مطلوب تقرير كامل عن الCitroen C4

**Romeo26222** · 12-08-2011 05:21 PM

مساء الخير...
اولا شكرا استاذ محمد علي كلامك بخصوصي وبخصوص المركز..
ثانيا نتكلم شوية عن العربية مميزات وعيوب
طبعا مميزات السي 4 كتيرة جدا وكفاية انها العربية الوحيدة في العالم اللي فيها الدركسيون بيلف لكن الطارة ثابتة
العربية من حيث الموتور موتورها جيد جدا 1600 سي سي بقوة 110 حصان واقتصادي في استهلاك البنزين وكمان العربية صديقة للبيئة من ناحية انبعاث العادم..
الفتيس لازم نعترف انة فية مشاكل موجود عندنا في مصر بس وبصراحة شديدة السبب كلة في المرور والشوارع والزحام الرهيب اللي بيخلي الفتيس ما ياخدش نقلاتة مستريح وبيستهلكة بسرعة..
عناصر الامان في العربية متمثلة في فرامل اية بي اس من شركة بوش الالمانية وايرباج بيختلف عددهم علي حسب تجهيزات السيارة لكن علي الاقل بيكونوا طبعا اتنين اضف لذلك احزمة امان بتتشد كهربائيا عند حدوث اي حادث لاقدر الله..
طبعا العربية دي بتتميز اوي عن اي عربية تانية في الكرسي بتاعها..لان ستروين تعتبر من الشركات القليلة جدا اللي بتستخدم دكاترة علاج طبيعي وعظام في اخد موافقتهم علي تصميم الكرسي ودا بيكون واضح اوي في اراء ملاك العربية لما تسألهم عن راحة الركوب مقارنة بأي عربية تانية مهما كانت فئتها..
الباور ستيرنح الكتروهيدروليك يعني فية نعومة الكهرباء وقوة الهيدروليك..
التكييف اداؤة جيد لكنة اقل كفاءة من تكييفات العربيات الكوري والياباني عموما حال اغلب العربيات الاوربية
العربية كل مشاكلها بتبقي بسبب الاهمال او تركيب قطع غيار مش اصلية او غسيل العربية من الداخل في اي كار كير..
من اكتر المشاكل شيوعا هي مشكلة الدينامو اللي بيبوظ وكويل التكييف الداخل..
لكن اغلب مشاكل الدينامو بتكون بسبب غسيل الموتور ولأن الدينامو دا جواة دائرة كهربائية زيادة عن اي دينامو تاني فهي دي اللي بتبوظ من المياة..
اما بالنسبة لمشكلة كويل التكييف بتبقي بسبب الرطوبة العالية عندنا في مصر بتخلي في مياة كتير تتكثف علي الكويل ودا مع الوقت بيسبب صدا لكن الحل بسيط جدا واغلب اللي عندهم تكييفات منزلية بيعملوة وهو قبل مجي الشتاء بنشغل التكييف علي اعلي درجة بس علي المروحة فقط علشان ينشف كل الدواخل اللي في الكويل ومايصديش من الركنة اثناء فترة الشتاء..
اسعار قطع الغيار مش رخيصة ولكن مش غالية اوي وخصوصا ان العربية دي بتقعد 15000 كيلو بين كل صيانة والتانية يعني كل 30000 بتغير زيت الموتور مرتين مقارنة بتغييرة 3 مرات في اي عربية تانية يعني امتر من 350 جنية توفير..
اضف لذلك بوجيهات وفلتر هواء وفلتر بنزين لو كان فيها بيتغروا 30000 مقارنة بتغييرهم علي 20000 في موديلات العربيات الاخري..
اهم شيء قبل شراء العربية دي هو انك تجربها كويس وتكشف عليها عند التوكيل بالجهاز علشان يبين كل اللي فيها وتبقي عارف انت بتشتري اية وبرضة تاخد فكرة عن اسعار الصيانات الدورية وقطع الغيار..
اتمني اكون افدتك وبالتوفيق ان شاء الله....

