الموضوع: مساعدة في شراء فلونس

المشاركة الأصلية كتبت بواسطة raedegypt

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار

يبني متبطل بقى تخش في كل حتة في المنتدى تعد تمدح الالنترا بتاعتك الكوري دي .. انتا بتحلل لنفسك الفلوس عشان اتدبست فيها و لا ايه ؟؟ انت ذات نفسك عارف من جواك ان الفلوانس ست ست الالنترا الكوري البلاستيك دي بس مش عايز تعترف .. و احنا مش محتاجين نخش معاك في مناقشات عشان احنا عارفين ان عندنا عربية من افخم العربيات في مصر .. بطلو غيظ و حقد بقى اعوذ بالله .. قالك هيونداي قال .....

المشاركة الأصلية كتبت بواسطة raedegypt

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار

جزاك الله خيرا على النصيحة
والله أنا كنت في حيرة شديدة خلال الشهر اللي فات بين كذا عربية ومنهم الالنترا الجديدة. وفعلا روحت كذا مره عند المصرية وشفت العربيتين على الواقع. هي الالنترا عربية محترمة والتصميم الجديد فعلا جذاب والمساحات الداخلية واسعة بشكل ملفت عن الموديل اللي قبلة. بس بعد مقارنات فضلت الرينو على الالنترا (مع ان المنافسه كانت شديدة والحيرة كانت أشد) للاسباب الاتية:
1. التوكيل أفضل ... أنا شخصيا أفضل التعامل مع التوكيل للحفاظ على السيارة والحفاظ على وقتي لأني موش هقدر اتابع الصنايعية و الف وأدور عليهم... حتى لو التوكل أغلى بس أفضلي. وان شاء الله ناوي أروح التوكيل حتى بعد انتهاء الضمان. فموضوع التوكيل ده موضوع مهم جدا.
2. شكل الفلوينس أريحلي .. يمكن أنا بحب الشكل الهادي للعربيات. وطبعا دي كلها أزواق.
3. حسيت ان خامات الفلونس في التقفيل أفضل. يمكن دا احساس. هي جوده التقفيل في العربيتين ممتازين.
4. طبعا الكوري يتفوق في سعر إعادة البيع. بس أنا موش ناوي أبيع قريب وموش من النوع اللي بيفكر في إعادة البيع عند شراء سيارة.
5. أنا من الناس اللي تحب السيارات الذكية وذات الامكانيات الكمبيوترية العالية. ود واضح في سيارات الرينوا ... في ناس كتيره بتعتبر ده عيب لأنه ممكن يسبب أعطال. لكن أنا شخصيا بحس بالرضى لما أكون راكب عربية وفيها تكنولوجيا وإمكانيات عاليه.
6. عند مراجعة أسعار قطع الغيار والصيانة لاقيتعا معقولة لحد كبير. ممكن تكون أغلى من عربيات تانيه ..بس موش مبالغ فيها.
7. موتور الالنترا أسرع في الاستجابه ... ودا موش مؤثر معايا ... أخوك من النوع الهادي في السواقة واللي بيلتزم بالسرعات المحددة :b4_048: يعني موش هجري ولا هشد ولا هحرق.

يميز الالنترا في وجه نظري هو وجود ألوان اكتر وكمان التابلوة الفاتح بيبقى تحفه وأشيك بكتير. كنت أتمنى ان الفلوينس يبقي فيها تعدد الوان اكتر.

