محروقة

[piezo]

وانا كمان و الله علشان اروح من المهندسيين لمدينة نصر او الحرفين باخد بتاع 3 ساعات وبيعيط و الله العظيم و خد عندك البنزين الي بيروح في الوقفه ديه مش بيروح ده بيطير او بيتشم باين مش عارف اعمل ايه بجد انا تعبت من الموضوع وانا ليسه كمان ناقل في الشغل الجديد الي في المهندسيين في الاول كنت في مدينة نصر و الله العظيم كانت حلوه بالنسبه ليا و الله العظيم

[Chicco]

قلبي معاكم جميعا.... و ربنا يستر على الجميع... أنا باسوق في القاهرة من ١٩٩٠ ...إسمحولي بكام ملاحظة صغيرة

-أنا في كندا بقالي سنتين و نص.... تورنتو تحديدا ...وقت الذروة زحمة بس مفيش شدة أعصاب لان الناس محترمة.... بس خلاص

-الأخ الفاضل اللي بينصح بابدا بنفسك أولا.... للاسف يا باشا ماينفعش في القاهرة... عمري ما حانسي لما رجعت من اليابان ٢٠٠١ و كنت ماشي زي الروبوت لمدة ٣ اسابيع قافل الشباك و ببتسم للبني أدمين اللي بيشتموني عشان ماشي صح..... لحد ما مرة قدام مديرية أمن الجيزة قررت أقف عشان الاشارة قلبت أحمر و هوب سمعت زييييييء و طااااخ..... الافندي اللي ورايا لبس فيا و نزل من العربية و قعد يشتم عشان أنا وقفت مع إن التقاطع فاضي ساعتها فقت من حالة الروبوت و قلبت قاهري شمحطجي تاني

-بيتي في الرماية و كنت باروح قصر العيني مرتين في الاسبوع.... على طول على الدائري... كيلومترات و إستهلاك أكتر لكن شدة أعصاب أقل و ببعد عن المنغصات في شارع الهرم و ميدان الجيزة

- المنيل المعادي المهندسين دائري

- مصر الجديدة مرتين السبت الدنيا هادية نسبيا السواقة معقولة ... يوم التلات تاكسي لاقرب مترو و تاكسي تاني من المترو الوقت أقل و أعصابي أهدى وانا مروح ممكن أمشي للمترو و أهي رياضة

- زميل ليا في الرماية بعيد عني ب-١٠ دقايق مشي Car pooling مرة أنا و مرة هو

-أي فرصة أخد حد في طريقي و أنا مروح حتى لو ساعي باخده ثواب و صدقة و صحبة في الزحمة (و لو مش عايز أتكلم بشغل قرأن و أردد وراه و أهو كله ثواب)

مافيش حلول سحرية بس كنت باحاول على قد ما أقدر... و ربنا يستر من الشلل الخماسي و رطوبة الركبة و القعدة الطويلة ;)

[MMamdouh]

مشكلة المصرى انه فهلوى... مش حيتبع النظام الا اذا كان فيه عقاب شديد... دا غير انك مش حتاخد حقك لو كنت على حق لو حصل حادث

MMamdouh

[meza]

البلد دى حلها ان المصريين يتقسموا فترتين: مصريين فترة صباحية و دول بيصحوا الصبح ينزلوا شغلهم الصبح و يرجعوا المغرب و يناموا بالليل ... و مصريين فترة مسائية و دول يبدؤوا يصحوا وقت رجوع المصريين الصباحيين من أشغالهم و ينزلوا من بيوتهم على العشاء و يروحوا شغلهم و يرجعوا منه قبل الفجر بشوية و يناموا على الشروق ...

و بكدة البلد تتوزع الزحمة فيها على جميع فترات اليوم ... و يراعى اضافة خانة تصنيف جديدة فى شهادات الميلاد بجوار النوع و الديانة و هى خانة "الفترة" و يتكتب فيها صباحى أو مسائى و لا يجوز تغييرها من الميلاد الى الوفاة ... و يراعى منع تجول "الصباحيين" بعد العاشرة مساءً و يراعى منع تجول "المسائيين" بعد السادسة صباحاً

و يراعى كذلك عند الزواج منع زواج الصباحيين بالمسائيات و العكس، حرصاً على التكافؤ الفترى (نسبةً الى التكافؤ الاجتماعى)، و يراعى كذلك ... معلش أنا شكلى خلاص بأخرف -- الظاهر انى نمت فى الاشارة كتير :)

