الموضوع: رسالة من زوجة مستريحة متهنية

دي رسالة حب من زوجة مصرية بتكتبها بكامل قواها العقلية دون أي مقاصد شخصية و لا مغانم مادية. دي رسالة بريئة خاااالص بإسم كل الزوجات اللي بيموتوا في أزواجهم
وطبعاً أزواجهم بيموتوا فيهم ومليين المنتديات بفوائد الزواجات
زوجي الحبيب


أقر و أعترف أنا الموقعة أدناه بكامل إرادتي الحرة و قواي العقلية إني مدلعة، و مرفهة و مش مقدرة مجهودك و تعبك معايا أنا و العيال. يا سبعي يا جملي. يا مستتني و مريحني و موريني الهنا كله. ماهو إحنا كده يا ستات ما بيطمرش فينا و ما بنقدرش قيمة النعمة اللي إحنا فيها إلا لما تزول من وشنا.الشر برة و بعيد يا حبيبي.

عشان كدة أنا فكرت كتير يا حبيبي إزاي أريحك و أعوضك عن الشقا اللي أنت شايفه معانا مالقيتش غير إني أبدل معاك الأدوار و أشيل بدالك المسؤليات. ماهو من حقك تشوفلك يومين دلع حلوين إنت كمان.

أنا هروح الشغل كل يوم أشقى و أتعب علشانكم. و هصرف على البيت و أنت بقى كل اللي عليك أنك تستريح و تتبغدد. بس ما تنساش يا حبيب شوية حاجات صغيرة أنا كنت بعملها. ماعلش أنت قلت بنفسك قبل كده دي رفاعيات. يعني مثلا :-
· تصحى من النوم قبل زقزقة العصافير تكوي هدوم المدارس للعيال و تصحيهم و تشطفهم و تفطرهم و تلبسهم و تحضرلهم السنداوتشات و تنزلهم يركبوا الأتوبيس.
· بعد كده تيجي تصحيني و تحضري الحمام و الفطار و طبعا عقبال ما أخلص تكون حضرت لي هدومي عشان أروح الشغل حاكم أنا هشقى و أتعب علشانكم. ما تنساش قبل ما تنزل تجري على شغلك ، تتشعلق في أي مواصلة علشان تلحق توصل في معادك من غير ما تسمع كلمتين في جنابك من مديرك وما تنساش تسيب اللحمة برة التلاجة تفك عشان الغدا.
· و أنت راجع بقى الظهر يا حبيبي في عز الزحمة عدي على السوق جيب الغدا و اتزنق في طابور العيش و طير على البيت عشان تلحق تنضف الخضار و تحضر الرز و السلطة و تسيب الأكل يستوي عقبال ما تحمي العيال. أصلي ماحبش أي أكل بايت. أنت عارف يا حبيبي إني بشتغل عشانكم فمن حقي أكل اللي أنا عايزاه.
· بعد الغدا أنا هدخل أريح شوية و أنت بقى أدخل على المطبخ إغسل الأطباق و إكنس الأرض و حط الغسيل في الغسالة حاكم الحاجات دي ما تستناش .
· خلاص يا حبيبي هانت. فاضل بس تذاكر للعيال. تعمل معاهم الوجبات و تراجع حفظ النصوص و الدراسات الإجتماعية و تمليهم و تحل معاهم مسائل الرياضة. بس لو حد فيهم جاب نمرة وحشة هزعل منك و أقلب الدنيا على راسك علشان ده يبقى أسمه إهمال و تسيب يا روحي.
· أنا هقوم بعد كده أنزل أعمل كام مشوار مش مفهومين. المهم أي حجة علشان أسيب البيت و أنزل أشرب لي كابيتشينو في أي كوفي شوب مع صاحباتي أصلي مش هقدر أشرب حجرين على القهوة.
· وأرجع البيت بالليل ألاقيك حضرت كيكة ولا أي حاجة حلوة أكلها مع العشا بعد ما تكون عشيت العيال و نيمتهم و نشرت الغسيل اللي هتلمه بكرة بعد ما ترجع من الشغل و تقف ثلاث ساعات على رجلك تكويه علشان المكوجية أصبحوا مفتريين بس خالي بالك يا حياتي من كسرة رجل البنطلون أصلها تفرق معايا جدا ومكافأه ليك على مجهودك طول اليوم حاعمللك سهره ماحصلتش بس اوعى تتحجج وتقوللى تعبان .
· أما بقى في الويك إند يا حبيبي فاصحى مع الفجر تنفض البيت و تمسح الأرض و تغسل الحيطان و تحط فنيك و ديتول في الحمامات و تنضف النجف و بعد ما نصحى أنا و العيال تحضر لنا الفطار و تهوي الفرش و ترش الأوض. أصلي بحب البيت بيبرق.
· أنا هنزل يا حبيبي أزور ماما بعد الغدا. أصلي ما بعديش عليها إلا كل أسبوع مرة و دي ست الحبايب زي ما أنت عارف. أنت بقى فاضي على طول. ممكن تعدي على والدتك أي وقت. ما أنت هتبقى مدلع و متهني و طبعا مش محتاج لا تخرج و لا تتفسح. هنروح فين في الزحمة يوم الجمعة يعني. ده غير المصاريف.
· المهم في ده كله أن كل يوم ألاقيك واخد دُش و متأنتك و حالق دقنك " لإنك مش هينفع تحط مكياج " و مستنيني بإبتسامة حلوة سعيدة .

