اولا السلام عليكم ورحمة الله وبركاته

الموضوع انا عملته لعدة اسباب الصراحة
1- نقل التجربة
2- التحذير
3- مشاركتكم ليا في موضوعي

هبدأ الحكاية من اول لما اشتريت العربية

انا أشتريت العربية تقريبا يوم 17 - 3 - 2011
كانت حالتها كالتالي

العفشة ممتازة - مجرد بس تغيير جلب المقصات
الموتور ممتاز - كان بيبخر ويعرق مياة في عز الظهر في الصيف الحار كبس وجري زي الفل
التكييف - مش شغال عشان كان فلتر الفريون كان مسدود
الباور - محتاجة تغيير طرمبة
الزجاج الكهرباء - شغال ماعدا الزجاج الخلفي شمال
المرايات الكهرباء - شغالة بفضل من الله حتي الأن
السنتر - معطل بسبب طرمبة الهوا
البودي - محتاجة شوية ضبط للوش
الصالون - فبريكة بحالة جيدة
الفتيس - يعمل بكفاءة
الكاسيت - بايظ
الكاوتش - جديد نوفي
البطارية - مش جديدة ولكن شغالة
المفتاح - نسخة واحدة فقط وكانت الي فيها الريموت
الرخصة - هنتهي في شهر 8 وهتحتاج فحص عشان هنقل ملكية
الطابلوه - طبعا الفريم مشرخ والدرج مش بيفتح
عداد الكيلومتر - 117000 وشوية فكة

بوجه عام العربية كانت حالتها مرضية بالنسبالي واشتريتها ب 34500

اول حاجة عملتها تاني يوم هو التكييف
غيرت الفلتر المسدود باخر وشحنت وكان البايع قايلي انها مجرد شحن
النتيجة - التكييف يعمل بكفاءة عالية جدا

بعد كدة بيومين عملت السيرفيس
وكان كالتالي
تغيير فلتر البنزين
تغيير فلتر الهوا
تغيير سير الكاتينة
تغيير سير الدينمو والخدمات (باور وتكييف)
تغيير زيت الموتور


وبعدها روحت اكشف علي الباور
غيرت الطرمبة بواحدة اخري استيراد واكتشفت ان الزيت الي كان محطوط كان زيت فتيس (فالفالين)
النتيجة - الباور يعمل بكفاءة والدريكسيون خفيف اوي وصوت الموتور هدي بس الأر بي أم علي جامد
وبعدها روحت حطتها علي الكمبيوتر ولغيت الأعطال وظبطت الأر بي أم من رجلاش البوابة

وبعدها بحوالي اسبوع او اتنين روحت اضبط زوايا ولقيت مهازل
لقيت العجل قالب والزوايا كأنها مظبوطة بفتلة
وجلب المقصات محتاجة تغيير
النتيجة - عدل العجل عن طريق رجلاش فيه وظبط الدنيا علي الشعرة والعربية زي الفل والحمد لله

دورت كتير اوي علي موضوع السنتر والأنذار الفبريكة وتشغيلهم علي المفتاح بتاع العربية
وبعد ما فشلت روحت اشتريت انذار جديد

روحت لبتاع الأبواب عشان يركب الأنذار ويكشفلي علي السنتر
طبعا اشتريت طرمبة هوا استيراد وصباع انذار كهرباء (لباب السائق) وصباع سنتر هوا عشان التانك
وبعد ما ركب الأنذار وصباع السنتر الكهرباء لباب السائق بيكبس هوا لقيت الأبواب كلها بتقفل والشنطة والتانك
وخليته ظبطلي درج الطابلوه وبقي بيقفل كمان بالمفتاح
فرحت جدا طبعا بصراحة اكتر من التكييف والباور

بعدها بيومين بالظبط ركنت العربية وطلعت البيت
بعدها بشوية الحاجة كانت عايزاني اروح معاها مشوار فنزلت وبفتح بالريموت مش بيفتح
طبعا شكيت انه ياا أما باظ يا أما الفيوز ضرب

المهم فتحت بالمفتاح وركبت وبدور دارت بس اكتشفت ان الساعة والكيلومتر الديجيتال مش شغالين ونور الصالون والأنذار

لفيت حوالين نفسي واتصلت ساعتها بالمهندس ايهاب منصور وبعد الكشف المطول اكتشفت انها فيوز قاطع

حمدت ربنا كثيرا وبقيت اشيك عليه كل شوية

وبعدها بكام يوم
نزلت الصبح لقيت الفانوس الخلفي اليمين مكسور والرفرف مخبوط
حمدت ربنا وفوضت امري لله

بعدها بحوالي اسبوع اشتريت جلب المقصات وركبتها وعدت علي الزوايا
النتيجة - مفيش تغيير تقريبا


وبعدها بحوالي اسبوعين اشتريت الفانوس وظبطت الوش واشتريت طاسات جديدة (سيات اصلي استيراد)


وبعدها بحوالي 3 اسابيع بالظبط 21 يوم
نزلت وسط البلد في مشوار وسرحت لمدة ثانيتين كنت ببص علي يافطة وماشي علي سرعة 10 كم هوووب لبست في العربية الي قدامي
والنتيجة - الوش باظ تاني وبليل الفانوس اليمين بيضرب تحت العربية


بعدها بكام يوم كنت راكن العربية
انا من ساعة الثورة وانا بركن العربية وكاسر الدريكسيون ناحية الرصيف
المهم ركبت وسخنت وجيت طالع لقيت االدريكسيون تقيل جدا جدا اتاري زيت الباور كله في الأرض
روحت مشواري ورجعت علي الميكانيكي وحط زيت الباور وبنكشف
النتيجة - الزيت زي ماهو ومانقصش نقطة
طب ايه السبب - الله اعلم



بعدها بأسبوع رخصت العربية ونقلت ملكية وفحصت ودة كان بتاريخ 16 - 7 - 2011 يعني بعد 4 شهور بالظبط من تاريخ الشراء

وبعدها بيومين روحت غيرت زيت الفرامل بأخر dot4 زي الكتالوج ما بيقول



وغيرت زيت الفتيس بأخر كما هو مذكور في الكتالوج


وكانت خطتي اغير زيت الباور ايضا كما هو مذكور في الكتالوج

يعني كل التظبيط الي فات تم علي 4 شهور بمعدل كل 10 ايام بعمل حاجة وبلم الدور علي قد ما أقدر

ولحد كدة دي المرحلة الأولي من ساعة لما اشتريت العربية وتنتهي لحد اول رمضان وكانت قراية العداد ساعتها 121000 وشوية فكة