الموضوع: عايز اسقط موتور.... ولكن!!!

ماينفعش تشتري كارته وضفيرة بس؟

منتظرين التقرير التفصيلي وبالتوفيق ان شاء الله

المشاركة الأصلية كتبت بواسطة egyseadragon

ماينفعش تشتري كارته وضفيرة بس؟

اعتقد صعب انك تلاقي كارته وضفيره لوحدهم.....

خصوصا ان موتوري القديم نادر وماحدش هايرضي يبيعهم لوحدهم

المشاركة الأصلية كتبت بواسطة syd

اولا انا بعتذر جدا عن التأخير في الرد بس انت عارف رمضان وظروفه
كل سنة وحضرتك طيب

بص يا باشا
احنا اهم حاجة في عربياتنا هو التعامل مع الميكانيكي والكهربائي بتاعها

الحمد لله الأبيزا حوضها واسع جدا بسم الله ما شاء الله وبيجوز لها مواتير الجولف 2 و 3 دوول اللي انا متأكد منهم لكن ال4 الله اعلم مع موديلك لكن الموديل اللي بعد منك (ابتداء من 2002 - 2006) بيركب عليه بتاع الجولف 4 مستريح جدا
واعتقد ان شاء الله يركب عليه طالما ركب عليه موتور الأوكتافيا (علي فكرة الأوكتافيا واخدة موتور وشاسيه الجولف والجيتا) وبالتالي طالما ركب عليه الأوكتافيا يبقي بعون الله يركب عليه الجولف 4

انا أؤويدك في المكنة ال1600 لسببين
1- هتلاقيلها قطع غيار بسهولة لأنها نزلت مصر هي وال1400
2- هتبقي اوفر شوية في البنزين والضريبة والتراخيص

توكل علي الله وماتنساش تعملنا تقرير كدة علي مزاجك بعد ان شاء الله ماتسقط وتخلص من الموتور

والله المستعان
،
،

ان شاء الله هايكون فيه تقرير مصور يابو السيد

وبالنسبه للموتور فاللي مطمني شويه اني شوفت موتور اخو موتوري 1800 برضه ونفس الشكل راكب ف عربيه جولف 4 برضه... فقولت يبقي بالتالي ان شاء الله الموتور اللي راكب ف عربيه زيها هايركب

والله المستعان ان شاء الله

بسم الله الرحمن الرحيم

اسف جدا على الغياب الطويل في تكملة الموضوع......

انا للاسف كنت فاكر اني رديت بس اتاريني لأ.... الزهايمر بيعمل معايا عمايله

احكيلكم بقي ايه اللي تم ف العربيه بالظبط من طأطأ لسلام عليكم

انا روحت الشونه بتاعه الراجل المعرفه دا زي ماقولتلكم ووقع عيني على موتور جولف 4 1600 سي سي

المهم اخدت الميكانيكي وروحت عشان يبص ع الموتور

قالي هو هايكون فيه تعديل بسيط ف القواعد بس الفتيس مش هايقعد خالص... هاتخلي الفتيس القديم

انا قولتله مش مشكله كده كده الفتيس مكانش فيه مشاكل الحمد لله فمش هاتفرق

قالي على خيرة الله بس فيه مشكله تانيه لو تتحل هابدأ شغل من بكره الصبح

قولتله وانا قلبي بيطب : خير ياعم فيه ايه ؟

قالي العربيات دي جايه من لندن والدريكسيون يمين

قولتله طب وايه المشلكه ؟

قالي مش عارف الضفيره هاتنفع ولا حاتحتاج تعديل واللي يعرف المشكله دي هو الكهربائي

المهم صاحب الشونه جابلي كهربائي بيعدله العربيات النقل اللي جايه من لندن برضه

بص يمين وشمال وف النص و ف عربيتي وبعدين قال : هي هاتتعدل مافيهاش مشكله بس هاتاخد القطمه بالطاره بالمفتاح بتاع النص بكل حاجه

وكمان مش عارف العداد بتاعك هايشتغل ع الضفيره دي ولا لا

قولتله يعني هاينفع ولا ايه ؟ قالي ان شاء الله ينفع بس الاسطي الميكانيكي يقولي القطمه دي هاتركب ف عربيتك ولا لا ؟

الميكانيكي بص وقال اه تركب... انا استغربت قولت قطمه جولف 4 هاتركب ف ابيزا ازاي ؟ المهم قولت هما ادري


المهم توكلنا على الله واشتغلنا وفكينا دا وركبنا دا وفاضل ندوروا الموتور ونطمنوا بقي

دور ياعم بالمفتاح الجديد .... تبقي عايزة تنطق كده بس مابيدورش

الميكانيكي قال دي قصه كهربائي بقي لان انا كده خلصت شغلي

طبعا كل السلوك بره و مصارين العربيه كلها طالعه هما بيشوفوا بس الموتور هايدور ولا لا

