدية وتكون في البداية بس وفي فترة الخطوبة يبتدوا بقي يعرفوا بعض كويس ويقربوا من بعض والحب هاييجي شوية بشوية طالما في قبول مبدئي يعني

                بصي أنا نفسي يجتمع الأتنين مع بعض
                إزاي مش عارفة

                رنا اذا شعرت بمشاعر خاصة عاطفية تجاه شخص معين ممكن تلمحي له ولا لأ؟؟

                هو محصلش قبل كده
                مستحيل يحصل إلا لو هو اللي بدأ وأبدي إستعداد كامل لتقبل المشاعر دي

                رنا بتتصرفي ازاي في المعاكسات؟؟
                سعات بطنش لما بتكون حاجة بسيطة ومش مٌسفَة
                لكن بتنرفز جدا لما يكون تعليق سافل
                بس برده هاعمل ايه يعني هاضربه؟
                بحقن في نفسي واقول في سري حسبي الله ونعم الوكيل هو هايروح من ربنا فين

                رنا انتي تحبي تتفرجي على فيلم رومانسي ولا اكشن ولا اجتماعي ؟؟
                طبعا بحب الافلام الرومانسية وبرده اتفرج على افلام الخيال العلمي والرعب اللي فيه suspense

                رنا ممكن تبكي من مشهد رومانسي في فيلم؟؟
                ايوة طبعا ممكن دموعي تنزل وطبعا اخواتي بيقعدوا يتريقوا عليا لو شافوني

                ايه مواصفات فارس احلامك ؟؟ وياترى هو ظهر ولا لسه ؟؟
                - يكون على قدر من التدين (يفضل أعلى مني طبعاً) وخلوق
                - يكون مصري
                - يكون أطول مني
                - يكون اكبر مني سنناً
                - يكون حنين
                - يكون صبور وعلى دراية بطبيعة المرأة وطرق التعامل معاها
                - يكون شكله بالنسبة ليا مقبول مش شرط يكون وسيم جدا وزي القمر يعني بس علي الاقل أكون انا متقبلة شكله وشايفاه حلو في عينيا يعني لما اشوفه اكون مستريحة

                - يكون قادر على مصاريف واعباء فتح بيت للزوجية
                مش شرط يكون غني يعني بس علي الاقل يقدر يفتح بيت

                (مع إن بيني وبينكم دلوقتي اللي يقدر يتجوز لازم يكون غني في ظل الظروف الحالية الجميلة اللي احنا فيها يعني )

                - وطبعا يحبني ونكون متفاهمين وفي بينا حوار ويحافظ عليا طبعاً

                وهو في الحقيقة لسة لم يظهر بعد

                فاصل قصير ونعود معكم من جديد مع رنا
                أنا طالبة دليفري ياجماعة اتغذي بقي وارجع اكمل
                ااااه صحيح اتفضلوا معايا

                Comment


                • المشاركة الأصلية كتبت بواسطة نور القمر مشاهدة المشاركة
                  رنا لو جات لك فرصة تكوني مديرة في مجال شغلك وهتكوني مديرة على اعز اصحابك وغلطت في شغلها ممكن تعاقبيها العقاب اللي تستحقه؟؟
                  بصراحة سؤال صعب اوي يانور
                  بصي هو طبعاً الموضوع في الشغل مش بيمشي كده اكيد بيكون في إنذار الأول
                  ساعتها طبعاً هاديها إنذار وانبهها إن لو الخطأ اتكرر الموضوع هايخرج من ايدي ومش هاقدر اتدخلها ساعتها
                  بس بعد الشغل بقي هاكلمها واراضيها وافهمها ان ده لمصلحتها هي كمان
                  ولو هي صاحبتي وبتحبني فعلاً هاتقدر موقفي وتفهم إن الشغل مينفعش فيه مجاملات ومينفعش إنها تضرني عشان صاحبتي

