للفائدة العامة-مخطط لأسلوب ولوازم تركيب موتور المياه

[l0new0lf]

استشاره فنيه انا عندي ماتور كالبيده 1 حصان ومركب عليه بالونه واحده لما بظبط ضغط الاوتوماتك اقصي قيمه بيقدر الماتور يفصل عندها 3.5 بار ةبيقوم الماتور عند 2بار الماتور بيغذي شقتين فقط في الدور الخامس والسادس بس الميه طبعا بتضعف عقبال ما المتور يقوم تاني لان الضغط بيوطيلحد 2 بار ولو عليت الضغط بتاع فصل الماتور اخليه مثلا 4 او 4.5 الماتور مبيفصلش السباك قالي نزود بالونه تانيه ده هيخلي الماتور يفصل علي 4.5 بار هل الكلام ده صحيح يعني لو زودت بالونه هيزيد قدره ضغط الماتور ولا برضو مش هيقدر يفصل لو الوتوماتك مظبوط اعلي من 3.5؟

لأ كلام السباك غلط

عامة:
.... بفرض ان الدور ارتفاعه 3.25 متر, بحسبه بسيطه هنلاقى ان اقل ضغط لازم لتوصيل منسوب المياه للدور السادس = 6*3.25*3.281*0.433=(28 psi)
/14.7 ≈ 2 bar
ده معناه ان منسوب المياه يادوب يوصل للسادس (متنساش انك محتاج ضغط اعلى من كده لتعويض الفقد نتيجة احتكاك المياه داخل المواسير و مرورها فى الانحناءات و الكيعان)
اضبط بداية التشغيل عندك على 2.5 بار

....مش فاهم انا الجزئيه بتاعة انك رفعت ضغط الموتور ل4 بار و الموتور مفصلش
يعنى عرفت ازاى انك رفعت ضغط الموتور للقيمه دى؟
شايفها على العداد و الموتور مش عايز يفصل؟
و لا انت ضبط الصاموله بتاعة الاتوماتيك عشان تعلى الضغط و الموتور مش عارف يجيب ال4 بار فعشان كده مش عارف يفصل؟؟
هل انت متاكد ان العداد سليم؟

.... الجزء المسلوب فى رسمة الموتور اللى مكتوب عليه المضخه,

ده بيكون فيه حاجه اسمها مجموعة الزور (عباره عن القطعتين اللى عليهم سهم احمر, واحده الساقيه بتلف داخلها و التانيه بتوصل المياه من مدخل الموتور للقطعه الاولى), طالما الموتور مش عارف يرفع الضغط هتلاقى المجموعه دى محتاجه تتغير (غالبا ده السبب)
و ممكن الساقيه نفسها هى اللى محتاجه تتغير
و ممكن الاولسيلات اللى متعلم عليهم بالازرق محتاجين تغيير
اللى اعرفه ان الكالبيدا الساقيه فيه نحاس مش بلاستيك فغالبا دى مش هيكون فيها مشكله
بالنسبه لمجموعة الزور المواتير حاليا معظمها بيتصنع من الزهر, قبل كده كانت بتتصنع من البلاستيك و دى بتتغير عادى و انت ممكن تفك الموتور و تطلع القطعتين دول و تاخدهم شارع الجمهوريه و تشترى زيهم و تغيرهم بنفسك و متنساش الاولسيلات عشان البياعين بيستهبلوا و مبيدوهاش للناس غير لما تطلبها منهم, و لو ملقيتش هتضطر تستعمل سيلكون (على فكره دى رسمة الكالبيدا)

.... نبذه سريعه عن البالونه:
بالبلدى و ببساطه, البالونه عباره عن خزان بيتخزن فيه المياه تحت ضغط معين (اللى بتظبط عليه الموتور) و مهمتها انها تدى فرصه للموتور انه يفصل و يستريح شويه (لما الضغط يوصل عند القيمه اللى الاتوماتيك مضبوط عليها) لحد ما الضغط ينزل للقيمة اللى احنا ضابطين بداية التشغيل عندها و ساعتها الاتوماتيك يرجع يشغل الموتور.
تزويد عدد البالونات مالهوش علاقه نهائى بان المياه توصل لادوار اعلى
تزويد عدد البالونات بيدى فرصه اكبر للموتور انه يستريح فتره اطول زى ما انا شارح فوق
ضبط الاتوماتيك هو اللى بيتحكم فى تشغيل الموتور و ايقافه و كل ما تزود الضغط فى الضبط ده بيخلى الموتور يضغط المياه لقيمه اعلى و بالتالى تعرف تطلع لادوار اعلى

