تجربة غير تقليدية من قناه OTV

[hussein]

هو مش باريس هيلتون ده فندق فى فرنسا؟ وللا إيه ؟

واضح ان خالد يعرف باريس هيلتون اكتر من اى حد فينا :twisted: ولو حد نكشه ممكن يكتبلك تاريخها كله :twisted:
بس بجد مناقشه هايله جدا من ناس بتفهم و عندها ثقافه عاليه
انا كنت ملاحظ دا من زمان فى خالد (ثقافه عاليه ماشاء الله)
بس بجد اكتشفت انهارده محمود حفناوى
ربنا ينفع بينا كلنا دينا و بلدنا والمسلمين

[Ahmed Samy]

على فكرة احنا مش عرب أساسا
احنا تعربنا بالاسلام . فالاسلام أولا ثم العروبة
ثم ان العرب بيموتوا فينا :lol: :lol: :lol: :lol:

[Dr Ahmed]

باريس هيلتون هى الوريثة لسلسلة فنادق هيلتون :) ممكن تجرب تكتب إسمها فى جوجل و إنت تشوفها بس يفضل بعد رمضان عشان ممكن يطلعلك حاجات مش كويسة!!

هههههههههههههههههههههههههههههه
طب والله أنا لحد كام شهر كنت فاكر دا إسم فندق فعلا
عموما مافرقتش كتير :lol: :lol: :lol: :twisted: :twisted: :twisted:

[tamohsen]

CryptonX كتب:
انا مصري قبل ماكون عربي و لو الود ودي مبقاش عربي .. افضل المصرية قبل اي لغة , و اللغة الفصحى عمرها محتتنسي و لا يحصلها حاجة طول ماالقرآن الكريم موجود .


نفسى اقول +1 بس هو مش +1 اوى ، انا مصرى ومسلم وبس ، بعد كدة عندى العربى زى الهندى زى الأمريكى زى الأسترالى ،العربى او الصينى او الكورى اللى يحترمنى اشيله فوق راسى و العربى او الفرنساوى او الكندى اللى يهيننى مالوش عندى غير ال.....، الناس كلهم فى عينى سواء عرب او غير عرب ولا احمل ضغينة خاصة لأى شخص إللا اللى يقلل من احترامى

متفق معاك تماما

[سمير يونس]

CryptonX كتب:
انا مصري قبل ماكون عربي و لو الود ودي مبقاش عربي .. افضل المصرية قبل اي لغة , و اللغة الفصحى عمرها محتتنسي و لا يحصلها حاجة طول ماالقرآن الكريم موجود .


نفسى اقول +1 بس هو مش +1 اوى ، انا مصرى ومسلم وبس ، بعد كدة عندى العربى زى الهندى زى الأمريكى زى الأسترالى ،العربى او الصينى او الكورى اللى يحترمنى اشيله فوق راسى و العربى او الفرنساوى او الكندى اللى يهيننى مالوش عندى غير ال.....، الناس كلهم فى عينى سواء عرب او غير عرب ولا احمل ضغينة خاصة لأى شخص إللا اللى يقلل من احترامى

متفق معاك تماما

مع احترامي لأرائكم و لكني لا اتفق معكم تماما بسبب الخلط الواضح في المفاهيم

أحنا هنا بنتكلم عن اللغة العربية و اللهجة المصرية و ليس عن الجنسية المصرية و القومية العربية

[CryptonX]

لآ اسف اللغة العربية فرضت نفسها في مصر بينما لغيت اللغة المصرية القديمة , ومع كامل احترامي , لو كان ينفع افضل لغة بلدي الأصلية فوق اي لغة ,,, و احنا لا نمت بالعرب صلة الى بسبب الفتوحات الأسلامية .. مش اكتر !

[Abu Aly]

يا جماعه حرام عليكم ...باريس هيلتون كانت فى السجن ..بدل ما تجيبو فى سيرتها حد يبعت لها غيش و حلاوه ..

[Abu Aly]

الموضوع بسيط قوى و ما يستحقش النقاش ده كله ... جميع القنوات العربيه ( يجى ) 500 قناه بتقدم النشره باللغة العربيه
الفصحى .. حبت OTV تعمل حاجه جديده ملفته للنظر .. و بعدين معظم المعترضين على العاميه بيكتبوا مشاركتهم فى المنتدى بيها :D :D :D :D :D

[Ahmed Hassan]

