الموضوع: التسونامي الكوري في مواجهة صعبة امام الماكينات الألمانية

الاخوةوو الاخوات الكرام / مالكي و محبي هيونداي

أسعد الله أوقاتكم...

يسعدني أن ألتقي بكم من طريق القاهرة / السويس الصحراوي (تحديدا مابين مدينتي الرحاب و الشروق) لنقل الوصف التفصيلي لأحداث اللقاء الصعب جدا و الغير متوقع بين :

التسونامي الكوري
هيونداي ألنترا MD

Vs

الماكينات الألمانية
BMW X3

و
فولكس فاجن

البداية كانت صبيحة يوم الخميس الموافق 14 مارس 2013 و في حوالي الساعة الثامن و النصف بينما كنت في طريقي الي مدينة الاسماعيلية حيث جائتني مكالمة تليفونية من مكتبنا بالسويس تفيد بوجود أحدي السفن التابعة لأشراف هيئتنا بمنطقة البحيرات متعطلة و تحتاج الي كشف و اصدار شهادات صلاحية بعد الاصلاح لكي تتمكن من أكمال عبورها لقناة السويس في طريقها للسويس

طبعا أضطررت أني أغير أتجاهي صوب القاهرة مرة أخري بعد أن كنت قد تخطيت العشر من رمضان و ذلك كي أصل الي البيت لخذ اللاب توب و الختم الخاص بي

و فعلا في أقل من نصف ساعة وصلت الي البيت بالرحاب بفضل الله ثم الاألنترا MD اللي كنت قارص عليها

و في تمام التاسعة و النصف خرجت مرة اخري الي طريق السويس الصحراوي و أنا في غاية الاستعجال كي اصل الي تلك السفينة و كي تتمكن من عبور القناة في نفس اليوم قبل الساعة الرابعة عصرا

و أثناء تخطي أحدي السيارات من اليسار طبعا لاحظت وميض غريب في المراية الوسطي , و ميض عندما أراه احبه ....

أنها بي أم دبليو

طبعا أعطيت لسائق البي أم أشارة شمال و فعلا لم يكرر ومضاته لي و أنتظر حتي أنهيت التخطي لكل السيارات التي في يميني و كنت علي سرعة حوالي 140 كم/س , و عندما أصبح الطريق خاليا في اليمين لكن علي بعد تظهر سيارة نقل في اليمين أعطيت أشارة شمال للسيارة التي خلفي (البي أم) و فعلا أخذ هو يمين الطريق و طار من يميني

أستمريت علي سرعتي مابين 120 - 160 كم/س حسب حالة الطريق و البي أم امامي علي بعد أمتار (حوالي 100 متر) تزيد أو تنقص قليلا حتي أقتربت منه مرة أخري نظرا لحالة الطريق المزدحم بسيارات النقل

و فجأة تخطي من يساري سهم ألماني أخر ... انها فولكس فاجن (تقريبا باراتي) و الغريب أنه لم يكن ينتظر فأخذ غرزة صعبة جدا من أمامي و كسر علي البي أم (الاكس 3) بطريقة تدل علي عدم حفظ المقامات أو أحترام للكبير

و فعلا ثار البي أم و في لحظة كان امام الباراتي ليبدأ سباق غير متوقع بين الماكينات الألمانية
طبعا انا كنت في طريقي و مستعجل قولت فرصة
أتسلي و أتفرج عليهما و هما يوسعوا لي الطريق , و فعلا قرصت شوية و بدأت في الاقتراب منهما كي أتمكن من أختراق الطريق في أعقاب الموجة الألمانية التي تشق الطريق

لكنهما فهما أن التسونامي الكوري يلاحقهما و زادا من سرعتيهما فلاحقتهما ووصلنا الي سرعة جاوزت ال 180 كم/س و لكني قررت ان أزيد مسافة الامان بيني و بين (الباراتي) اللي كنت مش مطمئن له

يأخدوا غرزة أخدها وراهم يزودوا ازود يهدوا أهدي و استمر هذا الموكب (البي أم - الباراتي - الالنترا) بمسافات بينية بين السيارات الثلاث حوالي 3 أو 5 متر الي أن بدأ الطريق يقفل شوية و يزدحم و هنا قرر البي أم أن يهدئ من سرعته و أخد يمين الطريق لمحاولة تخطي أحدي سيارات النقل من اليمين بينما أخذ الباراتي و انا خلفه اقصي اليسار و قمنا معا بعدة مناورات متتالية بين السيارات لنتخطي البي أم من اليسار و كدت وقتها أثناء ذلك أن أتخطي الباراتي أيضا لكني فضلت البقاء خلفه تفاديا لأي مفاجأة بالطريق

و هنا أختلف الترتيب و أصبحت الالنترا في المركز الثاني منطلقة بأقصي سرعة خلف الباراتي (لم أتخطي ال 180 بعد و من غير كيك داون و لكن المسافة بيننا ضاقت الي ادني حد لها و البي أم يكاد يكون ملاصق لي من الخلف و هنا وصلنا الي قمة الاثارة عندما أنحرف الباراتي فجأة يسارا لتفادي ميكروباص في الحارة الثالثة من اليمين ووجدت الميكروباص امامي و بيني و بينه أقل من 100 متر (يمكن ووفق تقديري 60 أو 70 متر) و طبعا مش هاينفع أفرمل لأن البي أم خلفي مباشرة