البالونه الايطالى كنت جايبها مع الموتور و اشتغلت تقريبا 10 سنين و غيرتها لانها اخشنت من الداخل و بقت تقطع البالونه الكاوتش, كان مكتوب عليها حجم 25 لتر و ضغط الهواء (اللى بتنفخ البالونه عليه) 1.5 بار يعنى تقريبا 22 PSI, خلى بالك هتلاقى السباك بينفخها على اكتر من 30 حسب مزاجه
الحركه دى غلط لان كل ما عليت ضغط النفخ كل ما الحجم المتاح لتخزين مياه مضغوطه فى البالونه بيقل و ده معناه ان الفتره المتاحه للموتور انه يفصل عشان يستريح هتقل و بالتالى هتلاقى الفتره بين فصل الموتور و تشغيله بقت قصيره
البالونه ساعات بيكون مكتوب عليها ضغط 1.5-2 بار (يعنى 22-30 psi )
انصحك فى حالتك هشان الادوار العاليه دى انفخها على 30 مش اكتر.
اوعى تشترى بالونه مصرى, لما ضبط الموتور على انه يوصل ل4 بار كنت باشوف بعينى الجزء المقعر اللى فيه البلف بيطلع لفوق (يعنى الحديد بيحصل فيه تمدد زى البالونه الاطفال) و المفروض انها بتستحمل لحد 8 بار, طبعا لما لاحظت الموضوع ده غيرتها بدون تردد لان الموتور فى مدخل العماره و طبعا اى مشكله ممكن تعور حد يكون متواجد بالصدفه فى المدخل نتيجة الضغوط

.... صوره للاوتوماتيك من الداخل مع توضيح صواميل الضبط

الاحمر: لضبط ضغط بداية التشغيل
الازرق: لضبط ضغط ايقاف الموتور
و خلى بالك لو ضبطت الاحمر مثلا على 2 بار و بعد كده ضبط الازرق, هتلاقى ان ضغط التشغيل اصبح اعلى من 2 بار لان السوستتين اللى تحت الصامولتين بيضغطوا على نفس المفتاح
يعنى لازم ترجع تعيد ضبط الصاموله الحمرا

.... خلى بالك فيه علاقه عكسيه بين الضغط الموتور و كمية المياه اللى بيوصلها الموتور
يعنى حسب البطاقه دى (هتلاقى زيها عندك على الموتور)

http://www.outbackequipment.com/images/resources/39492/3c47bbc78f624ff58a0d06cc7eee7a95.jpg

اقصى ارتفاع المياه الموتور يعرف يرفعه هيكون 41 متر بس كمية المياه عند ارتفاع 41 متر هتكون 480 لتر فى الساعه يعنى 8 لتر فى الدقيقه
و اقصى كمية مياه تاخدها من الموتور ده 2.3 متر مكعب فى الساعه و دى لما تكون فاتح حنفيه على ارتفاع 5 متر من الموتور او اقل

كالبيدا والماتور والبالونه كالبيده واحد حصان
الي بستفسر عنه زياده بالونه كمان هتزود قدره ضغط الماتور ولا بتزود سع المياه المخزنه في البالونه فقط

هتزود فقط كمية المياه المخزنه فى البالونه مع تثبيط باقى العوامل من ضغط الهواء داخل البالونه و ضغط التشغيل و الايقاف للموتور

دمتم بود

[wwaeel]

المقصود انه مبيفصلش علي 4 اني بقفل السوسته الكبيره عشان يفصل عند ضغط 4 فبيجيب ضغط علي العداد 3.2 ويفضل العداد واقف والماتور شغال ومش قادر يرفع الضغط عن 3.2 والمجموعه الي قولتلي عليها الساقيه والزور فكهم السباك ونظفهم وسلكهم وركبهم تاني والساقيه فعلا نحاس مش محتاجه تغيير هل الاويل سي والزور هيفرقو في الضغط لو غيرتهم ولا هي دي قدره الواحد حصان وميقدرش يضغط عن 3.2 ؟