إنت عارف يا أستاذ جندى إن كلام حضرتك علمياً صح

فى ناس ساعتهم البيولوجية بتخليهم يبقوا أنشط فى الفترة الصباحية و ناس بيبقوا أنشط فى الفترة المسائية (أنا من النوع ده :))
ده مش كلامى ده كلام دكتور سيكولوجى كان قاعد بيدردش معانا
و على فكرة مش هينفع الواحد يغير الفترة اللى بيبقى نشيط فيها.......هو ممكن ينام بدرى و يصحى بدرى و يعود نفسه على كده لكن برضه مش هيبقى فى كامل تركيزه و نشاطه و أكيد جربتوها فى وقت الإمتحانات.

عشان كده بيفكروا فى أوروبا (تقريباً مش فاكر البلد) إنهم يعملوا فترة مسائية فى الشغل للناس اللى مبتعرفش تصحى بدرى.... و بكده يكونوا إستفادوا 24 ساعة يومياً بدل ما الناس كلها تشتغل نص اليوم بس.

[memo_hefnawy]

inapplicable

حل طبعا غير عملى و فكر فيها هاتلاقى إن كل شركة محتاجة 2 موظفين فى نفس الوظيفة واحد يغطيها بليل و واحد الصبح

ده ينفع فى بعض الوظايف لكن الكل لأ و محتاجة 2 مديرين و 2 رئيس مجلس إدارة و 2 وزراء و و و و ماينفعش :)

الحل إللى ممكن يتنفذ بسهولة

هو نقل جميع المصالح و الشركات من داخل القاهرة لأماكن جديدة موزعه على مدن جديدة و موزعه بإتقان و المدن الجديدة دى يربطها بالقاهرة طرق من العيار الثقــــــــيل 5 حرات فى الإتجاه الواحد بدون خوانق ولا أعناق زجاجة
و عمل فروع من كل المصالح و الوزارات فى كل الجمهورية

و مكان كل الشركات و المصالح إللى هاتتنقل يبقى جراجات

و يتوقف منح تراخيص بناء داخل القاهرة حتى إشعار آخر

و صاحب أى أرض الحكومة تعرض عليه يا يعملها حق إنتفاع للحكومة أو ياخد بدلا منها أرض مساحتها الضعف فى مدينة جديدة و يتصرف ليه قيمة متفق عليها من الدخل إللى هايعود من الأرض دى لما تتحول لجراج
و طبعا الحكومة مش هاتابع و تنفذ الجراجات لأ تعملها حق إنتفاع لشركات كبيرة

و حلول كثير أوى من ضمنها عمل خطوط مترو تربط جميع أطراف القاهرة و عمل سلسلة من الطرق الدائرية المفتوحة و الضخمة تحيط بالقاهرة فى صورة دوائر متفرقة متتالية تغطى القاهرة من كل الجهات و تفعيل المخالفات و تظبيطها و وضع شبكة مراقبة مرورية و عمل محطة على الراديو ال FM يبث من خلالها توجيهات للطرق و السائقين

حاجات ياما بس لو حد عايز يفكر و ينفذ لكن محدش عايز

[Karim_Monir]

انت ما تعرفش ان معدل موت الخلايا في جسم الانسان اللي بيسهر اكتر بكتير من اللي بينام بدري
ودي حاجة علمية وصحية
شوف كل الارياف زمان مش دلوقتي تلاقيهم بينانموا بعد العشا بشوية
وكان يومهم يبدأ بعد الفجر
حاجة زي الفل
لاكن عكس النظام اللي ربنا عملهولنا ده بيادي لقتل خلايا المخ والجسم عامة بصفة اكبر
كما هو الحال مع الناس اللي بتفرض عليهم ظروفهم شغل ليل
اكيد استاذ جنيدي كان بيهرج مش بيتكلم جد

[Karim_Monir]

