تركى وللا كورى

[sab3aawy]

فيه حاجة انا نفسى اقيم رأى الناس فيها

انا شايف ان مستوى صناعة السيارات فى تركيا مقارب جدا لمستوى صناعة السيارات فى كوريا ، برغم ان تركيا لا تملك علاماتها التجارية الخاصة، باستثناء التوفاش، والتى بدورها تنتج سيارات فيات ، وحتى الشاهين والدوجان فإنهما تحصلان على الدعم الفنى من فيات بشكل دورى

فأنا عايز اعرف، لو فرضنا ان السوق كان متاح للسيارات التركية والكورية بشكل متساوى، وكل العوامل من اعادة البيع والصيانة وقطع الغيار متساوية تركب تركى زى الباليو والبرافا واللينيا والرينو الكيلو والميجان والبيجو التركى
وللا كورى اللى كلنا عارفينه

فقط ارجو ممن سيجيب على الإستطلاع تنحية الحسابات الآتية عن فكره:

1- انا عندى سيارة كورية حاليا وبالتالى مقتنع ان كوريا احسن بلد بتعمل عربيات
2-تركيا دولة اسلامية وبالتالى هشترى سيارة تركية
3-السوق مليان عربيات كورى فهرف اصين وابيع عربيتى احسن


يعنى نخلى الإجابة مبنية فقط على الناحية الفنية من اداء ومتانة وعمر افتراضى دون اى اعتبارات دينية او سياسية او اقتصادية

[Karim_Monir]

صووت للكوري لاعتبارات اخري غير التلاتة اللي انت كتبتهم

[tutankhamoun]

تم التصويت للكوري لأنه فنيا وصل لدرجة من التقدم تجعله عالمي أما التركي فهو مجرد أعادة انتاج أو تجميع لسيارات أوروبية

أما من الناحية العملية عند الشراء

سأشتري منتج دولة إسلامية لتشجيعهم

[mido777]

بعيدا عن الثلاث افتراضات اللى حضرتك افترضهم

- انا اخترت الكورى لعامل الخبرة اللى اُكتسبت فى المجال ده
- فى السنوات الأخيرة اقتربت المنتجات الكورية عموما - وخصوصا السيارات - من جودة مثيلتها من المنتجات اليابانية

[TAG_Turbo0]

انا صوت للتركى بعيدا عن الشاهين
العربيات الى مجمعه فى تركيا زى الفورد والفيات الجديد
انا شايف انها احسن من الكورى

[yahyanaabil]

انا معرفش عربيات تركى غير الماتريكس 2008 وكانت ممتازه وتقفيل ممتاز فاكيد العربيات الاوروبى اللى بتتقفل هتكون نضيفه جدا عشان كده ارشح التركى
وانا مش شايف ان كوريا بتعمل انجازات او بتعمل حاجه جديده كل التكنولوجيا اللى عندها يا اليابانى سبقتها او الاوروبى سبقتها ولكن ده ميمنعش انهم عندهم جوده عاليه فى المنتجات بس لو قدامى فيات تركى وهيونداى كورى اكيد حشترى الفيات

[الريس]

الكوري لانهم ناس مطورين مش مجمعين

[fahd_628]

كورىىىىىىىىىىى

[hazem_khidr]

علي فكره البرافو ايطالي مش تركي
بس اناا ممكن اركب لينيا او ميجان تركي عادي لانها مهما كان عليها رقابه ايطالي او فرنساوي.
انما مركه لسه جديده ف دا صعب جدا و افضل الكوري

[CryptonX]

انا اختارت التركي طبعا
لان المصانع التركية اصبحت محط النظر لجميع الشركات العالمية و خاصة الاوروبية و الامريكية .
و حتى الصينية .

بس باستثناء اي ماركة تركية .. انا بتكلم علي جودة السيارات المجمعة في تركيا ضد تلك المصنعة اصلا في كوريا .

[معتز]

تركيا تسعى بكل اجتهاد للانضمام الاى الاتحاد الاوروبى.يعنى الجودة هى المحك......واعتقد خلال 5 سنوات سوف تكون تركية عضو بالاتحاد الاوروبى............

[Ahmed Anwer]

اعتقد الإستفتاء غير موضوعي

فيه فرق بين دولة مطورة و منتجة للسيارات و دولة مجمعه ،،

الأوقع مثلآ إن المقارنة تكون بين كوري و ماليزي ...... مثلآ

بس عادي اشتري اي عربية تجميع تركي عشان هيا رينو او فيات او حتي هيونداي ماتريكس

مش عشان مجمعة في تركيا تحديدا

يا جماعة مش عارف ليه بتنسوا إن هيونداي خامس اكبر شركة في العالم و اسرع شركة نموا و بتتباع في خمسة و سبعين دولة و بتطور و تصمم بنفسها ،،،، و تشكيلة موديلاتها بتضم جميع الفئات

مش عارف امتي هتدوها صك الشركة المحترمة

[Nile_Storm]

لما تطلب حق اللجوء السياسي لليابان :(

[dr_roufa]

طيب و اللي عايز يركب هيونداي ماتركس تجميع تركي يعمل ايه ؟!!!
فعلا انا متفق مع الأستاذ أحمد أنور لازم نفرق بين دوله منتجه و مطوره للسيارات و دوله مجمعه فقط , مش ممكن مثلا نقارن بين مصر و كوريا عشان مصر بتجمع معظم العربيات الكوري المنتشره فيها زي الفيرنا و الأكسينت و الدايو كلها تقريبا

[sherif_84]

طبعا تركيـــا لأنها دولة أثبتت نفسها فى سوق السيارات بسرعة
صحيح هى مجمعة للسيارات مش مصنعة زى الكوريين لكن بصراحة سواء ميجان أو غيرها التقفيل التركى ممتاز ومافيهوش أى عيوب لأنهم ناس عندهم ذمة وضمير وعايزين بلادهم تبقى صورة مشرفة لأوروبا والعالم وأنا بقول ان الشاهين ( التركى ) مش المصرى لو كانت بتنزل مصر كانت هتقلب السوق المصرى كله لكن بلدنا هى اللى عايزه تجمعها أمرنا لله ( :
الخلاصة أضيف صوتى لتركيا وده برضو مايمنعش انى بكره الكورى اطلاقا ولكن أنا برتاح للصناعة التركـــى