الموضوع: طرمبه الميه باظت (سلسله الابيزا عربيه اعتماديه)

السلام عليكم

اعراض الحدث
من حوالى شهر بدأت اسمع صوت وحش جى من الموتور واول حاجه جت على بالى تغيير الزيت لان الواحد مبقاش يضمن حاجه من الزيوت اليومين دول بس الصوت فضل زى ماهو المهم نفضت شويه ومشيت على كده خصوصا انى شايف ان المكنه ادائها متغيرشى ومفيش جديد

تشخيص الحدث
لحد ما عديت على صاحبى وهو ميكانيكى بس ملوش فى الابيزا قوى يعنى لو فى حاجه فيها اروح اقوله كذا بايظ تعالا نغيره يحل ويربط من غير ما يعك حاجه وممكن لو معرفشى العيب يروح يحطها على الجهاز عند اى حد المهم قاللى ان الصوت ده جى من وش التاكيهات بس ابوه اكد ان الصوت ده ياما من الدينامو ياما من طرمبه الميه ونصحنى امشى بيها كده لحد ما الطرمبه تودع وتجيب ميه ساعتها ابقى اغيرها

الاحتياطات
عديت على صاحبى يوم التلات الصبح وعرفته انى مسافر اسكندريه بالعربيه ولو محتاجه انه يبص عليها قبل ماسافر وبالمره نلاقى حل نركب بيه النمر الجديده من غير ماخرم فى صاج العربيه قاللى الدنيا تمام واتوكل على الله وسافر وقد كان رحله الذهاب كانت بلا اى متاعب كنت ماشى متوسط 120 الى 140 حموله العربيه الاتنين للى قدام والشنط العاديه وعده صيد اسماك والموضوع كان كويس جدا ومحسيناش بالطريق خالص وكان معايا على الطريق اخويا بالميجان بتاعته وكنا ماشيين بنفس السرعه تقريبا

بدايه المتاعب
بعد ما وصلت اسكندريه كان عندى لمبه واحده قدام وشغاله عالى بس والباقى كله فاصل وراحت فصلت هى كمان قلت لازم ابقى اشترى لمبه وكمان قبل ما اوصل لمكان السكن سمعت صوت العجله الشمال بتعمل صوت تزييق واللى كنت خايف منه لقيته وهى ان العجله فيها مسمار فوت وبقت ماسكه على مسمارين بس ولان المسمارين مش قصاد بعض فالعجله سابت والخلخت من مكانها بس الحمد لله مكنشى الموضوع كبير بس للاسف معرفتش ان المسمار فوت غير على طريق السفر واحنا جايين المهم اشتريت لمبه هالوجين واحده مكان اللى اتحرقت لحد ماوصل القاهره وابقى اشوف السبب اللى خلاها تتحرق بدل ماخسر لمبتين تانى