محدش هايعمل يا محمود واديك شوف حال المترو بقي ازاي لما سابتة الادارة الفرنسية
فعلا احنا شعب لازم ينقاد ما ينفعش يكون قائد نفسة
اي حاجة تولتها ادارة مصرية تتطرق اليها الفساد والفوضي
مترو الانفاق
مستشفى عين شمس التخصصي
مستشفى الهلال
وغيرة وغيرة
ونقل المالح برة البلد لازم يتم باقصي سرعة عشان البلد بدات تصاب بالشلل وكل الحلول التانية مؤقتة
اما عن المترو واضح ان هو الحل الوحيد
البراون امبارن من اكتر من 50 سنة اول ما فكر يبني مصر الجديدة اول حاجة عملها 3 خطوط مترو كهرباء نظيف يربط الضاحية بتاعتة بوسط البلد
لكن احنا اي خط مترو بنعمل في كام مليون سنة وبرضه ادارتة زي الزفت

[meza]

inapplicable

حل طبعا غير عملى و فكر فيها هاتلاقى إن كل شركة محتاجة 2 موظفين فى نفس الوظيفة واحد يغطيها بليل و واحد الصبح

ده ينفع فى بعض الوظايف لكن الكل لأ و محتاجة 2 مديرين و 2 رئيس مجلس إدارة و 2 وزراء و و و و ماينفعش :)

الحل إللى ممكن يتنفذ بسهولة

هو نقل جميع المصالح و الشركات من داخل القاهرة لأماكن جديدة موزعه على مدن جديدة و موزعه بإتقان و المدن الجديدة دى يربطها بالقاهرة طرق من العيار الثقــــــــيل 5 حرات فى الإتجاه الواحد بدون خوانق ولا أعناق زجاجة
و عمل فروع من كل المصالح و الوزارات فى كل الجمهورية

و مكان كل الشركات و المصالح إللى هاتتنقل يبقى جراجات

و يتوقف منح تراخيص بناء داخل القاهرة حتى إشعار آخر

و صاحب أى أرض الحكومة تعرض عليه يا يعملها حق إنتفاع للحكومة أو ياخد بدلا منها أرض مساحتها الضعف فى مدينة جديدة و يتصرف ليه قيمة متفق عليها من الدخل إللى هايعود من الأرض دى لما تتحول لجراج
و طبعا الحكومة مش هاتابع و تنفذ الجراجات لأ تعملها حق إنتفاع لشركات كبيرة

و حلول كثير أوى من ضمنها عمل خطوط مترو تربط جميع أطراف القاهرة و عمل سلسلة من الطرق الدائرية المفتوحة و الضخمة تحيط بالقاهرة فى صورة دوائر متفرقة متتالية تغطى القاهرة من كل الجهات و تفعيل المخالفات و تظبيطها و وضع شبكة مراقبة مرورية و عمل محطة على الراديو ال FM يبث من خلالها توجيهات للطرق و السائقين

حاجات ياما بس لو حد عايز يفكر و ينفذ لكن محدش عايز

على فكرة يا أستاذ ميمو أنا برضه متفق معاك .....الحل اللى أنا قلته ده مقلتش إنه عملى ...... أنا بس لما قريت كلام أستاذ جندى إفتكرت كلام الدكتور بتاعنا ده ..... و قلته .......فى حاجات مش هينفع فيها الشغل بالليل بس فى حاجات برضه لازم 24 ساعة زى الدكاترة مثلاً ..... هيبقى عندنا ورديات فى الشغل ليل نهار.

و أنا من رأيى إن الحل اللى إنت قلته ده عملى جداً ....... و أهو إبتدت الحكومة تنفذه .... زى حكاية القرية الذكية دى اللى نقلوا فيها رئاسة الوزراء و عقبال الباقى يا رب......

انت ما تعرفش ان معدل موت الخلايا في جسم الانسان اللي بيسهر اكتر بكتير من اللي بينام بدري
ودي حاجة علمية وصحية
شوف كل الارياف زمان مش دلوقتي تلاقيهم بينانموا بعد العشا بشوية
وكان يومهم يبدأ بعد الفجر
حاجة زي الفل
لاكن عكس النظام اللي ربنا عملهولنا ده بيادي لقتل خلايا المخ والجسم عامة بصفة اكبر
كما هو الحال مع الناس اللي بتفرض عليهم ظروفهم شغل ليل
اكيد استاذ جنيدي كان بيهرج مش بيتكلم جد

معدل موت خلايا المخ بيزيد مع الإرهاق يا أستاذ كريم .....يعنى لو زودت عدد الساعات اللى بتصحى فيها مثلاً أو حاولت تشتغل بالليل و إنت جسمك مش بيقدر يسهر بالليل أو العكس لأن ده هيؤدى للإرهاق برضه.....

