تفكير عميق فى البيجو 301 ولكن الخوف من سعر اعادة البيع

**m.basha** · 30-08-2013 01:48 AM

السلام عليكم فكرت كثيرا وشاركت فى مواضيع كثيرة عن البيجو 301 وقررت ان شاء المولى انى اشتريها اه فى حاجات بسيطة مش عجبانى فيها زى شكل العربية من الخلف مش حلو اوى زى وشها وتظهر كنزة من الخلف والى جانب شوية حاجات بسيطة فى الصالون زى مكان زراير الزجاج الخلفى و زى لمبة الصالون الخلفى اللى مش موجوده بس كل ده ممكن اتغاضى عنه لانها فى المجمل على مميزاته مع سعرها تعتبر ممتازة بس اللى مخوفنى اوى سعر اعادة البيع يعنى لو جبت الهاى لاين 136000 وبعد 5 سنوات ان شاء الله لو حبيت تغير اعتقد حاتكلم فى رينج 80 -90 يعنى تخسر فى ثمنها حوالى 40 الى 45 الف ياريت المشاركة و الاراء من الناس المحترمة اللى فى المنتدى و ياريت اللى يقول رايه فى الكلام ده يقولى عشان انا محتار بين لونين البترولى و لا الشامبين و معلشى طولت عليكم جدا و شكرا

**eleanor** · 30-08-2013 05:21 AM

كل العربيات الجديده بتخسر بس فكر انك هاتركب عربيه اوروبى محترمه وهاتريحك بغض النظر عن اعاده البيع
انت بتركب عربيه تريحك مش انت تتعب وهى تستريح

**Ahmed Amin** · 30-08-2013 08:43 AM

زي ما أستاذ eleanor قالك, أنت بتركب عربية أوروبي محترمة,
ثبات وأمان أعلي من باقي العربيات اللي في نفس فئتها السعرية اللي في السوق.
يعني انا لو معايا المبلغ اللي هيخليني أركب عربية أوروبي محترمة في الراحة والسواقة والأمان
لخمس سنين علي الأقل قبل ما تبدأ تطلب مصاريف أو قبل ما أفكر أغير,
مش هقول لأ وأروح لحاجة كوري مثلاً عشان أعادة بيعها أحسن وأقرف نفسي 5 سنين معاها عشان مخسرش.

ولو حسبتها كتير بحسبة أعادة البيع, هتلاقي نفسك هتروح للعربيات الكوري لأن أحنا مش هنحط الصيني في المقارنة,,
ومش هنحط الياباني كمان لأن كل الجديد سعرة عالي ومفهوش نفس كماليات وراحة الأوروبي في السواقة,

فأنت لو روحت للكوري أه مش هتخسر كتير في أعادة البيع لأنها بتبقي نازلة أرخص فمش بتخسر كتير زي العربية الأوروبي اللي بتبقي نزلة بكماليات أكتر ومهتم بالأمان فيها عشان كدا نازلة غالية,
العربيات اللي أنا أقصدها في الكوري رخيصة زي الدايو أو الفيرنا, أنا بتفاجي من سعر أعادة بيعهم,
عربية ممكن تعد بيها 5 سنين ولما تيجي تبيعها مش بتخسر فيها أكتر من 10 الأف جنية.!
أو علي الوضع الحالي بتاع سنتنا دي 2013, اللي أشتري فيرنا او لانوس من 5 سنين مش هيخسر فيهم أنهارده أكتر من 10 الأف.!
لأن الدايو سعرها مزادتش أوي وكانت رخيصة في الأساس فمخسرتش كتير,
وباقي العربيات كلها سعرها زاد بشكل غريب زي الأنسر البومة, وقيمة الجنية بتقل معاهم.

أما بالنسبة للبيجو 301 والأليزية الجديدة, أنا شايف أنها تعتبر category وفئة جديدة من الأوروبي,
مش نازلة غالية علينا في الأساس زي ال 308 مثلاً أو ال 508, فمش هتخسر كتير لما تيجي تبيع زي باقي العربيات في فئتها السعرية من الكيا سيراتو الشكل القديم أو الريو,
اللي هما نازلين في الفئة المتوسطة فمش بيخسرو كتير زي العربيات اللي فوق رينج ال 170 و 200 ألف.

وبالنسبة للسعر بعد 5 سنين لل 301, محدش عارف وقتها سعر العربيات الجديدة هتبقي عاملة أزاي, وقيمة الجنية هتبقي كام, فبلاش تفترض من دلوقتي أنها هتكون في 80 ل 90 ألف, لسه بدري علي الكلام دا.

