بسم الله الرحمن الرحيم
من واقع تجارب الأعضاء الكرام والموضوعات الكتير اللي شفتها , وحوارات مطولة ونقاشات مستفيضة عن تجارب الناس مع الزيوت وتغييراتها , قلت اشوف حاجة كويسة تحافظ على موتور الصني الجديدة وتخليه زي ماهو هادي وابن حلال
وكنت لقيت هنا موضوع إعلاني عن زيوت ليكوي مولي , وقلت اشوف إيه أفضل حاجة مناسبة لعربيتي
واتصلت بتليفون خدمة العملاء ورد عليا المهندس محمد صاحب التوكيل نفسه في مصر , والحقيقة راجل على خلق وعلم غزير ماشاء الله , لما اتكلم معايا حسيت هو قد إيه فاهم وبيرشدني للزيت اللي يطابق نوع وعمر محرك العربية
هو عرف نوعها وموديلها انها صني الجديدة , ولما عرف اني عديت 12 ألف كيلو , واني كنت حاطط زيت شل تخليقي 10,000 كيلو , قاللي اعمل التالي:
أول حاجة: الموتور لسة جديد وانت عايز تشيل آثار الزيت القديم , ومحتاج تعمل تنضيف بسيط للموتور قبل ماتحط الزيت الجديد , فنصحني اجيب إضافة اسمها Engine Flush ودي بحوالي 35 جنيه وشكله زي ماهو في الصورة:
والمفروض يتحط في العربية بعد مايكون الموتور سخن كويس , تبطل العربية وتحط الإضافة وتخليه يدور على أقل سرعة من غير ماتزود بنزين ولا حاجة , وخليه كدة لمدة عشر دقايق بعد كدة تبطل الموتور وتسيب الزيت ينزل براحته لمدة ربع ساعة
بعد كدة نبدأ نحط الزيت الجديد , وأنسب زيت للعمر الحالي للمحرك بتاعي بعد ماعمل 12 ألف هو LeichtLauf High Tech 5W-40
زي الصورة دي
الجركن اللي جبته كان 5 لتر وسعره كان 295 جنيه , قلت هو غالي لكن لو جودة ممتازة وكمان المرة الجاية ان شاء الله اجيب علبة 1 لتر واحط على اللي متبقي عندي واغير زيت مرة كمان يبقى كدة وفرت كويس
غيرت فلتر نيسان الأصلي ولقيته مصنوع في اليابان وكان بـ 25 جنيه وفلترها هو نفس فلتر الموديل اللي قبلها
الصنايعي دخل الكومبريسور مكان مقاس الزيت وضغط هواء علشان ينزل كل الزيت اللي موجود بالكامل , وبناءً عليه العربية أخدت اكتر من 3 لتر علشان مغير فلتر ومنزل كمان الزيت بضغط الهواء !
النتيجة :
قبل التغيير , كنت حاطط زيت شل 10,000 ومشيت بيه 7,000 كيلو وصوت الموتور بدأ يعلى على غير العادة وكمان أداء العربية من سحب وتسارع مابقاش زي الأول مطلقاً ... وحسيت ان العربية بتعاني وبتزمجر كل ماحاول اتحرك أو ازود سرعة , وكمان كان صوت المحرك مسموع على السرعات المتوسطة والعالية وده مش طبيعة موتور نيسان صني
بعد العملية دي لقيت الصوت بسم الله ماشاء الله يكاد يكون اختفى , صوت الموتور بيكون ظاهر بشكل بسيط عند بداية الحركة لحد سرعة 40 تقريباً , بعد كدة بيختفي الصوت تماماً في ظروف غامضة !!! مشيت على كل السرعات وماسمعتش صوت الموتور !!! الأداء تحسن بشكل كبير لكن طبعاً العربية مش هاتبقى صاروخ ولا هايكون سحبها زي عربية رياضية أو بي إم مثلاً .. رحم الله امرءاً عرف قدر نفسه !
الزيت ده بينزل ويتغير بعد 12 ألف كيلو , دي كانت نصيحة المهندس محمد بالرغم من انه مكتوب ان حسب تعليمات مصنع كل محرك , فيه إمكانية ان الزيت ده ينزل بعد 40 ألف كيلو !! لكن طبعاً ناخد بنصيحة الخبير , ولا ينبئك مثل خبير
ياريت لو حد جرب ليكوي مولي أو فالفولاين يحكيلنا هنا تجربته مع تغييره للصني الجديدة
وربنا يبارك لكم جميعاً في سياراتكم أياً كان نوعها ويرزقنا جميعاً الأمن والسلامة ويريح بالنا
سلام عليكم
المفضلات