[mohamedomar777]

استفسار

استفسار :
عندي موتور كالبيدا واحد حصان ,البوابه عندي بتقولي انو بيقعد يشتغل بل اربع ساعات نزلت علشان اشوفو لئيتؤ فعلن شغال و انا ميش مشغل الميه يعني شغال علي الفاضي المهم فصلت الاتوماتيك و روحت اسئل السباك الي ممكن تكون البالونه عايزه تتغير ,,,,,,,,,,صح الكلام ده ولا السباك بيشتغلني

[l0new0lf]

المقصود انه مبيفصلش علي 4 اني بقفل السوسته الكبيره عشان يفصل عند ضغط 4 فبيجيب ضغط علي العداد 3.2 ويفضل العداد واقف والماتور شغال ومش قادر يرفع الضغط عن 3.2 والمجموعه الي قولتلي عليها الساقيه والزور فكهم السباك ونظفهم وسلكهم وركبهم تاني والساقيه فعلا نحاس مش محتاجه تغيير هل الاويل سي والزور هيفرقو في الضغط لو غيرتهم ولا هي دي قدره الواحد حصان وميقدرش يضغط عن 3.2 ؟

هتلاقى مجموعة الزور فيها خرم او كسر صغير جدا (صعب انك تشوفه بالعين و بيكون فى اماكن غريبه) بس كافى انه يسرب الضغط حوالين المجموعه
و ده بيحصل لما تكون المياه مقطوعه و الموتور يفضل شغال فتره كبيره (الاتوماتيك مش هيفصل الموتور طول ما المياه مقطوعه لان مفيش ضغط) و المجموعه تسخن جامد و يحصل فيها الشرخ او الكسر ده
او ممكن نفس السيناريو اللى فوق و المجموعه سخنه المياه تيجى فيحصل تبريد مفاجئ ليها و برضه يحل الشرخ
غير مجموعة الزور و ان شاء الله الموتور هيشتغل تمام

ملحوظه مهمه:
لو الموتور كان بيستطيع انه يرفع الضغط سابقا لقيمه معينه و حاليا لأ معناها السيناريو اللى فوق
من مظاهر السيناريو اللى فوق ان كبس الموتور بيقل مع الايام بمعنى امبارح كان بيقدر يرفع ل4 بار و بعد يومين اصبح اخره 3.5 بار و القيمه دى بتقل مع مرور الزمن (يعنى فى خلال اسبوع هتلاقى نفسك بتضطر انك تظبط الاتوماتيك على ضغط اقل عشان الموتور يفصل مره او اكتر من مره)

[l0new0lf]

استفسار :
عندي موتور كالبيدا واحد حصان ,البوابه عندي بتقولي انو بيقعد يشتغل بل اربع ساعات نزلت علشان اشوفو لئيتؤ فعلن شغال و انا ميش مشغل الميه يعني شغال علي الفاضي المهم فصلت الاتوماتيك و روحت اسئل السباك الي ممكن تكون البالونه عايزه تتغير ,,,,,,,,,,صح الكلام ده ولا السباك بيشتغلني

اجابة السؤال ده مشروحه فى مشاركه سابقه

[mohamedomar777]

اجابة السؤال ده مشروحه فى مشاركه سابقه

احنا اسفين يا باشا

[l0new0lf]

استفسار :
عندي موتور كالبيدا واحد حصان ,البوابه عندي بتقولي انو بيقعد يشتغل بل اربع ساعات نزلت علشان اشوفو لئيتؤ فعلن شغال و انا ميش مشغل الميه يعني شغال علي الفاضي المهم فصلت الاتوماتيك و روحت اسئل السباك الي ممكن تكون البالونه عايزه تتغير ,,,,,,,,,,صح الكلام ده ولا السباك بيشتغلني

بيشتغلك

[unoman]

