لوجة الله تعالي نصيحة عشان غلبت

**aboelshoog** · 17-05-2016 12:49 AM

يا جماعة الله يكرمكم مع ارتفاع سعر العربيات الغريب اللي احنا فية دة انا عايز اجيب حاجة في رنج من 150 ال 175 وبصراحة مستخسر ادفع المبلغ دة في كوري والاذى منة ،
اية رايكم المبلغ دة يجيب مرسيدس محترمة مش تبهدلني عن الميكانيكية كل يوم والتاني ؟ واشتغالات مصاريف مستعمل وبهدلة ومرمطة في الحر دة ؟
ولا اجيب حاجة كورى كسر زيرو واستعوض ربنا قي الفلوس واقول دة بقي حال البلد وحال الجنية المصري اللي بقي بدون قيمة ؟

**adel1212** · 17-05-2016 01:14 AM

يا ابو الشوق لكل مقام مقال
انت بتقارن غلط مميزات ضد عيوب
لو قارنت مميزات و عيوب ضد مميزات و عيوب تتحل اغلب المشكلة
المرسيدس مدرسة لواحده عالم تاني بتظلمه لما تقارن بالكوري
الكوري الحصان الرابح في السنوات الاخيرة يعني مش بترمي فلوسك
وممكن اختيار وسط شارك-فلوانس-توليدو-كورولا ممكن كسر زيرو
حاول تحدد طلباتك و هتلاقي الدنيا اسهل
وفقك الله لحسن الاختيار

**aboelshoog** · 17-05-2016 01:45 AM

ما هوا انا اللي مجنني انة حصان رابح ادام احصنة الماني واوروبي !!.
لية بقي ؟!! وهل عشان احافظ علي فلوسي مش ادامي غير الكورى ؟
وبردة عشان مش اتبهدل واتمرمط واقضيها كل جمعة في مركز خدمة شكل مافيش ادامي غير الكورى ؟
فعلا الكورى اريح كدة يعني ولا اية ؟

**aboelshoog** · 17-05-2016 01:54 AM

و

**moumen_hs** · 17-05-2016 01:44 PM

المبلغ دة تدفعة فى أسكودا a5 أو فنتازيا وعداد يكون قليل معداش 60 أفضل أختيار المهم تكشف عليها كويس

**adel1212** · 17-05-2016 02:18 PM

سلامتك من الجنون
من 6 سنوات تقريبا كنت زيك و اكتر كان مستحيل افكر في الكوري و استغرب جدا من اللي يدفع فلوس في عربية كوري
كنت بغير ساعتها و ناوي على لانسر الحصان الرابح فى تلك الفترة(كان معايا نيسان 2009)
حصلت مشاكل الرواس مع الشركة الام و سحبوا التوكيل منه و الدنيا كانت ضبابية اقترح عليا احد الاصدقاء اشتري هيونداي نيو اكسنت او الالنترا hd كان ردي قاطع كلا البتة
المهم بعد مجادلات كتير قررت اشتري الالنترا بنظرية اقتصادية بحتة (علشان سعر اعادة البيع) لغاية ما اشوف السوق ماشي ازاي
يوم بعد يوم بدأ يزداد اعجاب بالعربية و لما لا وجدت انها عربية جميلة فعلا تستحق الاقتناء
كملت معايا 4 سنوات بعد ما كنت ناوي على سنة بالكتير
4 سنوات بدون اى مصاريف مفاجئة ولا اي اعطال نهائي
4 سنوات زيت و بنزين و فلاتر فقط (حتى البطارية لم اغيرها)
4 سنوات تسارع رهيب بجد (مافيش عربية 1600 وقفت معاها و بفارق ملحوظ)
4 سنوات اقل نسبة استهلاك وقود
4 سنوات 60000 كم الكاوتش بتاع بلدها بحالة جيده
و لما بعتها كنت ناوي علي القشقاي بس للاسف كان الشكل القديم بيخلص من السوق و مافيش حجز للشكل الجديد وعرفت انه 1200 cc و لازم بنزين 95 روحت تاني مرة بالصدفة للهيونداي بس المرة دي للجميلة IX 35 الحمد لله ماشية في سكة الالنترا
و اخيرا مش عاير اقولك انهم عربيات واو او عربيات جامدة اخر حاجة بس الانسب فى الوقت الحالي
و لسه بردوا معاك ست الكل المرسيدس بس دور على حالة كويسة و متصانة كويس علشان الصباح عليها بفلوس كتير
ولسه معاك الانواع الاخرى السابق ذكرها عربيات ممتازة ايضا
وربنا يهدك لما فيها الخير

