رينو سانديرو ستيب واي - عيب تصنيع - تحذير - متشتريش العربيه دى

**mikazagreat** · 12-07-2014 05:02 PM

أنا عارف ان مصر بلد مفيهاش معنى لحمايه المستهلك و مفيهاش حاجه تجيب حقك من شركه مثلا بالقضاء ولا خبير يقدر يحدد عيب تصنيع فى العربيه فقررت ان انا احذر الناس من شراء العربيه دى و اقول لكل واحد اقدر اوصله القصه دى متشتريش العربيه دى ولا اى عربيه مغربى ولا كفته, العربيات دى مش بتتباع فى اوروبا ببساطه لأن مفيش حد هيأمن على نفسه فى عربيات زى دي.

انا عايش فى مدينه الغردقه من 6 شهور بعد ما كنت مسافر بره مصر حوالى سنه, لما رجعت اشتريت عربيه رينو سانديرو ستيب واي 2013 بعد التوصيات اللى سمعتها من ناس اصحابي.

فى الأول كنت شايف ان العربيه مش وحشه بألنسبه لسعرها و الناس بتقول ان العربيه توكيلها كويس, من 4 اسابيع فجأه التكييف بطل يشتغل, رحت مركز صيانه معتمد قالولى ان السربانتينه جت فيها طوبه علشان كده اتخرمت و هي بره الضمان, قلتله ماشى غير, 3000 جنيه شكرا سلام عليكوا.

و انا راجع من عندهم واخد نفس الطريق اللى بمشيه كل يوم بنفس السرعه بنفس كل حاجه, كل يوم باخد نفس الطريق مرتين على الأقل رايح راجع على بعد 2 كيلو من بيتنا, فى نفس الملف اليمين هو هواه بنفس الطريقه, فجأه و بدون اى مقدمات العربيه وشها اتحدف يمين كأني كسرت الدريكسيون على الأخر يمين و بقيت رايح اخبط فى الحيطه بتاعه البيت اللى على اليمين, كسرت الدريكسيون الناحيه التانيه على اخره العربيه عرضت فى الشارع و بقت ماشيه بتسحف حوالي 50 متر لحد مل الفرده اليمين خبطت فى رصيف عالى و العربيه وقفت.

المهما طبعا مع الخبطه انا اترميت من على الكرسى لأني مكنتش رابط حزام و الزجاج بتاع الباب اليمين اتكسر و شويه جروح و كدمات, المهم نزلت بصيت على العربيه كان الرجبه اليمين اللى اخدت الخبطه انكسرت, طلبت ونش, جه خد العربيه وداها مركز الصيانه, هوفرعليك ال 25 يوم اللى قضيتهم مع مركز الصيانه و هو بيطلب قطع الغيار من الشركه و تيجي متأخر و يطلع حاجه ناقصه و اشتمهم علشان يخلصوا و هحكيلك المفيد.

بعد ما كل حاجه فى الفرده اليمين اللى اتخبطت اتغيرت من كل ما تتخيل و حتى القنطره بتاعه العربيه ( كوبلن, بارات, مقص, بيضات, شمعدان طنابير, تيل) كل حاجه فى الركبه اليمين اتغيرت, و فاتوره ب 25 الف جنيه, اطلع اجرب العربيه مع المهندس بتاع مركز الصيانه و اكتشف ان العربيه مع اقل كسره فى الدريكسيون و انا ماشى على طريق عدل بتعمل نفس الحركه اللى عملتها فى الملف و بتحدف يمين لوحدها, العربيه فيها عيب في علبه الدريكسيون و مفيش Handling كأن الدريكسيون بيطلع امر غلط للعجل, و الأقى المهندس بيقولى اصل هنجيبلك علبه دريكسيون لو هي فعلا علبه دريكسيون, طبعا القصه دى لسه شغاله و انا قررت انى مش هدفع الفاتوره و هفضل وراهم لغايه لما اوصل لأخر القصه دي, انا مكنش عندي مشكله انى ادفع الفاتوره و اخلص نفسى بس طول ما كل شركه بتبيع زباله و الناس مبتعملش حاجه و تدفع و هي ساكته و مفيش رقابه البلد دي مش هتنفع, و فى نفس الوقت قلت احذر الناس من العربيه دي, لأن القصه دى لو كانت حصلت معايا على طريق سريع و كنت بجري اكتر كان ممكن تكون حادثه موت.

**kantofanto** · 12-07-2014 05:23 PM

حمد لله على السلامة و الحمد لله ان حضرتك بخير ، مكنتش اتوقع ان توكيل رينو يبقى كدا و المشكلة الاكبر انى اختى راحت حجزت عربية فى رينو ..ربنا يستر على العربية اللى حاجزتها لانها سانديروا برضوا.

