الموضوع: تجربة تفريغ نص بولو كلاسيك فى ابيزا 98 (الجزء الثانى)

السلام عليكم ورحمة الله وبركاته

قبل اى حاجة احب اشكر كل الاعضاء اللى متابعة معايا الموضوع فى الجزء الاول وتشجيعهم ليا بالردود ويارب تكون تجربة مفيدة للكل

ده لينك الجزء الاول عشان الناس اللى مش متابعة من الاول
http://www.nilemotors.net/Nile/334909-98.html

اتكلمنا فى الجزء اللى فات عن تفاصيل عربيتى ومقارنتها بالنص البولو وسبب اختيارى ليه

الجزء ده هنتكلم عن خطوات التركيب من ميكانيكا الى عفشة الى كهرباء الى تكييف بالتفصيل وبالصور
ملحوظة: الميكانيكى كان متفق معايا انه هينقلى كل حاجة من النص حتى الكليبسات

اول حاجة عملناها اننا فضينا حوض عربيتى بالكامل وده لكذا سبب:
أولا: انه ينضف الحوض مطرح الطينة اللى كانت جواه عشان يشتغل على نضافة
ثانيا: ان يركب اى حاجة يفكها من النص مباشرة عشان مفيش حاجة تتنطر وعشان الحاجة متتبهدلش

نبتدى بالحوض:
طبعا الاكصدام والصدر بيتفك وبيشيل الموتور بالعافشة قطعة واحدة



وبعدين بيشيل ضفيرة الحوض والكونترول
الحاجة الوحيدة اللى مشالهاش من الحوض هى مواسير الفرامل لأن شيلها ممكن يبوظها + انها مش بتبوظ يعنى مش بتحتاج تتغير

بعد ماخلصنا الحوض بندخل على الصالون
بيشيل كرسى السواق وعصاية الفتيس والقاطمة وبيفك هوايات وعدادات والفبر عشان يفك التابلوه

نيجى بقى للمرحلة المهمة اللى هى التجهيز, يعنى ايه تجهيز؟؟؟ يعنى انك تتأكد ان كل حاجة هتركب من النص الى عربيتك بدون مشاكل!!!! طبعا حد هيقولى انت بعد ماعملت كل ده لسه هتتأكد؟؟؟ هقوللو ان عربيتى نازلة من غير تكييف لكن النص ده مكيف يعنى لازم اتأكد من مداخل ومخارج مواسير التبريد من والى الصالون
• معلش نقطة كده بره الموضوع: مفيش حاجة اسمها عربية مجهزة ان يتركبلها تكييف وده اللى احنا بنشوفه لما واحد بيحب يبيع عربية مش مكيفة يقولك مجهزة وب 2000 جنيه تركبلك واحد, الكلام ده كلام تجار عربيات عشان يبسطلك الموضوع ويخليك تشيل, وعلى فكرة ممكن فعلا ب 2000 جنيه تركب تكييف وتبقى عربيتك مكيفة بس انت مش هتتكيف وهيبقى شغل كله بلدى وعك وانا مش بحب كده
الكلام اللى جاى ده هيبينلك التكييف بيركب فبريكة ازاى وانت احكم
مبدأيا لازم نقول التكييف بيتكون من ايه:
1. كومبريسور (كباس)
الموتور لما يكون نازل بكباس غير نفس الموتور لما يكون من غير كباس
يعنى ايه: يعنى الكباس ده بيكون حمل على الموتور وبالتالى لازم يكون معمول حسابه من الاساس عشان يعوض فرق فقد الطاقة لما بتشغل التكييف, ومين اللى بيعمل كده؟؟؟ الكونترول هو اللى بيعمل كده, بيكون متبرمج على ان من ضمن الاحمال على الموتور الكباس فبالتالى بيعوض فقد الطاقة لما تشغل التكييف, لكن تعالى حط كباس على موتور مش متبرمج ان يكون فيه تكييف, عامل بالظبط زى واحد بيعرف يقرأ ويكتب عربى بس ومش بيعرف انجليزى وانت جاى تكلمه انجليزى
نستفاد من الكلام ده ان الكباس لازم يكون معاه كونترول نازل فيه اوبشن التكييف عشان يفهم اللى بيحصل لما بتشغل التكييف

2. سربنتينة
ودى بتكون مع الردياتير ولازم الردياتير يكون الكبير بأتنين مروحة وبالتالى لو انت الريدياتير بتاعك الصغير يبقى مش هتغيره لوحده, ده انت هتحتاج كمان تغير الصدر اللى بيشيله لأن القواعد مختلفة