سؤال معلشى
دلوقتى انا فى عماره فيها تحت موتور
وكلنا بندفع فاتورة مية واحده .. وغالبا انا مشترك فى (لانى مأجر الشقة مش تمليك)
المهم دلوقتى انا عندى فى المطبخ مكان سلكين كدا كان الكهربائى قالى دول مكان مفتاح الموتور
هو يقصد مفتاح بيتشينو عادى ولا مفتاح الاوتوماتيك دا بيركب فى كل شقة ؟؟؟
وسعره كام الاوتوماتيك ؟؟؟

[m.3iat]

انا امتلك موتور كالبيدا 1 حصان مع وحدة اتوماتيك وبدون تركيب عوامه ليغذى عمارة 5 ادوار (5 شقق) وبسبب عدم ضبط الضغط لا يتم وصول المياه الى كلا الدورين الرابع و الخامس بشكل منتظم .
ويوجد مشكله اخرى وهى ان من 3 شهور الموتور جاب مياه من ناحيه العمود مع علو فى ارتفاع صوته بشكل مزعج جدا
فاخذته للورشه لاصلاحه وتم تغيير رومان البلى والاكسيل وصمولتين
وتكرر نفس المشكله من يومين جاب مياه من ناحيه العمود مع ارتفاع صوته وتم اصلاحه مره اخرى وتغيير رومان البلى وصمولتين وبعد تركيبه لا يعمل بشكل جيد
فهل من حل لهذه المشاكل

[khaled_afandy]

لأ كلام السباك غلط

عامة:
.... بفرض ان الدور ارتفاعه 3.25 متر, بحسبه بسيطه هنلاقى ان اقل ضغط لازم لتوصيل منسوب المياه للدور السادس = 6*3.25*3.281*0.433=(28 psi)
/14.7 ≈ 2 bar
ده معناه ان منسوب المياه يادوب يوصل للسادس (متنساش انك محتاج ضغط اعلى من كده لتعويض الفقد نتيجة احتكاك المياه داخل المواسير و مرورها فى الانحناءات و الكيعان)
اضبط بداية التشغيل عندك على 2.5 بار


دمتم بود

هو البوست قديم بس معلوماته قيمه
احنا عندنا مشكلة مستفحلة
عندنا 9 مناور فى العمارة و موتور واحد و مؤخرا ضخ المياه ضعف من العمومى جدا فلا تصعد المياه سوى الى الدور الأول سكنى (يعتبر الثالث). مواسير الرفع بعضها يبعد 50 او 60 متر عن الموتور.
الموتور يوضح ضغط 4.6 بار معظم الوقت و شغال على طول الا فترات قليلة عندما يصل الضغط الى 5 فيفصل الموتور. البالونات تعمل بصورة جيدة.
الأسئلة:
1) كم من المفروض ان يكون الضغط لتوصيل المياه الى 9 مناور الى الدور الخامس علما يأن طول بعض المواسير الأفقية يصل الى 50 -60 متر
2) معظم السكان عندهم مشكلة مستفحلة (مياه مقطوعة او نقط او ضعيفة) فأين تذهب المياه إذا كان المونور شغال على طول و الضغط 4.6 بار معطم الوقت؟
3) مفاتيح الضبط يتم ادارتها بأىه بالضبط، ظرادية و الا ايه، المفك لم ينفع

و اخيرا نصيحة، اوعوا تسكنوا قى ابراج كبيرة، مشاكلها لا تعد و لا تحصى!!! العمارة المفروض اخرها 3-4 شقة فى الدور بعد كده يبقى مشاكل جامدة

مع خالص شكرى و تقديرى

[seaangel]

استفسار
انا عندى ماتور كالبيدا و كنترول و المشكلة هى ان الكنتروا واصلة كهرباء و منور و زى الفل بس لما افتح الحنفية لا توجد مياة و الكنترول و المياة لا يعمل و لابد ان اقوم بفصل التيار اكهربائى لمدة 10 ثوان او كثر قليلا لكى يعمل و يضخ مياة و السباك مش عارف يحل هذا الموضوع

أرجوا الافادة لاننى الى الان صارف اكثر من 900ج سباك و اسلاك كهرابئية و مازلت ادفع الى الان