المشاركة الأصلية كتبت بواسطة MaZaGAngeE

دي حكاية قديمة و مش على الموديلات اللي بتنزل مصر
لو سمحت مفيش أي داعي تطلع اشاعات و كلام غلط ممكن يشوش على الناس
العربية كويسة و مناسبة جدا و كلامك غلط

سيدى الفاضل ايه الغلط؟؟ عربيه سامسونج كورى تجميع تركى وعليها علامه رينو !!!! ولا نضحك على بعض ونقول فرنساوى

المشاركة الأصلية كتبت بواسطة arafatehegazy

السلام عليكم
الحمد لله بعد الاستخارة والمقارنات الشديدة بين الموديلات المختلفة ان شاء الله نويت انضم لقسم الرينو و أشتري فلونس تقسيط عن طريق البنك الوطني للتنمية , مصرف أبو ظبي. ان شاء الله استقريت على الفئة الثانية في الاتوماتيك اللي هيا ب 142 الف.
كنت عايز مساعدة من وحوش الرينو. عايز أعرف أحسن مكان أشتري منه ويكون عنده تسليم فوري. أنا قريت ان المصرية للسيارات الناس معاها مشاكل بعد التسليم وان في عربيات بيبيعوها جديده وتكون اتخبطط واتصلحت عندهم. أنا عايز مكان يكون مضمون وسريع التسليم.
كمان ايه اللي آخد بالي منه عند استلام العربية من المعرض. دي أول مره هستلم عربية زيرو.

الف مبروك يا باشا وان شاء الله ربنا يباركلك فيها ..

على فكرة فعلا الطارق معرض كويس و معاملته هايلة .. انا حاجز عندهم ميجان بس لسة ماستلمتهاش .. و كنت عاوز اسألك على حاجة .. ممكت تقوللى التقسيط مع أبو ظبى تفاصيله ايه ؟؟!1 احسن انا خدت موافقة من عودة على فايدة 9.6% مع انى دافع اكتر من 50% مقدم .. و حاسس ان ممكن الاقى عرض احسن ..

و مبروك مرة تانية ..

المشاركة الأصلية كتبت بواسطة raedegypt

سيدى الفاضل ايه الغلط؟؟ عربيه سامسونج كورى تجميع تركى وعليها علامه رينو !!!! ولا نضحك على بعض ونقول فرنساوى

يا بابا اهدى بس و بطل غيظ من الفلونس عشان تقدر تستوعب .. طول مانت متغاظ كده مش هنقدر نناقشك

اللي حضرتك بتتكلم عليها دي فعلا الفلوانس الكوري اللي بتتجمع في كوريا و بتنزل دول الخليج و دي مختلفة تماما عن الفلونس الفرنساوي .. و بعدين متعدش تقول وتردد ان الفلونس تركي .. الفلوانس فرنساوي و بتتجمع في تركيا .. معنى كلامك ان البي ام الفئة السابعة مصري عشان بتتجمع في مصر ؟؟

بطل بس حقد و اعرف المعلومة كويس و بعدين ابقى قول رايك و لو اني عارف انك متعصب جدا للالنترا و ده بدليل مشاركاتك اللي شوفت منها 50 عالاقل في كل موضوع اخشه في نايل موتورز ... بتخش تقول الالنترا احسن حاجة وتعد تذم في عربيات الناس التانية و تكت من الموضوع و محدش يشوفك تاني .... و اللي عايز يتأكد يراجع مشاركاته و هو هيعرف

انت عايز تعمل الالنترا الكوري اللي زي العربيات الصيني تبقى ند للفلونس دلوقتي .. والله بتضحكني لما اشوف مشاركاتك .. استمر عشان خاطري لحسن مكتئب اليومين دول و عايز اضحك

يا جماعة الفلوانس اللي بتنزل مصر فرنساوي غير اللي بعض الناس اللي بتحب تتكلم و خلاص بتقول انها كوري ... في منها نسختين ... النسخة اللي بتنزل مصر و دي اوروبية و النسخة اللي بتنزل الخليج و دي مختلفة تماما عن بتاعتنا ( كوري ) ... والاخ اللي عمال يقول النترا ده عايش في السعودية .. هما بينزلهم الكوري عشان كده عمال يقول سامسونج و بتاع .. و ده اكبر دليل انه بيتكلم من غير ما يفقه هو بيقول ايه