هتجنن من استهلاك البنزين 60 ك / صفيحة وجربت كل حاجة

**amrelsaqqa** · 14-04-2011 11:47 PM

السلام عليكم ورحمة الله

العربية عندى بتشرب بنزين بمعنى الكلمة
جوة البلد معدل الاستهلاك 60 كيلو فقط في ال20 لتر !!!

العربية بيجو 504

طبعا اول حاجة فكرت فيها بعد الفلاتر وظبط الكهربا و ظبط هوا الكاوتش والتأكد من عدم وجود قفش في الفرامل ،،

الكربراتير

واحد قاللى ده فيه اكس وباب وروح صلحه وهتظبط معاك اكيد
روحت صلحته عند واحد غيرله بيكات و الذى منه وقاللى الكربراتير كويس وجرب كدة وخلاص مش هياكل بنزين

دفعت 60 جنيه + تمن البكات والجوانات بلا اي فائدة
اتعقدت بزيادة ونفضت للموضوع واتأقلمت على كدة وامرى لله
لحد ما الكربراتير ظبطته باظت و العربية بقت تغيب اوى في الدوارة الصببح ، قلت اما اغيره

لقيت كربراتير جديد صينى ب275 باب واحد قلت مش مشكلة طالما جديد يبقى مضمون وللاسف ، ركبته خنق العربية جامد جدا ، لانه صغير والمفاجأة الاستهلاك برضه 60 كيلو بس / 20 لتر

ميكانيكى قالى ده كدة صبابات ووش السلندر هيتحل وبتاع .. ما اقتنعتش بالحوار ده
رحت عملت اختبار كبس الموتور طلعت حالته 90%
فكدة طبعا العيب مش من المكنة

وبرضه مش ملاحظ تسريب من دورة البنزين يعنى

المهم بعت الكربراتير الصغير وخسرت فيه 100 جنيه وجيت اركب القديم ، ما رضاش يظبط تانى ابدا و الباب والاكس بقى واضح انهم مبوشين جامد
جبت واحد استيراد ب550 وهو الصراحة الباب والاكس بتوعه كويسين وجربته على الطريق لقيت المعدل 120 ك / الصفيحة بس كان كلهم شد وحرق فقلت مش مشكلة مع السواقة الهادية المعدل هيزيد و هعملله صيانة وهيظبط و جبت بكات جديدة و كدة ونضفته كويس
والمفاجأة اجربه جوة البلد برضه 60 ك / الصفيحة

انا هتجنن بجد من العربية دى
بس اليومين اللى فاتوا عملت تجربة مثيرة

سخنت العربية الصبح وطلعت بيها مشوار صغير 3 كيلو مثلا
وروحت البيت ركنتها في الجراج وخدت بالى من قراية مؤشر البنزين
نزلت الضهر بصيت على المؤشر لقيته نقص شوية ( والعربية كانت واقفة بعد اخر مرة بصيت فيه )

دورت العربية دقيقتين ( اشغل دورة البنزين ) وبطلتها تانى وطلعت فوق
نزلت العصر لقيت المؤشر اتحرك برضه سنة صغيرة

اكتشفت ان بالمنظر ده ممكن العربية ما تمشيش خالص ومجرد تدور دقائق معدودة وممكن الاقى التنك خلص
رحت لميكانيكى النهاردة قاللى مش شايف تسريب والحرق كويس والعادم كويس والهوا كويس والكهربا كويسة والسحب كويس !!
لدرجة ان الميكانيكى عقدنى وقاللى بيعها احسن !!

روحت كشفت على خراطيم البنزين بنفسى ونزلت تحت العربية ، مش حاسس بأي اثار للتسريب
بس برضه انا بسمع الناس تقول "راجع البنزين" ومنظم البنزين ،
مش لاقى الحاجات دى في الدورة عندى
مجرد تنك وطالع منه خرطوم وماشى لحد الفلتر اللى في الحوض ومنه للرداخ ومنه للكربراتير ، دى كل دورة البنزين عندى

اعمل ايه بجد عشان انا خلاص هتجنن وهل كدة العيب تسريب بنزين مع انى مش عارف احدد اي مكان في تنشيع او تسريب مع انى بشم ريحة بنزين خفيفة في الجراج

وبصراحة خايف ادفع مصاريف زيادة على الفاضى لأن لحد دلوقتى صرفت ييجى 1000 جنيه على الفاضى بدون اي تأثير على الاستهلاك الغير طبيعى اللى محسسنى انى راكب 3 عربيات مع بعض مش عربية واحدة

معلش طولت في الموضوع بس اعذرونى وكمان عايز اختصر الطريق على الردود بدل ما حد يقوللى على حاجة من اللى انا عملتها

**ahmed1981** · 15-04-2011 12:00 AM

طالما لم توضح أي مشاكل أخرى مرافقة لمشكلة هذا الإستهلاك
إذن عندك تسريب بنزين جامد
ممكن التانك مخروم
أو في خرم في خراطيم البنزين رايح أو راجع

وممكن طرمبة البنزين نفسها بتسرب

**amrelsaqqa** · 15-04-2011 12:01 AM

المشاركة الأصلية كتبت بواسطة ahmed1981

طالما لم توضح أي مشاكل أخرى مرافقة لمشكلة هذا الإستهلاك
إذن عندك تسريب بنزين جامد
ممكن التانك مخروم
أو في خرم في خراطيم البنزين رايح أو راجع

وممكن طرمبة البنزين نفسها بتسرب

شكرا لرد حضرتك
بس انا معنديش خط راجع !!
هل ده طبيعى في بعض العربيات ؟

**dr.hazem** · 15-04-2011 12:54 AM

عزيزي
ممكن تكون مشكلتك في غطاء تنك البنزين
لو الغطا ده مش محكم او الجلده اللي جواه مفقوده هيكون بنزينك بيتبخر وانت مبتستخدموش اساسا
اتأكد ان الغطا سليم ممكن يكون هو المشكله فقط!!

