الموضوع: السيارة - أعطال وحلول

أنا راكب عربية
دا شئ جميل ..... جميل جدا
بس يا ترى العربية دي بتشتغل إزاي؟
بمعنى آخر إيه الحاجات اللي مينفعش العربية تدور من غيرها
ما أنا لازم على الأقل يبقى عندي فكرة
علشان لو رحت في يوم مشوار والعربية عطلت يبقى على الأقل عندي فكرة المشكلة إيه؟؟
وممكن أصلحها بنفسي ولا لأ...؟؟؟؟
هنحاول نمشي سوا خطوة خطوة على قد ما نعرف
أول حاجة لما تدخل العربية وتحط المفتاح في الكونتاك
لفيت المفتاح .............لمبات العدادات نورت
طيب نورت إزاي
البطارية هي مصدر الكهرباء في السيارة
الكهرباء تنتقل من خلال الكابلات مرورا بعلبة الفيوزات ثم تحملها أسلاك الضفيرة إلى كل مكان في السيارة
الكونتاك جايله كهرباء
المفتاح بتاع الكونتاك بيحرك أذرع توصيل في حاجة اسمها فبرة الكونتاك
http://img.findpart.org/images/1041/1041516.jpg
دي تحت الكونتاك
ولو خلعت الكونتاك ولفيت الحتة البيضا دي هتلاقي كأنك بتلف المفتاح بالظبط
طيب لو ما حصلش حاجة؟
أيوة .... محصلش حاجة
ولا حتى نور لمبات العدادات نورت
أول حاجة تعملها تنور الإضاءة الليلية
لو ما نورتش يبقى أول حاجة تشك فيها
كابل بطارية مخلوع ( أو البطارية اتسرقت)
مش ممكن تكون البطارية بايظة لدرجة انها ما تنورش لمبات العدادات إلا لو كنت راكن العربية لفترة طويلة أو البطارية اتكسرت
طيب الكابلات تمام
تاني حاجة أشك فيها هي علبة الفيوزات

ودي هنحتاج نقف معاها شوية
لازم يكون عندنا خبرة في اكتشاف الفيوز التالف وعمل الكباري
لإنك هتكتشف إن العربية وبالذات الموديلات الحديثة كل صغيرة وكبيرة فيها بتشتغل بالكهرباء ومن خلال فيوز
( المارش - الكونترول - طلمبة البنزين - التكييف - الأنوار - مراوح التبريد )
يعني فيوز ممكن يخلى العربية عذاب مش رفاهية
طيب نكتشف الفيوزات البايظة إزاي ....؟
الاول لازم نعرف إن الفيوز ده عبارة عن قطعة سلك
أيوة مظبوط
الفيوز عبارة عن قطعة سلك كل وظيفته توصيل الكهرباء
غاية الأمر إنه مصنوع بسمك معين بحيث لو مر خلاله كهرباء زيادة يسيح ويقطع
وحاجة تانية مهمة ..... كل الفيوزات بتاخد من موجب البطارية ( الكهرباء)
طيب أكتشف الفيوز البايظ إزاي
ممكن تخلع الفيوزات واحد واحد وتبص عليهم

أو ممكن تجيب لمبة صغيرة بسلكين ( ممكن تستعمل لمبة الصالون لغاية ما تخلص وتركبها تاني)
توصل سلك بالأرضي والتاني تمشي بيه على الفيوزات واحد واحد

شايف النقطتين المعدن اللي بيلمعوا على جوانب الكتابة ( رقم 10)
هتلمس عليهم
لو اللمبة نورت مع الجنبين يبقى الفيوز سليم
لو نورت مع جنب واحد يبقى الفيوز بايظ
هتشتاله من مكانه وتوصل حتة سلك بين رجليه وتحطه مكانه تاني
ويمكنك مراجعة هذا اللينك لمعرفة كيفية التصرف في هذه الحالة
http://www.nilemotors.net/Nile/419840-a.html
طيب لو طلع العيب من المارش
ممكن أكون مضطر إن اصلحه بنفسي
خصوصا لو العربية أتوماتيك يعني مش هتدور يالزق
طيب ايه بقى حكاية المارش ده
دي صورة المارش للي ميعرفوش

