تقطيع على الطريق السريع عند القيادة لمدة طويلة

**northy** · 21-05-2010 03:38 AM

ازيكم يا اجمل منتدى
عندى مشكله فى عربيتى 128
تتلخص فى انه فى اى مشوار طويل شوية على السريع بمشى على سرعات عاليه من 80 وانت طالع لمدد طويله
بحس ان مع الوقت العربية بتتقل ودوسة البنزين لازم تزيد عشان ازود السرعة فبحاول اضغط بزيادة عشان اسرع من 80 ل 110 مثلا الاقى العربية نتشت وقطعت
ولازم عشان امنه التنتيش اقلل السرعة ل 60 وبعدها ل 40 واقل كمان احيانا
تخيلوا بقي لما امشى على طريق سريع على 40 عشان العربية مش تقطع انا ماشى النهارده بتاع 60 كيلو كده
مع العلم العربية كويسة جدا جوه البلد والمسافات القصيرة
انا كنت شاكك فى رداخ البنزين وغيرته بس المشكلة زى ما هى
يلا يا عباقرة المنتدى شوفولى حل

**samirayad** · 21-05-2010 08:17 AM

أنا ميال لأن ده عيب فى مجموعة كهرباء الأسبراتير

وخصوصا الكوندنسر (المكثف )

ولكن برضه أطمن على أن البوبينا مبتسخنش منك بعد مشوار طويل

**samirayad** · 21-05-2010 10:27 AM

وبرضه ممكن يكون عيب فى كابلات البوجيهات

**northy** · 21-05-2010 01:58 PM

الف شكر يا باشمهندس سمير على الرد
عندى ليك كام سؤال كده
هل لو البوبينا السبب مش المفروض العربية تبطل ومش تدور الا لما البوبينا تبرد؟
هل لو كهربه الاسبراتير والكوندينسر السبب مش المفروض برضه تقطع فى جميع الاوقات مش بس لما امشى مدة طويلة على سرعات عالية؟؟
ونفس الكلام هل ممكن ينطبق على سلوك البوجيهات؟؟
اكتر شئ مميز بحسه فى التقطيع ده انه مرتبط بمحاولة التعجيل يعنى لما افترى على العربية فى دوسة البنزين علشان اخليها تزود سرعتها لانها بتبقى تقيلة اوى والسحب ضعيف
هل ده له معنى؟؟
ومرتبط كمان بمرور وقت يعنى سواقة نص ساعه او اكتر ,, عشان كده لو ميكانيكى طلع يجرب معايا مش بيلاقى حاجة
اعتقد انها مرتبطة بحاجة لما بتسخن بيحصل فيها مشكلة

**SAMEH_FOUAD** · 21-05-2010 02:08 PM

دة ممكن تلاقية عيب عندك فى بيجات الكرباراتير ولا السرعة بتزيد طبعا ضخ البنزين بيقل شوية عشان الترس بيصغر وبيبقى العربية خفيفة على الماتور فصعب انها تعدى اى عوائق فى البيجات عشان تقدر توصل للبنزين

تانى حاجة :نظف غير فلتر البنزين ونظف فلتر الهواء

وطبعا راجع كلام المهندس سمير

**samirayad** · 21-05-2010 02:11 PM

هل لو البوبينا السبب مش المفروض العربية تبطل ومش تدور الا لما البوبينا تبرد؟

لا مش شرط تبرد البوبينا علشان العربيه تدور

ولكن ممكن لما تسخن منك تخللى المكنه تقطع بس بدور برضه

هل لو كهربه الاسبراتير والكوندينسر السبب مش المفروض برضه تقطع فى جميع الاوقات مش بس لما امشى مدة طويلة على سرعات عالية؟؟

برضه مش شرط

ممكن الأبلاتين يلدع مع السرعه العاليه بسبب الشراره بين أطرافه
بسبب عيب فى الكوندنسر

ونفس الكلام هل ممكن ينطبق على سلوك البوجيهات؟؟

دى اللى ممكن نأجلها فى التشخيص حاليا

على أساس أن عيبها بيظهر مع جميع السرعات

بس وارد برضه أن عزلها بينزل مع أستمرار السخونه وبالتالى بتهرب الكهرباء وتخللى المكنه تنتش معاك

اكتر شئ مميز بحسه فى التقطيع ده انه مرتبط بمحاولة التعجيل يعنى لما افترى على العربية فى دوسة البنزين علشان اخليها تزود سرعتها لانها بتبقى تقيلة اوى والسحب ضعيف
هل ده له معنى؟؟
ومرتبط كمان بمرور وقت يعنى سواقة نص ساعه او اكتر ,, عشان كده لو ميكانيكى طلع يجرب معايا مش بيلاقى حاجة
اعتقد انها مرتبطة بحاجة لما بتسخن بيحصل فيها مشكلة

