الموضوع: تعالوا نتعلم مع بعض إزاى نسوق العربيات ال cvt

أتكلمنا و أتكلم أعضاء أفاضل كتير عن طريقة عمل الفتيس ال CVT من الداخل و لا داعى للإعادة و عرفنا أنه طارتين ما بينهم سير منزلق و الطارات بتغير أقطارها علشان واحدة منهم تمثل الترس الصغير و التانيةتمثل الترس الكبير و بهذا تتحدد نسب التعشيق المختلفة....

* مميزاته:
- نسب التعشيق اللانهائية و ده بيطلع أحسن عزم للموتور عند النسبة المظبوطة
- الموتور مستريح و مش دايماً بيلف عند أقصى طاقة له
- توفير جيد للبنزين
- نقلات فى منتهى السلاسة

الجديد بأه اللى هنعرفه دلوقتى هى القيادة للمثلى لهذا الفتيس

طيب الطارات بتغير أقطارها جوه....بس محدش سأل إزاى ده بيحصل؟؟!!

لاحظ فى الفتيس الأوتوماتيك العادى أو المانيوال...بيكون عندنا تروس فعلية محددة القيمة....أما فى ال CVT مفيش قيم ثابتة و القيمة بتتحدد على حسب الموقف و دوسة البنزين بتاعتك و العزم اللى أنت عايزه من العربية



طبعاً باين من الصورة أن كل طارة هى عبارة عن مخروطين فى وش بعض.....لو قربنا المخروطين من بعض بيزيد قطر الطارة و لو بعدنا المخروطين بيقل قطر الطارة.....و هى دى الطريقة اللى الفتيس بيتحكم فيها فى نسب التعشيق.....

كل ده كلام قديم::: أحنا بقى المفروض نعمل أيه يعنى و لا نفهم أيه.....

هرجع و أقول....محدش قال لنا المخروطين بتوع كل طارة بيقربوا و يبعدوا عن بعض إزاى علشان يغيروا نسب التعشيق؟
طيب هما أمتى بيتغيروا أصلاً؟

الأجابة:

لما بندوس دواسة البنزين....يبقى أحنا عايزين تسارع.....يقوم الطارات يقربوا أو يبعدوا عن بعض علشان يحققوا النسب المطلوبة للتسارع المطلوب

الأهم هو كيفية تحرك المخروطين على كل طارة

* عن طريق مضخات زيت

و تم تعديل مضخات الزيت فى الجيل الحديث من ال XTRONIC CVT اللى موجود معانا فى عربياتنا ليكونوا أصغر حجماً و أعلى ضغطاً و هذا جعل عملية التغيير أسرع بمقدار 25% عن الأجيال السابقة و هو من شأنه تقليل زمن تعديل الطارات و تقليل إلى أبعد حد مشكلة ال RUBBER BAND EFFECT اللى كنا أتكلمنا عليها قبل كده و هى أنك لما تدوس بنزين جامد صوت الموتور بيعلى و عدد اللفات بيعلى و بعدين ال CVT يجمع معاك و تنطلق السيارة كالسهم

أستخدام مضخات الزيت الجديدة قلل من هذا الشعور جداً و كلنا خاسينه فى عربياتنا

نيجى بقى للأهم....نسوق إزاى؟

لما حضرتك بتدوس جامد على بدال البنزين....الموتور بيستجيب لحظياً و بيعلى صوته و عدد لفاته.....مشكلة الفتيس ال CVT أنه معندوش تروس ثابتة و لكنه بيحدد نسب تعشيقه على حسب دوستك و هنا تكمن مشكلة التأخير
طول ما أنت بتكبس طول ما هو بيغير بأستمرار لغاية لما يعرف قيمة العزم اللى أنت عايزه و ده اللى بيخليه يتأخر فى التقدير و التسارع....
يبقى الحل أن حضرتك تكبس و تثبت رجلك لحظياً....كده بتديله فرصة أنه يفهم بسرعة الموقف و يظبط نفسة و هتلاقى الموتور هدى و لفاته ارتاحت... و بعدين تكبس تانى يقوم يظبط نفسه تانى بناء على الكبسة الجديدة

يعنى بالبلدى بدل لما تنزل بدال البنزين للأخر فى كبسة واحدة و هنا الموتور هيعلى معاك دون أستجابة سريعة من الفتيس....لأ أكبس على مراحل علشان الفتيس يقدر يتابع معاك مراحل التسارع و تلاقى أستجابته أسرع و زمن تحضيره أقل مع طبعاً صوت موتور أهدى

يعنى بدل ما تخليه ينقل من الأول للسادس فى نفس واحد بفرض أنهم 6 نقلات (و هذا غير حقيقى و لكنه مثال فقط) و تخليه يتأخر لغاية لما يعدى على ال6 نقلات ورا بعض....لأ خليه يطلع للنقلة التالتة الأول عن طريق أول كبسة و بعدين منها للسادس عن طريق تانى كبسة
بكده هتلاقى صوت الموتور أنعم....عدد اللفات أقل.....أستجابة أسرع بكتير للفتيس

أرجو أنى أكون قدرت أوضح فكرتى

تحياتى للجميع