**Omar2017** · 12-07-2014 06:27 PM

حمدا لله على سلامتك

**hilal** · 12-07-2014 07:00 PM

مشكلة مرعبة فعلا
شكرا على التحذير وربنا معاك للوصول الى حل

**wmn** · 12-07-2014 07:00 PM

هو أنا عموماً لاحظت في الستيب واي إن دركسيونها ناعم قوي بشكل مزعج ولازم تتحكم فيه كويس، وبصراحة بحس ان العربية مش موزونة كويس في الملفات خاصة مع السرعات ... وفي الطرق اللي مش متسفلتة كويس بلاقي الدركسيون بيتحرك يمين وشمال وده مزعج جداً برضو ... فمن الآخر يعني منصحش حد يجري بيها جامد ...
بس هو مش ضروري يكون العيب اللي عندك ده عيب تصنيع وفي كل العربيات، ممكن تكون علبة الدركسيون بتاعتك حصلها حاجة في الحادثة فعلا، للعلم انا كان معايا بيكانتو قعدت خمس سنين مفيهاش أي مشكلة، وفي يوم حصلي نفس الحادثة بتاعتك كده بالظبط وكان من ضمن الأضرار علبة الدركسيون بخلاف تغيير العفشة بالكامل ...
عموماً، ربنا يكون في عونك، بس انت بتقول 2013 وتصليح التكييف برة الضمان ازاي؟ انت كده مكملتش 3 سنين !

**mikazagreat** · 12-07-2014 08:35 PM

المشاركة الأصلية كتبت بواسطة wmn

هو أنا عموماً لاحظت في الستيب واي إن دركسيونها ناعم قوي بشكل مزعج ولازم تتحكم فيه كويس، وبصراحة بحس ان العربية مش موزونة كويس في الملفات خاصة مع السرعات ... وفي الطرق اللي مش متسفلتة كويس بلاقي الدركسيون بيتحرك يمين وشمال وده مزعج جداً برضو ... فمن الآخر يعني منصحش حد يجري بيها جامد ...
بس هو مش ضروري يكون العيب اللي عندك ده عيب تصنيع وفي كل العربيات، ممكن تكون علبة الدركسيون بتاعتك حصلها حاجة في الحادثة فعلا، للعلم انا كان معايا بيكانتو قعدت خمس سنين مفيهاش أي مشكلة، وفي يوم حصلي نفس الحادثة بتاعتك كده بالظبط وكان من ضمن الأضرار علبة الدركسيون بخلاف تغيير العفشة بالكامل ...
عموماً، ربنا يكون في عونك، بس انت بتقول 2013 وتصليح التكييف برة الضمان ازاي؟ انت كده مكملتش 3 سنين !

علبه الدريكسيون مكانها بعيد عن الحادثه, و انا بقيت شبه متأكد ان العربيه حصل فيها حاجه فى الملف, انا الأول فكرت ان فيه حاجه زحلقتنى فى الطريق و يومها رجعت اشوف مكان ما العربيه لفت مع نفسها ملقتش حاجه, و الطريقه اللى العربيه بتعوم بيها مش طبيعيه, اللى بيحصل على سبيل المثال ان مثلا لو انا فى طريق عدل و كسرت الدريكسيون حتى اصغر حاجه و لو حركه حتى متغيرش اتجاه العربيه, بتحدف كأنى كسرت جامد, بالظبط زى ما حصل وقت الحادثه.
السانديرو مش ناعمه قوي زى مانت بتقول كده, ده مش حقيقي, اصلا الدريكسيون بتاع العربيه يعتبر شبه تقيل. و الموضوع مش موضوع جري لأن العربيه عملت كده و انا ماشى 80!

تكييف بره الضمان علشان قالك دى طوبه خبطت فى السربنتينه خرمتها

**eleanor** · 12-07-2014 08:40 PM

الحمد لله انك بخير وربنا يستر طريقك
الواخد مش عارف العربيات الجديده دى مالها

**عمرو مجايفر** · 12-07-2014 09:40 PM

الف سلامة يا ريس .. المهم انك بخير .. بس عليك وعلى حماية المستهلك .. هيقرفوك اة بس اهو تطلع بأى حاجة احسن متدفعلهم تمن عيب تصنيعهم

**kokowasfy** · 12-07-2014 11:13 PM

الحمد للة انك بخير بس دى مشكلة فردية مش عيب صناعة فى كل الموديلات !@!

الموضوع: رينو سانديرو ستيب واي - عيب تصنيع - تحذير - متشتريش العربيه دى

LinkBack

أدوات الموضوع

عرض

-

-

-

-

المواضيع المتشابهه

تسعير رينو سانديرو ستيب واي كسر زيرو 2013

معلومات عن رينو سانديرو ستيب واي

رينو سانديرو ستيب واي وفيات بونتو إيفو و اوبيل كورسا

رينو لوجان بلاك لاين والا سانديرو ستيب واى

فيديو مراحل تصنيع رينو سانديرو

الكلمات الدلالية لهذا الموضوع

المفضلات

المفضلات

ضوابط المشاركة