انا قولت للكهربائي ياعم خلينا الصبح نشوف تاني ف النور يمكن فيه حاجه كده ولا كده

المهم روحت والصبح الكهربائي اتصل بيا قالي الموتور دار الحمد لله بس فيه مشكله لانها بتغلب كتير لحد ماتدور

قولتله طب قفل ولما نخلص نبقي نكشف عليها بالجهاز قالي ماشي

المهم الراجل ابتدا يقفل شغله وظبط وفضل يعافر على موضوع عدم الدواره دا لحد مالاقي العيب من طبله الكونتاك

عملها تقويه كده وبقت فل الحمد لله

جه بقي يركب القطمه .... ماركبتش جاب ميكانيكيه دسوق كلهم قالوا ماتركبش

ياااادي النيله طب وبعدين ؟؟؟!!!

الكهربائي دا كان عبقري بصراحه فضل يفك حجات من القطمه القديمه ويلحمها ف الجديده ومش عارف عمل حجات كتير كده لحد ماركبها الحمد لله ( انا شايف ان اللي الراجل عمله ف القطمه دا اختراع)

جينا بقي لتقفيل الطابلوه

طبعا انا طلبت منه انه يركب العدادات القديمه بتاعتي

ركبت وكل حاجه واشتغلت... بس فيه لمبه كده على شكل عربيه صفرا كان بتنور وتطفي ف الطابلوه

ويجي يدور العربيه مش بتلقط

رجعنا عدادت الجولف تاني اشتغلت فل

بصراحه عدادات شكلها تحفه ونورها جميل اوي بس مشكلتها الوحيده ان العداد الديجتال بتاع الكيلو بالميل مش بالكيلو.... يعني يوقولك العربيه ماشيه كام ميل مش كام كيلو... طبعا الموضوع دا خنيق عشان كده كنت عايز عداداتي رغم ان بتاعه الجولف اشيك بمراحل

المهم الراجل اخد الشاسيه بتاع عداداتي القديمه وراح مركب فيه العداد بتاع الجولف وركب وشغال فل هما كانوا تقريبا نفس الشكل بس واحد كان مايل على تحت والتاني طالع على فوق عشان كده غير الشاسيهات

المهم ركب وقفل وكله بقي تمام وقالي جرب ياعم

سميت وتكولت على الله ودورت وطلعت يا دوب مافيش 20 متر ولاقيت الكوبلن اتكسر

قالولي عزم المكنه كان شديد ع العربيه فكسر الكوبلن

ماااشي....

غيرت الكوبلن وكله بقي تمام جرب تاني يا عم الحج

جربت واخدت العربيه ومشيت بيها

فرق كبير الصراحه ف كل حاجه... الصوت والسحب والغيارات

رغم اني كان فيها مكنه 1800 وكنت متوقع ان ال 1600 هاتبقي اقل بس لاقيت حاجه تانيه الصراحه بسم الله ماشاء الله

ابسط مثل ممكن اقوله اني لما بكون ع الاولاني بيديني سرعه زي التالت ع المكنه القديمه مثلا بدون مبالغه....

يعني اكتشفت اني كنت مركب شبشب مش مكنه 1800 رغم انها كانت ف السفر بتوصل 160 والله

مش عارف دي ف السفر الطويل هاتبقي عامله ازاي بس اكيد هاتفرق جدا يعني

بس يا جدعان دي كل الحكايه... ومافيش حاجه معكره مزاجي دلوقت غير العداد اللي بيعد بالميل دا على الرغم من شياكه انواره ومؤشراته الشديده


وان شاء الله افوق كده شويه وهاكشف عليها برضه بالكمبيوتر لكي ازداد اطمئنانا

نصيحه يا رجاله اللي هايسقط موتور مختلف عن اللي مركبه يسقطه بضفيرته وكارتته... لانه حتى لو اشتغل ف الاول كويس فمستقبلا هايعمل مشاكل جامده جدا مع الحساسات زي ماحصل معايا ف الموتور ال 1800

ولن انسي ان اشكر باشمهندس ايهاب منصور لان الراجل دا كان معايا ع التليفون قبل ما اسقط الموتور واتناقشت معام ولم يبخل عليا بخبرته وقالي كلام نفعني جدا.... ولولا اني اتكسفت كل شويه اتصل بيه عشان اخد رايه ف الحجات اللي بتحصل اثناء تسقيط الموتور انا كنت كلمته كل يوم عشان اخد رايه.... نفع الله بك يا ايهاب وزادك علما وبارك في اولادك

وشكرا

نسيت اقول كمان اني هاعدي على الراجل بتاع المفاتيح عشان يحاول يعدل مفتاح الباب والشنطه انهم يتفتحوا بمفتاح الكونتاك الجديد.... مش عارف ينفع ولا لا بقي