اللى هيشتغل بالليل ده ..... هينام نفس عدد الساعات اللى المفروض ينامها (حوالى 8 ساعات) ..... و جسمه هيبقى طبيعى جداً ...... جايز حضرتك بتقدر تصحى بدرى ....يعنى من النوع بتاع الفترة الصباحية ......... لكن فى ناس تانية مبيقدروش ...... و ده كلام علمى و متأكد منه .... لأنه ببساطة كان مقرر علينا و درسناه و برضه أنا قريته فى كذا كتاب سيكولوجى .... حضرتك ممكن تدور على ما يسمى Biological Clock أو ساعة الجسم البيولوجية ..... هتلاقى إنها مش مرتبطة بساعة الوقت العادية. :)

[aif]

الحل إللى ممكن يتنفذ بسهولة

هو نقل جميع المصالح و الشركات من داخل القاهرة لأماكن جديدة موزعه على مدن جديدة و موزعه بإتقان و المدن الجديدة دى يربطها بالقاهرة طرق من العيار الثقــــــــيل 5 حرات فى الإتجاه الواحد بدون خوانق ولا أعناق زجاجة

علي فكرة يا ميمو باشا انور السادات الله يرحمة عمل اللي انت قلته دة وانشأ مدينة السادات علشان تكون العاصمة الادارية بدل القاهره ويتنقل فيها الوزارات والمصالح الحكومية وتصميمها علي هذا الاساس وفيها كل الامكانيات اللي تؤهلها لكدة
لكن السادات مات قبل التنفيذ ... امر الله
وماتت معة المدينة والفكرة
وكل ذنب المدينة ومشاكلها ان اسمها مدينة السادات والسادات مات فماتت معه المدينة علشان اسمها علي اسمه لوكانو سموها اي اسم تاني كان زمانها ليها شنة ورنة
آآآآآآآآآآآه يا بلد

[faresbelagwad]

مش عارف كل التعليقات مفيهاش غير 2 فقط هم اللي لهم تحفظات على بعض الكلمات المستخدمة بس انا بسأل نفسي كل المحرقة اللي ذكرها صاحب الموضوع علشان روح في 3 ساعات ,,, ياه ده ما سبش حته في بلدنا الا لما حرقها ,,, بس انا بقى بحب البلد دي هى ملهاش دعوة بمشاكلنا ,, على فكرة اي حاجة سيئة دلوقتي سببها حاجتين الفساد و الاهمال و اللي مضيع الدنيا ان الحاجتين دول متركزين اكتر حاجة في السلطة ,, يعني اللي بيلعن سواق ميكروباص لازم قصاده يعرف ان في واحد امين شرطة بياخد منه جنيه و ما بيعملوش حاجة و قيس كده على كل حاجة
و انا واحد من الناس الاهمال و الفساد ضيع اعز الناس منى اخويا حبيبي اعز الناس الي قلبي مات تاني يوم له في الشغل هو مهندس و كان لسه متخرج مات نتيجة الاهمال احبه و اقول له يا عمور كما كنت اناديه دوما اوحشني لقاك و افتقدك و ادعو لك بالرحمة و ارجو من الله ان يعوضك عن شبابك خير و احسبك عندالله شهيدا و اقول لك انه يوم ذهبت عني انا كمان ميت حى ,, و الحمد لله الذي لا يحمد على مكروه سواه
مش عايز حد يزعل مني انا بحب الناس كلها

[aif]

و انا واحد من الناس الاهمال و الفساد ضيع اعز الناس منى اخويا حبيبي اعز الناس الي قلبي مات تاني يوم له في الشغل هو مهندس و كان لسه متخرج مات نتيجة الاهمال احبه و اقول له يا عمور كما كنت اناديه دوما اوحشني لقاك و افتقدك و ادعو لك بالرحمة و ارجو من الله ان يعوضك عن شبابك خير و احسبك عندالله شهيدا و اقول لك انه يوم ذهبت عني انا كمان ميت حى ,, و الحمد لله الذي لا يحمد على مكروه سواه
مش عايز حد يزعل مني انا بحب الناس كلها

ربنا يصبرك انا حاسس بيك
ومن منا لم يفقد عزيز
لكن ان شاء الله ربنا يجمعنا بهم في مستقر رحمته

[Defender]