بالنسبه لخط الراجع المفروض يكون موجود بس مش عارف هل في عربيات مفيهاش؟
لكن اللي اعرفه ان فايدة خط الراجع انه بيحافظ على ضغط البنزين في التانك وكمان بيوفر في البنزين لانه بياخد الفايض ويرجعه
فممكن برضو تكون دي المشكله عندك

تحياتي

**keko** · 15-04-2011 09:02 AM

المشاركة الأصلية كتبت بواسطة amrelsaqqa

مممممم
طيب مش حاجة غريبة ان العربية ظابطة نفسها بالظبط على 60 كيلو / صفيحة سواء في يومين او في اسبوع او في اسبوعين !!؟

لو الموضوع في الغطاء اعتقد هترتبط بوقت اكتر من مسافة ؟؟ ولا ايه ؟
وهل مجرد وجود عدم احكام بسيط في الغطاء يعمل ده كله ؟

خصوصا مثلا انى اسمع ان التنك بيبقى فيه خرم من فوق عشان يدخل هوا مكان البنزين اللى بيتسحب ( بحيث التنك ما يحصلوش شفط زي علبة العصير بسبب سحب البنزين ) يعنى القصد لو فيه عدم احكام بسيط من فوق مش هيأثر ، ولا ايه ؟؟
وشكرا لاهتمام حضرتك

اكيد الخرم ده بيدخل هوا بس مش بيخرج
وانا بصراحة مع الاخ فى حكاية غطاء التانك شوفه مش هاتخسر حاجة
بص برضه على قطم الدبرياج لانه بياثر فى الاستهلاك
ضغط الكاوتش بياثر شوية بس مش قوى

سؤال جانبى هوا بتاع الكاربراتير اخد منك 60 ج لمجرد تغيير بيكات ونضافة !!!!!!!! دانا بروح للراجل ينفضه تنفيضة العيد ب 20 ج جرب واحد تانى ممكن ده مش فاهم قوى

**keko** · 15-04-2011 09:03 AM

اه ولو الموتور فيه صوت تكتكة ممكن تكون التاكيهات مش مظبوطة وده بياثر برضه

**amrelsaqqa** · 15-04-2011 02:14 PM

المشاركة الأصلية كتبت بواسطة keko

اه ولو الموتور فيه صوت تكتكة ممكن تكون التاكيهات مش مظبوطة وده بياثر برضه

التاكيهات عندى مبوشة بس مش محملة
واللى فهمته من كلام الميكانيكية انها لو مبوشة ما تأثرش
انما لو محملة تأثر في استهلاك البنزين

بس التاكيهات والحاجات دى كلللللللها المفروض تأثيرها ميبقاش لدرجة 60 كم / صفيحة

**keko** · 16-04-2011 07:01 AM

المشاركة الأصلية كتبت بواسطة amrelsaqqa

التاكيهات عندى مبوشة بس مش محملة
واللى فهمته من كلام الميكانيكية انها لو مبوشة ما تأثرش
انما لو محملة تأثر في استهلاك البنزين

بس التاكيهات والحاجات دى كلللللللها المفروض تأثيرها ميبقاش لدرجة 60 كم / صفيحة

مش شرط تكون حاجة واحدة ممكن تكون مجموعه عوامل . انا كان عندى مشكلة قبل كده وانا لسه شارى العربية انها مش بترضى تدور الصبح وبعد معاناة اكتشفت ان العيب كالاتى
1- البطارية جابت اخرها
2 - المارش كان بايظ
3 - فيه تسريب بسبب سلكة ملمسة
4 - الدينامو كان وحش
5 - العروة النحاس بتاعة المارش من البطارية مكانتش موصلة صح
6 - فيه تمليح عند كابلات البطارية فعامل عزل

6 عيوب مع بعض كانوا موجودين بسبب اهمال المالك السابق طبعا استحالة يكون عندك كل العيوب بس ممكن كذا حاجة مع بعض يعملوا كدا

**smartchoice** · 16-04-2011 09:33 AM

أنت متأكد ان قراية مؤشر البنزين صحيحة لن أنا عندى فى العربية التويوتا عوامة البنزين بايظة و مهما أفول العربية المؤشر مبيوصلش للأخر

الموضوع: هتجنن من استهلاك البنزين 60 ك / صفيحة وجربت كل حاجة

LinkBack

أدوات الموضوع

عرض

-

-

-

المواضيع المتشابهه

صفيحة البنزين بتعمل كام كيلو

مشكله كبيره فى البنزين ارجو المساعده لانى هتجنن

حاجة غريبة عندي في استهلاك البنزين

معدل استهلاك البنزين والعوامات بتاعة عدادات البنزين ؟

استهلاك البنزين 92 للنوبيرا عالى بدون تكيف داخل القاهرة+لمبة البنزين

الكلمات الدلالية لهذا الموضوع

المفضلات

المفضلات

ضوابط المشاركة