دى صورة الكبير الجديد



وطبعا بيكون معاه مواسير التكييف اللى ممكن برده تدوخ عليها
وده الفرق بين الصدر القديم والجديد
خد بالك من القواعد اللى بيركب عليها الردياتير



3. تلاجة (كويل)
ودى لازم تيجى مع الزراير بتاعت التابلوه



4. نيجى بقى لأهم نقطة فى الموضوع ودى اللى العضو ايهاب windofchange كان قلقان منها لأنه فاهم مخاطرها ومع ان نصيحته جت متأخرة بس الحمد لله ربنا ستر والميكانيكى راجل بيعرف ربنا ومش بيستسهل ويحب النضافة ولقيته عاملها فبريكة, اللى هى فتحة المواسير اللى داخلة من الحوض للتلاجة وفتحة الفايظ
فتحة المواسير بتكون فبريكة مش موجودة فى العربيات اللى مش مكيفة بس بتكون بارزة ومتحددة عشان لو حبيت تقصها زى ما أنا عملت, وفتحة الفايظ كمان بتكون نفس الموضوع
المهم فى الموضوع ده ان القص يكون مظبوط عشان ميعملش مشاكل سواء اصوات هواء او سخونية موتور او اتربة الى داخل الصالون, وان فتحة الفايظ تكون بالميللى ويركب عليها الكاوتشة بتاعتها اللى بتخلى المياه تنزل بره العربية مش جوه الصالون ومن غير ماتيجى على الصاج وتعمل بارومة



حاجة تانية مهمة وهو العزل اللى جوه الصالون
دى صورة العزل اللى فى النص مع الفتحة



ودى صورة العزل اللى فى عربيتى



طبعا مفيش اى اختلاف وكمان العزل بتاع ال 1000 زى 1600 زى 2000 سى سى زى البولو زى الابيزا

ودى الصورة بعد ما التلاجة اتقفلت



على فكرة الميكانيكى مرداش يخلع اللباد من النص لأن خلعه هيتلفه لأنه ملزوق + ان اللباد عندى كله سليم


وبكده نكون خلصنا جزئية التكييف, ومتهيألى اى حد معاه عربية مش مكيفة وعايز يكيفها هيعمل حاجة من الاتنين: يشترى نص وينقل كل حاجة فيه لعربيته او يبيع عربيته ويشترى واحدة مكيفة فابريكة

بالنسبة لشغل الكهرباء:
مش هتكلم عليه كتير لأن مجمله بسيط بس شغله صعب ولازم واحد بس اللى يشتغل فى الضفيرة من الاول للأخر عشان يبقى حافظ بيعمل ايه
عموما علبة الفيوز واحدة فى كل الابيزا والبولو لكن الضفيرة هى اللى بتختلف حسب الاوبشن اللى نازلة بيه العربية
فيه كذا حاجة قابلتنى فى الكهرباء:
كان فيه كبارى كتير معمولة وانذار بلدى ووحدة رفع بلدى وشغل عك
حاولت ارجع سنتر الفابريكة بس للأسف لقيت كابل طرمبة الهواء بتاعت السنتر مقطوع وده معناه انها مش شغالة وحتاجة كهربائى متخصص يراجع على الدايرة من اولها لأخرها
النص ده نازل من غير فوجات فبالتالى الضفيرة مفيهاش فيش للفوجات والزرار مفيهوش اوبشن الفوجات بس انا عربيتى فبريكة فوجات وكان الحل اننا اشترينا ضفيرة فوجات بتتباع جاهزة تقريبا ب 50 او 100 جنيه وده افضل من انك توصل الفوجات على الضفيرة دايركت لأن كده هتسخن الزرار وممكن يسيح, والزرار بقى بيشغل الفوجات مع لمبة الشابورة الخلفية وده عيبه انك عشان تشغل الفوجات لازم النور الواطى يكون شغال فأنا بفكر ابدل الزرار ده بالزرار القديم عشان كنت بقدر اشغل الفوجات من غير ما احتاج اشغل النور الواطى

أما بالنسبة للتابلوه فكان الاختلاف فى ان عربيتى مفيهاش وسائد هوائية لكن النص فيه واحدة للسواق ودى ليها سيستم عشان تركب يعنى مش مجرد طارة بتروح تشتريها من عند بتاع الاستيراد وتقول دى فيها طارة اير باج
طبعا الطارة تركب عادى جدا بس الاير باج عمرها ما هتفتح حتى لو جبت وش العربية فى ضهرها
الاير باج عشان يشتغل يركب معاه كونترول خاص بيه بيركب تحت التابلوه



والطارة بيكون مكتوب عليها Air Bag (بالنسبة لعلامة فولكس اللى على الطارة وان عربيتى سيات, ده غطاء ممكن يتغير بكل سهولة لأنها نفس الطارة مع اختلاف الغطاء)