                  نفسك يكون عندك سلطة ونفوذ ؟؟
                  ساعات نفسي بتشتهيها وساعات بخاف لإنها مسئولية وحسابها عند ربنا مش سهل
                  تتمني تعيشي في بلد غير مصر؟؟
                  اتمنيت كتير اسافر بره خصوصاً بعد الحال اللي وصلنا ليه واللي بنسمعه عن الأحوال اللي تفرح في البلاد التانية
                  بس في نفس الوقت بحب مصر واتمني اني افضل عايشة فيها بس تتحسن وتتطور بقي عشان منطفش منها كلنا بجد

                  نفسك ايه يتغير في مصر؟؟
                  كل حاجة وحشة بنعاني منها لازم تتغير
                  من أول الشوارع الغير منظمة ومش نظيفة واحوال المرور والظروف المادية اللي كلنا بقينا نعاني منها
                  والبطالة ومستوى التعليم
                  كفاية كده يانور لحسن هاعيط واقلب عليكوا المواجع
                  لوجات لك فرصة تسكني في مدينة جديدة نائية بعيدة عن القاهرة ممكن توافقي؟؟
                  ايوة طبعاً اوافق واوافق ونص كمان
                  لإنها اكيد هاتكون متخططة كويس وهاتكون متنظمة اكتر من القاهرة اللي بقت عاملة زي علبة الكبريت المتنعكشة
                  واللي مبقاش نافع فيها تنظيم عايزة تتفضي كلها وتترتب من تاني

                  رنا لو جات لك فرصه لضرب بوش بالجزمة ممكن تنفيذها ولا هتخافي على مستقبلك؟؟
                  الصراحة انا من جوايا نفسي طبعاً
                  بس الصراحة راحة يعني
                  هاخاف على مستقبلي
                  انا في ناس عايزيني يانووووور




                  ياااااااااااااااااه
                  اخيرا خلصت الإمتحان الصعب ده :k40:
                  دي امتحانات الكلية كانت ارحم يانور

                  اخد نفسي بقي شوية

                  الا هي النتيجة هاتظهر امتي يانور؟
                  يارب انجح يارب انجح

                  Comment


                  • المشاركة الأصلية كتبت بواسطة Terrible_DaRsH مشاهدة المشاركة
                    ايه اول علقة اخدتيها يا رنة !


                    الصراحة علقة بمعني علقة يعني محصلتش
                    اصل الضرب مش وسيلة متعارف عليها عندنا في البيت لإنهم عندهم وسائل اخري اقوي من كده للعقاب تخليك تتمني انك تنضرب ارحم


                    كام مرة وانتى صغيرة الفلوس ضاعت منك !
                    ماما بتحكيلي على مرة زمان كانت مدياني فلوس اجيب حاجة والراجل اداني الباقي فكة عملات معدنية
                    على ماورحت البيت كانوا ضاعو كلهم
                    لدرجة ان ماما افتكرت الراجل مدانيش الباقي اصلا وراحت سألته قاللها اديتهملها بس فكة
                    ودي قصة من القصص المأثورة اللي ماما كل شوية تقعد تشرد وتحكيها عن حد فينا وهو صغير يعني عشان نقعد نضحك ونتريق كلنا

                    ايه احسن مكان فى القاهرة بتحبى تروحيه !
                    وسط البلد ومصر الجديدة عشان من ايام الكلية وانا وصاحبتي الأنتيم لينا فيهم ذكريات كتيرة وكانت كل خروجاتنا فيهم
                    (الله يرحمها بقي قبل ماتتجوز :K_crying[1]::k30:)
                    وبرده بحب سفاري اللي في طريق مصر اسكندرية وسيتي ستارز لو مش زحمة


                    ايه اكتر موقف محرج حصل لك !

                    المواقف كتير متعدش يادرش
                    بس بتحرج جدا لو جيت انطق كلمة مثلا واتلخبطت في حروفها خصوصا لو كلمة انجليزي حروفها ملغفنة شوية

                    ايه اعلى درجة جبتيها فى حياتك الدراسية !
                    تقريبا في الفرنساوي في ثانوية عامة جبت 47.5 من 50
                    ومعظم مواد الثانوية العامة كانت درجاتي كلها معدية ال 45 من 50