الأعزاء محمود حفناوى واسلام شاهين

طبعا انا محترم وجهة نظركم بشدة واقدر اللغه الفصحى جدا، لكن لازم نعترف ان فى النهاية اللى بنتكلمه وبنتعامل بيه انا وانت والجميع على هذة الرقعة من الأرض هى العامية المصرية، اللى يمكن بتتشابه فى معظم مصطلحاتها مع العربية الفحصى لكن التركيب اللغوى مختلف الى حد كبير(ابسط مثال ان مافيش جملة فعلية(تبدأ بفعل) فى العامية المصريةو وغيره الكثير)ناهيك عن الختلاف فى كثير من المسميات وكذلك اسلوب نطق العديد من الكلمات لدرجة ان العامية المصرية تصنف لدى الأيزو بكود مختلف عن العربية الفصحى، العربية الفصحى تحمل كود ARA اما العامية المصرية فتحمل الكود ARZ

للمزيد اليكم هذين الرابطين:

http://en.wikipedia.org/wiki/Egyptian_Arabic

http://en.wikipedia.org/wiki/Arabic_language

ولذلك فانا شايف ان اللغة اللى انا بتكلم وبفكر بحلم بيها هى جزء من هويتى ( يا ترى هل فى حد فيكم بيفكر او بيحلم بالفصحى؟) واحييى من لديه افكار جديدة للحفاظ على هذة الهوية من التمييع فى ظل موضة طمس واحتقار الهوية المصرية اللى بقينا عايشيين فيها حاليا لصالح هويات اخرى قومية او عرقية او ايديولوجية وعلى هذا فانا احييى هذة القناه على هذا التوجه

بالنسبة لموضوع البرامج المبتذلة فلم يكن هذا هو وجه مقارنتى لهذة القناة بالقنوات الأخرى ، لكن عموما لو فتحنا هذا الباب للمقارنة فلن بينجوا من المذبحة سوى القناه الوثائثية وناشيونال جيوجرافيكس :lol: :lol: :lol: :lol: ، اما الباقى كله ففى الهم سواء، لكن اللى انا بتكلم عليه ان لو نجحت مثل هذة التجربة هتخلى ناس تانية تفكر بالأسلوب ده وممكن بعد فترة نشوف نسخة من ناشيوانل جيوجرافيكس او انيمال بلانيت بالعامية المصرية وساعتها انا متأكد ان فيه نسبة كبيرة جدا-مش هقول الكل لكن نسبة كبيرة-من اطفالنا، هتلاقى ان الأفيال والكانجارو والتصحر والاحترار العالمى وهجرة طائر البطريق مسلية زى نانسى وهيفا واليسا لأنها بتقدم لهم بلغة قريبة من قلوبهم

بالنسبة للأعزاء اللى حشرونا موضوع الدين بدون داعى فى الردود-فانا مش فاهم ايه علاقة ان انا شايف فى منتج معين بيقدمه فلان انه كويس بأنى احشر مع صاحب هذا المنتج فى يوم القيامة، إذن ما رأيكم ان نقوم جميعا فىيوم جماعى بحرق كل تليفونات موبينيل وسيارات هيونداى وثلاجات كريازى، ونعلن ان السيارات الوحيدة التى سنركبها من الآن فصاعدا هى الشاهين والبروتون القادمة من دول اسلامية(مع جل احترامى لهاتين السيارتين)، يا شباب الدنيا مبتمشيش كدة ، فحتى فى ازهى العصور الإسلامية لم يتوقف التعامل التجارى يوما مع اهل المعتقدات الأخرى والتفاصيل تملأ كتب السيرة وكتب التاريخ، بدون ان ينتقص احد من اسلام الآخر لأنه اشترى سيفا من تاجر يهودى او ترجم كتابا عن عالم يونانى ،

كما انه يحضرنى سؤال هام فى هذا الصدد: هل اخونا الماليزى المسلم الملتزم او صديقنا الباكستانى او الأندونيسى او الإيرانى او حتى المجاهد الأفغانى او الشيشانى الذى لا يجيد من العربية شيئا ولا يفهم معانى القرآن الذى يقرؤه بالعربية سوى عندما يراها مترجمة بلغته، هل فى عمل هذا او ذاك على الحفاظ على هويتة ولغته الأصلية انتقاص من تدينه، وهل فى هذه الحالة يحشر الاندونيسى المسلم مع بوذا ويحشر الباكستانى مع كريشنا ويحشر الإيرانى والأفغانى مع اهورا مزدا؟

ان نتعلم الفصحى ونتقنها فذاك شئ جميل يعطينا اداه قوية لفهم ديننا ويجب ان نشجع عليه، فمثلما يتقاتل الأباء حاليا لتعليم اولادهم الإنجليزية والفرنسية والألمانية لمنحهم فرصا اوسع فى الحياه فيجل ان يكو ن الإهتمام اكبر بتعلم اللغة التى بها نتعلم ديننا، لكن هذا لا يتنافى نهائيا مع ان واقع الأمور يقول ان هويتنا الحالية مرتبطة باللغة التى نتكلمها ونفكر بها ونحلم بها وبالتى فإن تعلم لغتا ولهجات اخرى لن يطمس حقيقة ان هويتنا مرتبطة بلغتنا المصرية المنطوقة