إمضاء

زوجتك المستريحة المتهنية

المشاركة الأصلية كتبت بواسطة amrelsaqqa

ماهو لو الزوجة بتعمل ده كله فعلا بالظبط كدة
يبقى هتيجى المشاكل منين غير مع راجل فقر ومش وش نعمة

ما هم الرجالة لو وجودوا كل حاجة حلوة - هيدور على حاجة وحشة ويقول يااااه أنا مستحمل إزاي

المشاركة الأصلية كتبت بواسطة korkor

دى زوجه وهميه مش موجوده فى الحياه اساسا دى موجوده فى العالم الافتراضى بتاع نيو فى فيلم ماتركس

أنا ما شوفت الفيلم - بس بجد الزوجة دي موجود وبكثرة وهي غالباً اللي بتكون متنكدة دايماً وجوزها عايز أكتر ، لكن النسبة القليلة المفترية بتكون منكدة على جوزها وبيكون راضي ومستحمل أحسن تطلب أكتر .

المشاركة الأصلية كتبت بواسطة mado83

هههههههههههههههههه
بجد موضوع جامد وفعلا الازواج محتاجين يتهنو شويه وياسلام لو فى عيل صغير لسه بيرضع وبيصحى طول الليل يزن
الله يكون فى عون الزوجات وفعلا بعد كده هاخد بالى ومتشكر جدا على النصيحه

الله عليك - رااااااجل أعترف

المشاركة الأصلية كتبت بواسطة FunnyMickey

الكلام ده كان زمان
وقليل اوي من بنات اليومين دول بيعملوا اصلا كده
وبيراعوا ربنا في ازواجهم

انما 99% من البنات حاليا بيدوروا علي الخدامه قبل الزوج

أنت علشان ساكن في مدينة نصر - أصلها موضة هناك - بس برضوا فيه ستات مطحونين .

المشاركة الأصلية كتبت بواسطة Dr_Mido

انها الكائن الاسطورى الخزعبلى الزوجه المريحه كائن اسطورى خزعبلى موجود فى مخ حماتك بس

كأئن وخزعبلي
دا كدة وإحنا بنحنن قلبك - أمال لو كنا بنتخانق هتعمل فينا أيه ؟

المشاركة الأصلية كتبت بواسطة الغزالى

هههههههههههههههه ده رد على غزو بنات اليورو لصفحات الفيس بوك المصريه انهم احلى من المصرييات ولا ايه
:]

أنت كمان بتنكر إن المصريات أحلى

اهد الصور الثلاثة


هل تعرفهم؟؟

ديانا ( البريطانية)

ذكرى (التونسية)

سوزان تميم (اللبنانية)


*_*_*_*_*_*_ *_*_*_*

هذه الصور الثلاثة


يوجد بينهم رابط قوى

كلهم ماتوا بسبب

رجل مصري

'
نستفاد من هذا ما يلى:

1) على الأجنبيات الحذر وعدم الارتباط بأي رجل مصري
2) لا يوجد من هو أقوى من الرجل المصري إلا المرأة المصرية (( ممشياه على العجين مايلخيطوش ))

ملحوظة: الثلاثة رجال اللي في الصور .... واحد مات في حادثة سيارة والثاني انتحر والثالث حبل المشنقة ملفوف حول رقبته , لذلك..

3) أيها الرجل المصري لو عايز تعيش .... خليك ماشي على العجين ماتلخبطوش!!