                    ايه اكتر حاجة بتعرفى تعمليها وناجحة فيها وايه اكتر حاجة فاشلة فيها ومش هتعرفى تعمليها ابداااا !
                    اكتر حاجة بعرف اعملها مجال شغلي يعني برامج الكمبيوتر اللي بستخدمها مثلا والفورمات اللي بعملها وال Trouble Shots بتاعة البرامج دي وطريقة المراسلات تكون ازاي وكده

                    واكتر حاجة فاشلة فيها هي مادة الفيزياء لما درستها في اولي ثانوي كنت بكرهها موووووووت وبسببها دخلت ادبي رغم اني كنت متفوقة في الكيمياء والاحياء
                    بتعرفى تطبخى :) !
                    ليه الإحراج ده بسسسسسسسس
                    هو في بعض الحاجات بعرف اعملها وبحاول اتعلم الباقي شوية بشوية

                    ايه هو شعورك لو ابنك راح يحارب !

                    هايكون عندي شعورين متناقضين
                    انا هابقي خايفة عليه طبعا ومش عايزاه يروح بحكم الخوف الطبيعي الغريزي بتاع الأم علي اولادها (اللي انا لسة مجربتوش الحقيقة)
                    لكني في نفس الوقت عارفه انه في سبيل الله ولو لاقدر الله مات في الحرب هايكون شهيد ويمكن يكون سبب في دخولنا الجنة انا وابوه وهو في الأول والأخر وديعة ربنا عندي وقد استردها وليس لي في الامر ده شئ.

                    سنة 2009 تديها كام فى المية من السنين اللى فاتت من حيث السعادة والفرحة وكذلك !
                    بالنسبة ليا انا على المستوي الشخصي يعني لسة لم تتضح ملامحها بعد هل هاتكون سنة سعيدة فعلا ولا ايه نظامها
                    بس خلينا نكون متفائلين شوية ونقول 50% سنة سعيدة
                    بس يارب متقلش عن كده بس خصوصاً بعد موضوع الأزمة العالمية البتنجانية دي

                    ونصيحة اوعى تشربي حاجة اصفرا من بتوع نور دول ..
                    لا لا لا نور ايديها تتلف في حرير وبتعمل مشروبات كده
                    وكفاية انها عملتلي الميلك شيك فراولة زي مابحبه
                    وميرسي جدا على الإستضافة الهايلة :k10:والأسئلة القوية دي

                    Comment


                    • هــــــــايله يا رنا والله اجاباتك كلها جمييييييييله والواحد استفاد من اجباتك وياريت الواحد يبقى بيفكر زى حضرتك كده والله
                      [CENTER][SIZE=6]
                      [/SIZE][/CENTER]

                      Comment


                      • رنا

                        ايه اللى ممكن يضايقك من شخص اخر سواء فى نفس الجنس او نوع اخر ؟
                        عايزة تعرفى عضو في المنتدى عن قرب ؟
                        ايه رايك فى الصداقة بين الولد والبنت ؟
                        ايه رايك فى الدموع
                        دموع السيدات
                        دموع الرجال
                        ايه احلي ذكري في حياتك ؟
                        ايه اسوء ذكرى فى حياتك؟
                        مين اللى فى المنتدى عايزة توجهى ليه كلمة ؟
                        ليه سبتى شغلك السابق كذا مرة ؟
                        ايه هواياتك ؟
                        ايه اسوء طبع فيكى
                        ايه احسن طبع فيكى
                        لو حسيتى انك بتحبى شخص وهو برده بيحبك او حتى فيه اعجاب متبادل بس لقيتى ان العلاقة بينكم بتضعف ، هل ممكن تاخدى خطوة علشان تحافظى على العلاقة دى
                        حتى لو لمحتى عن مشاعرك؟
                        ايه اللى نفسك تعمليه فى حياتك
                        ايه تعريفك للحب ؟ وهل دمعتى بسببه ؟؟؟؟
                        كم عدد تجاربك العاطفية ؟
                        ليه ما حاولتيش تتعلمى الطبخ ؟
                        معذرة للاطالة
                        A.Saad

                        Comment


                        • ايه ده ايه ده؟ إمتى حصل الكلام ده؟

                          رنا هي الضيفة و انا معرفش؟

                          طيب استنوني أحضر كام سؤال سقع و آجي :10D5C8~1107:

