الموضوع: تحياتي الي جهاز حمايه المستهلك ( اداني حقي )

بحكي تجربتي لكل الاعضاء عشان يستفيدوا و يعرفوا ازاي ياخدوا حقهم ( و بركز علي كلمه حقهم ) لان فيه نوعين من المستهلكين :
1- مستهلك معاه حق و مش عارف ياخده
2- مستهلك مش معاه حق و مش فاهم ده

تعود الحكايه لعام 2008 حيث اشتريت غساله اطباق ( مش حقدر اذكر الماركه ) و ضمانها كان لعدد من السنوات ....و حدث ان السله الداخليه اللي بيتحط فيها الاطباق قد صدأت و تأأكلت بالرغم من انها مجلفنه و طبعا الجزأ دة مهم و المفروض ميصديش لانه داخل الغساله و بيتعرض للمياه يوميا باستمرار .
كلمت الشركة وطبعا الضمان كان ساري و فاضل كذا سنه علي انتهائه و طالبت بسله داخليه بدلا من اللي عندي و المفاجأه كانت ان مدير خدمه العملاء قال لي في الهاتف ان ضمان الغساله لا يسري علي هذا الجزء .
و قلتله ان الضمان عندي غير مذكور فيه ما يقوله هذا المدير
قاللي السله تمنها حوالي 200 جنيه ....نبعتها لحضرتك ؟
قلتله مش مقتنع و حقي اني اخد سله بدون اي مصاريف
قاللي هيه دي القواعد المنظمه لخدمه الضمان
قلتله اللي بتقوله مش مذكور في الضمان .... قلتله انا حشتكي في جهاز حمايه المستهلك و كل واحد فينا ياخد حقه ....ايه رايك ؟
قاللي بالحرف : اشتكي في جهاز حمايه المستهلك !!

بالفعل اتصلت بالخط الساخن 19855 الخاص بجهاز حمايه المستهلك و حكيت الموضوع و طلبوا مني الفاتوره و الضمان
و بالفعل ارسلته بالفاكس علي رقم همه ابلغوني بيه و قالولي فيه فريق من المحققين بيتابع الكلام دة و بيشوف حق المستهلكين فين .
و بعد حوالي اسبوع اتصلوا بيا و قالولي انهم استدعوا المسئول بالشركة عن الضمان و اطلعوا علي شروط الضمان و حكموا بان ليا حق في استبدال سله الغساله بأخري نظزا لسريان شروط الضمان علي الغساله بالفعل .
بعد هذه المكالمه اتصل بيا نفس الشخص مدير خدمه العملاء بالشركة و قالي ( احنا اسفين يا صلاح )
بهذر طبعا :-)))
و حددوا يوم و جابوا السلتين العلويه و السفليه و اخدوا السلتين القديمتين و جابولي نفس السلتين بس نوع اخر مجلفن بطريقه الكتروستاتيك و المهندس اللي جه قاللي ان فعلا النوع بتاع السله اللي كان عندي كان عامل مشاكل لانه فعلا بيصدي .

تحيه لجهاز حمايه المستهلك

تحيه لكل مصري حقاني و بيشوف شغله بما يرضي الله و بيعطي الناس حقوقها .

تجربتي بحكيها عشان كل الناس تستفيد

و بنصح عند شراء جهاز الاهتمام بالاتي :
1- الاهتمام بشراء الجهاز بفاتوره ضريبيه معتمده و مختومة من الجهه اللي بتشتري منها
و طبعا كلنا عارفين انك ممكن تشتري بدون فاتوره و بدون ضريبه يعني ارخص و لكن في الحاله دي انت بتهدر حقك في ارجاع الجهاز و استبداله او استرداد نقودك خلال 14 يوم من تاريخ الشراء طبقا لقانون حمايه المستهلك .....يعني باختصار اشتري اي جهاز من جهه محترمة بفاتوره حفاظا علي حقك لانه جهاز حيقعد معاك سنين .
2- الاهتمام بختم الضمان اللي بيقي جوه كرتونه اي جهاز من الجهه اللي بتشتري منها
3- لو الجهاز بيركب عن طر يق الشركة تستدعي المسئول عن التركيب عن طريق الاتصال بارقام الخدمه و تهتم بأنه بعد التركيب بيديلك ما يفيد بتاريخ التركيب و ان الجهاز بيعمل بحاله جيده لانه هوة دة تاريخ بدايه الضمان .
4 - عند مواجهه اي مشكله مع اي جهاز ...اقرأ شروط ضمان الجهاز جيدا و بتأني حتي تعرف ان كان لك حق من عدمه .
5 - حتي بعد انتهاء فتره الضمان ارجو ان المستهلكين يصلحوا الاجهزة من خلال الشركة المنتجه لانهم بيتعاملوا في قطع غيار معتمده و موثوق فيها بالاضافه لخبره الفنيين عندهم لانهم كمان بيدوا ضمان علي القطعه اللي اتغيرت لفتره علي حسب الشركة فيه 3 شهور و فيه 6 و فيه سنه .
طبعا لما بتتعامل مع صنايعي من بره مفيش حته انه بيضمن القطعه اللي بيجيبها و عن تجربه بيحصل مشاكل .
تحياتي لكل الاعضاء و كل عام و انتم بخير .