إعـــــــلان

**KarimAbulEla** · 21-03-2009, 06:49 AM

هذا الموضوع ممتاز جدا و ارجو ان يستمر الاعضاء فى شرح الطرق بنفس الطريقة مع اضافة المعلومات الخاصة بالطوارىء

مثلا طريق القاهرة- شرم الشيخ
موقع المستشفيات اذا وجدت
نقاط للشرطة
محطات بنزين
بوابة الرسوم

**amir** · 31-03-2009, 01:28 AM

ممكن المساعده في الموضوع ده عن العين السخنه

عن العين السخنه شويه اسئله - نايل موتورز - NileMotors.net

http://www.nilemotors.net/Nile/showthread.php?p=755216#post755216

قسم خاص للتقارير عن الرحلات داخل مصر وخارجها

**mero2008** · 13-04-2009, 07:06 PM

طري قمرسى مطروح

ممكن أعرف أقرب الطريق المختصر لمرسى مطروح ازاي والاجمالي كام كيلو
انا ساكن في 6 أكتوبر

**MoToRiZeR** · 24-04-2009, 08:54 PM

المشاركة الأصلية كتبت بواسطة mero2008 مشاهدة المشاركة

ممكن أعرف أقرب الطريق المختصر لمرسى مطروح ازاي والاجمالي كام كيلو
انا ساكن في 6 أكتوبر

انا معرفش الإجمالي كام كيلو تحديدا بس أكتر طريق مختصر من 6 أكتوبر

هتمشي لحد ميدان جهينة و تلف معاه تخش شمال إلي طريق مصر إسكندرية الصحراوي

هتنزل علي الصحراوي و تمشي شوية حوالي 80 كيلو لحد طريق وادي النطرون

هتاخد الطريق لأخره .. أخر الطريق ده .. يمين الساحل الشمالي و مارينا .. و شمال العلمين و مرسي مطروح

الإجمالي هيكون حوالي 390 كيلو .

**shndbad2008** · 15-05-2009, 07:34 PM

موضوع مميز جدا اتمنى من ادارة الموقع انها تتبنى الفكرة وتخرجها بشكل منظم لأن بيتهيألى الموضوع جامد جدا

**okacha** · 13-06-2009, 04:36 PM

لو سمحتم يا رجاله عاوز حد يساعدنى انا اول مرة اسافر اسكندريه و عمرى ما رحتها مع حد بالعربيه و ساكن فى حلوان
كنت عاوز حد يقدر يساعدنى بس بالتفصيل عشان مش ناقصه اتوه خالص..فياريت حد يقولى انسب و اسهل طريق ايه هو و ازاى اسلكه و ايه الارشادات اللى فيه و اى معلومات تانى عن اسكندريه و الطريق اللى مؤدى ليها.و شكرا جدا

**dddddd** · 16-06-2009, 01:16 PM

ال عاوز يروح من طنطا لبور سعيد المواصلات ممكن تكون صعبة شوية
السوبر جيت له معاد واحد تقريبا او معادين والمكروباص بيقعد ساعتين على مايحمل
لما روحنا عملنا فكرة حلوة اوى
ركبنا من طنطا للمنصورة ومن نفس الموقف ال نزلنا فيه فى المنصورة ركبنا دمياط والمكروباص حمل بسرعة فى خمس دقايق
وبعدين ركبنا من دمياط لبور سعيد
ولما اتنقلنا فى المواصلات كدا محسناش بطول المسافة

بالنسبة للجمرك بقا
مبياخدوش جمرك غير للناس ال شارية حاجات جملة بالدستة
لكن ال شارى حاجات قطاعى كدا مبيخدوش جمرك

الاسعار فى بور سعيد بقا
تقريبا هى هى نفس الاسعار فى البلاد التانية ولا رخيصة ولا حاجة
ماعدا ملابس البيت البيجامات يعنى
ولبس الاطفال
لبس الاطفال هناك حلو رخيص وشكله حلو

**ahmadrabie** · 17-06-2009, 05:13 AM

ممكن اعرف اروح جسر السويس ازاى من مدينة 6 اكتوبر علشان اروح اسماعلية

**OlaOsman** · 26-06-2009, 06:11 PM

المشاركة الأصلية كتبت بواسطة zozza مشاهدة المشاركة

المدينه : مرسي مطروح

الطريق : القاهره - الاسكندريه الصحراوي حتي الكيلو 115
طريق وادي النطرون - العلمين 137 كم
طريق العلمين - مطروح الساحلي 180 كم

اعتقد معظم النس عندها علم باول مرحلتين من الطريق و للعلم المرحله التلته (طريق العلمين - مطروح ) يعتبر بنفس الكفائه يعيبه فقط السفر بالليل لو مفيش قمر بيبقي صعب عشان لحد الصيف اللي فات مقيش خطوط متقطعه و لا حتى عيون قط (الحاجات دي لحد مارينا بس :? )