                          Comment


                          • يانهاااااااااار ابيض
                            كل دي اسئلة :K_crying[1]:
                            دانا قلت خلاص الحلقة اتقفلت على كده
                            ماعلينا هاجاوب وامري الى الله
                            المشاركة الأصلية كتبت بواسطة asaadte مشاهدة المشاركة
                            رنا
                            المشاركة الأصلية كتبت بواسطة asaadte مشاهدة المشاركة

                            ايه اللى ممكن يضايقك من شخص اخر سواء فى نفس الجنس او نوع اخر ؟

                            هو عموما في طبع بيضايقني جدا وهو الفضول الزايد عن اللزوم او بمعني اصح التطفل
                            خصوصا لو كان الشخص المتطفل ده مبيرضاش يعرَف حد حاجة عنه
                            وللأسف كان ليا زميلة في الشركة السابقة كانت كده
                            كانت بتعقدني كل ماتشوفني واخدة إذن ونازلة من الشغل تقوللي رايحة فين وأنا للأسف كنت بتكسف اكبسها فكنت ساعات بقول حاجة مش حقيقية لكني بعد كده بقيت اقوللها مالكيش دعوة بهزار ولما تزن اوي اقولها هو انتي بتقوليلي حاجة عشان اقولك
                            لحد مالحمد لله استريحت منها خالص وسبت الشركة بس طبعا مش بسببها يعني
                            انا معنديش مشكلة انها تقرب مني وتعرف عني حاجات كتير بس الاقيها برده بتقربني منها وتحكيلي هي كمان مش تستغفلني

                            برده في حاجة بتضايقني اوي وهي عدم الوفاء بالكلمة
                            يعني لما حد مثلا يقوللي هاتصل بيكي وميتصلش أو يعتذر عن عدم الإتصال ولو برسالة الموضوع ده بينرفزني جداااااااااااااااااا انا معنديش اي مشكلة ان يكون حصلله او حصلها ظروف منعتها من الإتصال لكن على الاقل في اختراع اسمه رسالة اعتذار تتبعت
                            لإني بكون حريصة جدا اني اعمل كده لو مقدرتش اوفي بكلمتي مع حد لكن مع الاسف مش بلاقي معاملة بالمثل من الأشخاص

                            عايزة تعرفى عضو في المنتدى عن قرب ؟
                            بصراحة هما الناس كلها هنا كويسين اوي ونفسي فعلا اتعرف عليهم عن قرب وبالفعل كنت عايزة اتعرف على علا ونور وفعلا ده حصل وهما فعلا ناس

                            ايه رايك فى الصداقة بين الولد والبنت ؟
                            برده الموضوع ده شائك جدا
                            لإن حكم طبيعة الولد بميل للبنت وحكم طبيعة البنت بتميل للولد فالميل ده شئ غريزي صعب التحكم فيه حتى لو لم يتم الإفصاح عنه فصعب إنها تكون صداقة خالية من اي مشاعر تحول مسار العلاقة
                            بس يعني لو الضرورة حكمت ممكن يكون في زمالة وهي درجة اقل شوية من الصداقة بتحكمها المودة والإحترام وتكون بحدود وبشرط عدم حدوث اي تجاوز في القرب بين الولد والبنت.
                            ايه رايك فى الدموع
                            هي الدموع راحة وتطهير للنفس عموماً
                            دموع السيدات
                            سلاح قوي جدا بشرط أل يُساء إستخدامه
                            دموع الرجال
                            صعب اوي إن الراجل دموعه تنزل ولما بتحصل بيكون خلاص بينهار وبيكون السبب أقوي من قدرة إحتماله بس بتدل على إن الراجل ده حنين (من وجهة نظري يعني)
                            ايه احلي ذكري في حياتك ؟
                            كنت كل مابنجح في الدراسة واجيب درجات عالية
                            معظم ذكرياتي مع صحباتي في الجامعة كانت ظريفة خصوصا مع صاحبتي المقربة وخروجاتنا مع بعض اللي انعدمت حالياً :k30:.

