الموضوع: طلب مساعدة من استاذنا الكبير والمخضرم المهندس احمد البرعى

المشاركة الأصلية كتبت بواسطة mohamedibk

إلى زميلنا العزيز والاخ الفاضل / المهندس احمد البرعى
بعد التحية ,,,,
احنا كنا تنقشنا فى اول المشاركة حول موضوع اللزوجة المناسبة لزيت السيارات الافيو وحضرتك قلت ان الكتالوج هو المرجع الاساسى والذى مكتوب فيه ان اللزوجة 5-w30 او 10-w30 افضل حاجة لتلك السيارة تمام ياهندسة ده مانيوال العربية وانا مشير فى اول المشاركات فى السابق الكلام ده للاسترجاع
تعالى فى الحتة دية التوكيل بتاع منصور بيه شيفروليه بيحط موبيل ون 5-w50 كتخليقى او اتش اكس بي المعدنى على اساس ان دول مناسبين للافيو وبينصح بيهم وهذا الكلام بينفذ هنا فى توكيل العامرية بمحافظة الاسكندرية ومن خلال الصيانات التى تمت للعربية كانوا بيحطوا اتش اكس بي على اساس زيت مسموح به وفقاً لركومندد الوارد لهم بمستند رسمى من شركة جى ام بينما اللزوجة الموجودة فى مانيوال السيارة 5-w30 تستخدام فى المواتير ذات التكنولوجى العالى فى حين حضرتك لو دخلت على موقع موبيل ون ايجبت للزيوت التخليقية حتلاقى ان هناك 3 درجات من الزيوت التخليقية كالاتى :-
لزوجة 0-w40 و تستخدم لمعظم سيارات الشيفرولية والافيو ذات الماتور 1.2 LS اما اللزوجة 5-w30 و 5-w50 فتستخدم لماركات سيارات اخرى
الخلاصة ان مهندسى الصيانة لتوكيل منصور متفقين ومصممين ان اللزوجة 5-w30 غيرمناسبة فى ماتور الافيو على اساس ان امكانيته هى نفس ماتور اللانوس . وبالتالى تلك اللزوجة حرام تتحط فى ماتور زى الافيو ومش بتعمل اي حاجة له
فياريت نفتح تانى دكان المناقشة علشان انا بستخدم زيت شل الترا 5-w40 وبقالى سنتين ومستريح معاه جداً ومفيش مشكلة منه ولا نقص ولا الكلام ده وانا لما كان التوكيل بيحط اتش اكس بي كان صوت الماتور وحش وعالى كأن فى صوت خشن .
فعندك 4 اراء فى الموضوع ده
1-المانيول بيستخدم لزوجة 5-w30
2-التوكيل بيستخدم لزوجة 5-w50
3-موبيل ايجبت بتستخدم لزوجة 0-w40
4- انا بستخدم شل لزوجة 5-w40
فشوف لنا حل للمشكلة دية ومتسبناش من غير الاجابة النموذجية

طيب... علشان نحل الموضوع ده يبقى لازم نقر إن موتور الأفيو هو موتور اللانوس... والتوكيل بيتعامل من المنطلق ده، وأكيد المستند اللي بيعتمدوا عليه مبني على الجزئية دي.

وأنا دورت تاني في النت عن الموتور ده.. وعرفت إن تصميمه قديم (1982)، وده معناه إنه مش محتاج مواصفات عالية للزيوت.
https://en.wikipedia.org/wiki/GM_Family_1_engine#E-TEC

يبقى في الحالة دي هنرجع لصفحة الزيوت من كتالوج اللانوس:




خلي بالك إن الكتالوج هنا مقسم لزوجة الزيوت (في الرسم البياني للزوجة) حسب نوعية الزيت

القسم A ده للزيوت مفردة اللزوجة... وده مش هنستخدمه

القسم B للزيوت متعددة اللزوجة المعدنية... وده ينطبق عليه زيت زي XHP اللي بيتحط في التوكيل، غير 6 درجات لزوجة تانية.