طوكيو و لندن و نيويورك و باريس بهم سيارات أكبر من القاهرة
و لندن و باريس شوارعهم حواري
و مع ذلك المرور هناك أسرع من هنا
عارفين ليه
علشان هنا الناس عايزة الحرق بجاز
عارفين ليه
علشان عايشيين في قمة الفوضى .....
حتى النظام الحيواني مش قادرين نوصله
يعني لما الواحد يقعد في العربية 2 ساعة في مشوار لا يأخذ أكثر من 10 دقائق مش يبقى حرام و تضييع وقت و اهدار بترول بالهبل كما قدرته الأمم المتحدة بأن الخسارة السنوية من المحروقات البترولية في القاهرة وحدها بمليار جنيه سنويا
مليار جنيه محروقات يتم حرقها في الهواء بسبب عدم وجود نظام
و بسبب وجود الفهلوة و النصاحة المصرية
و اجدع سلام يا جدع للفهلوة و النصاحة المصرية

والله من حوالي 6 شهور مثلا ، والدي الله يرحمه كان تعبان وواخد الأشعة لدكتور يشوفها فى الخليفة المأمون ، طلعت من 6 أكتوبر ، روحت وجيت فى 6 ساعات ، طبعاً الوالد زعل جداً ، والموضوع مش بإيدي ، ما انا لو كنت رايح اسكندرية هوصل فى ساعتين ، هروح وارجع اربع ساعات ، انما 6 ساعات بجد ومعملتش حاجة ولقيت الدكتور مش موجود و روحت بخفي حنين ، وحسبي الله ونعم الوكيل فى عدم النظام وعدم الإحساس بالوقت اللى موجود فى البلد دي ، دة حتي الدائري اللى هو المفروض سريع ، اتفرج على الطلعات والنزلات ، مفيش حد ملتزم أبداً وكله بالفهلوة ، وبدل ما ياخد يمين علشان ينزل يمين ، تلاقي الدائري كله واقف وحارة بس اللى شغالة بالعافية علشان البهوات بيلفوا رأس الرجاء الصالح من على الدائري علشان يدخل النزلة قبل واحد تاني و يقف ضباط وامناء وبردو مفيش فايدة :'( ، شغلي فى الزمالك ، فى الظروف العادية بوصل الشغل فى نصف او 35 دقيقة من اكتوبر وبخرج الصبح بدري طبعاً قبل ما كله ينزل ، وانا خارج بقي ، ممكن الطريق ياخد ساعتين ونص ، وطلعات الدائري تبقي قدامك وشايفها ومفيش 200 متر ممكن تقعد تتأمل فيها ساعة عقبال ما توصل لها

البلد اللى الناس مش بتحس فيها بالوقت عمرها ما هتتقدم :(

[MASERATI]

السلام عليكم و رحمة الله و بركاته

أنا بعد ماقرأت التوبيك ده, جالى نفس الصداع اللى بيجيلى لما بتزنق بالعربية مدة طويلة فى الزحمة و المرور واقف و مش بيتحرك !!!!!!!!!, رغم أنى مش قاعد فى العربية و قاعد فى بيتنا !!!!!!!!!!!!!!

[MaZaGAngeE]

و انت ليه مش ساكن جنب شغلك أو تشتغل جنب بيتك ؟

[om mohammed]

[quote=maserati;3873694093]

السلام عليكم و رحمة الله و بركاته

أنا بعد ماقرأت التوبيك ده, جالى نفس الصداع اللى بيجيلى لما بتزنق بالعربية مدة طويلة فى الزحمة و المرور واقف و مش بيتحرك !!!!!!!!!, رغم أنى مش قاعد فى العربية و قاعد فى بيتنا !!!!!!!!!!!!!![/qu


سبحان الله .. نفس اللى حسيت بية (صداع من مجرد التفكير )..
خاصا ان اليوم وقفت فى المريوطية وشارع ترسا أكتر من ساعة ونصف فى مسافة لا تتعدى 7 دقائق أو أقل ( بالتوقيت الزمنى لكوكب أخر غير الأرض ) لو الطريق كان ماشى سليم مش سمك لبن تمر هندى عكسى

من 2008 الى 2011 والمشكلة لم تحل بل إزدادت سؤاً ( هى هتتحل إمتى ؟ )
حد عندة أمل !!!!!!!!!!!!!!!!!!