انا مختلف معاك تماما يا خالد.. احنا بنتكلم عاميه مصريه "عربيه" و الخليجيين بيتكلموا عاميه خليجيه "عربيه" و المغاربه بيتكلموا عاميه مغربيه "عربيه و اهل الشام بيتكلموا عاميه شاميه "عربيه" بس الناس دول لو اتقابلوا مع بعض في بض الاحيان مبيفهموش بعض الا لو اتكلموا عربيه فصحى STANDAR ARABIC تخيل لو كل البرامج اتحولت للعاميات؟!! هتختفي الفرصه الوحيده اللي بنسمع فيها العربيه الفصحى و لو قابلنا بعض مش هنفهم بعض.

نقطه تانيه... عامل الجذب للأطفال هوه الكرتون نفسه مش اللغه.. يعني هما برضوا بيتفرجوا على الكرتون بالعربيه الفصحى و بيفهموه "على فكره الكرتون المدبلج للعربيه الفصحى بيكون معمول باتقان شديد على عكس اللي بالعاميه المصريه مثلا بحس انه سخيف!!" ليه نحرو نفسنا و اولادنا من حاجه زي كدا؟؟ احنا اصلا مش ناقصين تشتت.

دي وجهة نظري المتواضعه.

[Abu Aly]

بالنسبة لموضوع البرامج المبتذلة فلم يكن هذا هو وجه مقارنتى لهذة القناة بالقنوات الأخرى ، لكن عموما لو فتحنا هذا الباب للمقارنة فلن بينجوا من المذبحة سوى القناه الوثائثية وناشيونال جيوجرافيكس ، اما الباقى كله ففى الهم سواء، لكن اللى انا بتكلم عليه ان لو نجحت مثل هذة التجربة هتخلى ناس تانية تفكر بالأسلوب ده وممكن بعد فترة نشوف نسخة من ناشيوانل جيوجرافيكس او انيمال بلانيت بالعامية المصرية وساعتها انا متأكد ان فيه نسبة كبيرة جدا-مش هقول الكل لكن نسبة كبيرة-من اطفالنا، هتلاقى ان الأفيال والكانجارو والتصحر والاحترار العالمى وهجرة طائر البطريق مسلية زى نانسى وهيفا واليسا لأنها بتقدم لهم بلغة قريبة من قلوبهم

تمام يا استاذ احمد اتفق معك 100 %

بالنسبة للأعزاء اللى حشرونا موضوع الدين بدون داعى فى الردود-فانا مش فاهم ايه علاقة ان انا شايف فى منتج معين بيقدمه فلان انه كويس بأنى احشر مع صاحب هذا المنتج فى يوم القيامة، إذن ما رأيكم ان نقوم جميعا فىيوم جماعى بحرق كل تليفونات موبينيل وسيارات هيونداى وثلاجات كريازى، ونعلن ان السيارات الوحيدة التى سنركبها من الآن فصاعدا هى الشاهين والبروتون القادمة من دول اسلامية(مع جل احترامى لهاتين السيارتين)، يا شباب الدنيا مبتمشيش كدة ، فحتى فى ازهى العصور الإسلامية لم يتوقف التعامل التجارى يوما مع اهل المعتقدات الأخرى والتفاصيل تملأ كتب السيرة وكتب التاريخ، بدون ان ينتقص احد من اسلام الآخر لأنه اشترى سيفا من تاجر يهودى او ترجم كتابا عن عالم يونانى ،

عين العقل .. الواحد مش عارف التسامح و السماحه راحت فين ؟؟ ..

[مدحت منيب]

+1000 ( معظمنا عارفين دينا كويس و ملتزمين بتعاليمه فمافيش داعي ان احنا نذكر احاديث نبوية شريفة في غير مكانها دي بقي اللي ربنا ورسوله يحاسبونا عليها
1000+ ( بلاش عنصرية بقى)+1000

[abo3bdolrahman]

هوا ليه فجأة الموضوع تحول من مجرد رأى فى خدمة تقدمها قناة فضائية إلى نفث أحقاد و كراهية للعرب و للعربية مع إن ده بيحمل فى طياته تلميحات غير جيدة ضد الإسلام نفسه لأن مثلا لو إنتقدت العبرانية لغة اليهود فأكيد أقصد اليهود متكلميها و اليهودية من طرف خفى أرجوا أن ننتبه لذلك و لا يجب الزج مطلقا بالدين فى المعاملات فرسول الله صلى الله عليه و سلم رحمة للعالمين مسلمين و غير مسلمين و قد أعطى خير القدوة فى حسن التعامل مع غير المسلمين من غير المحاربين من أهل الكتاب خاصة اليهود و النصارى و لا داعى للتشهير بأشخاص بعينهم أيا كانت ديانتهم دون دليل لأن القذف يعاقب عليه من الله حتى و إن كان فى حق غير المسلمين و كل ما يهمنا فى تعاملنا مع أى شخص هو صدقه و أمانته و حرصه على مصالح الآخرين و لا إتهام دون برهان أو دليل و كل عام و أنتم بخير و دمتم سالمين.

