الموضوع: أنا والتكييف وهواك (ابيزا 98)

رجااالة صباح الفل

للناس اللى عارفانى من اول ما دخلت قسم SEAT عارفين ان عربيتى ابيزا 98 كانت موتور 1000 وبعدين بقت 1400 وبدون باور وتكييف ودلوقتى بعد موضوع تجربة تفريغ نص بولو كلاسيك فى ابيزا
98 بقت 1600 وباور وتكييف ومن ساعة ما خلصت موضوع التسقيط ده وانا مكنتش شحنت التكييف عشان الجو حلو (مفيش فلوس)

وقلت مبدهاش بقى نروح نشحن التكييف عشان نشم النسيم على نضافة

قبل ما أدخل فى الموضوع انا كان عندى حاجة غريبة وهى ان لما العربية بتسخن او بتوصل لدرجة الحرارة اللى المفروض تشتغل عندها المروحة, المروحة مش بتشتغل, بس شوية والمراوح تشتغل بس على السرعة العالية (انا عندى الردياتير الكبير بـ 2 مروحة)
يعنى عمرى ما شوفت المروحة على السرعة البطيئة بس مكنتش بحط فى بالى لأنها مش بتسخن وقلت يمكن هو ده الطبيعى

نرجع لموضوعنا

بما انى كان معايا لادا موديل 84 ولما الفلوس لعبت فى ايدى جبت ابيزا 98 فاضية وده ان دل فأنه يدل على انى عمرى ما اتعاملت مع بتاع تكييف قبل كده ولا اعرف بيتشحن ازاى

المهم واحد صاحبى وصفلى واحد بتاع تكييف وقاللى كويس, روحتله ولما عرف انى مركبلها تكييف مرضاش يشتغل فيها ليه يابويا!!!! انا بشتغل فى التكييفات الفبريكة بس عشان مش بحب التكييفات اللى متركبة عشان بيبقى كله شغل عك, قولتله عندك حق والله بس افتح الكبوت وشوف

فتح الكبوت (و أنا نايمة) وشاف المواسير والكباس والثلاجة وقلى انت مركبه؟؟!! قولتله اه, قاللى مفرغ نص؟؟!! أى نعم, طيب توكلنا على الله

كبس المواسير والحمد لله مفيش اى تسريب
شحن فريون وشغل التكييف وبعدين قاللى بطل العربية
خير يابويا!!!! قاللى المروحة مش شغالة على البطئ طيب ايه الصح؟؟ قاللى لازم اول ما تفتح التكييف المروحة تشتغل على البطئ
طيب يمين شمال فوق وتحت
فاكرين الـ fan control اللى مكونتش عارف ده بتاع ايه


قالى المشكلة فيه لأن ده كونترول مسؤل عن تشغيل المراوح وتوقيت وطريقة تشغيلهم وروح لكهربائى يبصلك عليه

طيب ايه العمل دلوقتى؟؟!!
فك فيشة حساس الـ pressure sensor من جنب مبخر البنزين (فيها 4 اطراف) ووصل طرفين ببعض عشان يشغل المروحة مع التكييف direct (طبعا المروحة السرعة العالية) وقاللى على بال ما تروح تضبط موضوع الكونترول ده امشى مؤقتا كده (يابن الايه يا لذينة)

طيب ادخل شوف التكييف وقوللى ايه رأيك
التكييف ما شاء الله حاجة جميلة وافتكرت كلمة ايهاب منصور فى المقابلة لما قاللى التكييف بتاعك لما تشحنه هتلاقيه اقوى من الابيزا العادية لأن الكباس ده كبير عشان الموتور كبير

عايز كام يا معلمة؟؟ 150 جنيه, اتفضل , شكرا

طبعا بكرة اجازة ومفيش حد فاتح, هل فيه خطر انى اشغل التكييف بالوضع ده؟؟؟ يا ترى الموضوع ممكن يكون فيوز او كتاوت؟؟؟ هل فيه حاجة اقدر اعملها بنفسى؟؟؟

معلش يا جودعان اصلى جديد فى التكييف

الى اللقاء