الموضوع: دبة فى فتيس 406

السلام عليكم
شارى عربية 406 موديل 2005 لسة جديد بس ملاحظ حاجة غريبة لما بجيب الفتيس على وضع r بسمع صوت دبة قوية وقبل ما العربية تتحرك ايضا لما اكون ماشى على سرعة و آجى اهدى الاقى انخفاض فجاءى فى السرعة عند النقل من الثالث للثانى
صاحب العربية كلمته قال لى دى مشكلة ايدل بنزين محتاج تنظيف

عملت كدة المشكلة خفت نسبيا و لا تزال موجودة
حد يعرف تشخيص دقيق للموضوع

المشاركة الأصلية كتبت بواسطة leitosr

أنا الحمدلله تمام,, ومبسوط أنك رجعت تشارك معانا تاني عشان نستفاد من خبرة حضرتك.
وفعلاً السولونيد لازم يتجاب من مكان ثقة يعني التوكيل او مصطفي شوقي,

بخصوص فلتر الفتيس, هل معني كلامك أو ممكن الفلتر يتغير من غير ما الفتيس يتحل كله ويكون بفك فارغة واحدة بس.؟؟

حاجة تانية يا بشمهندس, كان فيه شكوي متكررة وكانت موجودة عندي إن ساعات لما حد يكون سايق وداخل علي مطب مثلاً وبيهدي,
والعربية عال d وياخد المطب براحة ويجي يطلع بيلاقي العربية مش بتتحرك أكنها واخدة n
وتفضل العربية في الحالة دي شوية لحد ما يدوس بنزين وال rpm يعلي بعد كدا تاخد الأول برزعة وتكمل مشي عادي,,
فا دي بيكون في الأغلب سببها أيه.؟؟

ناس كتير بقت تتجه لتغيير الشنابر وأنت كنت قلت قبل كدا في موضوع أنو بيبقي أجتهاد من الميكانيكي سواء بتغير الشنابر او الأتنين سولونيد فالف لحل المشكلة,,
بس دا مش بيكون حل والمشكلة بترجع بعدها بفترة مش كبيرة أو ساعات حالة الفتيس بتسوء لو الشنابر متركبتيش صح,,
ودا حصلت مع ناس أعرفها شخصياً والعربية متحركتش بعد تغير الشنابر والفتيس أحتاج عمرة كاملة,,!

فا أخر حاجة عرفتها إن العيب مش بيكون من الشنابر, وبيكون من قربة الفتيس لأن بيكون خارج ضغط الزيت ضعيف منها,,
فأيه رأيك في الموضوع دا ؟؟

وفعلاً محدش بينضف الفالف بدي كويس ومجاري البساتم عشان النقلات تبقي أنعم,,
وأنا فعلاً حابب أشوف الفالف بدي بيتعمل أزاي,, ولو كان معاك هيبقي شرف كبير ليا. :-)

ياريت تعرفني ممكن أبقي أكلمك أزاي, وحضرتك موجود فين مركز خدمة أيه حالياً ؟

ازي حضرتك....فعلا لايمكن فك الفلتر الا بفك الفتيس من السيارة.....وفك الفارغه الاخيرة المرتبطه بالحدافه..وبعدها يمكن فك الفلتر ودي عمليه مش سهلة عشان كده اكثر الفنيين بيغير الفلتر مع العمره فقط......وهذا خلاف العديد من السيارات امثال الفولكس باسات والاوكتافيا والهيونداي النترا .والاوبترا ...حيث ان الفلتر يمكن تغيره بسهولة بمجرد فك كرتيرة الفتيس بدون فك كامل للفتيس من السيارة....
موضوع الشنابر...طبعا جيد ولكن اكثر مايحدث في السوق المصري ان يقوم الفني بتركيب شنبر حاكم للضغط في الديل-بس للاسف يتم تركيب شنبر مستعمل مما يتسبب في احكام الدائرةالزيت لفتره ثم يضعف الشنبر ويزداد الوضع سوءا.وتجد مع مرور الوقت الفتيس يقل عزمه مع السخونة....خاصة وان هذه الشنابر غير متوفرة جديده بشكل منفرد
قربة الفتيس وهي الجزء المسؤول عن نقل عزم المحرك للفتيس وهو جزء يتسع الي حوالي لتر وربع زيتمزود باويل سيل لحكم الزيت...وترس يركب علي زور الفتيس ممايتسبب في ادارته...وجود تلف في الاويل سيل يتسبب في ضعف عزم الفتيس وذلك للاخلال بالحفاظ علي الضغوط بداخله...اما تلف الترس ممكن يتسبب في عدوم تحرك السيارة بالكامل وذلك لان عزم المحرك لن يصل الي الفتيس....(زي اسطوانة الدبرياج التالفه)فتجد صوت عالي والسيارة لاتتحرك
.......................................
احب فقط اضيف بعض النقاط الهامه
ان ضغط الفتيس الطبيعي هو 2.7-3 بار........واي تهريب للزيت عن طريق الشنابر او الاويل سيلات او لزوجة سيئة للزيت ...او اي سدد في الفالف بدي او ضغط البلوف او تقل في البساتم اوسدد في الفلتر...يعمل علي ضعف الضغط مما يتسبب في عزم اضعف ونتشة ودبه بشكل ملحوظ
اسف للاطالة ولكني حاولت جاهدا الشرح بشكل مبسط