الأسهل معاك حاليا

أنك تبرد البوبينا بفوطه صفراء مبلوله ومعصوره (مع وجود الحدث )

أنعدل الحال لما بردت البوبينا ( يبقى هى السبب )

أما لو مفيش تحسن

بعد كده ممكن تخش على تغيير طقم كهرباء ( أبلاتين وكوندنسر )

**م.محمد علاء** · 21-05-2010 02:26 PM

المشاركة الأصلية كتبت بواسطة northy

ومرتبط كمان بمرور وقت يعنى سواقة نص ساعه او اكتر ,, عشان كده لو ميكانيكى طلع يجرب معايا مش بيلاقى حاجة
اعتقد انها مرتبطة بحاجة لما بتسخن بيحصل فيها مشكلة

و ليه مش مرتبطة بحاجه بتخلص مع مرور الوقت..أو حاجه معدلها بيتغير مع الزمن...
انا حقول لحضرتك المشكله اللي انا قصدي عليها..والباشمهندس سمير وسمسم يقولوا رأيهم...
انا برجح مش بأكد..إنها ممكن تكون مشكله فى خرطو فايظ الهوا.....ماله ده؟؟؟؟؟
مع المشوار الطويل اللي حضرتك بتعمله و مع السرعه ..البنزين معدله بيقل داخل التانك.....طيب وبعدين؟؟
المفروض ان خرطوم الفايظ يدخل هوا يحل محل البنزين اللي خلص..عشان لو محصلش كده حتبقى مشكله..؟؟
المشكله إن التانك حيفضى من جوا ومفيش هوا بيدخل مكان البنزين اللى فضى...
زي علبة العصير لما تشفط منها بيحصلها إيه؟؟؟
أو لو حضرتك دكتور حتعرف إزازة المحاليل اللي بتتعلق...بيخروموها عشان متتشفطش لجوه...
هو ده اللي حيحصل للتانك بتاعنا فى الحاله دي...
البنزين بيخلص و مفيش حاجه تانيه بتدخل لأن الخرطوم مسدود..
التانك يكاد يتشفط أو يقفع للداخل...
طبعا الكلام ده بيحصل لما البنزين بيقل بصوره أو نسبه معينه...
الرداخ بيسحب بنزين...بس تول فى التانك ضغط فراغvaccum pressure..
بيحاول يسحب البنزين تاني فى التانك...
يبقى عامل زي لعبة شد الحبل..
الرداخ بيسحب...
و التانك بيسحب..
و هكذال...لو مشوارك طول...حتلاقى العربيه قطعتت وبطلت..
حتفتح التانك ..ساعتها حتسمع صوت عامل زى الشفاطه والبلاعه المسدوده..

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـ
كل ده من واقع تجربه مريت بيها مع ال 128 لمدة سبع سنين...
لدرجة إنى مكنتش بفكر أسافر بيها..

**samirayad** · 21-05-2010 02:31 PM

وهى مشكلة إنسداد خرطوم الفايظ الخاص بتانك البنزين

وأنا أأويد تلك النقطه الفنيه الجميله أيضا والخاصه بظاهرة ال vapour lock

لما الفائظ يبقى مش تمام فوارد جدا ذهاب (هواء + بنزين ) من التنك

الى الكربوراتير وبالتالى حدوث تقطيع للمكنه

وده ممكن تكتشفه لو تغير معاك صوت رداخ البنزين
من خلال تغير صوت الطلمبه وتحوله الى صوت مصحوب بزنه

ززززززززززززززززززز

**م.محمد علاء** · 21-05-2010 02:38 PM

المشاركة الأصلية كتبت بواسطة samirayad

وأنا أأويد تلك النقطه الفنيه الجميله أيضا والخاصه بظاهرة ال vapour lock

لما الفائظ يبقى مش تمام فوارد جدا ذهاب (هواء + بنزين ) من التنك

الى الكربوراتير وبالتالى حدوث تقطيع للمكنه

وده ممكن تكتشفه لو تغير معاك صوت رداخ البنزين
من خلال تغير صوت الطلمبه وتحوله الى صوت مصحوب بزنه

ززززززززززززززززززز

يعنى كلامي مقبول يا هندسه؟

بس انا عندي إستفسار من حضرتك...
النقطة اللي تحتها خط فى كلام حضرتك...
مشكلة زي إيه؟؟
منا بقول إن الخرطو ممكن يكون مسدود..يعنى مفيش هوا تمام بيدخل من التانك للتعويض الفراق..
و حتى لو بيدخل..إيه علاقه هواء التانك بهواء الشحنه؟؟
الفمروض ان الشحنه هى البنزين اللي جاي من التانك فقط..+هواء مخلوط فى الكاربيراتير..
؟