نيجى للنص وخطوات تفريغه
تقريبا هى نفس الخطوات اللى حصلت فى عربيتى مع الحذر الشديد عشان مفيش كلبس يتكسر وعشان كده هو بدأ بعربيتى

أسعد لحظات حياتك وانت بتكتشف حاجات فبريكة فى النص مش موجودة فى عربيتك زى:

صدادات فلين خلف الاكصدام (2 فى الجنب وواحدة عريضة فى النص) بس للأسف الصدادة اليمين كانت مش موجودة, ودوول بيكونوا ملزوقين



مسامير الشبكة والفوانيس اللى الميكانيكى صمم انه يركبهملى عشان الصدر الجديد يفضل سليم ومكان المسامير ميوسعش بالمسامير البلدى اللى كانت فى عربيتى
قواعد موتور الفبريكة
كابل دبرياج الفبريكة
بطانة الكبوت
الكاوتشة اللى بتكون فى طرف الكبوت من ناحية القفل اللى بتمنع دخول التراب للحوض واللى لو اتشالت مرة واحدة عمرها ماهتركب صح تانى
كاوتشة بتركب تحت بدال الدبرياج وبصراحة مش عارف دى بتاعت ايه بس على ما اعتقد عشان متنزلش بالبدال للأخر وتقطع الكابل



كونترول للمروحة!!!!!



كلاكس فولكس الفابريكة




بدأ بفك الصدر وخلع الرفارف والطوربيدو والمساحات



وبعدين دخل على الصالون وفك القاطمة والتابلوه وعصاية الفتيس وقاعدة البدالات



وحل الموتور بالعافشة حتة واحدة فيما عدا المساعدين والسيرفو




نيجى بقى لشوية مقارنات
السيرفو القديم اصغر من السيرفو الجديد وده طبيعى لأن الطنابير واجهزة الفرامل اكبر من عندى ودى عملتلى مشكلة بس هقولها فى وقتها

القنطرة القديمة المفروض انها نفس مقاس القنطرة الجديدة ودى حاجة انا كنت متأكد منها زى اسمى بس حصل حاجة خليتنى اشك فى اسمى وهى ان القنطرة القديمة (بتاعتى) كانت اعرض من الجديدة ب نص سنتيمتر وكنت قربت اقتنع واعرف انى مذاكرتش صح لولا انى شوفت حاجة دايقتنى وفرحتنى فى نفس الوقت



الحاجة اللى دايقتنى ان القنطرة الجديدة طلع فيها تقويسة بسيطة عملت نص سنتيمتر وطبعا ده هيخليها مش هتركب والحاجة اللى فرحتنى انى اثبت ان المفروض ان الاتنين واحد وانى صح
طبعا المفروض ان ده نص استيراد يعنى فبريكة يعنى ميكونش فيه الهواء وحاجة زى كده تعيبه بس دى حاجة عمرك ما هتكتشفها فى الأول
ولأنى متأكد ان النص ده سليم فبدأت أدور على السبب وطلع



فعصة فى المدادة
قولت اوبببااااااا, النص ده كان عامل حادثة وغير اكصدام عشان يدارى الحادثة
بس الميكانيكى قاللى لأ, وقاللى ده بسبب النقل والهبد, وبعدين افتكرت ان النص الرفرف اليمين مخبوط وافتكرت شكل الكلارك وهو بيشيله من الجنب واستنتجت ان الكلارك هو اللى عمل الكلام ده كله لما دخل الشوكة من الجنب ورفع النص من القنطرة, طبعا الحمل كله على القنطرة ومكانش قدام القنطرة غير انها تسحب المدادة معاها (يارب أكون صح)

عموما الموضوع ده اتحل عن طريق انى ركبت القنطرة القديمة بس اخدت قاعدة الموتور اللى فى القنطرة بتاعت النص وركبتها عندى

عصاية الفتيس القديمة اقصر من الجديدة لأن الفتيس مختلف وجيل أقدم من اللى كان راكب عندى

قطر فتحة شجرة الموتور 2.25 بوصة



وقطر فتحة الشكمان بتاعى 1.75 بوصة

يعنى لازم الشكمان بالكامل يتغير ويكون نفس القطر بتاع شجرة الموتور

الطنابير وجهاز الفرامل اكبر من اللى عندى وده برده عمل مشكلة مكنتش عامل حسابها خااااااالص بس الحمد لله احسن




أنا بقول كفاية كده الجزء ده عشان مطولش عليكم والى اللقاء فى جزء اخر ويارب أكون قدرت أفيدكم

وشكرا للمتابعة

• على فكرة انا استلمت العربية الخميس اللى فات 14/2/2013

ادعولى