الموضوع: تقريري عن الصنى ex الشكل القديم 2013 بعد الالف كيلو

بسم الله الرحمن الرحيم

طبعا قبل اي حاجة لازم اشكر الناس اللى هنا في قسم نيسان لانهم ساعدوني كتير اخد القرار السليم

وابقى نيساناوي وافتخر .

الحقيقة الموضوع مكنش سهل انك تختار عربية حاليا بسبب انت عاوز كل حاجة فى العربية اللى هتركبها وبردوا تدفع اقل سعر ممكن او نقول تكون فى حدود الفلوس اللى تقدر تدفعها

عشان كده لقيت ان انسب حاجة حاليا اختار النيسان وده بصراحة كان وانا باشتري بعد مقارنات كتير بينها وبين اللوجان والجين تو واليرسونا والافيو " كل ده اتوماتيك طبعا " وبردوا الصني الشكل الجديد

طبعا في حاجات طلعت من المقارنة بسبب السعر الاكسنت والكيا .

استقريت وعزمت واخترت الشكل القديم ex من سمير ريان وفضلتوا عن القديم لكذا سبب:-
1/ العربية بقالها كذا سنة فى الشارع فخلاص اتحفظت واتهرست وعيوبها ومميزاتها بانو,
2/ الصاج بتاعها فارق جدا عن صاج الجديدة وده ملحوظ جدا ودي نقطة مهمة فى مصر
3/ الشكل بصراحة مش قادر استوعب شكل الجديدة خالص لامن ظهرها ولا جنبها ولا الصالون من جوة وخصوصا بكر التكييف وشكل الفتيس ولا حتى شكل العدادات .
4/ موضوع الوسع من جوة مش فارق معايا خالص انا 165 سم يعنى باقعد فوق الطارة اصلا وطبعا المدام والولاد كده .
5/ بالنسبة للاي بي اس والاير باج وebd اه وسائل امان جميلة بس انا مش بازود عن 100 وانا مسافر صحراوي اصلا فما بالك بوسط البلد .
6/ استهلاك البنزين انا كنت راكب مستعمل قبل كده 1600 بردوا فاكيد هاحس بفرق بين الزيرو والمستعمل .
7 / الموتور بصراحة حتة ان الموتور اللى فى الجديدة اجزاؤه ياباني تجميع وتقفيل هندي مش عارف مش ريحتني زي الموتور اللى بييجي كلوا فى القديمة من اليابان " وده على ما فهمت من المواضيع الموجودة فى القسم "
8/ العربيةا لقديمة شوفوا كل الاشكال اللى فى الشارع والموديلات القديمة تلاقيها ماسكة نفسها كده مش زي عربيات كتير تلاقيها مدهولة " طبعا حسب الاعتناء " بس بشكل عام ماسكة نفسها .

نيجي بقى للمشي والتليين " :-

عملت مشوارين واحد اسماعيلية وواحد اسكندرية طبعا الار بي ام ما زدتش عن 2.5 والسرعة متنوعة من 60 لحد 100 اقصى حاجة :
1/ العربية ما شاء الله تحس بتقلها على الارض خصوصا لو عدى جنبك مقطورة او اتوبيس كبير مش باحس بانضغاط الهوا عكس عربيات كتير ركبتها قبل كده ده من ناحية الثبات واللى لسه بردوا مجربتوش على سرعة عالية بس من اللي شفته على الصحراوي من الناس اللى راكباها وبتهف من جنبي ومش باشوفهم بعد كده اكيد الثبات تمام .
2/ العزل انا بجد شايف ان العزل بتاع العربية كويس مش وحش صحيح مش 100% بس ممكن نديله 85% لما باقفل الزجاج بالاقي الدنيا هادية ومعزول وصوت الموتور مش داخل جوة " طبعا كل دوة السرعة مش زادت عن 100 " .
3/ بعد ال 500 كيلو قلت اجرب التكييف الحقيقة مقدرتش استحمل اكتر من 2 و 10 دقايق وفصلته .
4/ البنزين ودي مشكلة ناس كتير اتكلمت عليها انا حسبت الحسبة بتاعته كويس فى المرتين لقيت العربية بتعمل فى 30 لتر حوالي 400 كيلو يعنى بحسبة بسيطة 400/ 40 = 13.3 كيلو لكل لتر واعتقد دوة معدل معقول خصوصا فى اول الف كيلو حسب ما قريت هنا على المنتدى " ولا ايه رايكم؟ اطال الله عمركم "
5/ الاضاءة ليلا النور قوي وواضح بسم الله ما شاء الله وبيوجع عين اللى جي قدامك .
6/ الكلاكس صوته قوي وجميل.
7/ الكاوتش البريدجستون ممتاز جدا فى المشي .
8 / عفشة العربية بصراحة جميلة صحيح مخدتش مطب جامد غير واحد فى المحور وانا رايح على الشمال
ومحستش بيه رغم انه مطب غلس بس "العفشة حلوة مفيش كلام "على راي محمود عبد العزيز .
9 / صوت الموتور وانت جنب العربية برة ومدور ممكن متسمعوش ناعم وهادي لو قفلت الزجاج وفى حتة هادية ومدور ممكن تسمعه بسيط وده يكون عشان الكاتينة مثلا جنزير .
10/ الكراسي بصراحة مش مريحة خالص ظهري بيوجعنى وانا قاعد وعاوزة تعلى شوية .
11/ التابلوه جميل وشيك والزراير فى متناولك جدا بس يعيبه اولا ان الكاسيت فوق وادرج تحت والتكييف بينهم والمفروض كان العكس عشان اللي عاوز يركب كاسيت عريض . ثانيا :- زرار الانتظار تحس انه ملزوق عليه استيكر شكله مش قوي .ثالثا مفيش لمبة قراءة فوق السائق . رابعا ازرار الزجاج والدراعات مش بتنور بالليل يعنى كان شكلها هيكون اجمل كتير .
12/ طبعا عيب قوي لما تشترى عربية زي دي ومفيهاش سماعات كاسيت فى الرف الخلفى ومش شايف سبب وجيه لكده بصراحة .
13/ درج التابلوه من غير لمبة ودي موجودة فى عربيات كتير اقل .
14/ مؤشر الحرارة الشرط اللى فيه مش باينة ومش منورة بالليل اللى باين اول واخر شرطة المفروض الشرط اللي فى النص كمان تبقى باينة .
16 /الفتيس الاتوماتيك نقلاته سهلة وسلسة وناعم وتجميع االعربية جميل وتحس انها عاوزة تنطلق بس انت مكتفها .
17/ فيه مكان فى الاكصدام الخلفى محفور وجاهز لتركيب السنسور بارك .

طبعا دي الملاحظات اللى انا شفتها لحد دلوقتى وعاى قد ما عرفت اوصلها لكن العربية بشكل عام جميلة وكمميزات وامكانيات قصاد السعر اعتقد صفقة معقولة خصوصا بعد ارتفاع الاسعار الجنوني وكقيادة العربية ممتازة .

ومرة تانية شكرا صقور نيسان