الموضوع: تقريري عن البيجو 301 منذ البحث والشراء الى 1500 كيلو

السلام عليكم

بعد البحث اللي استمر لمدة شهرين عن عربية زيرو محترمة
ربنا وفقني واتعرفت على البيجو 301
انا في الاول كنت راكب عربية فيرنا 2006 مانيول

رحت اتفرجت على العربية ، بسم الله ما شاء الله فعلا عربية شيك من بره ومن جوا
المهم اشتريت فوري دفع واستلام من معرض ، واستلمت العربية لون بترولي 2016 اوتوماتيك بيزلاين
تمنها 124000

المهم، خدت العربية من المعرض ومشيت بيها ، للاسف كان مفهاش بنزين ، بالعافية وصلت لحد المحطة ، قراية العداد كانت 45 كيلو ، كتير شوية بس طبعا ده العادي من المعارض عشان بينقلوا العربية من المخزن الى المشتري

خدت العربية ومشيت بيها طبعا الاحداثيات اتغيرت تماما عن الفيرنا ، وكنت حاسس اني مش عارف اولها من اخرها ، وموضوع الاوتوماتيك كنت لسه مش واخد عليه . رحت البنزينة وفولت ب127 جنيه حوالي 48 لتر
اللمبة بتاعت البنزين كانت منورة طبعا لما خدتها من المعرض. وضبطت ضغط الكاوتش على 32 زي ما قايم العربية بيقول.

انا طبيعة مشاويري مختلطة اوي ، يعني بروح الصبح من الجيزة لحد اكتوبر ، باستخدم الدائري والواحات ، وكمان وانا مروح بستخدم محور 26 يوليو ، وصفط اللبن ، وفي نفس الوقت بالليل بمشي جوا البلد كتير

العربية اداءها جميل جدا بشكل عام

1- كرسي العربية محتاج يتظبط كويس على وضع انت تستريح له وبعد كده السواقة مش هتبقى متعبة ، انا قعدت في العربية سايق متواصل ساعتين جوا البلد مع الزحمة وكده والحمد لله قمت مش تعبان خالص ، بعكس الفيرنا كنت ببقى هموت.

2- المرايات والمقاسات كلها تمام ولو اني ما زلت لحد دلوقتي بردو مش متعود على المقاسات ولكن مش مسببة لي مشكلة طول مانا حريص ومش بخمن.

3- الفرامل : بسم الله ما شاء الله فرامل محترمة بجد ، لا تعليق عليها.

4- الجير : الجير نقلاته ناعمة والنقلة بين الاول والتاني مش شايف فيها مشكلة ، ولكن مشكلة الجير اللي انا شايفها انه ساعات بيفكر كتير ، يعني بيبقى محتار ينقل من فين لفين ، وبواجه المشكلة دي في مطالع ومنازل الكباري لو الدنيا زحمة ، زي مثلا طلعة وصلة المريوطية على الدائري اللي نازل على الرماية ، الجير مش بيبقى عارف يسقط غيار والا يرفع غيار وده بيؤدي الى ان في الغالب يسقط غيار بدون داعي ويفضل ماشي شوية والRPM على 3 وبيخلي صوت الموتور عالي شوية وده بيبقى رخم بالنسبة لي. نفس الكلام في المنازل ممكن يتاخر في التغيير .
طبعا بحكم اني بروح اكتوبر كتير ، المطبات في اكتوبر بالهبل ، ميزة الجير انك لما تيجي تفرمل بيسقط غيارات وانت بتفرمل وبالتالي الفرامل بتبقى اقوى ، والنقلات ناعمة وفي صوت بسمعه مع تسقيط النقلات من الموتور عامل زي ونة كده ، بس ناعم خالص وصوت جميل بصراحة
حركة الفتيس سهلة وسلسة
استخدمت نظام ال Steptronic كتجربة ومفيش فيه مشاكل
استخدمت نظام ال Snow ايام المطر اللي فاتت كتجربة بردو مع اني مش محتاجه اوي بس كان كويس
نظام ال Sport مجربتوش غير مرة واحدة وانا على مضض لاني مبحبش اضغط على العربية خالص.
بصراحة الجير بيفهم اني عايز اتجاوز حد معين ، فلما بضغط بقوة شوية على البنزين بيسقط غيار ويدي تسارع اكبر ، ودي حاجة حلوة.