الترفيه :
علي رأي ليلي مراد بحب اتنين سوا الميه و الهوا ... بجد انتا مش هتشوف ميه و لا هوا في مصر كلها زي اللي في مطروح ... حتي الناس اللي مش بتحب تنزل الميه مبيقدرش يقاوم بحر مطرح ... انسي الحر و العرق هناك و اغسل مخك هناك ادام البحر

البلد بقت نضيفه جدا عن زمان و بقت من انضف محافظات مصر
النشاطات هنا الصبح بحر و بحر و بحر كل الشواطىء نضيفه و مش غاليه و ممكن تروح تشوف حمامات كليوباترا و تنزل البحر هناك و كمان تزور عجيبه و هي عباره عن جبل علي البحر هتنزل و تتطلع و خلاص
بالليل بقي هتقضيها سينمات صيفي اكتر من المحلات و تتمشى في الوق و تروح مره سوق ليبيا لو ليك في التي شيرتات و الشرابات و الشنط و مراتك تطلع عينك هناك حاجات مش ضروريه بس رخيصه.
و تقضيها بقي جو الكورنيش و الايس كريم و الدره المشوي.

هناك في فنادق القصر 4 نجوم و البوسيد 5 نجوم (القوات المسلحه) معرفش اسعارهم كام و الاحسن و الاسهل انك تأجر شقه علي البحر و دي بتكون وهميه و رووف و بتاع في حدود 250 جنيه (مش هتنزل من البلكونه من كتر حلاوه الهوا و البحر)
و في طبعا شقق ارخص من كده بكتير جوه مش عالبحر

و انتا راجع هتجيب لب و سوداني طبعا حتي لو مش بتحبهم لان كل الناس بتعمل كده (روحت اشتري ربع كيلو لب لقيت كل اللي حواليه بيشترو بال10 و ال15 كيلو)

الاسعار هناك عاديه و المحلات في كل حته و احلي و ارخص حاجتين الفاكهه و السمك

يعتبر من المصايف العائليه النضيفه جدا و كمان مش حتشوف تدني مستوي اخلاقي و انحراف زي ما لو روحت شرم مثلا.

شكرا جزيلا على المعلومات الوافية.

اللي فهمته ان شقة ع البحر في مرسى مطروح هاتبقى أحسن كتير من فندق، صح؟

**ahmedhilmy** · 27-06-2009, 06:02 AM

جميل جدا الموضوع ده يا ريت نستمر بنفس المنوال

**ahmadmidop** · 05-07-2009, 05:25 AM

انا هكمل كلام عن راس البر ودمياط ودمياط الجديدة كمان :
اولا دمياط اول لما تدخل البلد وتعدي مدخل راس البر وتكمل على طول هيبقى اودامك طريقين يا تطلع الكوبري العلوي وده ممكن يوديك على كذا حتة هيوديك اولا على الشهابية ومنها ممكن تروح سوق الحسبة وده في كل حاجو ممكن تحتاجها من الاطعمة .ممكن تطلع برده على باب الحرس وده في كل المواقف سواء محطة الاتوبيس او بيجو اسكندرية قاهرة بورسعيد .....* ومن باب الحرس تقدر تطلع على الشارع الجديد عشان تجيب الحلويات في ناس كتير المساوي الجمل وغيرهم بس انا ارشح المساوي وبالهنا والشفا *بعد كده تقدر تطلع على شارع البحر وعلى ميدان سرور وده كله محلات كل حاجة ممكن تحتاجها ده في سنترات الدروس *ولو عاوز تدخل سينما اما في الصفوة مول او في راس لبر بس في المول افضل . بكده يارب اكون عملت ملخص وافي عن دمياط وانا في الخدمة وتشرفونا