                            ايه اسوء ذكرى فى حياتك؟

                            يوم دخول ماما للمستشفي في حالة خطيرة والرعب اللي الدكتورة وصلتهولنا عن حالة ماما لإنها كانت شاكة في حاجة خبيثة أو مرض خطير يعني بس الحمد لله مطلعش في حاجة وحشة.
                            وكمان لما بفتكر خيانة صديقة ليا ايام الجامعة


                            مين اللى فى المنتدى عايزة توجهى ليه كلمة ؟
                            بشمهندس سبعاوي
                            وأستاذ محمد ممدوح (MMamdouh)
                            وأستاذ كريم منير
                            عايزة اقولهم بجد شكرا على مجهوداتكم الهايلة في المنتدي واللي بجد استفدت منها كتير اوي اوي
                            ليه سبتى شغلك السابق كذا مرة ؟
                            لو الإجابة اللي بتتقال في الإنترفيوهات يبقي تطوير للمهارات واكتساب خبرات جديدة

                            لكن في الحقيقة اول شركة مكنتش مستريحة نفسياً فيها ومديري كان عصبي جدا رغم انه طيب لكن عصبيته دي كانت بتوترني ودايما حاطاني تحت ضغط نفسي ده غير إن النظام الإداري كان فاشل وفي ناس بتسوس وتنقل كلام وانا مش بحب الجو ده .
                            الشركة التانية كان فيها شوية ناس خنيقة برده بس مديري كان مصبرني عليها لإنه شخص محترم جدا وبيفهم كويس اوي ولما سابها بعد فترة سبتها لإني كان صعب اكمل مع العقليات اللي كانت موجودة وقتها.
                            وبرده انا فعلا بكون محتاجة اطور من نفسي واكتسب مهارات جديدة لإن كل مرحلة وليها احتياجاتها

                            ايه هواياتك ؟
                            انا بحب السفر اوي ولو إني لم تتحقق لي فرص سفر لحد دلوقتي
                            وساعات القراءة بس كتير بكسل عنها


                            ايه اسوء طبع فيكى
                            اني حساسة اوي وساعات باخد حاجات على اعصابي وبحقن في نفسي وبزعل بس بتراضي بسهولة وبسرعة برده.
                            ايه احسن طبع فيكى

                            اني طيبة ومتسامحة لكن ساعات بتضايق لما الناس بتستغل ده غلط

                            لو حسيتى انك بتحبى شخص وهو برده بيحبك او حتى فيه اعجاب متبادل بس لقيتى ان العلاقة بينكم بتضعف ، هل ممكن تاخدى خطوة علشان تحافظى على العلاقة دى
                            حتى لو لمحتى عن مشاعرك؟
                            بيتهيألي صعب لإن الخطوة دي مينفعش البنت هي اللي تقوم بيها دي خطوة لازم ينفرد بيها الراجل
                            اكيد مش هاروح اطلب ايده يعني

                            ايه اللى نفسك تعمليه فى حياتك
                            أولا نفسي ربنا يرضى عني
                            نفسي اسافر - نفسي اشتغل شغلانة فيها حركة اكتر - نفسي اتقن اكتر من لغة
                            ايه تعريفك للحب ؟ وهل دمعتى بسببه ؟؟؟؟
                            الحب هو مشاعر جميلة لازم عشان تكتمل تكون مشتركة بين طرفين وتكون اساسها بذل اقصى جهد لتمسك كل طرف بالأخر.
                            دمعت بسببه؟ لأ محلصش لإني لسة محبتش
                            كم عدد تجاربك العاطفية ؟
                            عدد وتجارب
                            لا الموضوع موصلش لعدد ولا تجارب
                            ممكن نقول كانت مجرد أعراض اعجاب ولم تخرج للنور من طرفي وكمان لم تكن حقيقة أو اعجاب من طرف أخر ولم تلقى عندي صدى فلم تكتمل لتصل إلى مرحلة إنها يتقال عليها تجربة.
                            فالإجابة على سؤالك هي أن عدد التجارب العاطفية = 0
                            ليه ما حاولتيش تتعلمى الطبخ ؟