[Ahmed Samy]

كلام سليم
ولكن الموضوع دخل في أفكار جانبية و الردود كانت على الأفكار الجانبية بعد الرد على الموضوع الأساسي

[ahmed ismail]

سلام عليكم


معلهش انا حتكلم فى نقطة بعيدة شوية عن الموضوع بس بتتقاطع مع صلب الموضوع فى نقطة معينة

حتكلم على دوائر الانتماء والهوية

فنحن لنا فى لاصل والاساس هوية اسلامية نابعة من تعاليم ديننا الحنيف ومثال لذلك الاية الكريمة ({قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ} (162) سورة الأنعام )

هويتنا الاسلامية هى الدائرة الكبرى والتى تجمع بقية دوائر الهوية والتى ننتمى لها على فكرة كلامى عن الهوية الاسلامية مش موجه للمسلمين بس لا موجه للمسلمين والمسيحين واليهود المقيمون فى الشرق الاسلامى فانتماء المسيحى فى مصر مثلا للهوية الاسلامية هو انتماء لحضارة وليس لدين فمعنى كلامى انه منتمى للحضارة الاسلامية والتى عاش الغير مسليمين فى كنفها واستطاعوا ان يضيفوا لها من منجزات وعلوم ومثال لذلك ابن البيطار عالم الادوية والنبات والصيدلة فهو مسيحيى ولكن انتماءه الحضارى هو انتماء للحضارة الاسلامية .
ملخص لكلامى ان كل المسلمين من اقصى المقيمين فى بلاد اغلبيتها مسلمة هم منتمين بالتبعية للهوية الاسلامية والتى حتما ستعود....

االدائرة الاقل من لهوية الاسلامية هى دائرة الهوية العربية والتى قامت على اساس وجودنا فى نطاق جغرافى واحد ونتكلم لغة واحدة هى العربية والتى تستمد خلودها وبقاءها من بقاء القران {إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ} (9) سورة الحجر
فالهوية العربية مع اعترافى انها تعتبر هوية غير مكتملة من منظور شمولى ولكنه يظل انمتاء وهوية ولا تتعارف مع انتماءنا للاسلام و تمسكنا بالهوية الاسلامية فهى جزء مهم حيث ان ارض العرب ومنطقة الشرق هى مهبط الرسالات السماوية ومنبع الحضارات للعالم كله.
اما الدائرة الاقل من الهوية العربية والاسلامية فى الهوية المصرية و نحن نعتز بها و نعتز للانتماء لها على اساس ان كل مسلم منا مطالب بالحفاظ على وطنة وخدمة ترابه والسعى الى رقية والنهوض به والانطلاق بالوطن نحو الافاق فنحن نحب مصر ونتمى لها حيث انها هى الامل الوحيد الباقى للمسلمين فى جمع الشتات و توحيد الصفوف والنهوض بالامة الى سابق عهدها و عزها و اقامة كيان واحد يجمعنا كلنا ويمس صميم هويتنا ويجمع جميع افراد ااوطان سواء كانو مسلمين او اقباط او يهود فالحضارة الاسلامية قادرة على استيعاب جميع الاديان السماوية كثير من الاقباط العقلاء يشجعون هذا الراى ويدعمونة واذكر المفكر القبطى رفيق حبيب واخرون


فانتمائنا المصرى هو جزء من انتمائنا العربى الذى هو جزء من انتماءنا الاسلامى العظيم وال>ى نفخر به ونعتز به اشد الاعتزاز




احمد اسماعيل
11-10 -2007
4:27 قبل الفجر بقليل

[ahmed ismail]

اما على تعليقى على الموضوع الاصلى
انا بعتبر قناة او تى فى ماهى الا وسيلة من وسائل الاعلام الموجهه والذى يهدف فى الاصل والاساس لخلخة قيم واسس واخلاقيات فى المجتمع وتثبيت مجموعة من القيم الخاطئة الموجودة فى المجتمع وا استحداث قيم غريبة عليه وتقديمها للمجتمع فى صورة بونبونيا لينخدع فيها ويظنها عادية
{ وَلاَ يَزَالُونَ يُقَاتِلُونَكُمْ حَتَّىَ يَرُدُّوكُمْ عَن دِينِكُمْ إِنِ اسْتَطَاعُواْ} (217) سورة البقرة