وده بيكون في الموتور من ناحية الرادياتير لو الموتور بالعرض وبيكون في الجنب اللي فيه البطارية لو الموتور بالطول
وبيكون واصل ليه كابل كهرباء من البطارية مباشر
أتخن سلك كهرباء في العربية بيكون واصل بين موجب البطارية والمارش
المارش ده عباره عن محرك كهربائي وكتاوت أتوماتيك (اللاقط) لتشغيله وتوصليه بترس الفلام
طيب ايه فايدة ده أو ده
المارش ده بيكون حصان ونص
ده معناه إنه بيسحب من البطارية حوالي 100 أمبير ساعة ما يدور
حصان القدرة = 735 وات
الوات = 1 فولت X 1 أمبير
1.5 حصان قدرة = 1100 وات
الفولت = 12 فولت
الامبير = 91 أمبير مستخدم لتشغيل المحرك
دا غير المستخدم لتشغيل اللاقط وباقي أجزاء السيارة كطلمبة البنزين ومنتجات الشرر وهي ضرورية لدوران المحرك
طيب نخلينا في المارش
دلوقتي عايزين مفتاح يتحمل 100 أمبير على الأقل
طيب هنجيب منين مفتاح يستحمل 100 أمبير؟
أو حتى كتاوت؟
طيب الحل
تم عمل مفتاح ميكانيكي يقوم بوظيفتين
الوظيفة الاولى
دفع ترس المارش ليقوم بعمل تعشيق للمارش مع الفلام
لأنه من غير المعقول أن يظل المارش متصلا بفلام السيارة وقت دورانها فيدور معها مما يؤدي لاستهلاك أجزائه كما أنه غير مصمم للدوران بسرعة عالية
الوظيفة الثانية هي توصيل الكهرباء إلى محرك المارش ليقوم بالدوران وتشغيل محرك السيارة
ويتم ذلك عن طريق غويشتين من النحاس يلمسو بعض وقت التدوير وينفصلوا بعدها
اللاقط ده عبارة عن ملف مغناطيسي لما توصله كهرباء يندفع محركا ترس المارش باتجاه الفلام ودافعا الغويشتن النحاس ليلمسو بعض فيقوم بتوصيل الكهرياء إلى المارش ليدور
الملف ده متصل طرف بجسم المارش ( الأرضى) وطرف بالسوكت اللي في ظهر المارش اللي بياخد كهرباء تبعا لحركة مفتاح الكونتاك
طيب لو المارش واصل ليه كهرباء بس ما بيدورش
يعني كل التوصيلات تمام وعرفنا إن العيب من المارش
إتأكد أولا من شحن البطارية
لإن ممكن أوي تكون البطارية ضعيفة ومش قادرة تشغل المارش حتي لو بتشغل كل انوار السيارة
ولعمل شاحن بسيط لبطارية السيارة
http://www.nilemotors.net/Nile/420206-a.html
طيب البطارية تمام والمارش مش بيدور؟؟
هتدر العربية زق لو مانوال
أما لو كانت أتوماتيك يبقى لازم المارش يتصلح
هتجيب كهربائي يخلص لك الموضوع
اما لو ...........................
عايز تحل الموضوع بنفسك؟؟؟؟
عادي بقا
الأول خد نفس عميق وتأكد أن عملك الذي ستقدم عليه له فوائد جمة
كفاية أوي عامل الخبرة المهم حيث سيكون لديك بعد ساعتين خبرة بأعطال المارش وكيفية علاجها
وهذا من أهم ما يكون فلربما صادفك شء من ذلك وأنت على طريق لا تجد فيه أحدا
وصدق إذ كنت يوما باولادي في المنصورة وبينما نحن عائدون والساعة حوالي 11 ليلا أبت السيارة أن تدور
ماذا افعل والوقت ليلا ومعي الأولاد وكانت نفس مشكلتك تماما قمت برفع السيارة وحل المارش ووجدت فعلا أن أحد اللحامات قد فك