                            ابدا حاولت زمان خالص وانا صغيرة بس والدتي مكنتش بترضى كان يهمها مذاكرتي اكتر ولما كبرت بقي بقيت اكسل بس ساعات بحاول تاني واكيد لما اتجوز ان شاء الله هايكون في كورس مكثف قبلها طبعا
                            معذرة للاطالة
                            لا خالص إطالة ايه بس ده كلام برده
                            قال إطالة قال

                            Comment


                            • روني حبيبتي عشان خاطرك بس هكلم انا مليش فالاسئله بس يلا
                              اسمحيلي الاول اشكر نور علي الموضوع
                              تعاليلي
                              اول سؤال انتي عارفاه جاوبي بقي عليه من غير لما اساله
                              شايفه الجواز ازاي
                              ايه رايك فالستات النكديه
                              نفسك بيتك يبقي شكله ايه بالتفصيل احنا ورانا ايه
                              الامومه بالنسبالك ايه
                              بتقدري تتحكمي فعواطفك
                              ايه الحاجه اللي ممكن متسامحيش فيها(عشان معملهاش)
                              مين اكتر حد اثر فيكي وفشخصيتك
                              مين الحد اللي عمرك ما تزعلي منه طبعا غير بابا وماما
                              لما تجوزي ان شاء الله لو جوزك جاله شغل بره البلد هتسافري معاه ولا هتعدي مع اهلك(بينا موبايلات بقي )
                              حبه جنان
                              ما الفرق بين سيكولوجيه الرجل والمراه
                              كفايه كده
                              بليل لو لقيت الحلقه مخلصتش هبقي احضرلك كام سؤال
                              dh4ever سابقا
                              [thread=55971] سلوكياتنا واللي حوالينا [/thread]

                              Comment


                              • دينا ابو العلا عندنا
                                يامرحبا يامرحبا:10D5C8~1107:

                                المشاركة الأصلية كتبت بواسطة دينا أبوالعلا مشاهدة المشاركة
                                روني حبيبتي عشان خاطرك بس هكلم انا مليش فالاسئله بس يلا
                                اسمحيلي الاول اشكر نور علي الموضوع
                                تعاليلي
                                اول سؤال انتي عارفاه جاوبي بقي عليه من غير لما اساله

                                طبعا يادينا انتي صديقة عزيزة عليا جداً
                                دانتي حبيبتي من ايام الجيزة

                                شايفه الجواز ازاي

                                والله هو الجواز في حد ذاته شئ كويس
                                لكن ده في حالة وجود زوجين متناسبين متفاهمين
                                وطبعا هو نعمة من عند ربنا لكن لو الإنسان مش بيراعي ربنا فيه اكيد هاينقلب إلى نقمة

                                وبرده هو رزق يرزق به البعض ويُحرم منه البعض زيه زي الفلوس زي الشغل زي الأطفال
                                بس كده


                                ايه رايك فالستات النكديه

                                هي دي محتاجة رأي يادينا
                                طبعا غلطانة 60 غلطانة اللي تعرف انها نكدية وتفضل كده ومتغيرش من نفسها
                                بس احقاقاً للحق يعني الستات بيتقال عليها نكدية عشان هي معظم الوقت بتكون فاضية وبتقعد تفكر في كل امورها من بيت وعيال وهموم شخصية واعباء نفسية وتحمل نفسها فوق طاقتها فبتشيل الهم وطبعا لازم زوجها ينوبه من الحب جانب عشان كده بيشوفها نكدية
                                فالحل بقي انه يشوفلها اي حاجة تشغلها ولما تكون مضايقة يهون عليها شوية ويستحملها ماهي ياما بتستحمل كتير برده
                                نفسك بيتك يبقي شكله ايه بالتفصيل احنا ورانا ايه
                                لا ده موضوع كبير
                                بصي هو حلم وصعب تحقيقه طبعا ان لم يكن مستحيل يعني
                                نفسي يكون عندي فيلا بحمام سباحة خاص واللي جوه الفيلا بقي مش مهم اكيد هايكون حلو ماهو اللي يجيب فيلا اكيد هايصرف ويفرشها بأحسن حاجة يعني
                                بس طبعا خلينا واقعيين شوية
                                هي تكون شقة بسيطة في منطقة معقولة وفرشها معقول مع شوية عناية واهتمام هاتكون احسن من شقق كتيرة مفروشة بفلوس كتيرة لكن شكلها يسد النفس .
                                الامومه بالنسبالك ايه
                                نعمة كبيرة من عند ربنا طبعا وفي نفس الوقت مسئولية كبيرة وياصابت وطلعت شاب أو بنت زي الفل ياخابت وطلعت جيل يجني علي نفسه وعلي اللي حواليه

