مقبل على شراء الصني ، اكمل ولا بلاش ، انصحوني ؟

**A_H_M_A_D** · 13-08-2015 08:43 PM

نيسان عامله اوفر حلو على الصني الاوتوماتيك اليومين دول ، وده خلاني افكر جدياً ان اجيبها خصوصا انها في دماغي من زمان بس المشكلة لقيت تعليقات على صفحتهم على ال Facebook كلها شتايم في العربيه بصراحة قلقتني منها جامد
الفرامل فيها مشاكل ، الصاج ضعيف جدا و بيطبق من اقل حاجه ، التيل بيصفر ، الطنابير اي كلام ، التكييف ضعيف

دي بعض من العيوب اللي الناس قالتها وخلتني اقلق ، قلت مفيش غير نايل موتورز اللي هايدلوني على المفيد
هي فعلا العربيه وحشه كده ولا الناس دي بتبالغ
واكمل واحجز واشتري والحق العرض ولا اصرف نظر واشوف نوع تاني حتى لو مستعمل بنفس المبلغ

انصحوني يا اهل الخبره ، خصوصا اللي معاه الشكل الجديد يقولي رأيه بحياديه

**hugan** · 13-08-2015 08:55 PM

عامه
هي اﻻكثر مبيعا وانتشارا في فئتها بلا منافس
حتي الشكل الجديد غرق الشارع في وقت قياسي
اكيد مش من فراغ

**A_H_M_A_D** · 13-08-2015 09:07 PM

المشاركة الأصلية كتبت بواسطة hugan

عامه
هي اﻻكثر مبيعا وانتشارا في فئتها بلا منافس
حتي الشكل الجديد غرق الشارع في وقت قياسي
اكيد مش من فراغ

الانتشار ده اعتقد سببه سعرها المهاود ، والشكل الجديد حلو قوي بالنسبة لبقية العربيات اللي في نفس السعر
بالاضافه انها عربية يابانية الاصل ، والموتور بتاعها ياباني

**A.Saad** · 13-08-2015 10:38 PM

فرامل كلها مشاكل
ابعد عنها

**A_H_M_A_D** · 14-08-2015 01:05 AM

المشاركة الأصلية كتبت بواسطة yehya badr

1) مفيش مالك للصني الجديدة أعرفه و إلا لعن اليوم اللي جابها فيه كلها مشاكل !!! حتي برة مصر كل مجلات السيارات المحترمة مديهيا تقييم زي الزفت !!
2) الموتور مش ياباني و لا الفتيس دول بقوا هندي !!!
3) خاماتها ردئية

دور علي الشكل القديم أو أصرف نطر خلاص و سيبك من موضوع الأنشار الناس في مصر لسة ما عنداهش تقافة البحث عن المعلومة قبل الشراء !!!

بالنسبة لموضوع الموتور انا سألت مهندس شغال في المصنع نفسه وأكدلي ان الموتور ياباني والفتيس فرنساوي ، وقالي فعلا فيه اجزاء بتيجي من الهند لكن الموتور والفتيس مش من ضمنها

بالنسبة للشكل القديم لقيته بيتباع اغلى من الجديد ب ١٠ تلاف جنيه ، وده شئ مش منطقي ابدا وسرقة

**A_H_M_A_D** · 14-08-2015 01:16 AM

المشاركة الأصلية كتبت بواسطة a.saad

فرامل كلها مشاكل
ابعد عنها

المفروض انهم تلافوا مشكلة الفرامل دي في الموديل الجديد، لان انا اعرف ان موديل ٢٠١٢ و ٢٠١٣ هم اللي فيهم المشكلة وحصلهم استدعاء
لو معلوماتي غلط ياريت حد يصلحلي

**Yehya Badr** · 14-08-2015 01:30 AM

المشاركة الأصلية كتبت بواسطة a_h_m_a_d

بالنسبة لموضوع الموتور انا سألت مهندس شغال في المصنع نفسه وأكدلي ان الموتور ياباني والفتيس فرنساوي ، وقالي فعلا فيه اجزاء بتيجي من الهند لكن الموتور والفتيس مش من ضمنها

بالنسبة للشكل القديم لقيته بيتباع اغلى من الجديد ب ١٠ تلاف جنيه ، وده شئ مش منطقي ابدا وسرقة

بسيطة هات الvin h أو رقم الموتور و حتعرف بلد المنشأ !!! و الجديد موضوع الفتيس الفرنساوى أحسن يكون بتاع اللوجان !!!! ما هو نسيان و رينو متحالفين !!!

**A_H_M_A_D** · 15-08-2015 07:14 PM

يا جماعه فين تفاعل مالكي الصني ، انا حاسس انهم ملتزمين الصمت
النهارده قابلت واحد في الشارع معرفوش لقيته نازل من صني ، شاب صغير وقفته وسألته عن رأيه في العربيه
قالي ان العربيه بقالها معاه سنتين وعمل بيها ٥٢ الف كيلو ، وفي خلال الفتره ديه كان مبسوط بيها ، عيوبها في نظره الاتزان ضعيف مع السرعه ، والتيل بيتاكل بسرعه ويصفر ، غير كده هي مضيقتوش في حاجه