أعمل إيه وإحن نص الليل
استلفت مفك رفيع من أحد محلات صيانة الموبايل وقمت بحشر ورق في داخل اللاقط ليحافظ على التوصيلة ودورت السيارة وروحت
الاوات المطلوبة ( مفتاح مقاش 13 جنب شرشر وجنب بلدي + مفتاح مقاس 8 جنب مشرشر وجنب بلدي + مكواة لحام كهربائي قدرة 120 وات أو أكبر + متر قصدير + لتر بنزين + فرشاة أسنان قديمة " لو مفيش قديمة هات جديدة وأمرك لله" + شحم)
طيب هنعمل إيه
هتلبس لبس شغل يعني أي ملابس قديمة "ولو مفيش قديمة البس أكتر طقم بتكرهه عادي يعني " بنص كم وحط القميص في البنطلون ( كلام سكتشف أهميته حين تتسخ يداك ولا تستطيع لمس جسمك ولا هدومك)
عرف حد من البيت إنك هتعمل شغل في العربية ( برده مهم جدا - لو إحتجت لشئ ضروري وناديت على حد يبقى عارف هيجيلك فين بدل ما يقعد يدور عليك وفيه أمور الثانية فيها بتعمل فرق كبير)
هتنزل ترفع العربية لأقصى مدى ممكن ( ترفع عجلة من قدام لآخر الكوريك وحط تحتها حاجة جامدة وثابتة وتروح ترفع العجلة اللي قدام التانية زيها وبدره تحط تحتها حاجة) ولا تعتمد على الكوريك في بقاء السيارة مرفوعة أبدا بل لا بد أن تعتمد على أجسام صلبة وثابتة ( قطعة خشب - حجر - طوب)
تشد فرامل اليد كويس وتدي العربية الباركينج لو أتو ماتيك أو الأول لو مانيوال
تحط طوب أمام وخلف العجل الخلفي
إشتال كابل البطارية
تجيب حاجة تفرشها تحت الاكصدام الأمامي
تنزل تفك المصفحة لو موجودة من قدام وتسيب مسمار واحد بس وا تهويه شوية
ودي المصفحة على جنب علشان تشوف شغلك
هتلاقي كابل جاي من البطارية واصل بمسمار نحاس بصمولة مقاس 13 فكه واشتال الكابل واربط الصمولة مكانها علشان مش تضيع
هتلاقي سلك واصل بكليبس هتشده (ده كان واصل لأتوماتيك المارش ( اللاقط)
الجسم اللي كان راكب فيه الكابل ده هوا المارش
هتلاقيه مربوط في جسم العربية بمسمارين أو 3 مقاس 13
هتفكهم
خد بالك أحيانا بيبقى المسمار له صمولة من ناحية الفتيس
هتمسك الصمولة بمفتاح وتفك بمفتاح
كده يبقى المارش معاك
خده وإجري بقى بعيد عن العربية واقعد في حتة نظيفة وظل وياريت تحت المروحة او في التكييف علشان تشتغل ببال رايق


هتلاقي المارش عبارة عن اسطوانتين لازقين في بعض زي ما شوفت في الصورة

الاسطوانة الصغيرة دي هى الأوتوماتيك ( اللاقط)
ودي صورته

طبعا انت فاكك صمولة مسمار من الاتنين قبل كده وخالع منها الكابل في العربية
دلوقتي هتفك التانية وتفك المجدول النحاس اللي واصل لجوه المارش
هتلاقي مسمارين صغيرين هتفكهم
وتشتال الوش ده بحرص
وتاخد بالك كويس
هتلاقي وردتين نحاس مكبرت وهتلاقي اسطوانة حديد وفيها مسمار وهتلاقي تحتها سوستة
هتمسك كل ده وتغسله كويس بالفرشاة والبنزين وتشيل الاوساخ اللي عليه
ده اسمه اتوماتيك المارش