محتاج آراءكم فى مسألة الكاتينة

[sab3aawy]

ديلوقتى انا قربت على الأربعين ألف ، انا اعتقد وان كنت غير متأكد ان ده موعد تغيير الكاتينة لذلك انا حابب آخد رأيكم فى كام حاجة:

1- هل هى بتتغير على 40 ألف وللا أكتر وللا أقل؟
2-هل :
...........اغيرها فى التوكيل بكل ما نسمعه عنه من مشاكل...وللا
...........اشترى السير من التوكيل واخلى ميكانيكى ثقه يغيره لى...وللا
...........اشترى السير من برة واخلى ميكانيكى ثقة يغيره لى وفى هذه الحالة ايه ماركة السيور الكويسة ؟
3-هو السير بيتغير معاه شداد وللا بيتغير لوحده؟

مستنى آرائكم القيمة

[hamaza81]

والله يا ريس
انا شايف انك تشترى السير من التوكيل وتخلى ميكانيكى ثقه يغيره
عشان بس تضمن قطعة غيار أصلية

ومافيش داعي تعمله في التوكيل لانك مش متابع مع التوكيل من الاول
وكدة كدة خرجت برة الضمان بموضوع التكييف

[nodey]

شوف حضرتك حسب تعليمات السلامة الواردة من معظم شركات السيارات يوصي بتغيير سير الكاتينة مع الشداد كل 60000 كم
وايضا فضل تغيير طرمبة المياه لضمان كفاءة دورة التبريد للماتور
وممكن تشتري الاشياء من التوكيل وتركبها عند واحد فاهم عشان تقسيمة الكاتنية تطلع مظبوطة
وربنا يوفقك

[dr.hazem]

سبعاوي بيه
انا بفكر برضو في الموضوع لاني قربت برضو عال40
اللي غايظني ان الكتالوج بيقول انه يتغير على 100
وكلنا عارفين ان العربية هيا هيا الهنديه
فياترى الكلام ده ينطبق علينا؟؟؟
ده اول مسأله

ثانيا
معتقدش ان التوكيل هيجيب سير غير اللي بيتباع في السوق وهيبقى هوه هوه والفرق انهم هينهبونا فيه,,,
لكن لو كنت لابد فاعلا وهتشتريه منهم يبقى يغيروه هما ولو حصل فيه حاجه يبقى مسئوليتهم ويبقى عليه ضمان (وان كنت لا اعتقد انهم هيدونا ضمان عليه)

من الآخر لو ثبت اننا نغيره على 40 ألف اعتقد اننا لو جبناه من بره وغيرناه عند حد ثقه هيكون كله تمام باذن الله

سبعاوي
رجاءا مهما قررت قولي عشان انا عايز اغيره كمان ونبقى نروح سوى حتى لو انا معملتش ال 40
ده لو تقرر اننا هنغيره عال40

سلامي ياباشا

[sab3aawy]

والله يا ريس
انا شايف انك تشترى السير من التوكيل وتخلى ميكانيكى ثقه يغيره
عشان بس تضمن قطعة غيار أصلية

ومافيش داعي تعمله في التوكيل لانك مش متابع مع التوكيل من الاول
وكدة كدة خرجت برة الضمان بموضوع التكييف

هو بالنسبة للضمان العربية اصلا فاضل لها 3 شهور وتنهى ال 3 سنوات فترة الضمان(اللى مالوش لازمة اصلا) وبالتالى هى مش فارقة كتير، انا كانت فكرتى من خيار التوكيل(المستبعد بصراحة) انه ممكن يكون الموضوع فيه نوع من انواع الفن هم بيعملوه احسن من برة

المهم ديلوقتى، لو هنجيب السير من برة، هل فيه ماركة كويسة وفيه حد ثقة بيبيعها؟ وللا نجيبه من التوكيل جتى لو هنغيره بره؟

[Amr Axel]

