الموضوع: تجربة تغيير زيت المحرك - ابيزا 1.6 Code AFT

المشاركة الأصلية كتبت بواسطة karim ibiza

السلام عليكم ورحمة الله وبركاته

تكملة لتقييم اداء الموتور الجديد فى موضوع http://www.nilemotors.net/nile/341077-98.html كان المفروض انى اغير الزيت اللى كنت بنضف بيه الموتور بعد 1000 كيلو ولكن لظروف معينة اضطريت انى امشى عليه 3000 كيلو وكان نوعه mobil xhb بدرجة لزوجة 20w-50 زيت معدنى وكنت جايبه بـ120 جنيه وده انا مش بنصح بيه للمواتير اللى ماشية اقل من 1000 ألف كيلو واللى معدية الـ 1000 ألف بس حالتها كويسة, انا كنت جايبه بس عشان التنضيف

من يومين نويت انى اغير الزيت وكنت عايز اجيب اى حاجة نصف تخليقى بدرجة لزوجة 10w-40 لأن ده الـrecommended للموتور بتاعى ولحالته لأنه عامل 85 ألف كيلو

بصراحة كنت ناوى اجرب ليكوى مولى زى اللى بشمهندس سيد كان عامل بيه التقرير عشان نشوف اذا كانت المشكلة فى الزيت ولا فى سوء اختيار الدرجة المناسبة لحالة موتوره بس للأسف الليكوى مولى مبقاش موجود اليومين دوول والوكيل مش عامل ليه support

كان قدامى كذا اختيار: Castrol magnetic - valvoline durablend - شيل hx7
قولت خلينى فى المضمون لأن ده اول غيار زيت للموتور الجديد وعايز اقيم اداءه

بالفعل جبت شيل hx7 الأزرق وده لأنه نصف تخليقى ودرجة لزوجته 10w-40 والمعلومة اللى عرفتها ان كل زيوت شيل اللى بتتباع فى مصر بيتم تعبئتها برده فى مصر زى mobil ماعدا شيل الأزرق بيجى مستورد made in eu اتحاد اوروبى وطبعا دى حاجة اسعدتنى

الزيت ماشاء الله لونه لون زيت الأكل وخفيف جدا وموتورى اخد 3.5 لتر بالفلتر

اما بالنسبة للتقييم فأنا قيمته على اساس الفرق بينه وبين الزيت اللى انا كنت حاطه mobil xhb
مفيش صوت تاكيهات
تجميع العربية بقى أعلى ومبقاش فيه تعتيل فى الموتور مع القرص على الغيار والعربية اتحولت بمعنى الكلمة وحاسس انى كنت ظالمها لما مشيت على الزيت التانى الفترة الطويلة دى

سعر العبوة 4 ليتر 220 جنيه



اما عن مواصفات الزيت فـ الـ api بتاعه sl
ومكتوب على العبوة انه مخصص لحماية ونظافة المحركات من تراكم وترسيب الشوائب الناتجة من احتكاك اجزاء الموتور ببعضها فى ظروف القيادة المختلفة وده معناه عمر اطول واداء افضل للمحرك

طبعا انا لسه معملتش بيه 200 كيلو على بعض
ان شاء الله هنقل ليكم تقييمى للزيت بعد اول 1000 كيلو

وشكرا

كريم باشا ، أولاً ألف مبروك على الزيت :) ، ثانياً بقه سؤال معلش ، هو الزيت دا المفروض بيتساب كام كيلو ، و ممكن يتحط فى عربية عاملة 100000 أو أكتر ولا لأ ؟؟ و ألف شكر مقدماً يا باشا..