وبعد 5 سنين من أنهارده, أنا أو أنت كمشتري, لو قدامك عربيتين واحدة بيجو أوروبي مستعمل
وواحدة كوري أستعمال, هتختار أيه ؟ وأنهي اللي هتبقي محافظة علي نفسها أكتر ؟؟

هسيب لك أنت الرد,,

بالنسبة للشكل الخلفي للعربية لو أنت عايز عربية شكل وبتتكم عن شكل العربية, ممكن بالمبلغ اللي معاك تزود عليه شوية وتروح لأول فئة من ال 308,

**m.basha** · 30-08-2013 02:47 PM

ما هو انا ياباشا لو حافكر فى استعمال انا اصلا معايا اوبترا 2010 و تعتبر مش ماشية حوالى 45 الف كيلو بس بقالها معايا 4 سنوات و الحمد لله مش مضيقانى بس انا بحب قبل ما ابتدى اصرف على العربية لاء اغير و ابيعها و هى لسه فى حالتها و ازود شوية و اركب حاجة زيرو دى وجهة النظر فهو ده اللى محيرانى انى معايا عربية مش وحشة خالص انت عارف لو معايا عربية مزعلانى او موديل قديم شوية كنت مش حاتردد و حاشترى البيجو وش كده بس ده الحيرة بتاعتى لانى بفكر جديا للتغيير

**Akram.Gamal** · 30-08-2013 03:33 PM

انا رأيى انك لو نزلت جربت سواقة ال 301 و ركبته فتره
التردد هيروح و هتقدر تقرر بسهوله
و بعدين عندى ملحوظه ع سوق الاوربى انت عندمك الناس بتدور على البولو موديل 2000
و ديل 99 ب 50 الف فما فوق
فما بالك بيجو ال احنا متعودين منها ع التعمير
اانا راكب بيجو موديل 79 :d

**m.basha** · 30-08-2013 09:18 PM

-

المشاركة الأصلية كتبت بواسطة Ahmedshalaby

بص يا باشا مادام انت راكب كوري و ماشتكيتش منه بس عاوز تغير يبقى مش هتحس بنقلة غير لو ركبت عربية اوروبي زي دي
انا كنت في نفس حيرتك دي بس الحمد لله استقريت عل ٣٠١ و حجزتها
بس انا كنت بيجوهاوي قديم قبل ماركب الكوري ٥٠٤ و ٣٠٧
و بصراحة مش باحس اني راكب عربية غير الاوروبي
اما بالنسبة لسعر اعادة البيع فانت قدامك ان شاء الله مش اقل من ٧ سنين قبل ما تفكر تبيع و ساعتها حتى لو كانت لانسر بوما بردو مش هتجيب اكتر من ٩٠ الف يعني مش فارقة كتير
انت تفكر في سعر اعادة البيع فعليا لو مضطر تبيع بعد سنتين مثلا و ساعتها افضل حاجة الكوري المستعمل مش الجديد زي اللي معاك مثلا كده
اما بالنسبة للون
العربية كنزة شوية من الخلف زي مانت قلت لكن الالوان الفاتحة بتغير الاحساس دا و بتدي فخامة
فانا رأيي ابيض او شامبين او فضي

- كلام حضرتك مقنع جدا بصراحة وانا ان شاء الله حاتوكل على الله و حاستخير ربنا وان شاء الله حاشتريها بالنسبة للون انا فعلا بفكر فى لون فاتح عشان كنازة العربية من الخلف و بفكر فى الشامبين والبترولى مش عارف اه ممكن يبين شكل العربية احسن انا شوفت البترولى فى الشارع عجبتنى لونها اوى بس من الخلف العربية باينة كنزة شويه عكس الفضى لما شوفتها مش عارف الشامبين حايبقى كده و لا ايه

**AHMED REFAT** · 31-08-2013 08:13 PM

تعليقا بسيط على سعر اعادة البيع اللى السوق ييوهمنا ان الكورى هى الصفقة الرابحة فى سعر اعادة البيع ..اشتريت ماتريكس موديل 2007 زيرو ب 88 الف بعتها 2010 ب 72 الف بعدها اشتريت فيرنا موديل 2011 زيرو ب 72500 بعتها كسر زيرو ماجابتش 2000 كيلو بعد شهر من استلامها ب 67000 ويعدها اشتريت كارينز موديل 2011 زيرو ب 123500 بعتها بعد سنة بالظبط من استلامها ب 107000 .. الشاهد ان برضه الكورى بيخسر واى عربية زيرو بتخسر بنسبة وتناسب ولاتتفاوت بنسبة كبيرة قوى بين كورى وغيره .. يا باشا توكل على الله انا عمرى ماجبت عربية ونيتى ابيعها لكن الظروف هى التى تحكم ونسأل الله ان ييسر لك امرك ويعافيك والعربية تفضل معاك وتريحك