**Mohamed Desoky** · 17-05-2016 02:51 PM

المشكله مش فى نوع العربيه المشكله فى الاسعار وقيمة الجنيه المصرى المنهاره امام اى عمله حتى الجنيه السودانى دلوقتى له قيمه عن المصرى بس على الاقل السودان بتزرع ارضها حد من الاخوه ملاحظ ان السودانيين قله فى مصر المهم نرجع لايام الكورى الاولى الاكسيل كانت فى التسعينات سعرها كام ودلوقتى الفيرنا بكام المسئله كلها اقتصاديه المبلغ اللى مع حضرتك ده لو الاقتصاد سليم يجبلك المانى مش كورى ومع احترامى للحصان الرابح كورى ده فى مصر بس لكن فى العالم كله المانى وبعده يابانى وبعده امريكى وفرنسى ده ترتيب للسيارات القويه المحترمه يعنى اركب عربيه على زوق السوق المصرى يبقى كورى طب والامان لاسرتى اللى اهم من العربيه والفلوس لوحضرتك عايز تركب عربيه محترمه وتحمينى من شر الطرق المصريه وربنا هو الحامى من الشر اركب المانى العقل بيقول كده وشكرا

**borio1704** · 17-05-2016 08:09 PM

الموضوع ده كل مرة بيتفتح وكل مرة بقول نفس الكلام

يا جماعة...

الألماني على عيني وراسي فيه كل التكنولوجيا وأعلى ثبات على الطريق وأفخم صالون .. وقول من هنا لبكرة ...

بس محدش سأل نفسه إيه السبب في كل ده؟؟؟

أنا أقوللك...

أولا... العربيات الألماني ماهياش عربيات معمولة للطبقة العادية من البني آدمين

العربيات الألماني معمولة لناس معاها فلوس كتييييييير

حد لاحظ إن ماركات العربيات الألمانية كلهم على بعضهم 6 ماركات:

مرسيدس - بي إم دبليو - أودي - بورشه - فولزفاجن - أوبل

أول 4 ماركات دول معمولين للناس الأغنياء بجد ... والغني مش هيرضى بعربية فيها حاجة ناقصة... أمال هو بيدفع كتير ليه؟؟؟

آخر ماركتين دول عربيات عادية .. طبعا ده من وجهة النظر الألمانية اللي مستوى الدخل فيها عالي أصلا.

طيب.. المشكلة الأساسية هنا .. إن ما دام مستوى الدخل عالي بالطريقة دي... يبقى مؤكد كمان إن مصاريف العربيات دي هتكون عالية ..

طيب ليه لازم؟؟؟

علشان اللي صمم العربية حط في باله إنه يحط فيها آخر تكنولوجيا.. ودي سعرها غالي.. ولو باظت.. ما تعرفش تغيرها إلا عندهم وبسعر غالي جدا...

ده غير أسلوب تفكير الألمان في الصيانة اللي بيعتمد على تغيير مجموعات ميكانيكية كاملة بدل تغيير الجزء التالف بس.. قال يعني كده بيضمن أداء أفضل للعربية!!!!!!!!!!!!!!

يا راجل ده حتى كتالوج العربية ماهواش سهل يتفهم.. لإنهم معتبرين إن اللي شاري العربية عنده حد أدنى من التعليم!!!!

أما بالنسبة لثبات العربيات الألماني على الطريق... فده له سبب وجيه....

المسألة مش إن الألمان بيحبوا يعملوا عربيات بثبات عالي... المشكلة إن ألمانيا هي البلد الوحيدة في العالم اللي فيها شبكة طرق سرعتها مفتوحة بدون حد أقصى للسرعة....

تفتكر أي واحد بيفكر يبيع عربيته في ألمانيا يجرؤ إنه ينزل عربية ثباتها ضعيف؟؟؟؟؟

من الآخر... الألماني حلو وجميل... بس تقدر على مصاريفه؟؟؟؟؟؟؟؟؟؟؟؟؟؟؟؟؟؟ ؟؟؟؟؟

نفس الكلام اللي فوق ده بينطبق على كل السيارات المترفة في العالم... جاجوار... لكزس... كاديلاك.. بنتلي.. رولزرويس... وغيرهم كتير.