                                بتقدري تتحكمي فعواطفك
                                ساعات مش في كل الأحوال بس ببذل قصارى جهدي عشان اوصل لدرجة تحكم عالية ادعولي

                                ايه الحاجه اللي ممكن متسامحيش فيها(عشان معملهاش)

                                الخيانة وبسببها فقدت صديقة عشرة 4 سنين كانت عزيزة جدا جدا عليا وبدون ماوجهلها كلمة عتاب ولا لوم واحدة على اللي عملته.
                                اصل الخيانة مفيهاش عتاب ولا لوم مينفعش اصلا يتقال فيها حاجة دي مرض قاتل بعيد عنك وعن السامعين

                                مين اكتر حد اثر فيكي وفشخصيتك

                                م. محمد مديري (لمدة 5 سنين)
                                دكتورة سوزان (بتدرسلي بعض العلوم الدينية والدنيوية)


                                مين الحد اللي عمرك ما تزعلي منه طبعا غير بابا وماما

                                اخواتي طبعا وصاحبة عمري من حوالي 15 سنة (رغم اني ساعات بقلب عليها لكن موصلناش لمرحلة اني مرجعش اكلمها تاني يعني) دي حبيبة قلبي .

                                لما تجوزي ان شاء الله لو جوزك جاله شغل بره البلد هتسافري معاه ولا هتعدي مع اهلك(بينا موبايلات بقي )
                                لأ هاسافر معاه إن شاء الله
                                مسيبوش لوحده اااااااااابدا
                                قال موبايلات بقي قال
                                ليه قاعدة طيشة أنا؟
                                وبعدين أن ايش ضمني الستات اللي هناك لحسن عينه تزوغ كده ولا كده ارجع اعيط انا بقي :k30: لا ياستى رجلى علي رجله

                                حبه جنان
                                ما الفرق بين سيكولوجيه الرجل والمرأة

                                ده الموضوع طلع كبير اوي اوي اوي يادينا
                                ايه الاسئلة دي مكنتش عندنا في المقرر دي

                                بصي ياستي هو الراجل بطبعه عقلاني اكتر والمشاعر عنده مش بتاخد مساحة كبيرة من حياته واهتمامه
                                لكن الست عاطفية بطبعها (ودي طبعا لإن ربنا خلقها عشان تكون زوجة وأم فيما بعد) فالجانب العقلاني عندها اقل طبعاً وساعات كتيرة بيغلب على تصرفاتها كمان.
                                عشان كده المفروض الست تقدر احتياجات الراجل وطريقة تفكيره وتعذره والراجل كمان لازم يكون على دراية تامة بطبيعة المرأة وطريقة تفكيرها واحتياجاتها ويعذرها هي كمان.
                                صدقيني لو كل واحد قرب من التاني وعرف طبيعته كويس هياكون في نسبة تفاهم عالية جدا جدا ومعدل المشاكل والخلاف والصدام هايقل كتييييييييييييييير
                                بس تقولي لمين بقي
                                أمال الصراع الأزلي نسيبه لميييييييين؟
                                يارب تطلع إجابتي صح وتكون هي دي السيكولوجية اللي بتسألي عنها يادينا

                                كفايه كده

                                أخيراااااا
                                بليل لو لقيت الحلقه مخلصتش هبقي احضرلك كام سؤال

                                ايه ؟ مين؟ فين ؟ ليه؟
                                تحضري كام سؤال أمال اللي فوق دول ايه؟
                                هو انتي لسة مكملتيش يادينا
                                يانووووووووووور
                                فين المذيعة ؟
                                يانوووووووووووووور
                                انزلي بالتتر بقي يانووووووووووور خلينا نشوفلنا ضيف تاني نسأله بقي

                                Comment

                                Working...
                                X