و رغم ثقتي الكاملة الان في فرامل الالنترا و أنها هاتوقفني في أقل من المسافة دي ألا اني تصرفت بشكل مختلف

أخدت شمال زي الباراتي مرة واحدة و هوووووووووب رديت يمين في لمح البصر
العربية فعلا أتنقلت من الحارة الثالثة الي الحارة الرابعة كما هي كأن حد شالها و حطها في الحارة التانية
لكن الغريب أني وجدت الطارة لسه كاسرة شمال و العربية ماشية علي طول !!!

طبعا رفعت رجلي من علي البنزين و دوست سنة فرامل و شوية و لاقيت الطارة بدأت تعدل تاني

بصراحة الموقف كان غريب و مش فاهمة لحد دلوقتي

المهم فضلت مكمل ورا الباراتي بينما البي أم أتصرف بشكل مختلف و قرر أنه يفرمل و تخطي الميكروباص من اليمين لكن المسافة بينه و بيني زادت

وصلنا الي ملف الشروق و بدأت أهدي و لاقيت الباراتي بيهدي و داخل شمال بينما تخطي البي أم من اليمين مكملا الي أتجاه مدينة السويس
و هو بجانبي أطلق كلاكسه مرتين فرديت عليه التحية و أنطلقنا أنا و الباراتي خلف بعض في أتجاه الشروق لكنه دخل محطة البنزين بينما اكملت أنا لأدخل من المدخل في أتجاه طريق الاسماعيلية

بصراحة كانت شداية مثيرة جدا و غير متوقعة و لكن نتيجتها طبعا كانت معروفة و محسومة بلا شك لكن الالنترا أبلت بلاء حسنا سواء تسارع أو جري أو حتي ثبات و بصراحة انا كنت عامل حساب كبير لفرق الامكانيات بيني و بين العربيتين و مقدر أمكانيات عربيتي كويس جدا و بأسيب مسافات و اعمل حسابي في الفرامل و الملفات و حتي الغرز ماعدا المرة الوحيدة اللي فلتت مني بصراحة لما الباراتي غلط و لم ينبهني للميكروباص اللي قدامه بينما البي أم كان بصراحة بيراعيني جدا و واخد باله أن فيه فرق أمكانيات بين العربيتين و ده اللي زود أحترامي ليه جدا

و علي فكرة صادفت أننا أتقابلنا بالليل مرة تانية و أنا راجع و تقريبا في نفس المسافة من الشروق الي الرحاب و فضلنا ماشيين ورا بعض مرة نشد و مرة نهدي (هي نفس العربية علي فكرة و ليست شبيهة من شكل اللوحات و العربية من الخلف اللي حفظته جدا في الصباح)
بصراحة هو سواق عاقل جدا و سواقته عجبتني و متناغمة معايا جدا

الدرس اللي طلعت بيه هو :
- ماتشدش مع الالماني في طريق مفتوح أبدا أبدا أبدا ....
- و لاحتي في طريق مقفول لأنه هايعدي هايعدي لن ثباته و امكانياته أفضل بكتييييير
- بس برضه الالنترا طلعت مش ساهلة خاصة في الملفات و الغرز
- التوب سبيد بتاع الألنترا مالوش حل برضه و يقدر يتعب اي عربية
- أن ربنا ساترها معانا و الله بشكل كبير مش أمكانيات عربياتنا

و في التهاية .. تحية كبيرة للماكينات الألمانية و للصانع الألماني و هارد لك للتسونامي الكوري ذو الاداء المشرف و تمنياتي له بالتوفيق و التقدم أن شاء الله

المشاركة الأصلية كتبت بواسطة lanos2004

انته تشد مع الالمانى عادى جدااااااااا
وما فيش مشاكل خالص
بطلوا عقد ه الالمانى بقه
بتدوا لعربيات سمعه انها جرايه وهيه عاديه جدا
زى بى ام 318--و316 واكتافيا وباساتfsi وجيتا--دى عربيات تقيله ميتاخدش منها جرى خالص

الاوكتافيا مالهاش في الجري فعلا و انا لمست ده لما جربت بالياريس و و كنت طاير علي 195 و ماعرفش أصلا يحصلني , و طبعا بالالنترا طلعت منها فوق و تحت و مش بأفكر أني اشد تاني معاها الصراحة .... هههههههههه

الجيتا و الباسات نفس الكلام علي طريق الاسكندرية بهدلتهم , لكن الباسات الجديدة أوعي وشك

البي أم بقي ... مش ممكن اعديها لأني بأحترم العربية دي أوي أوي و كل الحكاية أني بأحب أمشي وراها , زي ماتكون واحدة حلوة أوي و انت عايز تمشي وراها تعاكسها هههههههه