المتاعب
العربيه اتركنت طول المصيف مخرجتش بيها غير مره واحده وكانت ما شاء الله زى الفل والخروجه التانيه كنت وانا راجع القاهره المهم فولت بنزين 92 واتوكلت على الله وكنت شادد معدى تقريبا ال140 وانا رايح للبوابات وكانت عينى زى العاده على امبير الحراره المهم سمعت صوت التزييقه اللى فاتت كنت قبل البوابات بشويه نزلت لقيت العجله عامله نفس الموضوع بي المرادى فى مسمار طالع من مكانه خالص قلقت بس كان اليوم ده الوقفه ومعظم الناس قافله رحت مقرط عليها تانى واتوكلت وانا ماشى الحراره عليت والمروحه مشتغلتشى قلت ربنا يستر رحت نازل قافل الدايره راحت دارت رحت سايبها على السرعه البطيئه بما انى هجرى والجو حلو ومكنتشى عايز العربيه تبرد قوى المهم كل مامشى شويه الاقى العجله تفك من مكانها ووقفنا فى الطريق ما يقارب ال20 دقيقه ندور عند بتوع الكاوتش لحد ما اخويا اقترح ان احنا نرفع العربيه ونفك المسامير ونغير وضعيه العجله ونربطها كويس بالمسمارين بس يكونوا قصاد بعض ده طبعا بعد ما جربت انى اركب مسمار من اى عجله من التلاته التانين بس طلعت العجله دى الوحيده اللى خارطه والمسامير اكبر بسنه صغيره جدا المهم الفكره بتاعه اخويا نفعت والعجله بقت ثابته وبدأت ازود السرعه لحد 110 والدنيا تمام بعد كده وقفت فى الرست وسألت على مسامير هناك وكنت بطلت العربيه عشان اجيب الصليبه المهم ملقيتشى بس الراجل اكدلى على مسامير العجل وقاللى متقلقشى المهم طلعت من عنده وطرت عديت ساعتها ال130 لقيت امبير الحراره عدى ال 3/4 وداخل على الريدزون قلت لا كده كتير رحت واقف وجايب المروحه على السرعه العاليه برضه مفيش ولاحظت ان الماسوره اللى رايحه على الردياتير سخنه لكن الراجع دافيه لمهم ركبت العربيه واستنين شويه الحراره ثبتت على 3/4 وبدأت امشى على مهلى وبدأ الجو يبرد بس مفيش فايده برضه المهم لقيت انى لو مشيت هادى زى ما امشى بسرعه رحت مديها وانجزت باقى الطريق فى مفيش لحد بوابات اسكندريه وانا عشان ساكن فى اول الهرم فكده مفيش مشى تانى يعنى 5 كيلو كمان مش اكتر المهم وصلت البيت وسبت العربيه لان اول يوم العيد بكون مشغول جدا وقلت ابص عليها تانى يوم

اكتشاف العطل
تانى يوم العيد الصبح صحيت الساعه 8 الصبح وفضلت انكش على مواضيع تنضيف الردياتير والدوره وكده ولقيت ان اسرع طريقه هى انى افك دوره الميه بره وانضفها يدوى بصابون وميه فقط وقد كان المهم عرفت ليه الواحد لازم يحط ميه خضرا او حمره لان الميه بتاعه الحنفيه دى ملياااااانه املاح وترسبات وبصراحه انا نزلت بلاوى والوان وممكن كمان كلاب ميته المهم رجعت كل حاجه زى ما هى ومليت العربيه ميه ومحتجتش اخد هوا لان الترموستات بتاع الكوعه مش موجود لقين ان الميه مش بتلف جوه الموتور وصوت الطرمبه بقى عالى وانا عرفت كده لما فكيت الفبره اللى قافله على السيور

زعلان ولا فرحان
بصراحه العربيه احلوت فى عينى جدا جدا لان برغم كل الاعطال واللى كانت فيها من مده بس عشان كل مشاويرى كانت صغيره مكنتشى ظاهره قوى الا انها مشيت بيا باداء يرضينى ووصلتنى البيت والحمد لله بدون اى مشاكل فى المكنه جوان او خلافه ده غير انى نضفت دوره الميه اللى كانت على وشك تبوظ الردياتير بس للاسف مصورتش حاجه انا دلوقتى بدور على طلمبه ميه وكل الناس مش بترد على تليفوناتى علشان العيد وكده مع انى هسأل على سعر الطلمبه بس كنت شفت ان سعرها جديد فى حدود 200 الى 250 وسعرها استيراد 150 الى 200 تنصحونى اجيب ايه ومن عند مين
وبكل ثقه اقول انها حقا لسياره محترمه ربنا يخليهالى يا رب

مع ان الموضوع فيه تفاصيل تانى مجبتش سيرتها بس اسف جدا على الاطاله

انا اشتريت الطرمبه من محمد لادا من سنتين و نص ب 200 جنيه (موتور 1300) و شغاله زي الفل لحد دلوقتي
و اعتقد ان الجديد أفضل من الاستيراد في موضوع الطرمبه لأن البليه بتاعتها غالبا بق خشنه و بالتالي هايبقى في صوت خشونه