**MuhammadAOmar** · 12-08-2011 05:53 PM

شكرا جدا جدا يا باشمهندس علي المداخلة دي وبجد افادة مابعدها افادة عشان من شخص فاهم في العربية ومفيش كلام من اللي قلته إلا بدليل واضح وسليم.. في برده شوية حاجات عايزين نتأكد من صحتها.. للاسف أنا مش فاكر كل الحاجات دي بس على سبيل المثال كان في ناس قالت إن سحب العربية ضعيف جدا وتحس إنها 90 حصان مش 110 وخصوصا العربية اللي الفتيس بتاعها ستبترونيك..

ومعظم الناس اللي جابوا العربية اشتكوا من حتت الفتيس دي بالذات وخصوصا إن اسعار التوكيل كمان خياليه بعد الشيء وكمان بيضطروا انهم يجيبه استيراد من بره.. فـهل في حال للمشكلة دي ولا الحل الوحيد تغيره ولا بديل عن كده؟! وحضرتك كنت قلت في موضوع سابق إن المشكلة دي في موديلات 2006 و 2007 بس. طب و 2005 و 2008 إيه نظامهم؟

ممنوع استخدام اللون الأحمر في الكتابة حيث أنه مخصص فقط للمداخلات الإدارية والاشرافية، تم تغيير لون الكتابة.

يرجى مراجعة قواعد المنتدى

مشرف الساحة
٣آ

**Romeo26222** · 13-08-2011 01:57 PM

المشاركة الأصلية كتبت بواسطة muhammadaomar

شكرا جدا جدا يا باشمهندس علي المداخلة دي وبجد افادة مابعدها افادة عشان من شخص فاهم في العربية ومفيش كلام من اللي قلته إلا بدليل واضح وسليم.. في برده شوية حاجات عايزين نتأكد من صحتها.. للاسف أنا مش فاكر كل الحاجات دي بس على سبيل المثال كان في ناس قالت إن سحب العربية ضعيف جدا وتحس إنها 90 حصان مش 110 وخصوصا العربية اللي الفتيس بتاعها ستبترونيك..

ومعظم الناس اللي جابوا العربية اشتكوا من حتت الفتيس دي بالذات وخصوصا إن اسعار التوكيل كمان خياليه بعد الشيء وكمان بيضطروا انهم يجيبه استيراد من بره.. فـهل في حال للمشكلة دي ولا الحل الوحيد تغيره ولا بديل عن كده؟! وحضرتك كنت قلت في موضوع سابق إن المشكلة دي في موديلات 2006 و 2007 بس. طب و 2005 و 2008 إيه نظامهم؟

موضوع السحب دا محدش بيشتكي منة الا اللي بيعمل صيانات بقطع غيار مش اصلية او نوع بوجيهات غير الموصي بة وبصراحة العربية دي حساسة جدا لنوعية البوجيهات اللي بتتركب فيها ولنوعية البنزين طبعا...
موضوع الفتيس كان مرتبط اكتر بموديلات 2006 و2007 لكن خد بالك الارتباط دا مش قاعدة بسبب بسيط ان كل الفتايس اللي اتصنعت في السنتين دول هما اللي فيهم مشاكل زيادة لكن ممكن نلاقي عربية 2008 راكب فيها فتيس تصنيع 2007 وهكذا..
بالنسبة لحل مشاكل الفتيس في حاجات بتستدعي تغييرة بالكامل وحالات بيحتاج اصلاح لاجزاء معينة فيه من جوة..
طبعا علشان تبقي عارف الكيلومتر اللي عاملاة العربية بيأثر علي الفتيس لانة بيكون اشتغل اكتر والعربيات اللي داخل القاهرة بتتأثر اكتر من العربيات اللي برة القاهرة بسبب مشكلة الزحمة اللي اتكلمنا عليها قبل كدة والفيصل في الموضوع هو الكشف بالجهاز وتجربة العربية..