إلى أبي الفداء ( د/محمد بنها) شاحن بطارية

**samaty** · 08-05-2014 12:57 AM

كتير مننا وخاصة أصحاب السيارات الأوتوماتيك بتقابلهم مواقف صعبة لو البطارية نامت
ما بتبقاش عارف تعمل إيه
العربية مينفعش تدور زق
طيب العمل إيه
أنا هشرح عمل شاحن بسيط جدا
طبعا دا شاحن للطوارئ بس
يعني مفيش أي أوبشن
لا فصل ذاتي ولا مبين شحن
بس الميزة فيه إنك هتعمله بايدك وبتكلفة بسيطة وممكن ترميه في شنطة العربية لو رحت المصيف والبطارية عملتها معاك تقدر تتصرف
أولا المكونات المطلوبة
1- محول كهربائي 12 فولت 3 أمبير أو 5 أمبير

2- دايود 6 أمبير

3- طقم مشبك بطارية

4- مترين سلك 1مم كل متر بلون
5- سلك كهرباء بفيشة ( الطول حسب رغبتك)
التوصيلات
المشابك بتاع البطارية هتشد البلاستيك لبرة وتوصل كل متر سلك بمشبك
وبكده يبقى عندنا سلكين كل واحد فيهم واصل بمشبك من ناحية ومن الناحية التانية مفيش حاجة
نيجي بقا للمحول
هنلاقي فيه سلكين لونهم أحمر خارجين من ناحية وسلكين أي لون تاني خارجين من الناحية التانية
السلكين اللي لونهم أحمر سمكهم اكبر من التانيين
السلكين الحمر بتوح المحول هنوصل واحد منهم مباشرة بالسلك اللي واصل بالمشبك الاسود
أما السلك التاني هنوصله بالدايود من الجهة اللي مفيهاش الخط الأبيض
والجهة اللي فيها الخط الابيض هنوصلها بالسلك اللي واصل بالمشبك الاحمر
أما السلكين التانيين اللي خارجين من المحول فدول هنوصلهم بالسلك اللي فيه فيشة

وبكده يبقى عندك شاحن بطارية
البطارية تنام منك أي وقت
توصلها تشحن
من غير ما تروح لحد
طبعا هتوصل المشبك الاحمر بموجب البطارية ( الكهرباء) والاسود بسالب البطارية ( الأرضي )
وتحط الفيشة في الكهرباء

**سيد الجندي** · 08-05-2014 01:37 AM

معلش على تكرار الصور
مستجد بقى نعمل ايه

**samaty** · 08-05-2014 01:38 AM

المشاركة الأصلية كتبت بواسطة سيد الجندي

سؤال بعد اذنك ياشيخ ابراهيم
هوه انت ليه حاطط دايود فرداني ؟ مش كده هايبقى نصف تقويم
مش لو حطينا قنطرة كاملة زي دي مثلا يبقى تقويم كامل

full wav

أولا أنا بدور على الأسهل في التوصيل
لكن انا ممكن أعمله من غير دايودات أصلا ولا بريدج وأعمله دايرة فصل بعد تمام الشحن لكن هل لو شرحت ده هيبقى في مقدور كل واحد إنه يعمله
ثانيا البريدج مش متوفر عند المحلات في الأرياف
ثالثا التوحيد النصفي معناه إن مع التحميل الطويل يظل المحول غير مجهد
رابعا الشحن النبضي أفضل للبطارية طالما لا يوجد دوائر حماية

و أخيرا لا تنسى اننا نتعامل مع أناس لا علاقة لهم بالالكترونيات

**samaty** · 08-05-2014 02:24 AM

المشاركة الأصلية كتبت بواسطة bestlove2

طب هل دلوقت ممكن اعمله لقطه للتدوير وبعدين اوصل البطارية للشحن على السيارة

سيدي الفاضل
مارش السيارة يلزمه تيار قدره حوالي 100 أمبير ليؤدي عمله في تدوير السيارة
الشاحن مثلا بيشحن البطارية بتيار قدره 1 أمبير لمدة ربع ساعة (900 ثانية)
علشان المارش يسحب 100 أمبير لمدة 9 ثواني يدور فيهم العربية

**samaty** · 08-05-2014 04:15 AM

المكثف عبارة عن لوحين يتم تخزين فرق الجهد بينهما
تقاس سعة المكثف بالفاراد
1 فاراد = اأمبير لمدة ثانية واحدة
ليس لدينا في مصر المكثفات هائلة السعة ( أكبر سعة مكثف شفتها في مصر كانت 82 مللي فاراد)
المكثفات ثمنها غالي جدا
المكثف 22 مللي فاراد تمنه 15 جنيه
علشان تدي المارش 10 ثواني ( دا بفرض إن العربية هتدور من اول تكه)
يلزمك مكثف بسعة 1000 فاراد
في الخارج يتم إجراء تجارب على استخدام المكثفات كبديل للبطاريات نظرا لأنها تقبل الشحن والتفريغ لعدد لا نهائي من المرات
بالاضافة للميزة الأهم وهي أنه مهما كبرت سعة المكثف بالامكان شحنه في ثانية واحدة بالكامل إذا وصل به تيار مناسب