ثانيا:راس البر طبعا اول لما تدخل دمياط زي ما اتشرح ابقل كده وبتمشي عل طول راس البر هتكون على الشمال هتلاقي مكتوب لف وادخل وامشي في الطريق على طول الطريق كله منور وهو يعني مش وحش امشي لحد لمل تدخل راس هتلاقي المدخل كبير ومنور وفي اكيد مطبات واكيد هتدفع وانت داخل طبعا(يبقى انتا اكيد في مصر)ما علينا هتعدي البوابة وخليك على طول هتلاقي ارقام الشوارع مكتوبة على الوح ممكن تمشي على طوووووووووول لحد هتلاقي جامع كبير ادخل شمال هتلاقي محلات اكل كتير وممكن تمشي على طول بعد الجامع وهتلاقي لوحة مكتوب عليها النيل ادخل فيها والنيل ده بيبقى مقفول سياتك بتركن وتنزل تتمشى في كافتيريات مطاعم محلات ملابس كل الي انت عاوزة ولو مشيت لاخر النيل هتوصل لللسان والفنار بس ممنوع تدخل باكل وبتتفتش وانت داخل عشان ممنوع تاكل جوه المهم هتلاقي الفنار بس منظر تحفة وشوية هوا جامدين . وبرده في فراس البر شارع بورسعيد وهو من بعد الجامع امشي على طوووووووووول للاخر كل ده شارع بورسعيد وهيطلع على اللسان برده وفي هناك فندق السلام وفي كافتيريا هاواي جامدة برده. يعني بصراحة انا مش عارف ارتب افكاري كويس بس انا عملت ملخص يعني مش وحش يارب يفدكم
ثالثا:دمياط الجديدة ومدخلها قبل راس بشوية شمال برده ادخل وامشي مع الطريق لحد لما تلاقي مزلقان وصنية في النص عادي امشي على طوووول هتلاقي على يمينك الميناء وعلى شمالك مركز قوات الامن خليك على طوووول هتلاقي لوحة مكتوب عليها دمياط الجديدة امشي بعدها ودخل شمال انت كده دخلت دمياط الجديدة بصراحة دمياط الجديدة مفيهاش الا حاجتين شارع الصعيدي وده في كل حاجة اكل لبس مكاتب عيادات سيابر ........كل حاجة وده بتتمشى فيه يوازي النيل في راس البر . وعندك برده البحر وفي هناك كافتريات تعود باليل قدام الميه شويه هوا بصراحة جامدين ....... يااااارب اكون فيدتكم وانا في الخدمة ملحوظة المسافة من دمياط لراس البر حوالي 21 كيلو ومن دمياط الى دمياط الجديدة حوالي 28

**Amo0o0oRa** · 23-07-2009, 09:11 PM

المشاركة الأصلية كتبت بواسطة ahmadrabie مشاهدة المشاركة

ممكن اعرف اروح جسر السويس ازاى من مدينة 6 اكتوبر علشان اروح اسماعلية

لو عايز تروح الاسماعيليه فى طرق تانى

انت ممكن توصل لاخر المدينه(6اكتوبر) وتاخد الدائرى من هناك

هتكمل فى الدائرى ده على طووووول سيبك من اى نزله هتقابلك لا هرم ولا محور ولا اى حاجه خااالص

لحد ما توصل ااااخر الدائرى خالص فى حل من اتنبن

1ـ هتلاقى اخر نازله خالص وهى نزله مدينة السلام هتنزل منها تمشى شويه هيقابلك كوبرى مش هتطلعه هتعمل يوترن من تحته وبعدين ترجع تانى هو ده جسر السوس وبدايه مصر اسماعيليه الصحراوى

2ـبدل ما تاخد النزله دى هتلاقى نفق فى اخر الدائرى ممكن تنزل النفق وبعدين تطلع الناحيه التانيه اول يوترن يقابلك هتاخده وترجع تانى وده مخرج الدائرى تكمل بقى على طول فى طريق مصر اسماعيليه

اول ما تمسك اول الطريق ملكش دعوة باى ملفات ولا اى شمال ولا يمين عشان هيقابلك نفق العبور سيبك منه وهيقابلك كمان مدخل الشروق والعاشر سيبك من كل ده

على طول وخليك شمال عشان فى كوبرى هيقابلك لازم هتطلعه عشان لو نزلت من تحته يبقى انت كده رايح على العاشر وطريق بلببيس وكده

الطريق كويس وفيه تقريبا محطتين بنزين على ما اعتقد

طولت عليك كفايه كده

ســــلام

**biboelking200** · 11-08-2009, 07:52 PM

تسلم ايديك علي الوصف بتاع الطريق بتاع مصر اسماعيليه بس عاوز اقولكم شويه حاجات كده علي الماشي
في كذا مكان ممكن توقف فيهم وجامدين جدا واسعارهم معقوله اوي بنزينه اسمها smil ,....l
أللى في العاشر وفي كمان مطعم اسمه المطعم اللباني حلو برضوا وممكن تاخد ريست فيه
وعاوز انبهكم كمان لحاجه مهم اني في كذا ردار هم مش ثابتين بس موجودين فخالي بالكم منهم
في واحد بعد ما تعدي الشروق قبل المركز الدولي وفي واحد تاني بعد ما تعدي البوبات بحاولي 10 كيلو امشي علي مهلك كده من عند فتحت ابو صوير
الكلام ده لحد اسماعيليه لحد بورسعيد بقي الدنيا حلو بس اول لما توصل اسماعيليه ادخل علي موبيل اللى في التفريعه ديه علشان لحد بورسعيد تقريبا مش هتلاقي بنزينه تانيه في الطريق اللى رايح هات منها اللى انتي عاوز وحط بنزين وظبط
وفي ردار برضوا واحد او اتين اللى متاكد منه ببيقي قبل الكارته كده وده بيبقي مش ثابت فخالي بالكم بقي وانت مسافرين وربنا معانا

**HASBALAH** · 04-09-2009, 08:09 PM

فكرة ممتازة

Comment

إعـــــــلان

.

دليل نايل موتورز السياحى

Comment

Comment

Comment

Comment

Comment

Comment

Comment

Comment

Comment

Comment

Comment

Comment

Comment

Comment