الموضوع: طلب مساعدة من استاذنا الكبير والمخضرم المهندس احمد البرعى

أنا آسف جدا جدا جدا على تأخير الرد.. أنا لسه شايف الموضوع حالا.. ورسالة حضرتك على الخاص وصلتني وفتحتها فعلا بس ما كانش عندي وقت أرد ساعتها.

باعتذر مرة تانية وأرجو إنك تقبل اعتذاري.



مبدئيا.. أنا مش عارف إزاي التوكيل يحط زيت مخالف لتوصيات الكتالوج!!!!

مش هقول معدني ولا تخليقي.. إنما اختلاف شديد في اللزوجة بالطريقة دي.. الحقيقة الموضوع ده عليه علامات استفهام كبيرة عن مصداقية التوكيل ومدى احترافية اللي شغالين فيه أو القائمين عليه.


طيب.. نيجي للمفيد..

الكتالوج بيمنع صراحة استخدام أي لزوجة غير 5W-30 ... مش كده وبس.. ده قايل كمان "ما تستخدمش لزوجة 20W-50 أو 10W-40" كده بالنص.

وكمان بيطلب إن الزيت يكون مطابق لمواصفة جنرال موتورز رقم GM6094M.. وبعد شوية مراجعة وتأكد على النت.. قدرت أعرف إن المواصفة دي تكافئ كود الـ SL في الـAPI.


دي وصلة كتالوج الآفيو 2008 على النت

http://www.chevrolet.com/content/dam...veo_owners.pdf

وصفحة الزيت رقمها 15-5



عموما.. رأيي إن حضرتك تحط 5W-30 المرة الجاية.. بس لازم نتابع استهلاك الزيت بدقة..

يعني كل أسبوع تشوف هل فيه نقص ولا لأ..

وما تنساش تتابع صوت الموتور في بداية التشغيل بالذات.


أنا قلقي كله إن الموتور ممكن يكون اتضرر نتيجة استخدام لزوجة 20W-50.



...

المشاركة الأصلية كتبت بواسطة mohamedibk

شكرك جدا جدا على ذوقك الجميل وسيادتك ماتاخرتش ولا حاجة يابشمهندس
وانا حبعتلك صورة الكتلوج العربى بتاعى الذى يوصى باستخدام المواصفة 5w30 او10w30على اساس ان السيارة تجميع مصرى فنلاقى نقيض او اختلاف بينه وبين الكتاولوج الانجليزى الذى لم يسلم لى على اساس انه للسيارات الخاصة بدول اخرى مع ان الكتلوج العربي مش ذكر اى حاجة عن المواصفة 20w50 او 10w40 والتى يحذر استخدامها الكتلوج الانجليزى الموجود على موقع شيفرولية وانا والعربية مستريحين مع شل الترا فى مثلاً صوت الماتور هادى واستهلاك البنزين افضل مفيش نقص فى الزيت بخلاف ذلك لايوجد اي مشكلة ماعدا ان جوان التاكيهات كان بدا بتسريب الزيت اول ما انا اقلت اقلب الى الزيت التخليقى وتم حلها واصبحت الامور على مايرام
لان كل الناس التى تعمل فى مجال بيع وتغيير الزيوت تنصحنى بالمواظبة على المواصفة 5w40 التى ماشى عليها حتى الان بما فيهم موزعين زيوت ليكوى مولى ووليفر والخ
علماً بان مهندس ميكانيكا فى التوكيل قالى ان ماكينة الافيو ذات الماتور 1500cc والواحد كامة والتى تعادل ماكينة الاسترا 2004 لن يكون مناسب لها المواصفة 5w30 وكأنى بارمى فلوسى فى الارض
فبرضى شوف لى الامور كيف تسار من حيث الصح عشان اصبحت محير ومشتت

والله أنا كمان بقيت متحير من الناس اللي شغالين في التوكيلات دي.

طيب .. خليني ساكت


المهم...

حضرتك ممكن فعلا تحط لزوجة 5w-40.. بس بشرط

إن الزيت يكون مكتوب في صفحته على النت أو في البرشور بتاعه إنه ممكن يستخدم بدل لزوجة 5W-30

وفعلا.. كنت أحيانا بدخل على صفحات لبعض الزيوت وألاقي توصية زي كده عليها.

إنما لو ما كانش مكتوب حاجة زي كده.. ما أنصحكش.


...

المشاركة الأصلية كتبت بواسطة mohamedibk

بص بقى يا بشمهندس وسيادتك احكم فى الحتى ديه من فضلك
ماتور عربيتى الافيو هو نفس ماتور الدايو الانوس 1500سي سي
وادى نسخة من كتالوج الزيت الذى ممكن يتحط فى ماتور الدايو اللانوس


وشكراً

أنا دخلت مخصوص على ويكيبيديا علشان أجيب قرار الموتور ده.. ولقيت فعلا إنه هو نفسه اللي محطوط في العربيتين.

موضوع محير فعلا !!


طيب.. بس من معلوماتي السابقة.. شركات السيارات بتعمل تعديلات على مواتيرها كل فترة... ويجوز التعديلات ما نحسش بيها..

أنا طبعا معرفش تفاصيل كل السيارات ولا المحركات.. وبالتالي مقدرش أديلك رأي نهائي بالنسبة للموضوع ده.


ما قدمناش غير حل من اتنين:

1- نفترض إن مفيش فرق بين الموتورين نهائيا.. وإن شيفروليه عاملة موضوع تحديد الزيت ده كناحية تسويقية للمستخدم علشان يحس إنه معاه عربية بتكنولوجيا عالية عايزة زيت متقدم..

وفيه احتمال إن شيفروليه تكون عاملة الموضوع ده كمان علشان العربية تبقى متوافقة مع القوانين الأمريكية بتاعت انبعاثات العادم وتقليل استهلاك البنزين.

في الحالة دي اللي يمشي على اللانوس يمشي على الآفيو... مع الأخذ في الاعتبار إن استهلاك البنزين احتمال يزيد شوية.


أو

2- نفترض إن فعلا فيه فرق بين الموتورين.. وإن كتالوج الآفيو صحيح ..

في الحالة دي لازم ألتزم بالمكتوب في كتالوج الآفيو..


والخيار لحضرتك في الآخر.


...