الموضوع: تقريري ل byd f3 مانيوال 2015 بعد 1300 كيلو

المشاركة الأصلية كتبت بواسطة hossam102000

بصرف النظر عن التوكيل وعيوبه ومشاكله لكن هقول مميزات وعيوب العربية

وهبدأ بالعيوب
1- الموتور صوته خشن او بمعنى ادق فيه حشرجة مقصدش صوته عالي إنما أقصد إنه في صوت خشونة وإحتكاك محشرج وده لا يليق بعربية زيرو كمان عزمه بيقل مع التكييف والمفروض إني ما أحسش بكده في عربية زيرو إلا بعد فترة
2-العدادات غير حساسة بالمرة وبتترعش واضح إن كبلاتها ضعيفة او ملمسة وده ما يصحش يكون موجود في عربية زيرو
3-دهان العربية خشن جدا وغير املس وجرب مشي إيدك عليه وده بيخلي العربية تتوسخ بسرعة ولونها يطفي علشان السطح خشن
4-العربية غير ثابتة في المنحنيات على السرعة العالية نسبيا أو في المناورات
5- أداء الفرامل سيء جدا بالنسبة لعربية بيقولوا إنها فيها abs و ebd وده مقارنة بعربيات تانية إنما لو قورنت بعربية بيجو 504 ولا شاهين تبقى فرامل مية مية
6-العربية خفيفة بداية من وصول السرعة ل100
7- الحزام حرافه ناشفة جدا ممكن يعلم عليك لو لبسته فترة طويلة وخامات الصالون رديئة
8-الأبواب لازم تترزع علشان تقفل كويس وصوت طلوع ونزول الإزاز خشن بردو
9- العفشة رغم إنها ناعمة إلا إنها مش عجباني بسمع صوت صوصوةفي السلانسيه تخبيط حاجة خفيفة لو طريق مكسر ومعتقدش إنها هتصمد باداء كويس عند 10 ألاف
10- الدركسيون خفيف لكن لدرجة سيئة جدا بتلاقي إنك لو بتلف في الركنات بتوصل لآخره من غير أي إحساس ومرة واحدة دب تحس إنه هيتقطم اول ما يخلص لقته وبيخبط في حاجة شكلها حاجة ضعيفة كإنك راكب عربية في ملاهي
11- التوكيل ما بيعرفوش يعالجوا حاجة زي معظم التوكيلات في مصر


المميزات:
1- التكييف كويس
2- القعدة مريحة لكن مش أوي
3-التحكم في أبعاد العربية سهل
4- عالية طوال ما أنت مش مركب إنما لو ركبت أوزان بتنزل تحت ودي التاكسي بيعالجوها بتعلية بحلقات أو حاجة زي كده
5-الشنطة وسع خيالي ممكن تنزل تلعب فيها كورة

اولا ربنا يباركلك فيها ويديك خيرها ويكفيك شرها.
ثانيا بعض العيوب اللي عند حضرتك ممكن تكون فردية ويمكن محاوله اصلاحها خلال الصيانة ولي بعض التعقيبات بما ان العربية دي مع اخويا وحشارك بأرائي للافادة العامة.

١- الموتور فبداية فترة التليين صوتة مرتفع نسبيا ولكن بعد اول فترة صيانة وتغيير الزيوت صوته اختلف تماما ودا طبعا لان تغيير الزيت الملئ بفتتات الاحتكاك بيفرق كتيير وبالنسبة للقوة والسحب بسم الله ماشاء الله حدث ولا حرج بس يعيب تصميم الموتور ان قوة وعزم الموتور عند عدد لفات عالي يعني لازم تغيير علي اربي ام مرتفع .
٢- العدادات سهلة وواضحة ومافيهاش كلاكيع وممكن حضرتك فالصيانة تغليهم يأكدوا علي الجاكات والوصلات والسوكيت بتاعتهم.
٣- اتفق معاك ان الدهان مش حلو بس مش سيئ للدرجة دي وكان لازم حضرتك وانت بتستلم تشوف الكلام ده لانه ممكن يكون عيب فردي.
٤-اختلف مع حضرتك في موضوع الثبات العربية بامانة راسية جدا واستابيلتي رائعة وكنت راكب مع اخويا وكان بياخد ملفات علي ١١٠ و١٢٠ ولا حاسين بحاجة وبالنسبة للقرص والجري لحد ١٥٠ كانت العربية راسية ولا بتعوم ولا اي حاجة.اخويا اول مستلم العربية ومروح العربية كانت مرجيحة وبتعوم وكان مهموم جدا تناني يوم نزل ظبط ضغط الكاوتش اللي كانت كل فردة بضغط لوحدها وخلاهم كلهم علي ٢٨ العربية اتحولت من مرجيحة لدبابة راسية ومتزنة.راجع ضغط الكاوتش خليه علي ٢٨.
٥- اداء الفرامل مقبول وان كان يحتاج الي تظبيط ودا راجع الي نوع التيل السيئ.
٦-انا شايف العربية راسية ومتزنة زي ماقولت فالنقطة اللي فاتت.
٧- فالصيانة خليهم يبصوا علي بكرة الحزام لانها محتاجة تترجليش او تتغير. بالنسبة لموضوع الخامات انا شايفها احسن من غيرها كتير بص كدة علي اللانوس والفيرنا وحاتشوف الفرق الشاسع فالخامات والنضافة.
٨- الابواب تقيلة ولكن لا تحتاج للرزع زي الايمجراند بالعكس باقل دفع بتقفل.فصيانة الالف خليهم يظبطوها.
٩-العفشة جيدة جدا ولا هي ناشفة قوي ولا ناعمة قوي فتديك احساس بالراحة والثبات في نفس الوقت.
١٠-الدريكسيون انا شايفة تقييل عن عربيات تانية واخويا حاسس ان العربية مافيهاش باور لانة قعد فترة طويلة راكب بريليانس v5 وطبعا باور كهربا زي المستيكة مش هيدروليك فحاسس بفرق كبير .
١١- اتفق معاك جدا فموضوع التوكيل المنيل بنيلة.

مع احترامى انما ولا كلمة صح من اللى بتقولها عندى وكمان ناس تانية معايا عرضت عليهم كلامك وبقوا مستغربيين اتأكد من عربية خضرتك كويس لان المشكلة شكلها عندك انت بس

كل عربية وارد بيبقى فيها مشاكل وحضرتك تحكم على العربية بعد صيانة الالف ولو متظبطتش روحل للتوكيل تانى واقرفهم لحد ما تتظبط .
بس للامانه هى مش وحشه للدرجة اللى انت وصفتها بيها دى .