استطلاع رأى بسيط جدا

بس موجه للمتزوجين فقط، ومش كل المتزوجين لكن الشجعان منهم فقط الذين يستطيعون ان يقولوا رأيهم دون خوف من التبعات التى تتراوح بين النكد الأزلى الى ابو وردة مرورا بسيبان البيت

هل لو رجع بيك الزمان الى ما قبل قرار الزواج بخمسة دقائق، هل ستتخذ نفس القرار بالزواج وللا هتقرر انها تجربة خير اسلوب للتعامل معها هو الإبتعاد عنها والفرار منها



اللى يحس انه هيقول رأيه متأثرا بخوفه من الطرف التانى او عايز يجامل الطرف التانى اتقاء للنكد ياريت يمتنع عن التصويت علشان الإستطلاع يعكس اراء حقيقية

ياللا مستنى أراءكم بدون خوف

والله كتير نصحونى بس أنا مسمعتش الكلام

:)
طبعا مضمون الرد واضح زى الشمس

بجد
الزواج أوقف حاجات كتيرة تانية
هو عائق منيع ضد الدراسة السريعة القوية (بيمنع المذاكرة بمزاج و لازم تذاكر و انت مزنوق)
و كمان بيضطررك لاختيارات كتيرة غير اللي انت عايزها في حاجات كتيرة (نوع السيارة مثلا ماينفعش تكون مانيوال لأن المدام مابتعرفش تسوق مانيوال)
ده غير القضاء تماما على أي فرصة للتحويش
ولكن
لو رجع بيا الزمن كنت هاتجوز برضه :d

لالالالالالالالالالالالال الالالالالالالالالالالالا لا وبلا خوف !!!!!!!!!!!!!!!!!!!!!!!!!!!!!!!!!

اشمعني يعني . هوه الجواز وحش للدرجه دي يا رجاله ولا ايه ؟ ده انا نفسي اتجوز و حاطط عين كمان .. و ناوي قريب بس اما اخلص من السته اشهر الجايين دوول .. دراسه بقي و كده .. مع العلم .. انا عندي 21 سنه و جنسيه سويسريه .. يعني بالنسبه للسفر العمليه مفتوحه علي البحري .. و غير كده كنا اصلاُ شغاليت مستوردين قطع غيار سيارات .. ايه الكلام يا رجاله ... اللي يتكلم ياريت يكلمنا عن عيوب الزواج (غير طبعاُ العيال و كده .. الكلام ده عارفينه ) ;)
ايه الكلام .. الحقونا قبل الفاس ما تقع في الراس :d

هو بس الزمن مش ممكن يرجع لورا ..... يا خساره !

زى اسلام شاهين ماقال بالظبط .............. اصلنا صحاب قوى انا وهو

انا الحمد لله متجوز من 7 سنين .(يعنى عديت فتره الخطر :):) ) لو رجع الزمان تانى هاتخذ نفس القرار طبعاً

الجواز زى اى حاجه فى حياتنا عباره عن (package) طالما انت مختار على اسس سليمه وفى الوقت السليم يبقى توكل على الله .. الجواز مش كله حلو ومش كله وحش .. زى ما هاتفرح بوجود انسانه تحبك وتحبها وتشاركك حياتك وتكون اسره واولاد لازم قدام ده تتحمل المسئوليات الجديده وتبعيات المسئوليات دى من تنازلات شويه من متطلباتك

يعنى زى اى حاجه فى حياتنا لازم تقدم حاجه علشان تاخد حاجه (تقدم فلوس تشترى متطلباتك... تقدم تعب تحقق نجاحات ... تقدم موده تكسب اصدقاء ...إلخ)

اهم حاجه عند الاختيار يكون فى توافق ذهنى، توافق اجتماعى، نضج فكرى وفهم صحيح لمرحله الزواج، مقدرة ماديه (مش لازم تكون مليونير بس على الاقل تعيش فى نفس مستواك فى بيت والدك او والدها) وطبعا قبول الاسرتين

ده رأيى

لا و الله يا جدعان الجواز حلو و كل حاجه و احسن حاجه فيه ان الواحد بيتلم اه الواحد بيبوص علي ديه و ديه بس مش من حلوت البنات الي بنشوفهم في الشارع لا انا بنتقضهم وبكون قرفان منهم لاني مشيت في الطريق الصح و الحاجه الحلال مش الحرام وكمان كما تودين تودان لو عكسيت ديه او بصيت علي ديه هاتلاقي الي بيبوص او بيعاكس المدام فعلي ايه بقي يعني
وبالنسبه للمشاكل فا ديه امرها سهل جدا بكلمه حلوه او بهديه بسيطه زي ورده مثلا الامور بترجع تاني وبتكون الامور احسن من الاول وطبعا شوية مسايسه بتظبط الدنيا وكل مشكله ليها حل بس ماتفكرش و انت عصبي او متنرفز وكمان ماتخودش منها اي كلام و هي مترفزه او متعاصبه لانها هاتتكلم كلام هايضيقك اكتر فا علي ايه سيبها خالص ولما الامور تهدي و تروق ظبط الدنيا و الدنيا هاتمشي و تكون اخر حلاوه و حياه هاتكون مانجوا بس

هتخذ نفس القرار وبدون تردد، الزوجة الصالحة نعمة من عند ربنا، بس أهم حاجة الأختيار، لازم تختار بيت و عيلة مش زوجة بس، انت بتختار اب و أم تانيين و بتختار خال ولادك و بتختار نسايب و قرايب و حاجات كتير و غالبا لو اخترت كل دول كويس، يبقى الزوجة هتبقى كويسة هى كمان.