5- صوت الموتور ناعم وهادي ولكن باتضايق لما ابقى على سرعة هادية والجير يفكر فيقوم مسقط غير والRPM يعلى يقوم صوت الموتور يعلى من غير لازمة ، وعلى حسب كلام الزملاء ان المشكلة دي هتتعدل ان شاء الله في الصيانة لما انزل الsoftware .
على سرعة 110 فعلا مش باخد بالي اني وصلت للسرعة دي ، ببقى فاكر اني اقل من كده
فوق ال110 ، ببدأ اخد بالي ، وصوت الموتور مش بيبدا يضايقني غير عند ال130 ، وفعلا لو مشغل الكاسيت مش هتسمعه اساسا.
الRPM عند سرعة 120 لا يزيد عن 3.5 ودي حاجة كويسة

6- عزل العربية عن الصوت الخارجي فعلا فرق عن الفيرنا كتير ، عزل الصوت نسبته عالية وعزل الحرارة كمان
ولو اني عندي ملحوظة بسيطة بس مش دائمة اني على سرعات عالية بسمع صوت هواء بسيط من الباب اللي جنبي على طول ، بس مش لدرجة الازعاج.

7- التكييف حضرت بالعربية فترة الحرارة كانت فيها 38 ، والتكييف جميل مفيش عليه اي تعليق ، شغلته على 2 وبعد ما بردت العربية نزلته على 1 ، ومعنديش ملاحظات على التكييف بالمرة .

8- استهلاك البنزين: العربية فيها كمبيوتر في العدادات بيقول متوسط استهلاك البنزين ، وانا متابع الموضوع ده بدقة شديدة من ساعة استلام العربية

قبل 1000 كيلو:
متوسط 12 لتر لكل 100 كيلو داخل البلد
متوسط 9 لتر لكل 100 طرق سريعة

بعد 1000 كيلو:
متوسط 10 لتر لكل 100 كيلو داخل البلد
متوسط 5.5 لتر لكل 100 كيلو طرق سريعة بدون تكييف لان الجو برد الفترة دي ، فعلا 5.5 لتر بدون مبالغة ، ومتوسط سرعتي على الطرق السريعة 100.
متوسط 8.5 لنر لكل 100 كيلو طرق مختلطة .

9- عفشة العربية نوعا ما ناشفة ، وخصوصا اني زابط الكوتش على 32 زي ما قال الكتاب ، في ناس بتقول لو نزلته 30 هتبقى العفشة انعم ولكن انا ميهمنيش العفشة قد ما يهمني الفرامل واستهلاك البنزين وسلامة الاطارات.

10- الاضاءة الامامية فعلا روعة ، بتفرش حلو .
11- الراديو سماعتين فقط امامي عشان انا بيزلاين ، كان فعلا عايزالها سماعتين ورا وتبقى تمام بس مش مهم اوي.
12- باور الدركسيون ، ناعم وانت واقف ، تقيل وانت ماشي بيديك ثبات حلو.
13- ثبات العربية ممتاز لحد ما جربت 130 ، مفيش مشاكل بالنسبة لي ، راسية وثابتة وتجاوز من حارة لحارة مفيش اي مشاكل. عكس الفيرنا تماما
14- التسارع مفهوش مشاكل بس انا مش بحب اقرص على العربية.
15- مش عايز اتكلم بقى عن وسع العربية من جوا لان فعلا ده محدش يقدر يختلف عليه ، انا طويل وقعدت ورا والكرسي الامامي كان مزبوط ومكنتش متضايق خالص ، وشنطة العربية واسعة .


لو يرجع بيا الزمن ، هشتريها بردو ، لانها عربية جميلة فعلا ، ربنا يبارك فيها.
ولو حد هيسالني على عربية في رينج السعر ده ، هنصجه بيها طبعا.

الله يبارك فيك استاذ عمرو
مقلتلناش على تقريرك انت؟