القسم C للزيوت التخليقية... وهتلاقي فيه درجات لزوجة كتير .. منها الـ5W-30 والـ10W-30 اللي في كتالوج الأفيو، وكمان فيهم لزوجة 10W-40 والـ5W-40 (اللي حضرتك بتستخدمه)، وآخر حاجة لزوجة 5W-50 (اللي التوكيل بيستخدمها)


علشان كده بقول إن كتالوج اللانوس مريح جدا ... ومعظم درجات اللزوجة في السوق تشتغل.. وده يمكن اللي عامل لخبطة لناس كتير .

وبالتالي مفيش حد غلط !!!


يفضلنا لزوجة 0W-40 اللي حضرتك شفتها على موقع موبيل 1 المصري، والموقع بيقول إن الزيت مطابق لمواصفات جنرال موتورز (وكاتب أرقام المواصفات)... وده شيء كويس جدا...

بس سؤال ...

هو فيه أي كتالوج من الكتالوجات بتاعت اللانوس أو الأفيو كاتب إن الزيت لازم يبقى مطابق للمواصفات دي؟

على حسب ما أنا شايف في الصفحات المرفقة..... لأ.

يبقى الزيت ده مش هبصله على أساس إنه مفضل عن غيره... بالعكس.. ده ما ينفعناش علشان اللزوجة مش هي المطلوبة.



نيجي بقى لرأي مهندسي التوكيل من ناحية إن "تلك اللزوجة حرام تتحط فى ماتور زى الافيو ومش بتعمل اي حاجة له"...

هما طبعا بيبصوا للموتور نظرة متجردة على أساس إنه موتور زي كل المواتير اللي زيه.. على عكسنا إحنا اللي بنبص للعربية على إنها شيء غالي يجب المحافظة عليه.

بس خلي بالك إن اللانوس والأفيو يعتبروا سيارات اقتصادية في المقام الأول... وبالتالي مش المفترض فيها إن متطلباتها تكون عالية.. علشان كده بيبقى فيه تساهل من ناحية نوعية الزيوت خصوصا إن موتورها يعتبر قديم من الناحية التصميمية والتكنولوجية.

عايز رأيي... هما عندهم حق.. لإن العربية مهما حافظت عليها.. بيبقى ليها عمر افتراضي اللي بعده بتلاقي نفسك بتصرف كتير على حاجة قديمة والمردود منها مش كبير زي ما كانت العربية جديدة أو لسه بحالتها.


ملخص الكلام...

تقدر حضرتك تحط أي زيت من الموجودين في كتالوج اللانوس ... ويفضل التخليقي طبعا.. سواء 5W-40 اللي حضرتك متعود عليه أو 5W-50 اللي التوكيل بيستخدمه...

بس الأهم.. تثبت على واحد فيهم.. وتثبت الماركة كمان.



...

المشاركة الأصلية كتبت بواسطة amrelzawawy

سؤال لاستشارى الزيوت فى ليه نصحت انه يثبت على النوع رغم انه ممكن تكون المواصفات واحده يعنى مثلا 5w40 api sn acea a3b4 هل فى ضرر من مجرد تغيير براند

أيوه ممكن يكون فيه ضرر... وده بسبب اختلاف أنواع الإضافات اللي ممكن تكون مضافة لكل زيت.

احنا لما بنيجي نغير الزيت .. بنفك الطبة وننزله (أو بنعمل شفط).. بس بتفضل نسبة بسيطة موجودة في الموتور وعلى الأجزاء الداخلية..

وبعدين نحط الزيت الجديد.. فممكن الإضافات اللي في بواقي الزيت القديم تتفاعل مع الزيت الجديد وتقلل من خواص الإضافات الموجودة فيه.

المشكلة الأساسية إن نوعية الإضافات المستخدمة في كل شركة مش معروفة بالتحديد.. وما نقدرش نعرف إذا حطينا ماركة زيت وغيرنا بعد كده هيتفاعلوا مع بعض إزاي!!!

ده نفس المبدأ اللي بنرفض بيه خلط الزيوت.


وبالتالي .. يفضل إني أثبت على نوع واحد (أو شركة واحدة) علشان لو غيرت .. الإضافات ما تتفاعلش مع بعض بصورة "احتمال" تكون سلبية

المشاركة رقم 3 من الموضوع ده فيها تفاصيل أكتر عن موضوع الإضافات:
http://www.nilemotors.net/Nile/341680-a.html


...