يعني ما ينفعش نقارن عربيات مترفة مع عربيات عادية... الكلام ده فيه إهانة للعربيات المترفة.. وظلم للعربيات العادية

نيجي بقى للعربيات العادية....

فيه ناس كتير بتشتري العربيات علشان بتبقى ماسكة سعر .. اللي بيسموه سعر إعادة البيع.

تعالى نفهم ليه العربيات بتمسك سعر؟؟؟

باختصار.. العربيات بتمسك سعر علشان بتبقى مرغوبة...

ليه بتبقى مرغوبة؟؟؟ حط نفسك مطرح اللي بيشتري عربية مستعملة وانت تعرف...

لو بتشتري عربية مستعملة.. بتبقى مش عايز من وراها مشاكل... والعربيات اللي ماسكة سعر بتبقى مشاكلها أقل..

إزاي؟؟؟

يعني عربيات أعطالها قليلة...

يعني مش هتعب علشان ألاقي لها قطع غيار..

يعني صيانتها سهلة ومعظم الميكانيكية بيفهموا فيها...

يعني سواقتها سهلة ومريحة....

يعني مش مكلفة في تشغيلها أو صيانتها...

حد جاب سيرة أداء عالي؟؟؟ لأ

حد جاب سيرة ثبات على الطريق؟؟؟ لأ

حد جاب سيرة فخامة وأوبشنز؟؟؟؟ لأ

العربيات اليابانية والكورية بتحقق كل اللي فوق ده وزيادة... علشان كده بتمسك سعر وتنتشر في السوق...

مش في مصر بس... في العالم كله.

...

**Mohamed Desoky** · 18-05-2016 12:59 AM

مع احترامى ياهندسه لكلامك بس الالمانى مش فخامه وبس الالمانى قوه حضرتك شوفت اختبارات السلامه الاوربيه الالمانى بيحقق اعلى نتيجه بلامنازع والختبارات دى لقوة التصادم مش للفخامه والالمانى مش للاغنياء فى العالم الموضوع هنا فى مصر بس قطع غيار غاليه لكن معمره جدا يعنى الكورى ده ممكن تغير الحاجه 3 مرات والقطعه الالمانى مستمره ولما نقارن بين المرسيدس موديل 60 موجوده وشغاله وبكل قوة ديزل وبنزين وموجوده فى سيناء زى النمل ونقول اكسيل كورى مش هندى زى دلوقتى اى حد يعمل المقارنه دى تمساحه مو60 او 70 واكسيل 90 شوفها فى الشارع البيتلز الخنفسه مو55 موجوده وحتى فى ناس بتعدلها لتناسب الساحل والبحر والاسم الكبير جولف بكل تاريخها الفولكس عربية الشعب الالمانى الاولى والكيا سبورتاج وصل سعرها 400 الف زى الباسات الالمانى يبقى انهى الافضل موضوع عربيه ليها سوق ده بيحدده تجار السوق كل مؤهلاتهم يجيد القراه والكتابه وشوية فهلوه على نصب بقى تاجر سيارات هما دول اللى بيخلى الفيرنا الورق تتباع اغلى من الاودى الالمانى والشفر الامريكى كل ده علشان قطع الغيار متوفره ورخيصه بس على انها غير معمره كل شهر يغير واسئل التاكسى الابيض عن الفيرنا مثلا وشوف اقل خبطه فى الكورى العربيه بتتعوج والشاسيه بيروح فى داهيه الكورى مش مميز وله له انتشار فى العالم زى التويوتا او الالمانى او الامريكى ممكن حضرتك تقولى انهى عربيه كورى نجحت فى اختبارت التصادم الاوربيه الكورى سابق الصينى بخطوه واحده لكن بين العمالقه هو قزم ضعيف

-

الموضوع: لوجة الله تعالي نصيحة عشان غلبت

LinkBack

أدوات الموضوع

عرض

-

-

-

المواضيع المتشابهه

عاوز نصيحة لوجة الله

نصيحة لوجة الله

عاوز نصيحة لوجة الله

نصيحة لوجة الله

ممكن نصيحة لوجة الله

الكلمات الدلالية لهذا الموضوع

المفضلات

المفضلات

ضوابط المشاركة