الموضوع: رابطة حائزى الفلوينس

المشاركة الأصلية كتبت بواسطة yalahwy2010

أنا عايز أعمل شكر خاص لمالكى الفلوانس وأحب أوضح شوية حاجات فى العربية مش موجودة فى أى عربية تانية
أنا هحكيلكم حكايتى مع العربيات من طأطأ لسلام عليكم
أنا كان معايا ميجان 2005......واشتريتها مستعمل سنة 2009 وقعدت معايا حوالى سنتين و 9 شهور
الميجان من العربيات المحترمة جدا وعربية ركوبة فعلا.........بس مشكلتها فعلا فى أعطالها الغير منطقية واللى مش موجودة فى عربيات تانية أقل منها فى المستوى......والقلق اللى جالى وانا بركبها نتيجة التجارب اللى مريت بيها ......
المهم.........بعتها وجبت سيفك 2009 مستعملة......وكانت عربية حالتها ممتازة........لكن للأسف .....ما استريحتش فيها خالص.......والسبب هى الميجان
الميجان عودتنى على حاجات ممتعة.........ومالقيتهاش فى السيفك
يعنى على سبيل المثال...........لما بروح افتح الشنطة بتاعة السيفك.......لازم أحط المفتاح او افتحها من الدراع اللى جوة..........لكن الميجان من الشنطة نفسها..........السنتر بتعها بيشمل فتحة تنك البنزين والشنطة وكله........
واللى خلانى أشترى السيفك...انى كنت فاكر ان الفلوانس بنفس أعطال الميجان...........لكن لما قريت ال 123 صفحة ( رابطة حائزى الفلوانس) وعرفت ان العربية ما شاء الله مافبهاش أعطال الميجان..........عزمت النية على شاء الفلوانس والحمد لله ربنا وفقنى واشتريتها (تانى فئة اوتوماتيك)
العربية لما ركبتها ......بس الله ما شاء الله.............حاجة تفرح وتفتح النفس فى سواقة العربية
العربية هقول على شوية مميزات للأخوة اللى ممكن يقروا اللى انا كاتبه وتساعدهم على الاختيار:
1. أولا العربية كراحة فى الركوب......حاجة فوق الوصف فى الراحة فى المناورة والكرسى المريح ..........
2. الباور الناعم اللى بيخلى الواحد وهو بيركن مش تعبان ولا بيفرق معاه فى الطلوع والرجوع
3. الارتفاع عن الأرض.......يعنى انسى المطبات والنقر والتكسير اللى تحس بيه وانت سايق......يعنى لو معاك 3 أفراد فى الكنبة الخلفية.......صعب جدا تحك فى مطب رخم
4. الشنطة الواسعة اللى تشيل شنط كتييير جدا .....
5. الصاج المحمل ومددى منظر للعربية بالقوة والصلابة.....لو واحد ركن عليها ماتلاقيش الصاج عروج
6. الكماليات اللى مالهاش حصر...........تحس انهم كانوا عايزينك تدخل وتسيب العربية تمشى لوحدها من غير ما تتعب نفسك وتدوس بنزين وفرامل........آه...........الفرامل بالصلاة على النبى.........مش قادر أوصف الفرامل........من الآخر (أحسن من السيفك والفانتازيا)
7. الكنبة الخلفية مريحة جدا للى بيقعد ورا..........واسعة جدا ومريحة جدا جدا
8. العزل ثم العزل ثم العزل ........حاجة تحفة......بس صوت الموتور بيطلع فوق ال 160 .......بس قبل كدة........ولا الهوا.....انسى صوت الظلط والأسفلت الوحش والهوا والكلام ده كله
7. أنا مش هتكلم عن الكماليات .......عشان بتختلف من فئة للتانية...........بس اللى عايز يشترى......ما يشتريش أقل من الفئة التانية أوتوماتيك
8. بالنسبة لإعادة البيع..............لو العربية إعادة البيع ما اتحسنتش.......عمرى ما هفكر أغير...........ولو حبيت أغير.......يبقى أكيد هفكر فى الفلوانس 2015...........لو غيرت لأحسن..........يعنى الميجان لو كانت بدون أعطال.........ماكنتش بعتها..........لأنى بصراحة ما لقيتش ركوبة أحسن منها....ماعدا الفلوانس

وبالتوفيق لأى حد ناوى يشترى ويجيب فلوانس ........ومش هيعرف قيمة اللى انا بقوله الا لما يقران بينها وبين أى عربية تانية فى نفس فئتها السعرية أو أعلى منها لغاية 50 ألف جنيه

انا بعد سنتين من استخدام الفلوينس كل يوم بيزداد اعجابى بها اكتر ورغم انى مفروض اكون اتعودت على العربيه لكن لغايه دلوقتى ادائها مازال مبهر جدا و حضرتك لخصت و اوفيت حقها تماما تحيه على مشاركتك الرائعه

المشاركة الأصلية كتبت بواسطة ahmed elsahaby

إلي ماكلي الرينو فلوانس
الحمد الله اخويا عمل حادث بعربيتي رينو فلوانس 2012
والحادث اثر علي الشاسية والريداتير وفي سمكرة والباقي قطع غيار .... إلخ (وشوية حجات تاني )
انا من الأقصر
وفي ناس كتير نصحوني اني اروح مركز صيانة العامرية في اسكندرية
وفي ناس كتير نصحوني اني اروح مركز صيانة العبور
انا بصراحة محتار بس توصلت ان المركزين دول افضل مركزين صيانة لرينو في مصر
بس عاوز اعرف اراء العملاء اللي اتعاملو مع العامرية واللي اتعاملو مع العبور
واعرف تقيمهم اية للمركز وهل هناك مهندسين فاهمين ولا اي كلام .. وهل في ميكانيكا وسمكرة ودودكو والحجات دي
كويسة ولا لأ ؟
شكرا مقدما لمالكي الفلوانس خاصة ولمالكي الرينو عامة

الف سلامه لاخوك ورينا يعوضه خير ان شاء الله.

بالنسبه للعبور فيه سمكره ودوكو وفيه في القطاميه

انا جربت القطاميه كويسين بس العيب المده يعني انا سبت العربيه اسبوعين عشان تغيير اكصدام امامي

بس ان شاء الله هتستلم العربيه زي الاول وتتخربش تاني

الف سلامه لاخوك وفداه الحديد