بالنسبة ليا انا التو جبتها و غيرتها برة التوكيل و اللي عملهالي ميكانيكي معرفة و مش نظام اللي واخدينها فهلوة بتوع اليومين دول كل العيلة و الاصدقاء و اهل الاصدقاء..الخ...الخ بيتعاملوا معاه و الحمد الله مفيش اي مشاكل و بتغير السير بس
الأول طلعهالي و قالي هي تقسيمتها ازاي و روحت جبت زييها لأن معايا التو 2008 فدوخة عشان تلاقي السير بتاعها لأنه مختلف عن باقي الموديلات كلها في عدد السنون
وغيرتها في حدود 60 - 70 الف بس كانت طالعة ع وشك القطع و الفبريكة كمان
و وجهة نظري ان الافضل نغيرها كل 50 الف بالكتيير حتي لو لسه فيها شوية لكن الوقاية خيرا من العلاج لأنها لو لا قدر الله اتقطعت و الواحد ماشي جابت كاتينة

و لو لقيت في التوكيل هات مع اني حاسس ان اللي في التوكيل هو هو اللي برة بس فرق سعر
و لو هتجيبها من التوكيل يبقي الافضل تغيرها عندهم و خلاص

و بالتوفيق ان شاء الله

[love7amada]

انا عامل 20 الف بس عايز اغيره عشان العربيه موديل 2007 فاكيد الزمن بيأثر ع المطاط فمش هلتزم بكيلومترات

[hamaza81]

أخر الأخبار
النهاردة كنت في التوكيل (مودرن موتورز الدقي) وسألت على موضوع الكاتينة
تغيير الكاتينة لوحدة بـ 700 جنية وسالت المهندس عليه ضمان قالي احنا بنضمن شغلنا وأكدت عليه ان العربية برة الضمان
وهو قالي ممكن يقعد لحد 50 ألف بس المعلومة دي أنا اشك فيها لان في موضوع في المنتدى هنا حد كان معاه ماروتي سير الكاتينة اتقطع تقريبا على 37 ألف بس هو كان في الضمان وبفضل الله ماحصلش حاجة لوش السلندر

أنا كنت بعمل صيانة العشرين النهاردة عندهم
واللي هاعيط عليه ان صيانة الـ 40 ألف بتتكلف الف جنية تقريبا شاملة الكاتينة وكل حاجة
الله اعلم ساعة الأربعين الف هاعمل ايه

[aymanay32]

انا قربت من ال40 الف كيلو
فاذا كان كدة ممكن نعمل خدمة كويسة
و هى شراء سير من التوكيل و البحث عن مثيل متطابق له بنفس الالوان و الكتابة و الجودة و المواصفات فى السوق
سواء كان البحث فى التوفيقية او احمد حلمى او شبرا
و بكدة ممكن يعرف الاعضاء ايه هو السير المظبوط و المتطابق مع التوكيل و سعرة و مكان بيعه خارج التوكيل

[msafa]

أنا رأيي الشراء من التوكيل و تركيبه عند واحد ثقة

[love7amada]

طيب سعره كام ف التوكيل بدون تركيب

[sab3aawy]

مفاجأة يا شباب:

الكتالوج بيقول السير يتغير على 100 ألف، ايه رأيكم؟

[hamaza81]

والله أعلم يا هندسة الكتالوج دا بتاع الموديل اللي هو حقن اليكتروني اللي مش بينزل مصر أساسا

في التوكيل هما بيغيروه على 40 ولما سألت المهندس هناك قالي ممكن يقعد لحد 50

وأنا ما فتكرش انك ممكن تغامر بالكاتينة

[Amr Axel]

مفاجأة يا شباب:

الكتالوج بيقول السير يتغير على 100 ألف، ايه رأيكم؟

لاحظ اننا مش زي اللي بينزل برة انا طلعت السير بتاعي ف حدود 60 الف و كان خلاص هيتقطع
فزي مقولت اخرنا 50 الف و نغير

[dr.hazem]

سبعاوي بيه
انا بفكر برضو في الموضوع لاني قربت برضو عال40
اللي غايظني ان الكتالوج بيقول انه يتغير على 100
وكلنا عارفين ان العربية هيا هيا الهنديه
فياترى الكلام ده ينطبق علينا؟؟؟
ده اول مسأله

مفاجأة يا شباب:

الكتالوج بيقول السير يتغير على 100 ألف، ايه رأيكم؟

منا قلت الكلام ده وقلت ياترى هو صح ولا غلط؟
اعتقد ان الحاجات اللي تقعد ل 100 ألف لازم تكون جنزير مش سير...

ولا ايه رأيكم؟